Tutimize Nadhiri Yetu Siku Baada Ya Siku

¹ Mtunga zaburi Daudi alijisikia mwenye kusukumwa kusema kwa Yehova: “Hivi nitaimbia jina lako sifa kwa milele, ili [nitimize] naziri zangu kila siku.” (Zab. 61:​8, ZSB) Daudi alijua kwamba wakati mtu anapofanya nadhiri, huifanya kwa namna ya kujipendea kwa moyo kamili. Hata hivyo, alikuwa pia mwenye kutambua kwamba ikiwa angefanya nadhiri, alikuwa mwenye kulazimika kuitimiza. Ingawa hivyo, alimsifu Yehova kwa ajili ya uwezekano aliokuwa nao wa kutimiza nadhiri zake siku baada ya siku.

² Wakati tulipojitoa wakfu kwa Yehova, ni kwa kujipendea sisi mwenyewe kwamba tulifanya nadhiri ya kutimiza mapenzi yake. Tulijikana wenyewe na tulifanya utumishi kwa Yehova kuwa sababu ya kwanza ya kuwako kwa maisha yetu. (Lk. 9:23) Ni kwa sababu hiyo sisi pia tunapaswa kutimiza nadhiri yetu siku baada ya siku. (Muh. 5:4-6) Tangazo la peupe ambalo tulifanya wakati wa ubatizo wetu linapaswa kuonekana katika mtindo wetu wote wa maisha, huku tukijua kwamba ni “kwa kinywa mtu hufanya tangazo la peupe kwa ajili ya wokovu.” (Rom. 10:​10, NW) Hilo linatia ndani mahubiri ya habari njema. (Ebr. 13:15) Hali ya kila mmoja ni tofauti sana, lakini tunalinda sote akilini siku baada ya siku umuhimu wa kutangaza habari njema kwa wengine.

³ Tutokeze Nafasi za Kuhubiri Kila Siku: Jambo la kutangaza tu habari njema kwa mtu fulani linatokeza shangwe. Ili kufanya hivyo siku zote, tunapaswa kutokeza nafasi za kuhubiri kila wakati hilo linapowezekana kwetu. Wale wanaochukua uamuzi wa kutoa ushuhuda wa vivi hivi kwenye nafasi zao za kazi, shuleni, kwa majirani zao au kwa watu wengine wanaokutana nao kila siku wanaishi nyakati zenye kufurahisha. Tunaweza hata kutoa ushuhuda kwa njia ya barua au kwa njia ya simu. Kwa kufaidika na uwezekano wote huo mbalimbali na kwa kujiwekea wakati kikawaida ili kutoa ushuhuda wa mlango kwa mlango na kufanya ziara za kurudia, tutapata labda shangwe ya pekee ambayo mtu hujipatia kwa kuongoza funzo la Biblia la nyumbani. Ndiyo, inawezekana kwetu kila siku kutokeza nafasi za kuhubiri.

⁴ Dada mmoja alianza kusoma broshua Kuyachunguza Maandiko Kila Siku wakati wa pumziko la saa sita. Alipendekeza kwa mfanya-kazi mwenzake wa kike kusoma andiko la siku pamoja naye, jambo ambalo liliongoza haraka kwenye funzo la Biblia pamoja na mtu huyo. Walikuwa wakijifunza muda wa nusu-saa kila siku, mara tano kwa juma. Mfanya-kazi mwingine aliona funzo lao la kila siku. Alifikia kujitambulisha kuwa yeye ni ndugu, lakini asiyetenda. Bidii ya dada huyo ilimchochea, na alikwenda kumwona mzee mmoja ili arudilie tena kutenda. Kwa sababu ya nia yake ya kutimiza kama ifaavyo nadhiri yake siku baada ya siku, dada huyo alifikia kuwa na uvutano mzuri juu ya watu wawili.

⁵ Tukisukumwa na moyo wenye kujaa shukrani kwa ajili ya mambo yote mazuri ambayo Yehova alifanya kwa ajili yetu, tutatimiza nadhiri yetu kila siku kulingana na uwezo wetu, jambo ambalo litatupatia shangwe na uradhi. Kama vile mtunga zaburi, tunaweza kusema: “Nitakusifu, Ee [Yehova] Mungu wangu, na moyo wangu wote, na nitatukuza jina lako kwa milele.”​—Zab. 86:12.