ஊழியத்தில் சகிப்புத்தன்மை தேவை

¹ எந்தவொரு நல்ல காரியத்திற்காகவும் முயற்சி எடுக்கும்போது பல கஷ்டங்கள் வரத்தான் செய்யும். அப்போஸ்தலன் பவுலுக்கும்கூட அவரது ஊழியத்தில் பல கஷ்டங்கள் வந்தன. (2 கொ. 11:23–29 ) என்றாலும், அவர் 30 வருடங்களுக்கு மேலாக மகிழ்ச்சியோடு முழுநேர ஊழியம் செய்துவந்தார்; சோர்ந்துபோய் ஊழியத்தை நிறுத்திவிடவில்லை. (2 கொ. 4:1 ) ஊழியம்செய்யும்போது வரும் சோதனைகளைத் தாங்கிக்கொள்வதற்குத் தேவையான பலத்தை யெகோவா தருவார் என்பதை அவர் புரிந்திருந்தார். (பிலி. 4:​13, NW ) பவுல் இவ்வாறு உண்மையோடு சகித்திருந்து நமக்கு முன்மாதிரியாகத் திகழ்ந்ததால்தான், “நான் கிறிஸ்துவைப் பின்பற்றுகிறது போல, நீங்கள் என்னைப் பின்பற்றுகிறவர்களாயிருங்கள்” என்று அவரால் சொல்ல முடிந்தது.​—⁠1 கொ. 11:⁠1.

² ஊழியத்தில் சகிப்புத்தன்மை: நம் சகோதரர்களில் பெரும்பாலோர் பல்வேறு சோதனைகளை அன்றாடம் எதிர்ப்படுகிறார்கள். குடும்ப அங்கத்தினர்கள், சக பணியாளர்கள், சக மாணவர்கள் ஆகியோரின் கேலி கிண்டல்களுக்கோ எதிர்ப்புகளுக்கோ ஆளாகிறார்கள், அல்லது அவர்களால் அலட்சியம் செய்யப்படுகிறார்கள். (மத். 10:35; யோவா. 15:20 ) ஒருவேளை நீங்களும் அதே பிரச்சினைகளை எதிர்ப்படலாம். இல்லையென்றால், உடல்​நலப் பிரச்சினைகளோடு போராடலாம்; அல்லது உங்கள் விசுவாசத்திற்கும் சகிப்புத்தன்மைக்கும் சோதனையாக வருகிற கவனச்சிதறல்களையும் சபலங்களையும் எதிர்த்து அன்றாடம் நீங்கள் போராடலாம். பூர்வகாலத்தில் வாழ்ந்த உண்மை ஊழியர்கள் பலரும், இக்காலத்தில் வாழ்ந்து​வரும் சக கிறிஸ்தவர்கள் பலரும் கஷ்டங்களை எதிர்ப்பட்டிருப்பதோடு அவற்றைச் சமாளித்தும் இருக்கிறார்கள். அவர்களுடைய அனுபவங்களைச் சிந்தித்துப் பார்ப்பதிலிருந்து நாம் பலம் பெறலாம்.​—⁠1 பே. 5:⁠9.

³ நாம் தொடர்ந்து ஊழியம் செய்வதற்குத் தேவையான பலத்தைப் பெற வேண்டுமானால், ‘தேவனுடைய சர்வாயுத வர்க்கத்தைத் தரித்துக்கொள்வது’ அவசியம். (எபே. 6:10–13, 15 ) சகிப்புத்தன்மை தருமாறு ஜெபிப்பதும் அவசியம். சோதனைகளைச் சகிப்பதற்குக் கடவுள் தமது சக்தியை நமக்கு அருளுவார். (2 கொ. 6:4–7 ) இந்த ஆன்மீகப் போராட்டத்தில் வெற்றி பெற வேண்டுமானால் கடவுளின் நினைப்பூட்டுதல்களுக்கு நாம் செவிசாய்ப்பது அவசியம். (சங். 119:​24, 85–88 ) ஒரு பிள்ளை தன் அன்பான அப்பாவிடமிருந்து பெற்ற கடிதத்தைத் திரும்பத் திரும்ப வாசித்துப் பார்ப்பதைப் போலவே, நாம் பைபிளைத் திரும்பத் திரும்ப வாசிப்பது யெகோவாவோடு உள்ள நம் பந்தத்தைப் பலப்​படுத்திக்கொள்ள உதவும். தனிப்பட்ட படிப்பைத் தவறாமல் படிப்பதன் மூலம் சோதனை​களைச் சமாளிக்கத் தேவையான ஞானத்தை நாம் பெறுவோம்; அதன் பலனாக, கடவுளுடைய நோக்குநிலையில் தீர்மானங்களைச் செய்வோம், தொடர்ந்து யெகோவாவுக்கு உத்தமமாய் நடந்துகொள்ள பலத்தைப் பெறுவோம்.​—⁠நீதி. 2:​10, 11.

⁴ சகிப்புத்தன்மையால் வரும் பலன்கள்: பவுலின் சகிப்புத்தன்மைக்குப் பலன் கிடைத்தது; அவ்வாறே, ஊழியத்தில் நாம் உண்மையோடு சகித்திருந்தால் நமக்கும் நல்ல பலன்கள் கிடைக்கும்; அதனால் யெகோவாவுடைய இருதயம் சந்தோஷப்படும், அதோடு, நமக்கும் மற்றவர்களுக்கும் அளவில்லா ஆசீர்வாதங்கள் கிடைக்கும். (நீதி. 27:11 ) ஆகவே, ஊழியத்தில் விடாமுயற்சியோடு ஈடுபடத் தீர்மானமாய் இருப்போமாக; இதன் மூலம், நம்முடைய விசுவாசம் பலமானது என்பதையும், ‘அக்கினியால் சோதிக்கப்பட்டும் அழிந்துபோகிற பொன்னைவிட அதிக விலையேறப்பெற்றது’ என்பதையும் நிரூபிப்போமாக.​—⁠1 பே. 1:​6, 7.