“உலகத்தார் மத்தியில் எப்போதும் நன்னடத்தை உள்ளவர்களாக இருங்கள்”

1. வரவிருக்கும் மாநாடுகளில் நல்நடத்தையைக் காத்துக்கொள்வது ஏன் மிகவும் முக்கியம்?

¹ ஒவ்வொரு வருடமும் மாநாட்டின்போது, மற்றவர்கள் நம்மைக் கவனிக்கிறார்கள். ஆகவே, நாம் நடந்துகொள்ளும் விதம் யெகோவாவிற்கு நற்பெயர் சேர்க்க வேண்டும். (லேவி. 20:26) நம்முடைய நல்நடத்தையும் ஆடை அலங்காரமும் நாம் கிறிஸ்துவின் சீடர்கள் என்பதைக் காட்ட வேண்டும். மண்டல மாநாட்டிலும் சர்வதேச மாநாட்டிலும் கலந்துகொள்ளும்போது, நாம் எப்படி ‘உலகத்தார் மத்தியில் எப்போதும் நன்னடத்தை உள்ளவர்களாக இருக்கலாம்’, நம் பரலோக தந்தைக்கு எப்படிக் கனம் சேர்க்கலாம்?—1 பே. 2:12.

2. மாநாட்டின்போது கிறிஸ்தவப் பண்புகளை எப்படி வெளிக்காட்டலாம்?

² கிறிஸ்தவப் பண்புகளை வெளிக்காட்டுங்கள்: நாம் ஒருவருக்கொருவர் அன்பு காட்டுவதும் ‘வெளியே இருப்பவர்களிடம்’ கனிவாக நடந்துகொள்வதும் இந்த உலகத்தின் கெட்ட சிந்தையிலிருந்து நம்மை முற்றிலும் வேறுபடுத்திக் காட்டுகிறது. (கொலோ. 3:10; 4:5; 2 தீ. 3:1-5) ஓட்டல் ஊழியர்களிடமும் அங்கு வேலை செய்யும் ஆட்களிடமும் நாம் கனிவோடும் பொறுமையோடும் நடந்துகொள்ள வேண்டும்; பிரச்சினைகள் வந்தாலும் அப்படி நடந்துகொள்வது முக்கியம். உள்ளூர் பழக்கவழக்கத்திற்கேற்ப டிப்ஸ் கொடுப்பது நல்லது. மாநாட்டு மன்றத்தில் இருக்கைகளைப் பிடித்து வைக்கும்போது அல்லது புதிய வெளியீடுகளைப் பெற்றுக்கொள்ள வரிசையில் நிற்கும்போது, நம்முடைய நலனை நாடாமல் பிறருடைய நலனை நாட வேண்டும். (1 கொ. 10:23, 24) ஆர்வமுள்ள ஒரு நபர் முதன்முதலாக மாநாட்டில் கலந்துகொண்ட பிறகு இப்படிச் சொன்னார்: “அன்றைக்கு என்னென்ன பேச்சுகளைக் கேட்டேன் என்று எனக்கு ஞாபகமில்லை. ஆனால், அங்கிருந்த சாட்சிகளுடைய நல்ல நடத்தையை மட்டும் என்னால் மறக்க முடியாது.”

3. பெற்றோருக்கு என்ன நினைப்பூட்டுதல் கொடுக்கப்பட்டிருக்கிறது, ஏன்?

³ மாநாடு நடக்கும் இடத்திலும் ஓட்டல்களிலும் பிள்ளைகளைப் பெற்றோர் கண்காணிக்க வேண்டும். (நீதி. 29:15) ஓர் ஓட்டல் மேனேஜர் ஒரு தம்பதியிடம் இப்படிச் சொன்னார்: “உங்க ஜனங்கள எங்களுக்கு ரொம்ப பிடிச்சுருக்கு. பெரியவங்களும் பிள்ளைகளும் பணிவா மரியாதையா நடந்துக்குறாங்க. நீங்க எல்லாரும் ஒவ்வொரு சனி-ஞாயிறும் எங்க ஓட்டலேயே தங்குனா நல்லா இருக்கும்ணு நாங்க பேசிக்கிட்டோம்.”

4. மாநாடு நடக்கும் இடத்தில் இருக்கும்போது, நம் தோற்றம் எப்படியிருக்க வேண்டும்?

⁴ அடக்கமான உடை: நம் உடை இந்த உலகத்தின் பாணியைப் படம்பிடித்துக் காட்டும் விதத்தில் இல்லாமல், அடக்கமாகவும் மாநாட்டிற்குப் பொருத்தமாகவும் இருக்க வேண்டும். (1 தீ. 2:9) ஓட்டலுக்கு வரும்போதும் அங்கிருந்து புறப்படும்போதும்... மாநாட்டிற்கு முன்பும் பின்பும்... நாம் உடுத்துகிற உடை ஏனோதானோவென்று இருக்கக் கூடாது. நேர்த்தியாக உடுத்தும்போதுதான், மாநாட்டு பேட்ஜை அணிந்துகொள்வதற்கும் சந்தர்ப்ப சாட்சி கொடுப்பதற்கும் தயங்க மாட்டோம். நம் தோற்றமும் நடத்தையும் நல்மனமுள்ள ஆட்களை உயிர் காக்கும் பைபிள் செய்தியிடம் ஈர்ப்பதோடு யெகோவாவுக்கும் சந்தோஷத்தை அளிக்கும்.—செப். 3:17.