Lenaneo le Lecha la Kopano ea Potoloho

Matsatsing ana a ho qetela a lefatše la khale le senyehileng, ke habohlokoa hore re sireletse liaparo tsa rōna tsa moea le seo re leng sona re le Bakreste. (Tšen. 16:15) Ka lebaka leo, ho loketse hore ebe sehlooho sa lenaneo la kopano ea potoloho ea selemo sa tšebeletso sa 2006 se re “Le Ikapese Botho bo Bocha.”—Bakol. 3:10.

Letsatsi la Pele: Neheletsano ea pele, ea sehlooho se reng “Ho Bonahatsa Litšobotsi Tsa Botho bo Bocha,” e tla totobatsa kamoo ho hlaolela botho bo bocha ho re ruisang molemo kateng likarolong tsohle tsa bophelo ba rōna. Re ka hlaolela botho bo bocha joang? Taba eo e tla tšohloa lipuong tse peli tsa ho qetela tsa letsatsi la pele, e reng “Ikitlaetse ka Matla ho Thuisa ka ho Loketseng” le e reng “Thuto e Bōpang Botho bo Bocha.”

Letsatsi la Bobeli: Neheletsanong ea bobeli, e nang le sehlooho se reng “Ho Hlaolela ho ba le Leleme la ba Bohlale,” ho tla tšohloa kamoo botho bo bocha bo re susumelletsang ho sebelisa maleme a rōna kateng. Sehlooho sa puo ea phatlalatsa se re, “Na U Hlōla ea Khopo?” ’me se tla totobatsa hore ho hlokahala re lule re falimehetse maqiti a Satane. Lipuo tse peli tsa ho qetela tsa kopano, e reng “Ipoloke U se na Letheba Lefatšeng” le e reng “Ho Nchafatsa Motho eo re Leng Eena ka Hare Letsatsi le Letsatsi,” li tla re thusa ho qoba maikutlo le boitšoaro bo khahlanong le litsela tse lokileng tsa Molimo le ho ema re tiile borapeling ba rōna ho Jehova.

Re lebeletse ka tjantjello e khōlō hakaakang ho fumana khothatso ee ea hore re apare botho bo bocha ’me re bo sireletse!