BACHA BAA BOTSA
Ho Ratana—Karolo ea 3: Na re Lokela ho Tlohela ho Ratana?
E se e le nako joale le ratana empa u se u qala ho ba le lipelaelo. Na le lokela ho tsoela pele le ratana kapa le lokela ho arohana? Sehlooho sena se ka u thusa hore u etse qeto e nepahetseng.
Seo re tl’o ithuta sona sehloohong sena
Ho sebetsana le lipelaelo
Ka mor’a ho ratana ka nakoana, mohlankana le moroetsana ba ka ’na ba hlokomela hore ha ba tšoane joalokaha ba ne ba nahana. Ka mohlala:
E mong o rata ho ea maoatleng ha e mong eena a rata ho hloa lithaba.
E mong ke motho oa batho ha e mong eena a thabela ho ba mong.
E mong boholo ba nako ha a tšepahale ha e mong eena a lula a tšepahala.
Hlokomela hore maemo ana kaofela a fapane. Boemo ba pele bo akaretsa lithahasello tse fapaneng, boemo ba bobeli bo akaretsa mekhoa e fapaneng, ha boemo ba boraro bona bo akaretsa ho se nke melao ea Bibele ea boitšoaro ka tsela e tšoanang.
Seo u ka nahanang ka sona: Har’a maemo aa a mararo, ke boemo bofe boo u bonang eka ho ka ba thata ho bo mamella ha le ne le ka nyalana? Hona ke bofe boo le neng le ka tenyetseha ho bona?
Monna le mosali ba ntse ba ka thaba lenyalong leha ba e-na le lithahasello kapa mekhoa e fapaneng. Ho bua ’nete feela, hore le tšoanelehe ho nyalana ha ho bolele hore le lokela ho tšoana ka lintho tsohle. Maemong a mang, monna le mosali ba ka thabela lintho tseo e mong a li thabelang le ho rua molemo tseleng eo e mong a etsang lintho ka eona.a
Ka lehlakoreng le leng, ke habohlokoa hore motho eo u tla nyalana le eena a nke melao ea Bibele ea boitšoaro ka ho teba joaloka uena. Haeba a sa etse joalo, seo ke letšoao la hore le lokela ho arohana.
Ka mohlala, nahana haeba le le bolumeling bo fapaneng. Buka ea Fighting for Your Marriage e re: “Lipatlisiso li bontša hore hangata ha monna le mosali ba le bolumeling bo fapaneng ba qetella ba hlalane.”
Molao-motheo oa Bibele: ‘Le se ke la kena jokong le batho bao e seng balumeli. Ha se ntho e ka etsahalang kapa leseli le lefifi li kopana hokae?’—2 Bakorinthe 6:14.
Ho etsa qeto e nepahetseng
Bibele e re batho ba kenang lenyalong “ba tla ba le mathata a mangata.” (1 Bakorinthe 7:28) Ka hona u se ke oa makala haeba le e-na le mathata hona joale leferehong la lona.
U se ke oa nahana hore liqabang tse nyenyane tseo le bang le tsona li bolela hore le lokela ho arohana. Taba ea bohlokoa ke hore na le tla khona ho li rarolla. Le tla lokela ho ba le bokhoni ba ho rarolla liqabang ha le se le nyalane.
Molao-motheo oa Bibele: “Le bontšane mosa, le be le qenehelo le be le tšoarelane ka bolokolohi.”—Baefese 4:32.
Ka lehlakoreng le leng, haeba le lula le e-ba le liqabang tse kholo sena se ka bontša hore ehlile ha le tšoanelane. Haeba ho joalo, ho ka ba molemo hore le bone pele le nyalana hore na lea tšoanelana kapa che.
Haeba le lula le e-ba le liqabang tse kholo sena se ka bontša hore ehlile ha le tšoanelane
Ntlha ea bohlokoa: Haeba u e-na le lipelaelo ka motho eo u ratanang le eena kapa u sa kholiseha hore na u se u loketse ho kena lenyalong, u se ke oa iphapanyetsa taba eo.
Molao-motheo oa Bibele: “ Ea bohlale o bona kotsi ebe oa ipata empa ba se nang kelello ha ba ipate ebe ba fumana litholoana tse bosula.”—Liproverbia 22:3.
Haeba u etsa qeto ea hore le arohane
Ho arohana le motho eo u ratanang le eena ho ka ’na ha u utloisa bohloko. Leha ho le joalo, haeba e mong oa lona kapa le le babeli le lula le e-na le lipelaelo ka lefereho la lona, ho ka ba molemo hore le arohane.
Le ka etsa’ng haeba le nka qeto ea ho arohana? Ntle le haeba ho e-na le lebaka le utloahalang, ho ka ba molemo hore le se ke la arohana ka ho romela melaetsa kapa le letsetsana. Ho e-na le hoo, khethang nako le sebaka se nepahetseng hore le buisane ka taba ena.
Molao-motheo oa Bibele: “Le bolellane ’nete.”—Zakaria 8:16.
Na ho arohana le motho eo u ratanang le eena ho bolela hore u ke ke oa hlola u fumana motho e mong? Ha ho joalo. Hopola hore lefereho ke lona le u thusang ho bona hore na u ka nyalana le motho eo u ratanang le eena kapa che. Ka hona le haeba lefereho la lona le ka fela, u ntse u ka ithuta lintho tsa bohlokoa ho se etsahetseng.
Ipotse: ‘Ke ne ke le motho ea joang ha ke ntse ke le leferehong leo? Na ho na le lintho tseo ke lokelang ho ntlafatsa ho tsona pele nka kena lenyalong? Nka etsa lintho ha molemo joang haeba ke etsa qeto ea ho ratana hape?’
a Ho ithuta ka ho eketsehileng ka hore na ho se utloisisane ho ama monna le mosali joang, bala sehlooho se re’ng: “Se ka Thusang Lelapa—Ho Sebetsana le ho se Tšoane” le se re’ng: “Se ka Thusang Lelapa—U ka Etsa’ng Hore u Tlohele Bohale?”