Hakikisha kwamba unarudi!
1 “Ni mazungumzo mazuri kama nini! Lazima nikumbuke kufanya ziara ya kurudia hapo.” Je, umekwisha kusema maneno hayo, na kisha ukasahau mahali ambapo mtu yule anaishi? Ikiwa ni hivyo, unajua kwamba njia moja pekee ya kuhakikisha kwamba utarudi ni kuandika.
2 Andika hayo yote: Huku ukiwa bado unakumbuka akilini mazungumzo pamoja na mtu mwenye kupendezwa, chukua wakati wa kuandika habari yote yenye kuhusiana na ziara hiyo. Andika jina la mtu na jinsi utakavyomtambua. Andika anwani yake, lakini usiifikirie bila kuwa na uhakika—hakikisha kwamba yale unayoandika ni sahihi. Andika habari mliyozungumzia, maandiko yoyote mliyosoma, na kichapo ulichomwachia.
3 Ikiwa ulimwachia mtu ulizo utakalojibu wakati wa ziara ijayo, andika hilo. Je, ulijifunza jambo fulani kuhusu mtu huyo, kuhusu familia yake, au dini yake? Ikiwa ndiyo, andika hilo. Kisha, wakati ujao utakapomtembelea, kutaja kwako mambo hayo kutaonyesha kupendezwa kwako binafsi na mtu huyo. Mwishowe, tia ndani siku na wakati ulipofanya ziara ya kwanza na wakati uliosema utarudi. Kwa kuchukua maandishi sahihi, utakuwa na vikumbusho vilivyo wazi na hautaelekea sana kusahau ahadi yako ya kurudi.—1 Tim. 1:12.
4 Wakati maandishi yako yanapokuwa kamili, yatie hayo pamoja na vifaa vyako vingine kwa ajili ya utumishi wa shambani—mfuko wa vitabu, Biblia, kitabu Kutoa Sababu, na vichapo—kusudi hayo yawe tayari wakati wote. Ni vizuri zaidi kuandika wale wasiokuwako nyumbani wakati wa mahubiri ya nyumba kwa nyumba kwenye maandishi yaliyo tofauti na yale unayotumia kuandika ziara za kurudia. Bila shaka, ijapokuwa ni kazi kulinda maandishi sahihi kuhusu ziara za kurudia, jambo la maana ni kuhakikisha kwamba unarudi!
5 Fikiri juu ya mtu yule: Wakati unapojitayarisha kwa ajili ya huduma, rudilia maandishi yako kwa ajili ya ziara za kurudia. Tafakari juu ya kila mtu na njia inayoweza kutumiwa vizuri zaidi wakati wa kufanya ziara ya kurudia. Fikiria jinsi ya kukuza kupendezwa kwa mtu na funzo la Biblia la nyumbani. Kuchukua mipango kama huko kunaweza kuongeza matokeo yako ukiwa mhudumu wa habari njema na, kwa njia hiyo, kuongeza furaha yako.—Mez. 21:5a.
6 Kwa hiyo, wakati ujao utakapopata mtu wa kukusikiliza, usifikiri kwamba unaweza kwa vyepesi kukumbuka ziara hiyo. Badala yake, andika hiyo, rudilia maandishi yako, endelea kufikiri juu ya mtu huyo, na kisha uhakikishe kwamba unarudi!