Litšupiso Tsa Bukana ea Seboka sa Bophelo le Tšebeletso
© 2024 Watch Tower Bible and Tract Society of Pennsylvania
LA 3-9 MARCH
MATLOTLO A TSOANG BIBELENG LIPROVERBIA 3
Bontša Hore u Tšepa Jehova
ijwbv sehlooho 14 ¶4-5
Liproverbia 3:5, 6—“U se ke oa Itšetleha ka Kutloisiso ea Hao”
“Tšepa Jehova ka pelo eohle ea hao.” Re bontša hore re tšepa Molimo ha re etsa lintho ka tsela eo a e batlang. Re lokela ho tšepa Molimo ka lipelo tsa rona kaofela. Ha Bibele e bua ka pelo, e bua ka motho eo re leng eena ka hare. Motho eo ea ka hare o akarelletsa maikutlo, lintho tse re susumetsang, monahano oa rona le tsela eo re itšoarang ka eona. Kahoo, ho tšepa Molimo ka lipelo tsohle tsa rona ha ho akarelletse tsela eo re ikutloang ka eona feela empa ke khetho eo re e etsang hobane re kholisehile hore ’Mopi oa rona o tseba se molemo bakeng sa rona.—Baroma 12:1
“U se ke oa itšetleha ka kutloisiso ea hao.” Kaha ha rea phethahala, re ke ke ra tšepa tsela eo re nahanang ka eona, ke kahoo re lokelang ho tšepa Molimo. Haeba re etsa liqeto re itšetlehile ka kamoo re ikutloang kateng, re ka etsa liqeto tse bonahalang eka li nepahetse qalong empa ha nako e ntse e-ea tsa e-ba le litholoana tse bohloko. (Liproverbia 14:12; Jeremia 17:9) Molimo o bohlale haholo ho re feta. (Esaia 55:8, 9) Haeba re tataisoa ke eena bophelong ba rona, re tla atleha.—Pesaleme ea 1:1-3; Liproverbia 2:6-9; 16:20.
ijwbv sehlooho 14 ¶6-7
Liproverbia 3:5, 6—“U se ke oa Itšetleha ka Kutloisiso ea Hao”
“U mo kenye mererong eohle ea hao.” Pele re etsa qeto leha e le efe ea bohlokoa bophelong, re lokela ho nahana ka hore na Molimo o ikutloa joang ka taba eo. Re etsa joalo ka ho mo rapela, re mo kopa hore a re tataise le ho etsa lintho tseo re ithutang tsona ka Lentsoeng la hae e leng Bibele.—Pesaleme ea 25:4; 2 Timothea 3:16, 17.
“O tla otlolla litsela tsa hao.” Molimo o otlolla litsela tsa rona ka hore a re thuse hore re phele ka melao ea hae e lokileng. (Liproverbia 11:5) Kahoo, re qoba mathata ebile re phela bophelo bo thabisang haholo.—Pesaleme ea 19:7, 8; Esaia 48:17, 18.
Hatela Pele Mohato ka Mohato—Tsoela Pele
Ha motho a se a ile a feta maemong a sa tšoaneng bophelong, a ka ’na a lekeha hore a re: ‘Nkile ka feta boemong bo kang bona. Ke tseba seo ke lokelang ho se etsa.’ Na ee e ka ba tsela e bohlale? Liproverbia 3:7 ea lemosa: “U se ke ua ipona bohlale.” Ka sebele phihlelo e lokela ho atolosa pono ea rona ka lintho tseo re lokelang ho li nahana ha re sebetsana le maemo a itseng bophelong. Empa ha re ntse re tsoela pele moeeng, phihlelo ea rona e boetse e lokela ho hatisa ka likelellong le lipelong tsa rona hore re hloka tlhohonolofatso ea Jehova hore re atlehe. Kahoo ho tsoela pele ha rona ho bonahala ka ho ikemisetsa ha rona ho retelehela ho Jehova hore a re tataise bophelong ba rona, eseng ka ho thulana ha rona le maemo ka ho itšepa ka kholiseho. Ho bonahala ka ho kholiseha ha rona hore ha ho letho le ka etsahalang a sa le lumella le ka ho ba le kamano e tšepahalang le e mofuthu le Ntat’a rona oa leholimo.
Matlotlo a Patiloeng
Lintlha-kholo Tsa Buka ea Liproverbia
3:3. Re lokela ho nka mosa o lerato le ’nete e le lintho tsa bohlokoa haholo ’me re li pepese joalokaha re ne re tla pepesa sefaha se theko e boima. Hape, re lokela ho ngola litšobotsi tsena lipelong tsa rona, ’me re li etse karolo ea rona ea bohlokoa.
LA 10-16 MARCH
MATLOTLO A TSOANG BIBELENG LIPROVERBIA 4
“U Sireletse Pelo ea Hao”
U Sireletse Pelo ea Hao
4 Ho Liproverbia 4:23 “pelo” e emela “botho bo ka sephiring” kapa sebopeho sa motho. (Bala Pesaleme ea 51:6.) E akarelletsa lintho tseo u li nahanang, tsela eo u ikutloang ka eona, sepheo sa hao le lintho tseo u li ratang.
U Sireletse Pelo ea Hao
10 E le hore re itšireletse, re lokela ho tseba maqiti a Satane re be re tlohe sebakeng se kotsi nako e sa le teng. Ho ‘sireletsa’ ho hlahang ho Liproverbia 4:23 ho ka bapisoa le mosebetsi o neng o etsoa ke balebeli. Mehleng ea Morena Solomone, balebeli ba ne ba lula qhooeng e le hore ha ba lireng ba ba hlasela ba ka lemosa sechaba. Mosebetsi ona oa bona o re thusa ho utloisisa hore na re lokela ho etsa’ng e le hore Satane a se ke a re sitisa ho sebeletsa Molimo.
11 Mehleng eo, balebeli ba ne ba ema lerakong le keiting. (2 Sam. 18:24-26) Ba ne ba etsa bonnete ba hore keiti ea koaloa hang feela ha sera se atamela. (Neh. 7:1-3) Ka tsela e tšoanang ha re ithuta Bibele, re tla qoba maraba a Satane a ka etsang hore re nahane le ho ikutloa ka tsela e sa khahliseng Jehova. Hang ha letsoalo la rona le re tšetšetha re lokela ho nka bohato.
U Sireletse Pelo ea Hao
14 E le hore re sireletse lipelo tsa rona, ha se hore feela re lokela ho hanela Satane empa re boetse re lokela ho fa Jehova monyetla oa hore a re thuse. Mohlala o motle e ka ba oa motse oo Morena Solomone a neng a lula ho oona. Haeba balebeli ba ne ba lula ba koetse likeiti, lira li ne li ke ke tsa kena. Le teng ba ne ba ke ke ba fumana lijo le lintho tse ling tseo ba li hlokang, kahoo batho ba ne ba tla shoa ke tlala. Ka tsela e tšoanang, le rona re lokela ho lumella Jehova hore a fetole tsela eo re nahanang ka eona, eo re itšoarang ka eona le eo re ikutloang ka eona.
“Sireletsa Pelo ea Hao!”
Ke hobane’ng ha re lokela ho sireletsa lipelo tsa rona tsa tšoantšetso? Molimo o ile a susumelletsa Morena Solomone hore a ngole tjena: “Ho feta tse ling tsohle tse lokelang ho lebeloa, u sireletse pelo ea hao, kaha mehloli ea bophelo e tsoa ho eona.” (Liproverbia 4:23) Bophelo boo re bo phelang hona joale le boo re bo lebeletseng nakong e tlang, bo itšetlehile ka boemo ba lipelo tsa rona tsa tšoantšetso. Hobane’ng? Hobane Molimo o bona se ka lipelong tsa rona. (1 Samuele 16:7) Seo re leng sona ka hare, e leng “motho ea ka sephiring oa pelo,” ke sona seo Molimo a se shebang ho rona.—1 Petrose 3:4.
Matlotlo a Patiloeng
Na U Ikemiselitse ho Letela Jehova?
4 Liproverbia 4:18 e re: “Tsela ea ba lokileng e joaloka leseli le khanyang le ntseng le khanya ka ho eketsehileng ho fihlela motšehare o moholo.” Mantsoe ana a bontša ka ho hlaka hore Jehova o thusa bahlanka ba hae hore ba utloisise morero oa hae hanyane ka hanyane. Temana ena e boetse e re thusa ho utloisisa hore na Mokreste o etsa liphetoho joang bophelong ba hae e le hore e be motsoalle oa Jehova. Ho nka nako hore motho e be motsoalle oa Jehova. Haeba re ithuta Lentsoe la Molimo ’me re mamela keletso e tsoang ho lona le e tsoang ho mokhatlo oa hae, butle-butle re tla ba le makhabane a tšoanang le a Kreste. Re tla boela re tsebe Molimo haholoanyane. Bona kamoo Jesu a ileng a bontša taba ena kateng.
LA 17-23 MARCH
MATLOTLO A TSOANG BIBELENG LIPROVERBIA 5
Qoba Boitšoaro bo Bobe bo Amanang le Thobalano
U ka Lula U Hloekile Lefatšeng la Boitšoaro bo Bobe
Maeleng ana, motho ea tsoileng tseleng o tšoantšoa le “mosali osele”—letekatse. Mantsoe ao a ekang phofu ea hae ka ’ona a monate joaloka khekhe ea linotši ’me a boreleli ho feta oli ea mohloaare. Na hangata lebonyo le isang boitšoarong bo bobe ba ho kopanela liphate ha le qale ka tsela ee? Ka mohlala, nahana ka phihlelo ea mongoli e mong ea bohehang ea lilemo li 27 ea bitsoang Amy. Oa pheta: “Monna enoa eo ke sebetsang le eena o ntlhokomela haholo ’me oa nthorisa ha monyetla o mong le o mong o hlaha. Hoa thabisa ho eloa hloko. Empa ke bona hantle hore thahasello ea hae ho ’na ke ea ho kopanela liphate feela. Ha ke na ho thetsoa ke lebonyo la hae.” Mantsoe a boikaketsi a moeki oa monna kapa oa mosali a atisa ho hohela haeba re sa lemohe sebopeho sa ’ona sa ’nete. Ho sena re lokela ho sebelisa matla a rona a ho nahana.
U ka Lula U Hloekile Lefatšeng la Boitšoaro bo Bobe
Litholoana tsa boitšoaro bo bobe li baba joaloka lengana ’me li bohale joaloka sabole e sehang ka nģa tse peli—li bohloko ebile lia bolaea. Letsoalo le sehang, boimana bo sa batloeng, kapa boloetse bo tšoaetsanoang ka ho kopanela liphate hangata ke liphello tse babang tsa boitšoaro bo joalo. Hape, nahana ka bohloko bo boholo ba maikutlo bo utluoang ke molekane oa lenyalo oa motho ea sa tšepahaleng. Ketso e le ’ngoe ea ho se tšepahale e ka baka bohloko bo tebileng hoo bo ka bang teng bophelo bohle. Ha ho pelaelo hore boitšoaro bo bobe boa lematsa.
U ka Lula U Hloekile Lefatšeng la Boitšoaro bo Bobe
Re lokela ho suthela hole haholo kamoo re ka khonang le tšusumetso ea batho ba boitšoaro bo bobe. Ke ka lebaka la’ng ha re ipepesetsa litsela tsa bona ka ho mamela ’mino oa bona o hlephisang boitšoaro, ka ho shebella boithabiso bo silafatsang boitšoaro, kapa ka ho ipepesetsa libuka tsa bootsoa? (Liproverbia 6:27; 1 Bakorinthe 15:33; Baefese 5:3-5) Hona ke bothoto bo bokaakang ho imemela [batho ba boitšoaro bo bobe] ka ho bonya le bona kapa ka ho apara le ho itlhopha ka tsela e sa itlhompheng!—1 Timothea 4:8; 1 Petrose 3:3, 4.
Matlotlo a Patiloeng
U ka Lula U Hloekile Lefatšeng la Boitšoaro bo Bobe
Ka tsela ena Solomone o hlakisa moputso o moholo oa ho inehela boitšoarong bo bobe. Bofebe le ho tloha seriti, kapa ho felloa ke boitlhompho, li tsamaea hammoho. Na hase ntho e lihlong e le kannete ho sebeletsa feela ho khotsofatsa takatso ea rona kapa ea motho e mong ea boitšoaro bo bobe? Na ha ho bontše ho hloka boitlhompho ho itlohella ho kopanela liphate le batho bao e seng balekane ba rona ba lenyalo?
LA 24-30 MARCH
MATLOTLO A TSOANG BIBELENG LIPROVERBIA 6
Re ka Ithuta’ng ho Bohloa?
it-1-E 115 ¶1-2
Bohloa
‘Bohlale ba Tlhaho.’ Bohloa bo bohlale, eseng hobane bo ithutile ho nahana empa ’Mopi o bo file bohlale ba tlhaho. Bibele e bontša hore “bo ipatlela lijo tsa bona hlabula, bo bokella lijo tsa bona ha ho kotuloa.” (Pr 6:8) Hona le mofuta o mong oa bohloa o fumanehang Palestina o tsebahalang e le bohloa ba temo kapa o bitsoang Messor semirufus , o bokella lijo tse ngata linakong tsa selemo le lehlabula ’me o sebelisa lijo tsena nakong eo ho leng thata ho fumana lijo joaloka mariha. Hangata bohloa bona bo fumaneha seotlong moo ho poleloang lijo tse kotutsoeng ka bongata. Haeba lijo tsena tseo bohloa ba temo bo li bokelletseng li ka ba mongobo ka lebaka la pula, boa li nka ebe bo li isa letsatsing e le hore li ka oma. Hape bo tsebahala ka ho tlosa pelo ea peo e le hore e se ke ea mela. Moo lihlopha tsa bohloa bona ba temo li fumanehang teng u tla bona ka litsela tse eang seholong le ka le litlhoka tsa lijo tse kotutsoeng.
Seo re Ithutang Sona ho Bohloa. Ho batlisisa ka bohloa ho re thusa ho utloisisa hore na ke hobane’ng ha ho thoe : “Uena ea botsoa, e-ea ho bohloa, u ithute ho bona ’me u hlalefe.” (Pr 6:6) Taba ea hore bohloa bo khona ho boloka lijo bakeng sa nako e tlang ha se eona feela ntho e ikhethang ka bona empa bo boetse boa phehella le ho ikemisetsa ha bo sebetsa. Hangata bo jara le ho hula lintho tse boima haholo, bo etsa ka hohle-hohle ho qeta mosebetsi oo bo o etsang ’me ha bo tele le hoja bo ka oela kapa ba thella ha bo ntse bo nyoloha moepa. Bo sebelisana ’moho ka tsela e makatsang, seholo sa bohloa bona se lula se hloekile, boa thusana ’me ka linako tse ling bo thusa bo bong haeba bo lemetse kapa bo khathetse hore bo khutlele seholong.
Sireletsa Lebitso la Hao
Joaloka bohloa, na le rona ha rea lokela ho khothala? Ho sebetsa ka thata le ho leka ho ntlafatsa mosebetsing oa rona ho molemong oa rona ebang re talimiloe kapa che. E, sekolong, moo re sebetsang, le ha re kopanela mesebetsing ea moea, re lokela ho etsa sohle seo re ka se khonang. Joalokaha bohloa bo rua molemo bokhothaling ba bona, ka tsela e tšoanang Molimo o batla hore re ‘bone se molemo bakeng sa mosebetsi oohle oa rona o thata.’ (Moeklesia 3:13, 22; 5:18, NW) Letsoalo le hloekileng le khotsofalo ea rona ke meputso ea mosebetsi o thata.—Moeklesia 5:12.
Ha a sebelisa lipotso tse peli tse sa hlokeng likarabo, Solomone o leka ho tsosa sekhoba botsoeng ba sona, ha a re: “Uena ea botsoa, u tla ’ne u robale halelele hakae? U tla tsoha neng borokong ba hao?” Ha a se etsisa ha se bua, morena enoa oa eketsa: “Ho robala hanyenyane, ho re shoa! hanyenyane, ho phutha matsoho hanyenyane hore u robale, ’me ka sebele bofutsana ba hao bo tla tla feela joaloka lesholu, le bohloki ba hao bo tle joaloka motho ea hlometseng.” (Liproverbia 6:9-11, NW) Ha ea botsoa a sa ntse a kakaletse, bofuma bo mo tsometsa ka lebelo la sekebekoa, ’me bohloki bo mo hlasela joaloka motho ea hlometseng. Masimo a sekhoba a pupetsoa ke lehola le bobatsi ka potlako. (Liproverbia 24:30, 31) Khoebo ea hae e oa kapele. Mohiri a ka mamella ea botsoa ho fihlela neng? Na seithuti se botsoa ho ithuta se ka lebella ho atleha sekolong?
Matlotlo a Patiloeng
Sireletsa Lebitso la Hao
Lihlopha tsena tse supileng tseo maele a buang ka tsona ke tsa motheo ’me li akarelletsa hoo e ka bang mefuta eohle ea liphoso. “Mahlo a iphahamisang” le “pelo e rerang merero e kotsi” ke libe tse etsoang ka ho nahana. “Leleme la bohata” le “paki ea bohata e phatlalatsang mashano” ke mantsoe a boetsalibe. “Matsoho a tšollang mali a hlokang molato” le “maoto a potlakelang ho mathela bobeng” ke liketso tsa bokhopo. Seo Jehova a se hloileng ka ho khetheha ke phepheletsane har’a batho bao ntle le moo ba ka beng ba lula hammoho ka khotso. Ho eketsoa ha palo ena ho tloha ho lintho tse tšeletseng ho ea ho tse supileng ho bontša hore lethathamo lena ha lea rereloa ho fella moo, kaha liketso tsa bokhopo tseo batho ba li etsang li ntse li eketseha.
LA 31 MARCH–LA 6 APRIL
MATLOTLO A TSOANG BIBELENG LIPROVERBIA 7
Qoba Maemo a ka Etsang Hore u Lekoe
“Boloka Litaelo Tsa ka ’me U Tsoele Pele U Phela”
Fensetere eo Solomone a hloelisang ka eona e na le lekhoakhoa—leo ho bonahalang eka ke lithupa tse fapantsoeng ’me mohlomong e le tse betliloeng le tse khabisitsoeng. Ka mor’a shoalane, literata li ba lefifi haholoanyane bosiu. O bona mohlankana e mong ea sa sireletsehang ho hang. Ka lebaka la ho hloka temoho, kapa ho se hlaphoheloe kelellong, o na le pelo e haelloang. Ho ka etsahala hore ebe o hlokomela mofuta oa sebaka seo a keneng ho sona le se ka mo etsahallang moo. Mohlankana enoa o atamela ‘sekhutlong sa mosali eo,’ se tseleng e eang ntlong ea hae. Mosali eo ke mang? Mosebetsi oa hae ke ofe?
“Boloka Litaelo Tsa ka ’me U Tsoele Pele U Phela”
Melomo ea mosali enoa e boreleli. Ka sebete o bua mantsoe a hae ka kholiseho. Ntho e ’ngoe le e ’ngoe eo a e buang o e nahanne hantle hore a eke mohlankana enoa. Ka ho bolela hore o entse mahlabelo a kopanetsoeng hona letsatsing leo ebile o phethile boitlamo ba hae, o iponahatsa a lokile, o fana ka maikutlo a hore ha a fokole moeeng. Mahlabelo a kopanetsoeng tempeleng e Jerusalema a ne a etsoa ka nama, phofo oli le veine. (Levitike 19:5, 6; 22:21; Numere 15:8-10) Kaha motho ea a nyehelang o ne a ka nka karolo e itseng ea sehlabelo se kopanetsoeng bakeng sa hae le lelapa la hae, kahoo o bontša hore ha hae ho na le lijo tse ngata le lino. Ho hlakile hore na o bolela’ng: Mohlankana enoa o ne a tla ba monyakeng moo. Mosali eo o tsoile ka tlung ea hae a tlil’o batla eena feela. Ho utloisa bohloko hakaakang—hore ebe motho a ka lumela taba e joalo! Setsebi se seng sa Bibele se re: “Ke ’nete hore o ne a tsoile ho tla batla motho e mong, empa na o ne a hlile a tsoile ho tla batla eena eo ka ho khetheha? Ke sethoto feela—mohlomong eena enoa—se neng se ka mo kholoa.”
Ha a se a entse hore a khahlehe ka moaparo oa hae, ka mantsoe a hae a qekang, ka mokhoa oa hae oa ho kopa, le ka tatso ea melomo ea hae, mosali enoa oa moeki o hulela thahasello tabeng ea monko. O re: “Ke khabisitse setulo sa ka se kang moalo ka masela a koahelang moalo, ka lintho tse mebala-bala, line ea Egepeta. Ke fafalitse bethe ea ka ka myra, makhala le sinamone.” (Liproverbia 7:16, 17, NW) O lokisitse bethe ea hae hantle ka line e mebala-bala e tsoang Egepeta o bile o e nyanyalitse ka myra, makhala le sinamone tse monko o monate.
O tsoela pele, o re: “Tloo, re noe lerato hore re be re kholoe ho fihlela hoseng; a re thabelane ka lipontšo tsa lerato.” Memo ena ke ea ho etsa ntho e ’ngoe e fetang hore batho ba babeli ba thabele lijo tsa mantsiboea tse hlabosang. Tšepiso ea hae ke ho thabela likamano tsa botona le botšehali. Ho mohlankana enoa, boipiletso bona ke ba hore a leke ntho e ncha, ’me boa thabisa! Ha a tsoela pele ho mo eka, oa eketsa: “Etsoe monna ha a eo ka tlung ea hae; o ile sebakeng se hole. O nkile mokotla oa chelete letsohong la hae. O tla tla ntlong ea hae letsatsing leo khoeli e tolokileng ka lona.” (Liproverbia 7:18-20, NW) O mo kholisa hore ba tla sireletseha ka ho feletseng, hobane monna oa hae ha a eo o leetong la khoebo ’me o tla khutla ka mor’a nako e itseng. O na le tsebo e kaakang ea ho thetsa mocha! “O mo khelositse ka ho mo susumetsa haholo. O mo eka ka molomo oa hae o boreleli.” (Liproverbia 7:21, NW) Ke monna ea itšoereng joaloka Josefa feela ea neng a ka hana boipiletso bona bo hohelang. (Genese 39:9, 12) Na mohlankana eo o itšoere joalo le eena?
“Boloka Litaelo Tsa ka ’me U Tsoele Pele U Phela”
Ho bonahala ho le thata hore mohlankana enoa a hane memo ena. Ka bothoto o mo sala morao ‘joaloka poho e eang tlhabong.’ Joalokaha monna ea litlamong a ke ke a phema kotlo ea hae, ka ho tšoanang mohlankana enoa o huleloa sebeng. Ha a bone kotsi ea sena sohle ho fihlela “motsu o phunya sebete sa hae,” ke hore, ho fihlela a e-ba le leqeba le ka mo bolaeang. Lefu lena e ka ’na ea e-ba la nama kaha o ipepesetsa mafu a bolaeang a tšoaetsanoang ka likamano tsa botona le botšehali. Leqeba lena le ka ba la mo bolaea moeeng; la “ama moea oa hae.” O kenoa ke boloetse bo tebileng ’me bophelo ba hae bo ameha ka ho teba, ’me o sitetsoe Molimo haholo. Kahoo, o mathela lefung joalokaha nonyana e thoethoela sefing!
Matlotlo a Patiloeng
“Boloka Litaelo Tsa ka ’me U Tsoele Pele U Phela”
Solomone o tsoela pele: “[Litaelo tsa ka u] li tlame menoaneng ea hao, ’me u li ngole letlapeng la pelo ea hao.” (Liproverbia 7:3, NW) Joalokaha menoana e hlaheletse ka pel’a mahlo a rona ebile e le ea bohlokoa haholo ho phetheng merero ea rona, lithuto tse ithutoang ka ho holisoa ka Mangolo kapa ka tsebo ea Bibele e lokela ho ba khopotso e tsoelang pele le tataiso nthong e ’ngoe le e ’ngoe eo re e etsang. Re lokela ho li boloka lipelong tsa rona, e be tsona tse re susumetsang.
LA 7-13 APRIL
MATLOTLO A TSOANG BIBELENG LIPROVERBIA 8
Mamela Jesu
“Ke Rata Ntate”
7 Temaneng ea 22, bohlale bo re: “Jehova o ile a ntlhahisa ke le tšimoloho ea tsela ea hae, ke le oa pele-pele linthong tsa khale tseo a li finyeletseng.” E tlameha ebe hase bohlale feela tjee boo ho buuoang ka bona mona, kaha ha ho mohla tšobotsi ena e kileng ea ‘hlahisoa.’ Ha bo na qalo kaha esale Jehova a le teng a bile a le bohlale. (Pesaleme ea 90:2) Empa Mora oa Molimo eena ke “letsibolo la popo eohle.” O ile a hlahisoa, kapa a boptjoa; ke eena oa pele-pele linthong tsohle tsa khale tseo Jehova a li finyeletseng. (Bakolose 1:15) Mora o bile teng pele lefatše le maholimo a e-ba teng, joalokaha ho hlalositsoe ho Liproverbia. ’Me kaha ke Lentsoe, ’Muelli oa Molimo, o ile a bonahatsa bohlale ba Jehova ka tsela e phethahetseng.—Johanne 1:1.
“Ke Rata Ntate”
8 Mora o ne a etsa’ng ka lilemo-lemo tseo a li phetseng pele a tla lefatšeng? Temana ea 30 e re o ne a le mabapa le Molimo e le “mosebetsi ea hloahloa.” Seo se bolela’ng? Bakolose 1:16 e re: “Lintho tse ling tsohle tse maholimong le tse lefatšeng li ile tsa boptjoa ho sebelisoa eena . . . Lintho tse ling tsohle li bopiloe ka eena le bakeng sa hae.” Kahoo Jehova ’Mopi o ile a sebelisa Mora oa hae, eo e leng Mosebetsi ea Hloahloa, ho bopa lintho tsohle tse teng—a qala ka libopuoa tsa moea tse leholimong le bokahohle bo pharaletseng, lefatše hammoho le limela le liphoofolo tse hlollang tse ho lona, a qetella ka sehlohlolo sa popo e lefatšeng: e leng moloko oa batho. Lintlheng tse ling, re ka ’na ra bapisa tsela eo Ntate a neng a sebelisana le Mora ka eona le tsela eo setsebi sa meralo se sebelisanang le sehahi ka eona, kapa rakonteraka ea hahang ho latela polane e raliloeng ka bohlale ke setsebi sa meralo. Ha re tsota ntho leha e le efe e bopiloeng, ha e le hantle re rorisa Setsebi se Seholo sa Meralo. (Pesaleme ea 19:1) Leha ho le joalo, re lokela ho hopola hore ’Mopi o qetile lilemo-lemo a sebetsa le ‘mosebetsi oa hae ea hloahloa’ ba thabile.
9 Ka linako tse ling, ha batho ba babeli ba sa phethahalang ba sebetsa haufi-ufi ba thatafalloa ho sebelisana ka kutloano. Boemo bo fapane ka Jehova le Mora oa hae! Mora o qetile lilemo tse se nang palo a sebetsa le Ntate ’me a “nyakaletse ka pel’a hae ka nako eohle.” (Liproverbia 8:30) E, o ne a thabela ho ba le Ntate oa hae, Ntate le eena a thabela ho ba le Mora. Kahoo Mora o ile a tšoana le Ntate le ho feta ha nako e ntse e ea, ’me a ithuta ho etsisa litšobotsi tsa Molimo. Ha ho makatse hore ebe Ntate o bile le maqhama a matla hakana le Mora! Ho ka boleloa ka nepo hore ke ’ona maqhama a khale a matla ka ho fetisisa a lerato bokahohleng.
Ananela Jesu e Leng Davida e Moholo le Solomone e Moholo
14 Ho hlakile hore ke motho a le mong feela ea neng a feta Solomone ka bohlale. Motho eo e ne e le Jesu Kreste, ea ileng a ipolela hore ke “ho hong ho fetang Solomone.” (Mat. 12:42) Jesu o ile a bua “lipolelo tsa bophelo bo sa feleng.” (Joh. 6:68) Ka mohlala, Thuto ea Thabeng e ile ea tlatseletsa melao-motheong e meng ea maele a Solomone. Solomone o ile a bua ka lintho tse ’maloa tse etsang hore morapeli oa Jehova a thabe. (Liprov. 3:13; 8:32, 33; 14:21; 16:20) Jesu o ile a hatisa hore thabo ea ’nete e tlisoa ke lintho tse amanang le borapeli ba Jehova le ho phethahala ha litšepiso tsa Molimo. O ile a re: “Ho thaba ba elang hloko tlhoko ea bona ea moea, kaha ’muso oa maholimo ke oa bona.” (Mat. 5:3) Batho ba sebelisang melao-motheo ea lithuto tsa Jesu ba atamela haufi le Jehova, e leng “mohloli oa bophelo.” (Pes. 36:9; Liprov. 22:11; Mat. 5:8) Kreste o bonahatsa “bohlale ba Molimo.” (1 Bakor. 1:24, 30) Kaha ke Morena eo e leng Mesia, Jesu Kreste o na le “moea oa bohlale.”—Esa. 11:2.
Matlotlo a Patiloeng
‘Bohlale bo Ntse bo Hoeletsa’—Na Ua bo Utloa?
▪ The World Book Encyclopedia e re Bibele “ke buka e abuoeng ka ho fetisisa historing. E fetoletsoe hangata le ka lipuo tse ngata ho feta buka leha e le efe.” Bibele e fumaneha ka lipuo tse ka bang 2 600 e felletse kapa e sa fella, e leng se bolelang hore batho ba fetang 90 lekholong lefatšeng ka bophara ba ka e fumana.
▪ Bohlale “bo ntse bo hoeletsa ka lentsoe le phahameng” ka tsela ea sebele. Matheu 24:14, e re: “Litaba tsena tse molemo tsa ’muso li tla boleloa lefatšeng lohle leo ho ahiloeng ho lona hore e be bopaki ho lichaba tsohle; joale e ntan’o ba hona bofelo [ba lefatše lena] bo tla tla.”
LA 14-20 APRIL
MATLOTLO A TSOANG BIBELENG LIPROVERBIA 9
E-ba Motho ea Bohlale Eseng Mosomi
Mamela “Mantsoe a ba Bohlale”
4 Ho ka ’na ha e-ba thata hore re mamele keletso e tobileng le ho e sebelisa. Re ka ba ra utloa bohloko ha re eletsoa. Hobane’ng? Le hoja ho le bonolo hore re lumele hore ha rea phethahala, ho ka ’na ha e-ba thata hore re amohele keletso haeba motho e mong a re bontša phoso e itseng eo re e entseng. (Bala Moeklesia 7:9.) Re ka ’na ra batla ho ikemela kapa ra belaella mabaka ao motho a re eletsang ka ’ona. Hape re ka utloisoa bohloko ke tsela eo a re elelitseng ka eona. Re ka ba ra tšoaea-tšoaea motho ea re eletsang liphoso ’me ra re: ‘Ebe o nahana hore ke mang eena hore a ka nkeletsa? Le eena o ntse a etsa liphoso!’ Haeba re sa thabele keletso eo re e fuoang, re ka ’na ra se e mamele kapa ra kopa motho e mong hore a re eletse hobane re e-na le tšepo ea hore o tla re bolella ntho eo re batlang ho e utloa.
Mamela “Mantsoe a ba Bohlale”
12 Ke’ng e ka re thusang hore re mamele keletso? Re lokela ho ikokobetsa ’me re hopole hore ha rea phethahala ebile ka linako tse ling re na le ho etsa lintho tse booatla. Joalokaha re bone lirapeng tse fetileng, Jobo o ne a e-na le maikutlo a fosahetseng empa o ile a a fetola ’me Jehova o ile a mo hlohonolofatsa. Hobane’ng? Lebaka ke hobane Jobo o ne a ikokobelitse. O ile a bontša seo ka hore a mamele keletso ea Elihu le hoja Elihu a ne a le monyenyane ho eena. (Jobo 32:6, 7) Ho ikokobetsa ho tla re thusa hore le rona re sebelise keletso eo re e fuoang le haeba re nahana hore ha re e hloke kapa re e fuoa ke motho e monyenyane ho rona. Moholo e mong oa Canada o re: “Re ke ke ra khona ho ntlafatsa haeba ho se na motho ea re eletsang hobane batho ba khona ho bona lintho tseo re sa li boneng ho rona.” Kaofela ha rona re lokela ho sebetsa ka thata hore re be le litholoana tsa moea le ho ntlafatsa mosebetsing oa boboleli.—Bala Pesaleme ea 141:5.
13 Nka keletso e le tsela eo Molimo a u bontšang hore oa u rata. Jehova o re batlela se molemo. (Liprov. 4:20-22) O bontša hore oa re rata ka ho re fa keletso a sebelisa Lentsoe la hae, lingoloa tse thehiloeng Bibeleng kapa Bakreste ba nang le boiphihlelo. Baheberu 12:9, 10 e re: “O etsa joalo molemong oa rona.”
14 Nahana ka keletso eseng tsela eo e fanoeng ka eona. Ka linako tse ling, re ka ’na ra nahana hore ha rea fuoa keletso ka tsela e nepahetseng. Ke ’nete hore motho ea fanang ka keletso o lokela ho etsa hore ho be bonolo hore motho e mong a e amohele. (Bagal. 6:1) Leha ho le joalo, haeba e le rona ba eletsoang re lokela ho nahana ka keletso eo re e fuoang le hoja re ka nka hore re ka be re elelitsoe ka tsela e fapaneng. Re ka ’na ra ipotsa lipotso tsena: ‘Le hoja ke sa rata tsela eo keletso e fanoeng ka eona, na ho na le ntho eo nka ithutang eona ho eona? Na nka iphapanyetsa liphoso tsa motho ea nkeletsang ebe ke ithuta ho hong ho keletso eo a mphang eona?’ E ka ba bohlale hore re fumane ntho eo re ka ithutang eona ho keletso leha e le efe eo re e fumanang.—Liprov. 15:31.
‘Ka Bohlale Matsatsi a Rona a Tla Ngatafala’
Karabelo ea motho ea bohlale ha a khalemeloa e fapane le karabelo ea mosomi. Solomone oa hlalosa: “Fana ka khalemelo ho motho ea bohlale ’me o tla u rata. Fa motho ea bohlale ’me o tla hlalefa haholo.” (Liproverbia 9:8b, 9a) Motho ea bohlale oa tseba hore “ha ho taeo eo hona joale e bonahalang e thabisa, empa e baka mesarelo; leha ho le joalo ka mor’a moo ho ba koetlisitsoeng ka eona e beha litholoana tsa khotso, e leng, ho loka.” (Baheberu 12:11) Le hoja taeo e ka bonahala e le bohloko, ke ka baka la’ng ha re ka iphetetsa kapa ra itšireletsa haeba ho e amohela ho tla etsa hore re be bohlale haholo?
Morena ea bohlale o tsoela pele ka ho re: “Fa motho ea lokileng tsebo ’me o tla eketsa ho ithuta.” (Liproverbia 9:9b) Ha ho motho ea hlalefileng haholo kapa ea tsofetseng haholo hoo a ka khaotsang ho ithuta. Ke thabo e kaakang ho bona esita le ba seng ba holile ba amohela ’nete le ho inehela ho Jehova! E se eka le rona re ka lula re ntse re e-na le takatso ea ho ithuta le ho boloka kelello e ntse e sebetsa.
‘Ka Bohlale Matsatsi a Rona a Tla Ngatafala’
Ho ikitlaetsa hore re fumane bohlale ke boikarabelo ba rona re le batho ka bomong. Ha a totobatsa ntlha ena, Solomone o re: “Haeba u hlalefile, u hlalefile molemong oa hao; ’me haeba u somile, u tla ho jara, uena u le mong feela.” (Liproverbia 9:12) Ea bohlale o bohlale molemong oa hae, le mosomi ke eena feela ea ka jarang molato oa mahlomola a hae. Ka sebele, re kotula seo re se jalang. Kahoo, e se eka, re ka ‘ela bohlale hloko.’—Liproverbia 2:2.
Matlotlo a Patiloeng
Lintlha-kholo Tsa Buka ea Liproverbia
9:17—“Metsi a utsoitsoeng” ke eng, hona ke hobane’ng ha a le “monate”? Kaha ka Bibeleng thabo ea ho kopanela liphate lenyalong e tšoantšoa le ho noa metsi a khathollang a khuoeng selibeng, metsi a utsoitsoeng a tšoantšetsa ho kopanela liphate ka ho ikutsoa le motho eo e seng molekane oa hao. (Liproverbia 5:15-17) Khopolo ea ho kopanela liphate ka ho ikutsoa le motho eo e seng molekane oa hao, e etsa hore metsi ao a bonahale eka a monate.
LA 21-27 APRIL
MATLOTLO A TSOANG BIBELENG LIPROVERBIA 10
Ke’ng e Etsang Hore Motho a Thabe e le Kannete Bophelong?
‘Litlhohonolofatso ke Tsa ea Lokileng’
Ea bohlale o boetse o hlohonolofatsoa ka tsela e ’ngoe hape. “Ea sebetsang ka letsoho le monyebe o tla ba le ho honyenyane, empa letsoho la ea khothetseng ke lona le tla ruisa motho. Mora ea etsang ka temohisiso o bokella nakong ea lehlabula; mora ea itšoarang ka mokhoa o hlabisang lihlong o khalehile nakong ea kotulo.”—Liproverbia 10:4, 5.
Mantsoe a morena a hlokomelehang ka ho khetheha ke a mabapi le basebetsi nakong ea kotulo. Nako ea kotulo hase nako ea boroko. Ke nako ea ho khothala le ea ho sebetsa lihora tse telele. Ka sebele, ke nako ea tšohanyetso.
A nahanne ka kotulo ea batho, ho fapana le ea lijo-thollo, Jesu o ile a bolella barutuoa ba hae a re: “Kotulo e kholo, empa basebetsi ha ba bakae. Ka hona, le kope Mong’a kotulo [Jehova Molimo] hore a romele basebetsi kotulong ea hae.” (Matheu 9:35-38) Selemong sa 2000, batho ba fetang limilione tse 14 ba ile ba e-ba teng Sehopotsong sa lefu la Jesu—e leng palo e fetang ea Lipaki tsa Jehova habeli. Ha ho le joalo, ke mang ea ka latolang hore masimo a ‘soeufetse bakeng sa kotulo’? (Johanne 4:35) Barapeli ba ’nete ba kopa Monghali hore a romele basebetsi ba eketsehileng ha ka nako e tšoanang ba ikitlaetsa ka matla mosebetsing oa ho etsa barutuoa tumellanong le lithapelo tsa bona. (Matheu 28:19, 20) ’Me Jehova o hlohonolofalitse boiteko ba bona hakaakang! Selemong sa tšebeletso sa 2000, ho ile ha kolobetsoa ba bacha ba fetang 280 000. Bana ka ho tšoanang ba leka ka matla ho ba mesuoe ea Lentsoe la Molimo. E se eka re ka thaba le ho khotsofala nakong ena ea kotulo ka ho kopanela ka ho feletseng mosebetsing ona oa ho etsa barutuoa.
Tsamaea ‘Tseleng ea ho Loka’
Solomone o bontša bohlokoa ba ho loka. O re: “Lintho tsa bohlokoa tsa morui ke motse oa hae o matla. Tšenyeho ea ba tlaase ke bofutsana ba bona. Mosebetsi oa ea lokileng o fella ka bophelo; lihlahisoa tsa ea khopo li fella ka sebe.”—Liproverbia 10:15, 16.
Maruo e ka ba tšireletso khahlanong le maemo a itseng a sa tsitsang a bophelo, feela joalokaha motse o sirelelitsoeng ka matla o fana ka polokeho e itseng ho ba lulang ho oona. Bofutsana bo ka baka tšenyo ha ho hlaha maemo a sa lebelloang. (Moeklesia 7:12) Leha ho le joalo, e ka ’na eaba morena eo ea bohlale o boetse o lemosa ka kotsi e amanang le leruo le bofutsana ka bobeli. Mohlomong monna ea ruileng a ka sekamela ho beheng tšepo ea hae e feletseng leruong la hae, a nahana hore lintho tsa hae tsa bohlokoa li “joaloka lerako le sireletsang.” (Liproverbia 18:11) Mohlomong le mofutsana ka phoso a ka nka hore bofutsana ba hae bo etsa hore ho se be le tšepo ka bokamoso ba hae. Ka tsela ena, ka bobeli ba hloleha ho iketsetsa lebitso le letle ho Molimo.
it-1-E 340
Tlhohonolofatso
Jehova o Hlohonolofatsa Batho. “Tlhohonolofatso e tsoang ho Jehova e ruisa motho ebile ha e tlise bohloko.” (Pr 10:22) Jehova o hlohonolofatsa batho bao a ba amohelang ka litsela tse ba ruisang molemo. Oa ba sireletsa, oa ba tataisa le ho ba fa lintho tseo ba li hlokang.
Matlotlo a Patiloeng
Thabo ea ho Tsamaea ka Botšepehi
18 “Tlhohonolofatso ea Jehova”—ke eona e entseng hore batho ba hae ba atlehe moeeng. ’Me re tiisetsoa hore “ha a e phaelle ka bohloko.” (Liproverbia 10:22) Joale, ke hobane’ng ha batho ba bangata ba Molimo ba tšepahalang ba hlaheloa ke liteko, tse ba bakelang bohloko bo boholo le mahlomola? Ho na le mabaka a mararo a sehlooho a etsang hore re hlaheloe ke mathata le litsietsi. (1) Tšekamelo ea rona ea boetsalibe. (Genese 6:5; 8:21; Jakobo 1:14, 15) (2) Satane le bademona ba hae. (Baefese 6:11, 12) (3) Lefatše le khopo. (Johanne 15:19) Le hoja Jehova a lumella hore re hlaheloe ke lintho tse mpe, hase eena ea li bakang. Ha e le hantle, “mpho e ’ngoe le e ’ngoe e molemo le neo e ’ngoe le e ’ngoe e phethahetseng e tsoa holimo, kaha e theoha ho Ntate oa maseli a leholimo.” (Jakobo 1:17) Litlhohonolofatso tsa Jehova ha li bake bohloko.
LA 28 APRIL–LA 4 MAY
MATLOTLO A TSOANG BIBELENG LIPROVERBIA 11
Itholele!
Botšepehi bo Tataisa ba Lokileng
Botšepehi ba ba lokileng le bokhopo ba baetsalibe li boetse li na le phello ho batho ba bang. Morena oa Iseraele o re: “Ka molomo oa hae mokoenehi o felisa oa habo, empa ba lokileng ba pholosoa ke tsebo.” (Liproverbia 11:9) Ke mang ea tla hana hore ketselletso, litšebo tse lematsang, puo e litšila le ho bebera li kotsi ho ba bang? Ka lehlakoreng le leng, puo ea ea lokileng e hloekile, e nahannoe hantle, hape ea nahanela. O lopolloa ke tsebo hobane botšepehi ba hae bo mo fa bopaki bo hlokahalang ho bontša baqosi ba hae hore ba leshano.
Botšepehi bo Tataisa ba Lokileng
Baahi ba motse ba latelang tsela e lokileng ba etsa hore ho be le khotso le katleho ’me ba haha ba bang sechabeng. Kahoo, motse oa phahamisoa—oa atleha. Ba buang liketselletso, lintho tse bohloko le tse fosahetseng ba baka moferefere, masoabi, karohano le khathatso. Ho ba tjena haholo-holo haeba batho bana e le batho ba nang le tšusumetso. Motse o joalo oa ferekana, o ba le bobolu le tšenyeho ea boitšoaro mohlomong le ea moruo.
Molao-motheo o boletsoeng ho Liproverbia 11:11 o sebetsa ka ho tšoanang ho batho ba Jehova ha ba kopana liphuthehong tsa bona tse kang metse. Phutheho eo ho eona batho ba moea—e leng ba lokileng ba tataisoang ke botšepehi ba bona—ba nang le tšusumetso, e fetoha sehlopha sa batho ba thabileng, ba mafolofolo, le ba molemo, ba tlotlisang Molimo. Jehova o hlohonolofatsa phutheho eo, ’me ea atleha moeeng. Ka linako tse ling, ba seng bakae ba ka ’nang ba tletleba, ba se khotsofale, ba tšoaea-tšoaea liphoso ba ba ba bua hampe ka tsela eo lintho li etsoang ka eona, ba tšoana le “motso o chefo” o ka jalang chefo le ho e kenya ho ba bang bao pele ba neng ba sa ameha. (Baheberu 12:15) Hangata ba joalo ba batla bolaoli bo eketsehileng le ho hlahella. Ba jala menyenyetsi ea hore ho na le ho hloka toka, khethollo ea merabe, kapa lintho tse joalo ka phuthehong kapa ho baholo. Ka sebele, melomo ea bona e ka baka karohano ka phuthehong. Na ha rea lokela ho hana ho mamela puo ea bona ’me re loanele ho ba batho ba moea ba bopang khotso le bonngoe ka phuthehong?
Botšepehi bo Tataisa ba Lokileng
Motho ea se nang kahlolo e molemo, kapa eo “pelo ea hae e haelloang” o baka tšenyo e kaakang! O ntšetsa pele ho bebera ha hae ho fihlela boemong boo ho fetohang ketselletso kapa mahlapa. Baholo ba khethiloeng ba lokela ho potlakela ho felisa tšusumetso e joalo e mpe. Ho fapana le “eo pelo ea hae e haelloang,” motho ea nang le temoho o tseba nako ea ho khutsa. Ho e-na le ho phunya lekunutu, o koahela taba. Ka ho tseba hore ho bebera ho ka baka kotsi e kholo, motho ea nang le temoho oa ‘tšepahala moeeng.’ Oa tšepahala ho balumeli-’moho le eena ’me ha a bue ka litaba tsa lekunutu tse ka ’nang tsa ba beha kotsing. Batho ba tšepahalang joalo ke tlhohonolofatso e kaakang ka phuthehong!
Matlotlo a Patiloeng
g20.1 11, lebokose
U ka Thusoa Ke’ng ha U E-na le Stress?
“HO TŠOARA BATHO BA BANG KA MOSA HO KA U THEOLA STRESS”
“Motho ea nang le mosa o lerato o sebetsana ka mokhoa o putsang le moea oa hae, empa motho ea sehloho o tlisetsa ’mele oa hae khathatso.”—LIPROVERBIA 11:17.
Buka ea Overcoming Stress e na le khaolo e buang ka hore ho tšoara batho ba bang ka mosa ho fokotsa stress. Tim Cantopher e leng mongoli oa buka eo, o re ho ba mosa ho ka etsa hore u phele hantle u be u thabe. Ka lehlakoreng le leng, motho ea seng mosa a ka hloka thabo hobane ho se na motho ea batlang ho ikamahanya le eena.
Re ka imoloha haeba re sa ikhahlapetse. Mohlala, hopola hore bohle re etsa liphoso ebile hase ntho e ’ngoe le e ’ngoe eo u ka e tsebang. Ha u etsa joalo u tla imoloha. Jesu o ile a re, “u rate moahelani oa hao joalokaha u ithata.”—Mareka 12:31.