Iʼwiri jarecho jiti mi ke bineli ka nílima | ¿Piri aní echi Biblia?

Echi pagótami omáana Wichimóbachi bineli ka nili. Jaré doctores aní japi iʼwiria jarecho isimí japi ta ke awénili ka nílipo.

• “Iʼwiria echi pagótami japi newalé, tamó kaníliti alí tamó iʼwiri jiti iʼwérili nokiboa ke awénili mochía” (Institutos Nacionales de la Salud, echomí Estados Unidos).

Echi Biblia aní piri ta nokisáré iʼwírimia jarecho. Ata echi riká nokisáaká, ke ti awénili ka nílipo.

Japi mi omeri isiá

Nijíami nii. Iʼwérili isí napawika simiria jarecho yúa alí nijía japi mi olá. Ami nijíami nísaká, jarecho ko we simá nílima alí mujé amígowala nínilima.

• Echi Biblia aní: “Galá ʼyasi echi auché jaré [...] suwaba mapu ikí aboni newalé. Aʼlí Riosi ayena cho ʼyemi mi ʼyama suwaba mapu ikí ʼyemi aboni newalé” (Lucas 6:38).

Aʼláala namuti isí iʼwírimia jarecho. Iʼwérili isí iʼwiria echi japi we jilika piré. Ami omeri aʼlá kipúa jarecho nátika japi chu nili o isiá jarecho namuti iʼwírimia echi jiti ke jilí nirama pirea.

• Echi Biblia aní: “Japi we aʼlá amigo ju ko, sinibí we aʼlá galé echi amigo” (Proverbios 17:17).

Ami che machináliaká japi mi isísaré jiti mi aʼlá amigos olama, leeri echi artículo “La familia y los amigos”.