BACHA BAA BOTSA
Nka Ntlafatsa Tsela eo ke Qoqang ka Eona Joang?
Seo re tl’o ithuta sona sehloohong sena
Ke hobane’ng ha ke lokela ho bua le batho re shebane mahlong?
Batho ba bang ba re ba ka mpa ba bua le batho ka ho ba ngolla melaetsa ho e-na le ho bua le bona ba ba shebile mahlong. Ba re ho bua le motho u mo shebile ka mahlong ho thata.
“U ba tlas’a khatello ha u bua le motho lifahleho li talimane hobane le ha u ka bua ntho e mpe, o se a e utloile.”—Anna.
“Ha u ngolla motho molaetsa, u mo ngolla ntho eo u e nahanneng hantle ebile u tiisehile ka eona. Empa ha u bua le eena u mo shebile ka mahlong, ha u ka bua ntho e fosahetseng, ha u na monyetla oa ho e lokisa joalokaha u mo ngolla molaetsa. Ha ke bua le motho re shebane ka mahlong, ke lula ke tšoenyehile ka hore ke se ke ka mpa ka bua ntho e fosahetseng!”—Jean.
Ho na le nako eo u tla lokela hore u bue le batho u ba shebile ka mahlong. Ka mohlala, u tl’o lokela hore u bue le batho u ba shebile ka mahlong ha u batla mosebetsi, ha u batla ho etsa metsoalle le nakong eo u seng u batla motho.
Se thabisang ke hore ha ho hlokahale hore u tšohe ha u bua le batho u ba shebile ka mahlong. U ka khona le hoja u le lihlong.
“Ka linako tse ling, u tla bua ntho e soabisang ebe u hlajoa ke lihlong empa ha se ntho eo u lokelang hore u itšoenye haholo ka eona eo.”—Neal.
Nka qala moqoqo joang?
Botsa lipotso. Nahana ka ntho eo u ka buang ka eona le batho e thahasellisang ebe u e etsa moqoqo. Ka mohlala:
“Na ho na le moo u ileng oa chakela ha likolo li koetsoe?”
“Na u kile oa e bona websaete ee?”
“Na ebe u utloile . . . ?”
U ka khetha ho bua ka ntho eo le tšoanang ka eona. Ka mohlala, haeba ke motho eo u kenang sekolo le eena kapa eo u sebetsang le eena, u ka mo botsa ka lintho tse amanang le mosebetsi kapa sekolo.
“Nahana ka lipotso tsa lintho tseo u li thahasellang le tseo u ka ratang ho utloa hore na batho ba bang ba li nahana joang.”—Maritza.
Hlokomela: U se ke oa botsa batho lipotso tse ngata haholo, tse tla etsa hore ba ikutloe ba sa phutholoha kapa tse tla ba soabisa. Lipotso tse kang “U nonne hakaakang?” kapa “Na ho na le mohla u sa kuleng?” li ka soabisa batho ba bang hape tsa etsa hore ba ikutloe eka oa ba nyatsa.
Ntho e ’ngoe e ka u thusang ke hore u bolelle motho maikutlo a hao tabeng eo le ntseng le bua ka eona pele kapa ka mor’a hore a arabe. Ka mantsoe a mang e lokela ho ba moqoqo, e se ke ea ka u mo hloma lipotso.
Na u botsa batho lipotso tse ngata haholo tse etsang hore ba ikutloe ba sa phutholoha?
Molao-motheo oa Bibele: “Merero e ka pelong ea motho e joaloka metsi a tebileng empa motho ea nang le temoho oa e kha.”—Liproverbia 20:5.
Mamela batho ba bang. E le hore u khone ho qoqa le batho ba bang, u hloka ho ba mamela ho e-na le hore u bue haholo.
“Nako e ’ngoe le e ’ngoe ha ke qoqa le motho, ke ithuta ntho e itseng ka eena e le hore re ka bua ka eona nakong e tlang.”—Tamara.
Hlokomela: U se ke oa tšoenyeha ka hore na u tla re’ng. U tla khona ho mo araba haeba u mo mametse ka hloko.
Molao-motheo oa Bibele: “Motho e mong le e mong a potlakele ho utloa, a liehe ho bua.”—Jakobo 1:19.
Bontša batho ba bang hore u ba tsotella e le kannete. U tla natefeloa ke ho qoqa le motho haeba u mo tsotella.
“Le tla qoqa hamonate haeba motho eo u buang le eena a bona hore u mo tsotella e le kannete, le haeba le ka ’na la felloa kae-kae.”—Marie.
Hlokomela: U se ke oa botsa litaba tse sa u ameng. U se ke oa re “U apere jase e ntle hakaakang. U e rekile ka bokae?”
Molao-motheo oa Bibele: “Le se ke la ameha feela ka lintho tse le tsoelang molemo empa le amehe le ka lintho tse tla tsoela batho ba bang molemo.”—Bafilipi 2:4.
U ka qetela moqoqo joang? Mocha e mong ea bitsoang Jordan, ha a fana ka tlhahiso, o re: “Ha u qoqa le motho, etsa bonnete ba hore u qetella moqoqo hamonate. E le hore le be le moqoqo nakong e tlang, u ka ’na oa bua lintho tse kang, ‘Ho bile monate ho qoqa le uena’ kapa ‘Thabela letsatsi la hao.’”