LYASI LYA KUSAMBILILA LYA 47
Kunti Twakita Siani Eevi Tutwalilile Kutonana Saana?
“Mwe bakwane, tutonane paantu kutona kuli kwafuma kuli Leeza.”—1 YOAN. 4:7.
LWIMBO 109 (Lwa Kiswahili) Tonane Saana Kufuma ku Mutima
KIFUPI KYA LYASIa
1-2. (a) Juu ya ki mutumua Paulo walanda nangue ntono i mibeele ‘yakatwalilila kubako’? (b) Ni biipuzio ki bituli kulondoluela?
MUSITA mutumua Paulo lwaali walondoluela palua kiketekelo, kiswapilo pamo ni ntono, waalandile nangue “kintu kyakatwalilila kubako pa eezi [mibeele] ni ntono.” (1 Bakor. 13:13) Juu ya ki waalandile evio? Musita uli waiza, tetukaba twakabiile kabili kuya twali ni kiketekelo mu bulayo bwakue Leeza palua kyalo kya leenu ao kuswapila nangue bobo bulayo bwakaba kufikiliziiwa paantu bintu byose bituswapiile byakaba byasyakitikile. Inzi, twakaba twakabiile lyonse kumutona Yehova pamo ni bantu bange. Kulanda kisinka, twakatwalilila kukila kubatona loonse.
2 Paantu twakaba twakabiile kuya twali ni ntono loonse, tuli kulondoluela biipuzio bitatu. Kya kuanza, juu ya ki tupalile kutonana? Kya bubili, kunti twalangilila siani nangue tutoneene? Kya butatu, kunti twakita siani eevi tutwalilile kutonana saana?
JUU YA KI TUPALILE KUTONANA?
3. Juu ya ki tupalile kutonana?
3 Juu ya ki ni kintu kya mana kuya twatoneene? Paantu kine tutoneene, keekio kili kulangilila nangue tuli Bakristu ba kisinka. Yesu waabalandile eevi batumua bakue: “Kine mwatonana, bantu bonse bali kumana nangue muli basambi bane.” (Yoan. 13:35) Kabili, kutonana kuli kwatukwasia kutwalilila kuya twali mu buumo. Paulo waalandile nangue ntono ni “kifundo kipuililikile kya buumo.” (Bakol. 3:14, NWT) Inzi, kuli ni nsaambu inge ya mana ilangiliile juu ya ki tupalile kutonana. Mutumua Yoane waabalembeele eevi balupua ni bankazi bakue: “Onse amutonene Leeza, amutone ni mwinakue.” (1 Yoan. 4:21) Musita utuli twalangililana ntono, tuli twalangilila nangue tumutonene Leeza.
4-5. Leeta mufuano ulangiliile nangue kumutona Leeza kupalameene saana ni kutona balupua ni bankazi.
4 Kumutona Leeza kupalameene saana ni kutona balupua ni bankazi betu. Mu nzila ki? Kwa mufuano, mona vipalameene mutima weetu ni seemu inge ya mubili weetu. Kine munganga watendeka kutoosia musipa pa kifundo kyetu kya minue eevi kumona kine utopele ao kine ulumine, paange kunti waviinda kumana kine mutima weetu ulumine ao kine uli wabomba buino. Leelio lifunde kunti lyatusambilizia ki?
5 Kupitila kutoosia musipa weetu, munganga kunti waviinda kumana kine mutima weetu ulumine ao kine uli mukumbomba buino. Evio vyenka ni fwefue kunti twamana kine ntono yeetu kuli Leeza ilumine, kine twatoosia vituli twasaangua twabatonene bange. Kine twainika nangue tetukibatoneesie balupua ni bankazi betu, keekio kunti kyalangilila nangue ni Leeza tetukimutoneesie. Inzi kine twatwalilila kubatona balupua ni bankazi betu, keekio kili kutukwasia kumana nangue ntono yeetu kuli Leeza ilumine.
6. Kine tetukibatoneesie balupua ni bankazi betu, juu ya ki bobo ni buavia bukata? (1 Yoane 4:7-9, 11)
6 Kine ntono yeetu ku balupua ni bankazi betu ili mukuya yakeepa, bobo ni buavia bukata. Juu ya ki? Paantu keekio kunti kyalengia tuzeezie bukibuza bwetu pamo ni Yehova. Mutumua Yoane wasininkizia keekio musita lwatulangulusia eevi: ‘Kine umo walanda nangue neene mutonene Leeza, kooku wasuulile mwinakue, ozo muntu ni wa bufi, ale kunti wamutona siani Leeza wasimwene kine asuulile mwinakue wamwene?’ (1 Yoan. 4:20) Keekio kyatusambilizia ki? Yehova ali wasekelela kinesie wamona nangue ‘tutoneene.’—Soma 1 Yoane 4:7-9, 11.
KUNTI TWALANGILILA SIANI NANGUE TUTONEENE?
7-8. Kunti twalangilila siani nangue tutoneene?
7 Lingi, Mulandu Wakue Leeza uli watukinkizia tuye ‘twatoneene.’ (Yoan. 15:12, 17; Bar. 13:8; 1 Bat. 4:9; 1 Pet. 1:22; 1 Yoan. 4:11) Anzia evio, ntono ni mibeele ya mu mutima. Te kuli muntu ali ni buviinde bwa kwimona ezio ntono moomo. Pakaako, eba! kunti twalangilila siani nangue tubatonene balupua ni bankazi betu? Kunti twakita evio kupitila milandu ni bikitua byetu.
8 Kunti twalangilila mu nzila ingi nangue tubatonene balupua ni bankazi betu. Mona eezi mifuano ikoonkelepo: “Kila muntu alande kisinka ku mwinakue.” (Zek. 8:16) “Ikale ni mutende mwe benenke.” (Mark. 9:50) Muye mwali ba kuanza “mu kulangililana mukinzi.” (Bar. 12:10, NWT) “Pokelelane.” (Bar. 15:7) “Twalilile . . . kweleelana.” (Bakol. 3:13, NWT) “Sipikizyanie mu maavia enu.” (Bag. 6:2) “Koselezyanie.” (1 Bat. 4:18) “Twalilile . . . kukuulana.” (1 Bat. 5:11, NWT) ‘Pepelane.’—Yak. 5:16.
Kunti twakita siani eevi kumukwasia lupua ao nkazi ali mu maavia? (Mona lifungu lya 7-9)
9. Juu ya ki kubakoselezia bange ni nzila ya mana ya kulangilila nangue tubatonene? (Mona ni foto.)
9 Tulondoluele nzila imo ya kubombia eevi kulangilila nangue tubatonene balupua ni bankazi betu elia izimbuilue mu lifungu litwapita. Paulo waalandile eevi: “Koselezyanie.” Juu ya ki kukoselezia bange ni nzila ya mana ya kulangilila nangue tubatonene? Kukoonkana ni referanse imo ya Bibilia, mulandu ‘kukoselezia’ olia ubombiiziwe na Paulo, uli na mana ya “kwimana peepi ni muntu eevi kumukoselezia musita lwali mukusipikizia maavia akata.” Pakaako, kine twamukoselezia lupua ao nkazi, keekio kilangiliile nangue twamukwasia atwalilile kumubombela Yehova wali wa kisinka. Lyonse, kine twamukoselezia lupua ao nkazi, tuli twalangilila nangue tumutonene.—2 Bakor. 7:6, 7, 13.
10. Mibeele ya nkumbu ipalameene siani ni mibeele ya kukoseleziana?
10 Mibeele ya nkumbu ipalameene saana ni mibeele ya kukoseleziana. Mu nzila ki? Muntu wa nkumbu ali wasonseziiwa kubakoselezia baalia bali ni maavia ni kubakwasia. Pakaako, nkumbu i ili yatusonsezia kukoselezia bange. Kukoonkana ni bulondolozi bwakue Paulo, nkumbu i ili yamusonsezia Yehova abakoselezie bange. Paulo walanda nangue Yehova ni “Baba wa luse lulambaleele kabili ali wakoseleziana.” (2 Bakor. 1:3, NWT) Mu leeli lileembo, Paulo wabombia milandu “luse lulambaleele” eevi kulondolola vya kubonvuila bange nkumbu. Pakaako, “Leeza ali wakuutua Baba, ao Nsulo ya luse lulambaleele paantu ali wabonvuila saana bantu nkumbu.” Kabili, ezio nkumbu ili yamusonsezia atukoselezie mu “maavia etu onse.” (2 Bakor. 1:4) Kwa mufuno, menda aswetele alia ali afuma mu kasulo ali abateekia mutima baalia bonvuile kyaka. Evio vyenka, Yehova ali wabateekia mutima ni kubakoselezia baalia bali mu maavia. Kunti twamupala siani Yehova kupitila kunvuila bange nkumbu ni kubakoselezia? Nzila imo ili kutukwasia kukita evio ni eezi, kukuzia mibeele ili kuviinda kutusonsezia kubonvuila bange nkumbu ni kubakoselezia. Ni mibeele ki itupalile kukuzia?
11. Nga vilandile Bakolosai 3:12 ni 1 Petro 3:8, ni mibeele ki inge itupalile kuya twali nayo eevi tutwalilile kubatona bange ni kubakoselezia?
11 Ni kiki kili kutukwasia kutwalilila kubatona bange ni “kutwalilila kukoseleziana” kila busiku? Tupalile kukuzia mibeele ilambaleele, nga evelia kwemenana, kutonana, ni kuwamiiziana. (Soma Bakolosai 3:12; 1 Petro 3:8.) Ezio mibeele kunti yatukwasia siani? Kine twabonvuila balupua betu nkumbu, kabili kine twabeemena saana, keekio kili kutukwasia tutone saana kubakoselezia musita ubali ni maavia. Nga vyaalandile Yesu, “kanua kali kalanda biizuzi mu mutima. Muntu aweeme ali wafumia bintu biweeme bizibilue mu mutima wakue.” (Mat. 12:34, 35) Kubakoselezia balupua ni bankazi betu baalia bakabiile kukwasiiwa kuli pakati ka nzila ya mana saana ya kulangilila nangue tubatonene.
KUNTI TWAKITA SIANI EEVI TUTWALILILE KUTONANA SAANA?
12. (a) Juu ya ki tupalile kuya twakengeele? (b) Ni kiipuzio ki kituli kulondoluela?
12 Fwe bonse tukabiile kutwalilila ‘kutonana.’ (1 Yoan. 4:7) Inzi, ni kintu kya mana kulanguluka nangue Yesu waatusokele eevi: “Ntono yaakakeepa.” (Mat. 24:12) Yesu taalandile nangue bengi pakati ka basambi bakue bakaba kulekela kutonana. Anzia evio, tupalile kuya twakengeele eevi te kunti tusonseziiwe na bantu ba mu keenu kyako baalia basili na ntono. Musita utukili ni azo malanga, tulondoluele keeki kiipuzio kya mana: Ni kiki kili kutukwasia kumana kine tubatonene saana balupua ni bankazi betu?
13. Juu ya ki kunti twamona kyakolele kubatona bange?
13 Nzila imo ya kutukwasia kumana kine tubatonene saana balupua ni bankazi betu ni eezi, kutoosia vituli twakita mu aali paleepale mu buikazi bwetu. (2 Bakor. 8:8) Eevi tuviinde kukita evio, tupalile kutontonkania milandu yaalandile mutumua Petro. Waalandile eevi: ‘Pa beebi byonse . . . tonane saana, paantu kutona i kuli kwapuisia ao kuviimba bibalo ao mazaambi.’ (1 Pet. 4:8) Pakaako, bilubo ni kusipuililika kwa bange kunti byalengia kiye kyakolele kuli fwefue kubatona.
14. Nga vilandile 1 Petro 4:8, tupalile kubatona siani balupua ni bankazi betu? Leeta mufuano.
14 Ale tutontonkanie milandu yakue Petro twapoozeleko maano. Seemu ya kuanza ya mulongo wa 8 ilondoluele vitupalile kubatona balupua ni bankazi betu. Ezio seemu ilandile eevi: “Tonane saana.” Paapa, bulanzi “saana,” bolia bubombiizie Petro, mulandu kwa mulandu buli na mana ya “kukunzulula.” Seemu ya bubili ya ozo mulongo ilondoluele bintu bituli kuviinda kukita kine tubatonene saana bange. Kine tubatonene saana balupua ni bankazi betu, tuli kuviinda kuviimba bilubo byabo. Kunti twasininkizia keekio kupitila ozu mufuano: Ezia kutontonkania meza ilipo bintu bingi biinoonekele. Muntu kunti waviinda kubuula kitambala ni kukikunzulula saana eevi kifikiile kuviimba, apanasie kintu kimo ao bintu bibili bili pa meza, inzi bintu bingi. Evio vyenka, kine tubatonene saana balupua ni bankazi betu, kunti twaviinda kuviimba ao kweleela, apanasie kilubo kimo ao bibili, inzi tuli kuviimba ‘bibalo ao mazaambi engi.’
15. Kine tubatonene saana balupua ni bankazi betu, ni kiki kituli kuviinda kukita? (Bakolosai 3:13)
15 Kine tubatonene saana balupua ni bankazi betu, tuli kuviinda kubeleela bilubo byabo atasie kine kukita evio kukolele saana. (Soma Bakolosai 3:13.) Kine twaviinda kubeleela bange, keekio kili kulangilila nangue tubatonene saana, kabili nangue tutonene kumusansamusia Yehova. Ni kiki kinge kili kuviinda kutukwasia kweleela bange ni kutiina kufipua lubilo palua beelia bibali bakita?
Nga evelia vituli twasuunga ma foto aweeme ni kupooza alia abiipile, tuli twatona kusuunga mu maano nsita iweeme ituli twapisia pamo ni balupua ni bankazi betu, tetwizi kupooza maano ku bilubo byabo (Mona lifungu lya 16-17)
16-17. Ni kiki kinge kili kuviinda kutukwasia kweleela bilubo biniini bya bange? Leeta mufuano. (Mona ni foto.)
16 Pooza maano ku mibeele iweeme ya balupua ni bankazi bobe. Te kupooza maano ku bilubo byabo. Tulande, muli mukupisia musita uweeme pamo ni balupua ni bankazi. Ku mpeleezio, weewe wakwata foto ya kikundi kyonse. Kisia, wakwata ni ange ma foto abili paantu paange elia ya kuanza teiviinda kuya yafumine buino. Pakaako, waaluka na ma foto atatu. Inzi pa foto imo pakati ka azo ma foto, pali lupua umo asisekele. Uli kuikita siani ezio foto? Uli kuivuta paantu ukwete ma foto ange abili, paalia pamusekele mwe bonse.
17 Kunti twapalania azo ma foto na bintu bituli twabiikilila. Lingi tuli twabiikilila nsita iweeme itwaapisiizie pamo ni balupua ni bankazi betu. Inzi pakati ka ezio nsita, paange kunti walanguluka nangue lupua ao nkazi umo waalandile ao waakitile kintu kimo kisipalile. Weewe, kunti wakita siani? Nga eveliasie vyuli kuviinda kuvuta foto imo pakati ka ma foto auli nao, kunti kyawaama ufumie mu maano keekio kilubo. (Tus Maf. 19:11; Baef. 4:32) Kulanguluka nsita iweeme itwaapisiizie pamo ni lupua ao nkazi, kuli kutukwasia kulaba bilubo biniini byaakitile. Ezio nsita iweeme itwaapisiizie pamo, i itupalile kubiikilila ni kuimona kuya yali ya mana.
JUU YA KI LOONU NI KINTU KYA MANA SAANA KUYA TWATONEENE?
18. Ni bintu ki bikata bitwasambilila mu leeli lyasi palua ntono?
18 Juu ya ki tutonene kutwalilila kutonana saana? Nga vitwafuma mu kumona, musita utuli twalangilila ntono ku balupua ni bankazi betu, tuli twalangilila nangue tumutonene Yehova. Eba, kunti twalangilila siani nangue tubatonene balupua ni bankazi? Kunti twakita evio kupitila kubakoselezia. Kine tuli ni nkumbu, tuli kuviinda “kukoseleziana.” Kunti twakita siani eevi tutwalilile kutonana saana? Kupitila kweleela bilubo bya balupua ni bankazi betu atasie kine kikolele kukita evio.
19. Juu ya ki loonu tupalile kutona balupua ni bankazi betu?
19 Juu ya ki loonu tupalile kutona balupua ni bankazi? Mona nsaambu yaalandile Petro. Waalandile eevi: “Mpeleezio ya bintu byonse yapalama. Kansi, . . . tonane saana.” (1 Pet. 4:7, 8) Paantu mpela ya keenu kyalo yakila kupalama, ni kiki kyakaba kukitika? Yesu waalandile eevi lwa ntaanzi palua basambi bakue: “Ntundu yonse yaakamisuula pa mulandu wane.” (Mat. 24:9) Eevi tuviinde kusipikizia kooko kusuulua, tupalile kutwalilila kuya twali mu buumo. Kine twakita evio, Sataana takaba kuviinda ata kaniini kutulekenkania paantu ntono i “kifundo kipuililikile kya buumo.”—Bakol. 3:14, NWT; Baf. 2:1, 2.
LWIMBO 130 (Lwa Kiswahili) Uye Waeleela
a Loonu, ni kintu kya mana kutona balupua ni bankazi betu. Juu ya ki? Kabili kunti twakita siani eevi kulangilila saana mibeele ya ntono?