Julio

Jesús ndiʼyáridoo xóo ku̱mu̱u̱ ga̱jma̱a̱ xóo endxa̱ʼwáminaʼ Anu̱u̱, nikujmaa dí xúʼko̱ nindxu̱u̱ ga̱jma̱a̱ rí xóo niʼthí ma̱ngaa rí xóo niʼni, asndu milagro dí niʼni (Juan 14:9). Guʼyáá ndiéjunʼ eʼsngúlú náa milagro dí niʼni Jesús. Jesús ga̱jma̱a̱ Anu̱u̱ nandún kuyulúʼ wéñuʼ. Índo̱ Jesús nixtáa náa tsu̱du̱u̱ Ku̱ba̱ʼ nisngájma nguáthá eyoo kaʼñúún xa̱bu̱ índo̱ nijmuu tsiakii ndrígóo mu mambáñún xa̱bu̱ ga̱jma̱a̱ milagro dí niʼni. Mbá miʼtsú a̱jmi̱i̱n xa̱bu̱ bi̱ tsékruigu̱u̱n nitháán ga̱jma̱a̱ aʼwá gakhi̱i̱ dí mambáñún (Mat. 20:​30-34). Náa historia naʼthí dí Jesús “nigáwi̱i̱nʼ a̱jkiu̱u̱n kaʼñún” ga̱jma̱a̱ dí nda̱wa̱á niʼni dí mambaʼta̱a̱ idún. Náa ajngáa griego najuiʼtájuíi xóo “nigáwi̱i̱nʼ a̱jkiu̱u̱n kaʼñún” mu miʼtá mbá rí xóo nikumu̱u̱ asndu náa awúún a̱jkiu̱u̱n. Rí nigáwi̱i̱nʼ wéñuʼ a̱jkiu̱u̱n nisngájma dí ra̱ʼkhá tháán nindoo kaʼñúún xa̱bu̱ ga̱jma̱a̱ numuu rúʼko̱ nixkaxi̱i̱ maxnún dí muphu bi̱ nixkidxu̱u̱n ga̱jma̱a̱ maʼni thanún bi̱ niguaʼdáá nandii (Mat. 15:32; Mar. 1:41). Ikha jngóo nandoo nduʼyáá gajkhun dí Jeobá Dios bi̱ “nagáwiinʼ a̱jkiu̱u̱n kaʼyulú” ga̱jma̱a̱ A̱ʼdióo nandún kuyulúʼ wéñuʼ ga̱jma̱a̱ nagawúnʼ wéñuʼ índo̱ nduyáá dí numíniiʼlú (Luc. 1:78; 1 Ped. 5:7). Ikhiin nandún ga̱jma̱a̱ xúgíʼ a̱jkiu̱ún muni gámbáa xkujndu dí naʼni mumíniiʼ xa̱bu̱ numbaaʼ. w23.04 3 kutriga̱ 4, 5

Ndayóoʼ muʼgími̱jna̱ muʼni xó má eʼngo̱o̱ mu xúʼni gachíí ku̱ma̱ ndrígulú ga̱jma̱a̱ xúgííʼ dí rígá náa numbaaʼ ndrígóo Gixa̱a̱. Mu muñewa̱a̱n ku̱ma̱ ndrígulú ga̱jma̱a̱ mundxaʼwamíjná dí májánʼ, ndayóoʼ dí muraxnuu ga̱jma̱a̱ muʼnigajmaa Biblia, mu̱ʼgua̱ reunión ga̱jma̱a̱ mu̱ʼgua̱ guʼtáraʼa. Jeobá naʼthúlú dí nditháan xániñulú muraʼníí mbóoʼ dí xáʼngulú (1 Cor. 10:​12, 13). Mu maʼngulú maguajúnlú jmbu náa iwáá mbiʼi mingíjyúuʼ rígi̱. Jeobá nandoo dí ‹muʼtháán xúgíʼ dí gíwa̱nʼ náa a̱jkiu̱lú› (Sal. 62:8). Ikha jngóo atríya̱ʼ xúgííʼ mbiʼi mu mu ma̱ra̱ta̱a̱n xúgííʼ dí kajkuáa náa a̱jkia̱a̱nʼ. Atani̱ mba̱a̱, araxnáa núma̱aʼ ga̱jma̱a̱ numuu xúgííʼ dí ikhaa naʼni, atanda̱ʼa̱a̱ mu xámiñaaʼ marataráʼa ga̱jma̱a̱ mambáyáaʼ matraʼníí xkujndu. Ma̱ngaa dí maʼnga̱a̱ʼ matani̱ ga̱jma̱a̱ dí nagua̱ʼa̱ matani̱. Nimbáa xátatsiʼñáʼ dí marikha̱ʼ dí maratakáñíí má xúʼko̱ Jeobá. w23.05 6, 7 kutriga̱ 17, 18

Náá numuu ejkualú reunión rá. Najkualu numuu dí nandulú muʼni mba̱a̱ Jeobá (Sal. 26:12; 111:1). Ma̱ngaa ikhí ma̱ndoo muxnamíjnálu tsiaki̱i̱ náa mbiʼi gakhi̱i̱ dí kuwáanʼlu xúgi̱ (1 Tes. 5:11). Ikha jngóo índo̱ nuʼni comentar nuʼnimbáníí mbá nájma̱ dí gíʼdoo numuu rígi̱. Mú rígá tikhu dí naʼniulú gakhi̱i̱: Numuu dí ra̱ʼkhá tháán míñulú dí asndu naʼni dí xúʼni comentar, o nuxujxí mbaʼa aʼphu̱ ñawúnlú mu tséjxnulú xúgíʼ náa dí ikháanʼ nindulú muʼthá. Apóstol Pablo niʼthí dí gíʼdoo wéñuʼ numuu muxnámíjnálu tsiakii. Á mu nduʼyáá dí comentario dí guxna maʼni dí maxnún tsiaki̱i̱ a̱ngiu̱lú ga̱jma̱a̱ xúʼthá wéñuʼ ma̱ngaa maʼni rí makujmaa fe dí kuaʼdáálú, rígi̱ gáʼni dí xámiñulu wéñuʼ índo̱ guxujxí ñawúnlú. Á mu tséʼni̱ comentar xó má endulú ikháan, makuwáanʼlu gagi índo̱ guʼyáá dí eʼwíinʼ nakánún muni̱i̱ comentar (1 Ped. 3:8). w23.04 20, 21 kutriga̱ 1-3

¡Xa̱bu̱ ñajunʼ niʼthí mbájmbu! Dí judío bi̱ nikúwíin mbá 70 tsiguʼ náa Babilonia ma̱ndoo matangi̱ín náa Isarel, náa xuajñún (Esd. 1:​2-4). Numuu dí xa̱bu̱ bi̱ kúwá náa Babilonia na̱nguá eniñu̱u̱nʼ magu̱ún xa̱bu̱ bi̱ naguwáʼ kudiin, mu i̱ndó Jeobá niʼngo̱o̱ niʼni dí marígá rígi̱ (Is. 14:​4, 17). Babilonia niguma gámbáa nda̱wa̱á dí imba̱a̱ nuxi̱ʼ xa̱bu̱ ñajunʼ niʼthí dí judío ma̱ndoo magu̱ún. Mámbáa judío, itháán má bi̱ kuya̱ edxu̱ún náa mbá guʼwíin ndiyóoʼ muraʼwíi dí muni̱: Á mu magajníín náa Babilonia o maguanúú má ikhí. Tikhuin niʼñúún gakhi̱i̱ muraʼwíi dí muni̱. Nikúwá tikhun judío bi̱ wanii ikha jngóo niʼñúún gakhi̱i̱ maguáan numuu dí tsínguánʼ. Ga̱jma̱a̱ mbaʼin dí ikhiin nigumiin náa Babilonia, ikha jngóo i̱ndó ikhí nindxu̱u̱ xuajen dí niniʼnuuʼ. Ikhiin ndiyáá dí Israel ninindxu̱u̱ mbá xuajen náa nikúwíin wajin xiʼñúnʼ, ma̱ngaa tikhuin judío niguaʼdáá wéñuuʼ mbújkha̱a̱ ikhí. Numuu rúʼko̱ jngóo niʼñúún gakhi̱i̱ muniñaaʼ guʼwún ga̱jma̱a̱ ñajunʼ ndrígún mu maguáan makuwá náa mbá xuajen dí tséniʼnuuʼ. w23.05 14 kutriga̱ 1, 2

Náa Ajngáa rawuunʼ Dios naxkajxáánʼ dí maʼngulú ga̱jma̱a̱ magáwíinʼ itháan a̱jkiu̱lú ma̱ngaa dí gaʼndulúʼ kuʼyamijná itháan. Lucas 21:19 naʼthí: “Á mu naʼngala asndu índo̱ gártumuu mbiʼi maguma káwáanʼ”. Colosenses 3:12 naxkajxáánʼ: “Gusngajmá dí nagáwíinʼ a̱jkia̱la kuyamíjna̱” ga̱jma̱a̱ 1 Tesalonicenses 4:​9, 10 naʼthí: “Dios xtáa má raʼsngála dí maʼndala kuyamíjna̱. […] Mú a̱ngui̱nʼ, ikháanʼxu̱ nunda̱ʼa̱la rí musngajmá xóó itháan ngajua rígi̱”. Xúgíʼ ajngáa rígi̱ nijkha náa inún xa̱bu̱ bi̱ nusngajma má dí naʼngu̱u̱n ga̱jma̱a̱ nagáwíinʼ a̱jkiu̱ún ma̱ngaa dí nandún kuyamijná, mú ndiyóoʼ dí muni tsiakimijna musngajmá itháán. Ikháá má kayuuʼ mangáanʼ, mbaʼyóoʼ musngajmá itháán cualidad rígi̱. Atayáá xú káʼnii nini̱ timbíin cristianos mu mba̱ja̱a̱ cualidad rígi̱, mu matayaa xú káʼnii ma̱ndoo matayaridún ma̱ngaa xú káʼnii gámbáyulú cualidad rígi̱ mu makuwáanʼ xawii índo̱ gárígá mbá ga̱ʼkhu̱ rí majphú mba̱a̱. Índo̱ gági̱ʼdu̱u̱ ga̱ʼkhu̱ rí majphú mba̱a̱, ikháán xáʼniaaʼ gakhi̱i̱ maʼnga̱a̱ʼ. w23.07 3 kutriga̱ 4; 4 kutriga̱ 8

Bi̱ kaxtaʼwíin ga̱jma̱a̱ “eʼwíinʼ mugu̱”, gíʼmaa muʼgualu má xúʼko̱ náa kamba̱a̱ rí “Kamba̱a̱ rí Kaʼwu” (Juan 10:16). Asndu nákha 1919 mbaʼin wéñuuʼ xa̱bekha ga̱jma̱a̱ gu̱ʼu̱ mangiin e̱ji̱n nigíʼdi̱i̱ nijgruigun náa “Kamba̱a̱ rí Kaʼwu” índo̱ nigájni̱ín náa Babilonia rí Mba̱a̱ dí nindxu̱u̱ xúgíʼ religión dí ragájkhun. Índo̱ Judíos nitangiín náa Babilonia, Jeobá niʼni dí nimbá nda̱a̱ dí garikhún náa kamba̱a̱ (Is. 57:14). Xúʼko̱ má niʼni ga̱jma̱a̱ “Kamba̱a̱ rí Kaʼwu” dí rígá dí mbiʼi xúgi̱ ma̱ngaa. Mbayuuʼ tsiguʼ ginii nákha xóó tséʼni 1919 Jeobá nijmiuu xa̱bu̱ bi̱ nuni̱ ñajuunʼ mu muni̱ kaʼwii kamba̱a̱ (atayáá ma̱ngaa Isaías 40:3). Xóo muʼthá ikhiin nini̱ “ñajuunʼ” Dios mu xúʼko̱ nda̱wa̱á xa̱bu̱ bi̱ niniguunʼ majmañún ga̱jma̱a̱ numuu ikhaa muniñaaʼ religión dí ragájkhun ga̱jma̱a̱ matu̱ʼu̱u̱n náa xuajñuu, náa mbuyamajkuíí Dios xó má kaʼyoo. w23.05 15, 16 kutriga̱ 8, 9

Jeobá nandoo rí makuwáanʼ gagi ruʼni ñajuunʼ ga̱jma̱a̱ xúgíʼ a̱jkiu̱lú (2 Cor. 9:7). Ndíjkha rí gíʼmaa muʼnimíjna̱ muʼnimbaníí meta dí muʼni ñajuunʼ Dios á mu na̱nguá egájnuu asndu náa a̱jkiu̱lú rá. Gundxaʼwamíjna̱ ga̱jma̱a̱ numuu xkri̱da ndrígóo apóstol Pablo. Ikhaa niʼthí: “Na̱ni̱ gínáa xuyuʼ ga̱jma̱a̱ na̱ni̱ rí manindxu̱u̱ ñumbáá ndrígóʼ” (1 Cor. 9:​25-27). Pablo nigíminaʼ maʼni dí Jeobá nigíʼthu̱u̱n maʼni maski má niríga mbiʼi dí na̱nguá edxuu a̱jkiu̱u̱n. Lá nidxuu Jeobá ga̱jma̱a̱ numuu xúgíʼ rí Pablo niʼni ráʼ. Xúʼko̱. Jeobá niʼni tsajkurámáaʼ ga̱jma̱a̱ numuu xúgííʼ tsiakii rí niʼni (2 Tim. 4:​7, 8). Jeobá ma̱ngaa nadxuu índo̱ ndaʼyoo dí nuʼni tsiakimíjna̱ muʼnimbáníí meta ndrígulú, maski má ajndu tséxnáa a̱jkiu̱lú muʼni. Náa numuu rá. Nuʼnilú numuu dí nandulú kuʼyáá maski asndu tsénigulú ñajunʼ dí niʼgímíjna muʼni. Jeobá niʼni tsakuramáʼ Pablo ga̱jma̱a̱ xúʼko̱ má gáʼni tsajkurámáanʼlu mangáánʼ á mu nuʼni tsiakimíjna̱ (Sal. 126:5). Índo̱ nduʼyáá dí Jeobá naʼni tsajkurámuuʼ ñajunʼ dí nuʼni, mbáa rúʼko̱ gaʼni dí maʼdxulu itháán. w23.05 29 kutriga̱ 9, 10

Apóstol Pablo niʼthí dí bi̱ xákáwíinʼ náa mbiʼi ndrígóo Jeobá nindxu̱ún xóo bi̱ nunuʼ. Índo̱ mbáa xa̱bu̱ naʼgu, na̱nguá eʼyoo ndiéjunʼ erígá náa xtáa o xú káʼnii enújngoo mbiʼi. Ikha jngóo na̱nguá eʼngu̱u̱n gúyáá índo̱ narígá mbá di gíʼdoo numuu. Ikhaa má kaʼyuuʼ erígá dí mbiʼi xúgi̱, mbaʼin xa̱bu̱ nindxu̱ún xó má bi̱ nunuʼ (Rom. 11:8). Na̱nguá enimbu̱ún dí xúgi̱ kuwáanʼ “náa iwáá mbiʼi” ga̱jma̱a̱ dí inuu ma̱ʼkha̱ majphú mba̱a̱ ga̱ʼkhu̱ (2 Ped. 3:​3, 4). Mú ikháanʼlu nduʼyáá dí mámbá mbiʼi dí nanújngoo itháan gíʼdoo numuu dí xáguanúlú muʼnuʼ (1 Tes. 5:6). Ikha jngóo ndayóo rí xáxmiéjunlú ga̱jma̱a̱ xákawabáanʼ. Ndíjkha rá. Numuu rí numbaaʼ rígi̱ nandoo dí muxuʼdámíjná náa política ga̱jma̱a̱ xóo endxaʼwamíjna̱ ikhiin. Mutsudáánʼ itháan mu muʼni xó má eʼni numbaaʼ, numuu dí na̱ʼkha̱ mijngii mbiʼi ndrígóo Jeobá. Mú, tséyóoʼ maxmiéjunlú mu mbuʼyáá xú káʼnii guriʼña̱a̱, numuu rí espíritu ndrígóo Dios maxnúlú tsímáá ga̱jma̱a̱ maʼni dí xájmulú ma̱ngaa mambáyúlú mu muraʼwíí májánʼ rí gúʼni (Luc. 12:​11, 12). w23.06 10 kutriga̱ 6, 7

Ndiéjunʼ e̱ʼkha̱ ginii edxa̱a̱ʼ ikháán ga̱jma̱a̱ numuu Sansón rá. Dí nindxu̱u̱ mbáa xa̱bu̱ bi̱ mixkujiʼ wéñuuʼ. Gajkhun má ninindxu̱u̱ mbáa xa̱bu̱ bi̱ nigiʼdoo tsiaki̱i̱ ga̱jma̱a̱ nikiéʼkúun, rúʼko̱ niʼni rí mamínuuʼ. Maski ajndu xúʼko̱, Jeobá ndiʼyoo nguáthá mba̱a̱ fe rí nigiʼdoo xúgíʼ mbiʼi rí nixtáa. Ga̱jma̱a̱ niraʼwíí dí maguanúʼ xkridoo náa Biblia mu mbiʼyuu majmañulú ga̱jma̱a̱ numuu ikhaa. Jeobá nijmiuu Sansón mú maʼni rí mbáa xa̱bu̱ xáʼngo̱o̱ gaʼni, mú maʼnikríyaaʼ xuajñuu Israel. Tsiguʼ nda̱wa̱á rí nikháñuu, Jeobá niʼni rí apóstol Pablo maʼnirámáʼ, mbiʼyuu Sansón náa mbá lista náa na̱ʼkha̱ xkridún bi̱ niguaʼdáá fe (Heb. 11:​32-34). Sansón nimbáyuminaʼ náa Jeobá asndu náa rí mbiʼi mingíjyúuʼ rí nixtáa. Ma̱ndoo mbuʼyaridáá ga̱jma̱a̱ majmañulú eʼwáʼ náa xkridoo. w23.09 2 kutriga̱ 1, 2

Rí mambáyulú mu maʼngulú nindxu̱u̱ rí muʼtákáñii má xúʼko̱ Jeobá (1 Tes. 5:17). Mbáa ikháán xúgi̱ na̱nguá xtaa ratraʼníí xkujndu gakhi̱i̱. Mú, lá naratákáñii Jeobá índo̱ nakiʼnán, najnga̱wa̱a̱n, o tsétayáá dí matani̱ ráʼ. Á mu naguʼwanʼ mataʼyáaʼ Jeobá índo̱ xtaʼdáá xkujndu, rúʼko̱ gámbáyáaʼ ma̱ngaa nda̱wa̱á índo̱ gáʼni itháán gakhi̱i̱ makuwáánʼ. Ikhú matayaa gajkhun dí Jeobá ndaʼyoo májánʼ nguáná ga̱jma̱a̱ xú káʼnii mambáyaaʼ (Sal. 27:​1, 3). Itháán xáʼniulú miʼskhaa muraʼníí ga̱ʼkhu̱ rí majphú mba̱a̱ á mu naʼngulú nuraʼníí xkujndu dí nuguaʼdaa xúgi̱ (Rom. 5:3). Mbaʼin a̱ngiu̱lú nakumu̱ún dí índo̱ naʼngu̱u̱n nuraʼníí mbá tsáʼkhá dí gakhi̱i̱, itháán tséʼniún mingíjyúuʼ imbo̱o̱ dí gáʼkha̱. Naʼngu̱u̱n nuraʼníí tsáʼkhá numuu rí Jeobá nambáñúún, rúʼko̱ naʼni rí fe ndrígu̱ún maʼni itháán gújkhúʼ, ga̱jma̱a̱ nambáñúún maʼngu̱u̱n muraʼníí i̱ʼwáʼ tsáʼkhá dí gáʼkha̱ (Sant. 1:​2-4). w23.07 3, 4 kutriga̱ 7, 8

Jeobá nakro̱ʼo̱o̱ kaʼyulú numuu rí ikhaa guabaaʼ ga̱jma̱a̱ májánʼ a̱jkiu̱u̱n. Mbá xkri̱da, nisngájma rí májánʼ a̱jkiu̱u̱n índo̱ inuu maʼni gámbi̱i̱n xúgíinʼ xa̱bu̱ bi̱ ramíjíin bi̱ nikúwíin náa Sodoma. Ikhaa nikuʼmiin tikhun ángeles mu magún gúthán Lot rí magayúu náa kúbá. Mú Lot nimiñuu maʼga ikhí. Ikha jngóo nindo̱ʼo̱o̱ Jeobá dí á mu ikhaa ga̱jma̱a̱ bi̱ kúwá náa goʼwóo ma̱ndoo magún náa Zóar, mbá xuajin chíʼgíiʼ náa Dios má nindxa̱ʼwa̱míjna̱ ma̱ngaa maʼni gámbáa. Jeobá ma̱ndoo maʼthúu̱n Lot rí maʼnimbo̱o̱ xó ma eʼthúu̱n ikhaa, mú na̱nguá niʼni xúʼko̱ káʼnii, ikhaa niʼdxawun rí niʼthúu̱n Lot maski asndu rúʼko̱ niʼni rí xáʼnigámbáa xuajin Zóar (Gén. 19:​18-22). Tsiguʼ nda̱wa̱á, Jeobá nisngájma rí nigáwíinʼ a̱jkiu̱u̱n nini xa̱bu̱ bi̱ nikúwíin náa Nínive. Ikhaa nikuʼmaa profeta Jonás mu maʼthúún rí ikhiin ga̱jma̱a̱ xuajin maguma̱a̱ gámbáa numuu rí nuni̱ dí raʼkhí, mú índo̱ ninivitas nitanga̱a̱ a̱jkiu̱ún rí nini̱, Jeobá nigáwíinʼ a̱jkiu̱u̱n kaʼñún ga̱jma̱a̱ niʼni mba̱a̱ a̱jkiu̱u̱n kaʼyoo xuajin (Jon. 3:​1, 10; 4:​10, 11). w23.07 21 kutriga̱ 5

Ndiéjunʼ ma̱ndoo majmañulú historia ndrígóo Jehoás rá. Ikhaa ninindxu̱u̱ xóo mbá ixi̱ rí ajmu̱u̱ majkhaʼ, dí mbaʼyóoʼ rí mixtambáyii mu mawiji̱ jmbu, rí asndu xóo ndayóoʼ mawi̱ji̱ mbóo ixi̱ náa nijniúu mu mambáyúu, ikhaa ninindxu̱u̱ ndxajkuun Jehoiadá. Índo̱ bugi̱ nikháñuu ga̱jma̱a̱ nigíʼdúu niʼdxawuun rí nuthi xa̱bu̱ bi̱ tsémiñún kuyáá Jeobá: Ikhaa nigíʼdúu niʼni rí Jeobá na̱nguá nigu̱u̱ʼ. Rígá mbóʼ dí naʼsngúlú: Na̱nguá eʼyamajkuíílu Jeobá i̱ndó numuu rí a̱ngiu̱lú ga̱jma̱a̱ bi̱ kúwá náa guʼwúlú numbayúlúʼ ga̱jma̱a̱ nuthi rí gíʼmaa muʼnilú. Mu muʼguá kanuu itháán náa Jeobá, gíʼmaa muʼni mba̱a̱ rí nandulú kuʼyáá ga̱jma̱a̱ gamajkhu rí kuáʼdáá náa Jeobá, rígi̱ muʼnilú á mu nuʼnigajmaa ma̱ngaa nundxa̱ʼwa̱míjnalú ga̱jma̱a̱ nuʼtákáñii tsejtsíí mbiʼi (Jer. 17:​7, 8; Col. 2:​6, 7). Jeobá na̱nguá nda̱ʼa̱ mbóo rí xáʼngulú guʼni. I̱ndó rí nandoo ikhaa nindxu̱u̱ xó ma na̱ʼkha̱ raʼthí náa Eclesiastés 12:​13, rí naʼthí: “Gamiñáʼ xtayáá Dios bi̱ gajkhun ga̱jma̱a̱ atatsimbaaʼ rí naʼtáñajunʼ. Numuu dí rígi̱ kaʼyoo maʼni xa̱biya̱”. Á mu nduʼyamajkuíí Jeobá ma̱ndoo muraʼníí asndu ndiéjunʼ má xkujndu gáʼkha̱ jma̱a̱ muguajúnlu jmbu. Nimbáa xáʼni gachúu xóo mbájxulu gajmiulúʼ Jeobá. w23.06 18, 19 kutriga̱ 17-19

Náa versículo 5 nagi̱ʼdu̱u̱ naʼthí xígi̱: “Bi̱ nigi̱ʼi̱ náa xílí niʼthí” (Apoc. 21:5a). Ajngáa rígi̱ nindxu̱u̱ kiejuunʼ, numuu rí xígi̱ nagi̱ʼdu̱u̱ naʼthí náa rí niwasngájma rí na̱ʼkha̱ náa Apocalipsis náa Jeobá niʼthí bájmbu. Rígi̱ nindxu̱u̱ dí niʼthí mínaaʼ Jeobá, raʼkháa mbáa ángel ni má Jesús. Ga̱jma̱a̱ rígi̱ naʼni muʼnimbulú náa ajngáa rí xóó na̱ʼkha̱ raʼthí nda̱wa̱á, numuu rí Jeobá nindxu̱u̱ mbáa “Dios bi̱ tséʼni nduwaʼ” (Tito 1:2). Gíʼma muʼnimbulú ga̱jma̱a̱ xúgíʼ a̱jkiu̱lú dí naʼthí náa Apocalipsis 21:​5, 6. “¡Atayáá!” náa ajngáa griego najuiʼtájuíi xígi̱ kaʼnii ajngáa rígi̱, dí na̱ʼkha̱ mbaʼa nuthu náa Apocalipsis. Ndiéjunʼ dí xóó na̱ʼkha̱ raʼthí rá. Dios naʼthí: “Xtáá ra̱ni̱ xúgíʼ nuxi̱ʼ”. Maski ajndu Jeobá xtáa raʼthí dí maʼni̱i̱ nda̱wa̱á, mú ikhaa naʼthí dí asndu xóo xtáa raʼni má xúgi̱ (Is. 46:10). w23.11 3, 4 kutriga̱ 7, 8

Apóstol Pedro ndiyóoʼ rí maʼni tsiakimínáʼ ga̱jma̱a̱ rí naʼni maxpátríguíi. Guʼyáá tikhuʼ dí ikhaa. Índo̱ Jesús niʼthúún xa̱bi̱i̱ rí mbaʼyóoʼ mamínuuʼ ga̱jma̱a̱ makhañúu xóo má naʼthí náa profecía dí na̱ʼkha̱ náa Biblia, Pedro nirikhoo Jesús (Mar. 8:​31-33). Ma̱ngaa mbaʼa nuthu nigi̱ʼdu̱u̱ gajmíi̱n a̱ngui̱i̱n mu muthi tsáá phú itháán gíʼdoo numuu (Mar. 9:​33, 34). Mbruʼun índo̱ inu muxiyáa Jesús Pedro nirujtu rígú cháʼwuun mbá xa̱bu̱ (Juan 18:10). Ga̱jma̱a̱ ikháá má mbruʼun rúʼko̱ niʼni gaʼduunʼ rí tséʼniniiʼ Jesús, niʼni rígi̱ ga̱jma̱a̱ numuu rí nimíñuu (Mar. 14:​66-72). Nimbiyaʼ gínúu ga̱jma̱a̱ numuu rí xígi̱ niʼni. Jesús na̱nguá niniñuuʼ Pedro, numuu dí ra̱ʼkhá tháán nigáwíinʼ a̱jkiu̱u̱n. Nda̱wa̱á índo̱ nigabi̱i̱ Jesús, niʼthúu̱n Pedro dí nandoo kaʼyoo má xúʼko̱. Niʼthúu̱n dí mañewu̱u̱n mugiu̱u̱ (Juan 21:​15-17). Ga̱jma̱a̱ asndu nadxuu Pedro niriʼña dí ma̱ndoo. Ikha jngóo índo̱ nixtáa náa ndxa̱a̱ Pentecostés dí nirígá náa Jerusalén, bi̱ nixtiʼyáaʼ ginii ga̱jma̱a̱ espíritu santo ninindxu̱u̱ Pedro. w23.09 22 kutriga̱ 6, 7

Pedro niʼthún eʼwíinʼ cristianos bi̱ kuya̱ edxu̱u̱: “Guñewu̱u̱n múgiúu Dios” (1 Ped. 5:​1-4). Nduʼyáá má dí bi̱ kuya̱ edxu̱u̱ nandún kuñún a̱ngiu̱ún ga̱jma̱a̱ nandún muñewu̱u̱n. Nguáná naku̱mu̱ún dí xáʼngo̱o̱ guʼni mbáníí ñajunʼ rígi̱, numuu dí ra̱ʼkhá tháán guáʼdáá ñajunʼ o naʼni néʼngu̱u̱n. A mu ikháán nagíʼnáaʼ xúʼko̱ kaʼnii, ndiéjunʼ ma̱ndoo matani rá. Aratháán Jeobá xú kaʼnii ku̱ma̱a̱ʼ. Pedro niʼthí: “Á mu mbáa naʼthí, gaʼni xóo mbáa bi̱ naʼtáriyaʼ ajngóo Dios ga̱jma̱a̱ á mu mbáa nambáñún eʼwíinʼ, gaʼni xó má eʼni mbáa bi̱ nagruigú tsiakii ndrígóo Dios” (1 Ped. 4:11). Mbáa a̱ngia̱a̱nʼ nuraʼníí xkujndu dí xámbánuu náa numbaaʼ rígi̱. Mu gármáʼáanʼ a̱jkia̱a̱nʼ dí Jesucristo, “nindxu̱u̱ baxtúu bi̱ phú kayá edxu̱u̱”, ikhaa ma̱ndoo maʼni itháan ki xóo ikháanʼ asndu nákha xúgi̱ ga̱jma̱a̱ náa numbaaʼ nuxi̱ʼ. Dí Jeobá nagi̱ʼthu̱u̱n nindxu̱u̱, dí bi̱ kuya̱ edxu̱u̱ maʼndún kuñún a̱ngiu̱ún ga̱jma̱a̱ muñewu̱u̱n. w23.09 29, 30 kutriga̱ 13, 14

Ragíʼmaa mbuyáá xóo endxaʼwamíjna̱ xa̱bu̱ numbaaʼ. Á mu nugíʼdi̱ nundxaʼwamíjna̱ xóo endxaʼwamíjna̱ xa̱bu̱ numbaaʼ ma̱ndoo maʼni dí xúʼni dí nandoo Jeobá ga̱jma̱a̱ manujnguramulú ikha ndrígóo (1 Cor. 3:19). “Ku̱ma̱ dí rígá náa numbaaʼ” naʼni dí xa̱bu̱ xúnimbu̱ún kuyáá Jeobá, nuni̱ i̱ndó rí nandún ikhiin. Guʼyáá dí nigíʼnuu congregación dí nirígá náa xuajin Pérgamo ga̱jma̱a̱ Tiatira. Tikhun cristianos niguáʼdiin nindxaʼwamíjna̱ xóo endxaʼwamíjna̱ bi̱ kúwíin mijngii, bi̱ nubúúnʼ xkawiʼ kayuuʼ gajmiún eʼwíinʼ ga̱jma̱a̱ nduyamajkhún xándú. Jesús nixnún mbá consejo gujkhuʼ a̱jma̱ congregación bugi̱, numuu rí niniña̱a̱nʼ dí makuwíin xa̱bu̱ náa nagimbíi̱n bi̱ mubúúnʼ xkawiʼ kayuuʼ gajmiún eʼwíinʼ (Apoc. 2:​14, 20). Xúgi̱ ma̱ngaa, xa̱bu̱ numbaaʼ nuni̱ dí mundxaʼwamíjna̱ xóo ikhiin. Mbáa asndu bi̱ kuʼñúún o bi̱ nuniʼnúuʼ muthulú dí guʼni xó má nandoo a̱jkiu̱lú ga̱jma̱a̱ dí manújngurámulú ikha ndrígóo Jeobá. Mbáa asndu muthulú dí na̱nguá má nindxu̱u̱ raʼkhí rí nagua̱ʼa̱ maʼni xuyulú ga̱jma̱a̱ ikha dí na̱ʼkha̱ náa Biblia nindxu̱u̱ wayuu. Nguáná makumulú dí ikha rí naxnúlú Jeobá ndayóoʼ maʼni itháan kaʼwu. Mbáa asndu maʼndulú manujngurámulú “rí kiʼnirámáʼ” (1 Cor. 4:6). w23.07 16 kutriga̱ 10, 11

María, ru̱dúu̱ Jesús, ndiyóo tsiaki̱i̱. Ikhaa xóo tsénu̱ju̱nʼ mú magu̱ ewan mbáa ada̱. Ikhaa tséjmañuu mañewu̱u̱n mbáa ada̱, mú ndiyóoʼ dí mañewu̱u̱n bi̱ mani̱ndxu̱u̱ Mesías. Ga̱jma̱a̱ ikhaa nimbá miʼtsu tábóoʼ ga̱jma̱a̱ nimbáa xa̱bu̱, xu káʼnii lá gáʼthúu̱n José María rígi̱ rá. (Luc. 1:​26-33.) Xú káʼnii nigruigú tsiaki̱i̱ dí ndiyóoʼ María rá. Nimbáyuminaʼ náa eʼwíinʼ. Mbá xkri̱da nirajxu̱u̱ Gabriel mu maʼthúu̱n xóó xu kaʼnii gaʼnimbánuu ñajunʼ dí nikhánáá (Luc. 1:34). Mbiʼi nda̱wa̱á, ni̱jkha̱ “náa kúbá mu maʼga náa mbá xuajen” Judá mú maʼga gáʼyoo Elisabet bi̱ kaʼyoo. Elisabet niʼthúu̱n María rí májánʼ niʼni dí ni̱jkha̱ gáʼyoo ikhú ga̱jma̱a̱ xi kaʼwu ndrígóo Dios, niʼtáriyaʼ rí májánʼ ga̱jma̱a̱ numuu ada̱ bi̱ magiʼdaa María (Lucas 1:​39-45). María niʼthí, dí Jeobá “mba̱a̱ rí ikhaa niʼni ga̱jma̱a̱ tsiakii ndrígóo” (Luc. 1:​46-51). Jeobá nijmiuu Gabriel ga̱jma̱a̱ Elisabet mu muxnáá tsiaki̱i̱ María. w23.10 14, 15 kutriga̱ 10-12

Kúwi̱i̱n mbá 144,000 cristianos dí nixtaʼwíin ga̱jma̱a̱ espíritu santo ma̱ngaa nambájxu̱u̱n kiejunʼ gajmíi̱nʼ Jeobá. Ikhiin mani̱ndxu̱ún ndxajkun náa mekhuíí ga̱jma̱a̱ Jesús (Apoc. 14:1). Índo̱ kúwíin xóó náa tsu̱du̱u̱ ku̱ba̱ʼ Dios naraʼwíin ga̱jma̱a̱ espíritu santo ndrígóo ga̱jma̱a̱ ndaʼñún xóo e̱ji̱i̱n. Rí Mikaʼwu dí rígá náa e̱jna̱ nandoo gáʼthúu̱n xóo kiejuunʼ nambájxu̱u̱n gajmiún Dios (Rom. 8:​15-17). Rí Phú Mikaʼwu dí rígá náa e̱jna̱ nandoo gáʼthúu̱n mekhuíí náa xtáa Jeobá. “Cortina” rí nawiʼtáa rí mikaʼwu ga̱jma̱a̱ rí phú mikaʼwu nandoo gáʼthúu̱n xuyuuʼ Jesús. Xuyuuʼ narikhoo mu mata̱ʼa̱a̱ʼ náa mekhuíí mu mani̱ndxu̱u̱ ndxajkun bi̱ phú kayá edxu̱u̱ náa mbiʼyamajkhuíí Dios. Ikha jngóo índo̱ Jesús nixnájximinaʼ makhañúu ga̱jma̱a̱ numún xa̱bu̱ numbaaʼ, ikhú ikhaa nimbáʼtoo kamba̱a̱ mu a̱ngiu̱lú bi̱ kaxtaʼwíin ma̱ndoo magúun mekhuíí. Mu ma ma̱ndoo maguáan mekhuíí, a̱ngiu̱lú bi̱ kaxtaʼwíin ndayóoʼ rí muniña̱a̱ʼ mani̱ndxu̱ún mbáa xa̱bu̱ dí gíʼdoo xuwiʼ ga̱jma̱a̱ itsu̱ (Heb. 10:​19, 20; 1 Cor. 15:50). w23.10 28 kutriga̱ 13

Gedeón ni̱jkha̱nú ndiʼyoo dí na̱nguá ninindxu̱u̱ xa̱bu̱ jmbii, ga̱jma̱a̱ índo̱ xa̱bu̱ bi̱ naguwáʼ náa eji̱i̱n Efraín nitha̱ numáá, na̱nguá nikiʼnáa (Juec. 8:​1-3). Dí phú niʼni ninindxu̱u̱ xa̱bu̱ guabaaʼ ga̱jma̱a̱ niʼdxawun dí nithi, ga̱jma̱a̱ ajngáa guabaʼ dí niʼthí niʼni rí ni xakiʼníi kuyáá. A̱ngiu̱lú bi̱ kuya̱ edxu̱u̱ bi̱ najmañún nindxu̱ún xóo Gedeón. Índo̱ mbáa nakiʼnáa kaʼñúún, ikhiin nudxawíín májánʼ ga̱jma̱a̱ nuriʼña̱a̱ ga̱jma̱a̱ ajngáa guabaʼ (Sant. 3:13). Índo̱ ikhiin nuni xúʼko̱, nayambáá rí marigá dí tsímáá náa congregación. Índo̱ nixnáá gamajkhu Gedeón numuu rí niʼngo̱o̱ nixmínaʼ gajmíi̱n’ madianitas, ikhaa niʼni rí israelita muxnáá gamajkhu Jeobá (Juec. 8:​22, 23). Xú káʼnii gándoo a̱ngiu̱lú bi̱ kuya edxu̱u̱ mbuyaridáá xá. Dí muxnáá xúgíʼ gamajkhu Jeobá índo̱ rígá dí najmii nuni (1 Cor. 4:​6, 7). Mbá xkri̱da, á mu nutháán mbáa bi̱ kayá edxu̱u̱ dí ra̱ʼkhá tháán májánʼ eʼsngáa, ikhaa ma̱ndoo mariʼña̱a̱ dí ikhaa niʼthí nindxu̱u̱ dí na̱ʼkha̱ náa Ajngá rawuunʼ Dios ga̱jma̱a̱ rí xúgiánʼ najmañulúʼ wéñuʼ numuu rí xuajñuu Jeobá naʼsngúlú. Májánʼ gáʼni rí nguáná a̱ngiu̱lú bi̱ kuya̱ edxu̱u̱ murajximijna á mu rí xóo nusngáa nuxnáá gamajkhu Jeobá o i̱ndó naʼni rí makhánún gamajkhu ikhiin. w23.06 4 kutriga̱ 7, 8

Á mu na̱nguá edriʼgulúʼ rí ninda̱ʼa̱a̱ Jeobá, mbáa maʼni murajximíjnalú: “Lá rí xtáá randa̱ʼa̱, nindxu̱u̱ itháan májánʼ ráʼ.” Nguáná ikháanʼ nakumulú rí nduʼyáá ndiéjunʼ nindxu̱u̱ rí itháan mambáyulú, mú mbáa rí kuwa̱án runda̱ʼa̱ xambáyulú mbayuuʼ. Mbáa kuwa̱án ruʼtájkáan mu mambánuu mbá xkujndu xó má eyulú ikháanʼ, mú, mbáa rígá imba̱a̱ núthu xóo ma̱ndoo magumambánúu itháan májánʼ. Mbáa nguáná rí nunda̱ʼa̱lú, na̱nguá embánii xóo rí nandoo Jeobá (1 Juan 5:14). Mbá xkri̱da gundxaʼwamíjna̱ ga̱jma̱a̱ numún xabuanii, bi̱ ninda̱ʼa̱a̱ Jeobá dí aʼdiu̱ún maʼni má xúʼko̱ dí Dios nanigu̱u̱ʼ. Ma̱ndoo makumulú dí ninda̱ʼa̱ mbá dí májánʼ. Mú Jeobá tséʼni tsu̱da̱a̱ʼ rí mbáa maʼni ñajuunʼ. Ikhaa nandoo rí xúgíinʼ, asndu ejñulúʼ, mbuʼyamajkuíí numuu rí ikháanʼ nandulúʼ muʼni (Deut. 10:​12, 13; 30:​19, 20). Á mu xúʼko̱, ndiéjunʼ gándoo gunda̱ʼa̱a̱ xabuanii buʼko̱ Jeobá rá. Rí Jeobá mambáñun ikhiin, mu rí índo̱ gúsngúún aʼdiún maʼga̱nú asndu náa a̱jkiu̱u̱n mú xúʼko̱ ikhaa ma̱ndoo kaʼyoo Jeobá ga̱jma̱a̱ dí maʼndoo mambájxu̱u̱ ga̱jma̱a̱ (Prov. 22:6; Efes. 6:4). w23.11 21 kutriga̱ 5; 23 kutriga̱ 12

Náá numuu nuʼthá rí muʼni̱i̱ a̱jkiu̱ún eʼwíinʼ, xúʼko̱ nusngajmún rí nandulúʼ kuʼñúún xá. Náa mbá Biblia niʼthí dí ajngáa rí nijmuu Pablo “rí maʼni̱i̱ a̱jkia̱a̱nʼ” náa ajngáa griega nandoo gáʼthúu̱n “rí mariejún náa nijniuu mbáa xa̱bu̱ mu xúʼko̱ maraxna̱ tsiakii maʼngo̱o̱ maraʼnuu xkujndu gakhi̱i̱”. Ikha jngóo índo̱ nuʼni̱i̱ a̱jkiu̱ún a̱ngiu̱lú bi̱ kúwá rumíniiʼ, xúʼko̱ numbáñunlú mu majngruigu̱u̱n má xúʼko̱ náa kamba̱a̱ rí gajkhun. Mambá rí índo̱ mbáa ndxájulú namínúuʼ, nuʼtháán rí kuwáanʼ ga̱jma̱á nindxu̱u̱, ma̱ngaa rí nandulúʼ kuʼyáá (2 Cor. 7:​6, 7, 13). Rí magáwíinʼ a̱jkiu̱lú ga̱jma̱a̱ rí muʼni̱i̱ a̱jkiu̱ún eʼwíinʼ ikháá má gíʼdoo numuu. Xú káʼnii eʼyáá rá. Numuu rí índo̱ mbáa xa̱bu̱ nagáwíinʼ a̱jkiu̱u̱n kaʼyoo mbáa bi̱ namínúuʼ nandoo maʼni̱i̱ a̱jkiu̱u̱n ga̱jma̱a̱ nandoo mambáyúu. Rí nuʼnilú ginii nagáwíinʼ a̱jkiu̱lú ga̱jma̱a̱ ikhú naxkajxáánʼ muʼni̱i̱ a̱jkiu̱u̱n. Xúʼko̱ má eʼni Jeobá ma̱ngaa. Pablo niʼthí rí nagáwíinʼ a̱jkiu̱u̱n Dios kaʼñún xa̱bu̱, rúʼko̱ naxkajxi̱i̱ mu maʼni̱i̱ a̱jkiu̱ún. Niʼthí rí Jeobá nindxu̱u̱ mbáa: “Anu̱lú bi̱ nagáwiinʼ a̱jkiu̱u̱n kaʼyulú ga̱jma̱a̱ Dios bi̱ naʼni̱i̱ a̱jkiu̱lú náa xúgíʼ” (2 Cor. 1:3). w23.11 9, 10 kutriga̱ 8-10

Xúgiáanʼ bi̱ nindxu̱lú cristianos nduʼyáá dí muraʼníí xkujndu gakhi̱i̱. Gundxaʼwamíjna̱ rí niʼthúún Pablo cristianos bi̱ kúwá náa Tesalónica: “Índo̱ nikuwáanʼxu̱ ga̱jma̱á nindxa̱la, nithalaxu má wapháá rí ndayóoʼ mumíniiʼlú, xó má e̱ya̱a̱, xúʼko̱ má ni̱jkha̱nú nirígá” (1 Tes. 3:4). Ga̱jma̱a̱ a̱ngiu̱lú bi̱ kúwá náa Corinto niʼnirámáʼ inún: “Nanduxu mbu̱ya̱a̱la ga̱ʼkhu̱ mba̱a̱ dí niraʼnííxu […] nimíñúxu rí makhañúxu” (2 Cor. 1:8; 11:​23-27). Gajkhun nindxu̱u̱ rígi̱. Bi̱ nindxu̱lú cristianos nduʼyáá rí manújngulú náa awúu̱n ga̱ʼkhu̱ (2 Tim. 3:12). Índo̱ nanindxa̱a̱ʼ xa̱bi̱i̱ Jesús, mbáa bi̱ nambájxáaʼ gajmiáanʼ ga̱jma̱a̱ bi̱ kúwá náa guʼwáaʼ nutsijmáánʼ o asndu nunia̱a̱ʼ dí raʼkhí. Lá niraʼdáá xkujndu náa natiejunʼ numuu rí nandaaʼ matani̱ xúgíʼ májánʼ ráʼ. (Heb. 13:18.) Xa̱bu̱ ñajunʼ na̱nguá eñún gúyaa numuu dí narathúún eʼwíinʼ dí kua̱ʼthi̱i̱n marigá nda̱wa̱á ráʼ. Tséʼniuu má asndu xkáʼnii xkujndu dí nuraʼníí Pablo niʼthí rí gíʼmáánʼ maʼdxulu. w23.12 10, 11 kutriga̱ 9, 10

Jacob ndiyóoʼ maraʼnuu mbaʼa xkujndu. Ga̱jma̱a̱ a̱jmi̱i̱n e̱ji̱i̱n Jacob bi̱ mbiʼyuu Simeón ga̱jma̱a̱ Leví, nini gachíí mbiʼñún bi̱ kúwá náa guʼwún ga̱jma̱a̱ mbiʼyuu Jeobá. Ma̱ngaa Raquel, a̱ʼgiu̱u̱ bi̱ nindoo kaʼyoo, nikháñuu índo̱ nixtáa bi̱ maʼni a̱jmi̱i̱n e̱ji̱i̱n. Ma̱ngaa numuu dí nirígá ewiʼ, Jacob ndiyóoʼ maʼga̱ gaxtáa náa Egipto índo̱ niʼni nikhi̱i̱ má (Gén. 35:​16-19; 37:28; 45:​9-11, 28). Maski ajndu Jacob niraʼnuu xúgíʼ xkujndu rúʼko̱, ikhaa nditháan tániñuuʼ raku̱mu̱u̱ kaʼyoo Jeobá ni má xúgíʼ dí nikudaminaʼ maʼni. Ga̱jma̱a̱ Jeobá nisngájmuu dí nidxuu kaʼyoo. Mbá xkri̱da, Jacob nigiʼdoo wéñuʼ, numuu rí Jeobá má nimbáyúu. Mbáa Jacob nixnáa núma̱aʼ Dios ndrígóo índo̱ dí mbayuuʼ tsiguʼ nda̱wa̱á nixka̱ma̱a̱ José, bi̱ nikumu̱u̱ ikhaa dí nikháñuu. Jacob niʼngo̱o̱ niraʼnuu xúgíʼ rúʼko̱ numuu rí nimbáxu̱u̱ májánʼ ga̱jma̱a̱ Jeobá (Gén. 30:43; 32:​9, 10; 46:​28-30). Ikháanʼlu ma̱ngaa maʼngulú muʼni gajmiúlú xkujndu dí nuraʼníí á mu nambáxulúʼ májánʼ gajmiúlú Jeobá. w23.04 15 kutriga̱ 6, 7

Náa Salmo 23, ikhí niʼthí David xóo nikumu̱u̱ kaʼyoo Jeobá rí ikhaa nandoo kaʼyoo ga̱jma̱a̱ nañewu̱u̱n májánʼ wéñuuʼ. Ikhí niʼthí rí Jeobá nindxu̱u̱ Baxtúu ndrígóo ga̱jma̱a̱ niʼthí xóo nambájxu̱u̱ ga̱jma̱a̱. David na̱nguá nimíñuu numuu rí ndiʼyoo dí Jeobá naxnúu ikha. Nambáyuminaʼ náa ikhaa. Ndaʼyoo rí ma̱ndoo kaʼyoo má xúʼko̱ náa xúgíʼ mbiʼi rí xóo gaxtáa. Guʼyáá náá numuu ni̱jkha̱nú niʼthí xígi̱ káʼnii. David ndiʼyoo dí Jeobá nañewu̱u̱n májánʼ wéñuuʼ numuu rí naxnúu má xúʼko̱ rí ikhaa ndayóoʼ náa mbiʼi rí kaʼyoo. Ga̱jma̱a̱ ndaʼyoo dí nambájxu̱u̱ májánʼ ga̱jma̱a̱ ma̱ngaa rí nandoo kaʼyoo. Ikha jngóo, David ndiʼyoo dí garigá má dí gárígá, Jeobá má gaxnúu rí ikhaa mbaʼyóoʼ. Ndaʼyoo gajkhun rí xóo nandoo kaʼyoo Jeobá nindxu̱u̱ itháán mba̱a̱ ki xóo rí naʼni maxmiéjuunʼ ga̱jma̱a̱ rúʼko̱ naʼni dí maxtáa gagi ga̱jma̱a̱ tsímáá (Sal. 16:11). w24.01 28, 29 kutriga̱ 12, 13

Asndu nákha niguámbá Ragajma Guerra rí nirígá náa xúgíʼ tsu̱du̱u̱ Numbaaʼ, xa̱bi̱i̱ Jeobá nindoo nitaraʼa náa mixtiʼkhu enii xuajin. Rúʼko̱ niʼni rí mbaʼin xa̱bu̱ niguánu muniʼniiʼ Jeobá ma̱ngaa rí xúgi̱ nandoo najuiʼtáraʼa náa xúgíʼ numbaaʼ. Rí mbiʼi xúgi̱, bi̱ nindxu̱ún Cuerpo Gobernante, nduyááʼ ikha ndrígóo Cristo, ikhiin nuni̱ asndu xó má naʼngo̱o̱ mu ikha rí nuxna mambaníi ga̱jma̱a̱ rí xóo nandoo Jeobá ma̱ngaa Jesús. Ga̱jma̱a̱ ikhiin nuxuʼma náa inún a̱ngiu̱lú bi̱ nindxu̱ún circuito ga̱jma̱a̱ ancianos, mu xúʼko̱ ikhiin muthún a̱ngiu̱lú bi̱ kúwá náa congregación. A̱ngiu̱lú bi̱ kaxtaʼwíin ga̱jma̱a̱ eʼwíinʼ ancianos kúwá náa “ñawún mújúunʼ” Cristo (Apoc. 2:1). Numuu rí nindxu̱ún xa̱bu̱ aʼkhá, ikha jngóo nguáná má najngawi̱i̱n, xó má nigíʼnuu Moisés, Josué ga̱jma̱a̱ apóstoles (Núm. 20:12; Jos. 9:​14, 15; Rom. 3:23). Mú Jesús, naxnúu ikha ñumbáá jmbii bugi̱ ga̱jma̱a̱ a̱ngiu̱lú ancianos. Ikha jngóo kuaʼdáá mbaʼa numuu rí muʼnimbulú kuʼñúún a̱ngiu̱lú bugi̱. w24.02 23, 24 kutriga̱ 13, 14

Mangáanʼ ma̱ndoo muʼni mba̱a̱ Jeobá índo̱ nuʼthúún xa̱bu̱ ga̱jma̱a̱ mbiʼyuu, xó má májánʼ a̱jkiu̱u̱n. Rí phú nandulúʼ índo̱ nuʼthúún xa̱bu̱ rí magún kanuu náa ikhaa ga̱jma̱a̱ rí maguanúu maʼndún kuyáá xó má eyulú kuʼyáá ikháanʼ (Sant. 4:8). Nanigulúʼ musngajmúún xa̱bu̱ xóo mitsaanʼ cualidad ndrígóo rí naʼthí náa Biblia, xóo eyoo kaʼyulú, rí naniguuʼ marigá dí májánʼ, rí najmañuu ga̱jma̱a̱ rí gíʼdoo tsiakii. I̱mba̱ xóo ma̱ndoo muʼni mba̱a̱ Jeobá nindxu̱u̱ rí muʼni gagi a̱jkiu̱u̱n ga̱jma̱a̱ rí mbuʼyaridáá xó má eʼngo̱o̱. Índo̱ nuʼnilú, xa̱bu̱ nduyáá dí ikháanʼ nindxu̱lú mixtiʼkuáanʼ ki xóo iʼwíínʼ xa̱bu̱, mbáa rígi̱ maʼni murajximíjna̱ náá numuu (Mat. 5:​14-16). Mambá mbiʼi ma̱ndoo muʼthúnlu ikháanʼ náá numuu nuʼnilú xúʼko̱. Nda̱wa̱á, rígi̱ gaʼni rí xa̱bu̱ bi̱ gajkhun maʼndún majmañún muxuʼmamijná náa Dios. Índo̱ nuʼni mba̱a̱ Jeobá xígi̱ kaʼnii, nuʼni rí maxtáa gagi (1 Tim. 2:​3, 4). w24.02 10 kutriga̱ 7

Mu ma̱nindxa̱a̱ʼ mbáa cristiano bi̱ naʼni májánʼ ñajuunʼ Dios, ndayóoʼ rí majmañaaʼ tikhuʼ rí matani̱. Rí matani̱ rígi̱, rúʼko̱ gambáyáaʼ mu matani̱ ñajunʼ náa congregación, ma̱ngaa mu mataxkamaa ñajunʼ náa makhánáaʼ mbújkha̱a̱ rí majmaaʼ o rí matambáñún bi̱ kúwá náa guʼwáaʼ, ga̱jma̱a̱ rí mambajxáaʼ májánʼ gajmiáanʼ eʼwíinʼ. Mbá xkri̱da, dí majmañaaʼ matraxnuu ga̱jma̱a̱ mataniraʼmáʼ májánʼ. Náa Biblia naʼthí rí xa̱bu̱ bi̱ xtáa gagi, ikhaa nindxu̱u̱ bi̱ naguxnuu Ajngá rawuunʼ Dios xúgíʼ mbiʼi ga̱jma̱a̱ nandxa̱ʼwáminaʼ rí niguxnuu (Sal. 1:​1-3). Xúʼko̱ na̱jkha̱nú ndaʼyoo xóo endxaʼwóo edxu̱u̱ Jeobá, rúʼko̱ nambáyúu mbaʼyoo ga̱jma̱a̱ mandxaʼwáminaʼ májánʼ (Prov. 1:​3, 4). A̱ngiu̱lú xa̱bekha ga̱jma̱a̱ gu̱ʼu̱ nda̱ñu̱u̱n rí musngúún, ga̱jma̱a̱ muxnún consejo rí na̱ʼkha̱ náa Biblia a̱ngiu̱lú xa̱bekha bi̱ najmañún. Á mu najmañaaʼ natraxnuu, ga̱jma̱a̱ nataniraʼmaʼ májánʼ, xúʼko̱ ma̱ndoo matanirataminaʼ májánʼ discurso, ga̱jma̱a̱ maraxna májánʼ comentario rí maxnún tsiaki̱i̱ eʼwíinʼ. Ma̱ngaa ma̱ndoo mataniraʼmáʼ rí maʼni gujkhuʼ fe ndrígáa ga̱jma̱a̱ rí maxnún tsiaki̱i̱ eʼwíinʼ. w23.12 26, 27 kutriga̱ 9-11

Índo̱ gámiñaaʼ, atatsaʼwáminaʼ rí gáʼni Jeobá nda̱wa̱á. Índo̱ xa̱bu̱ ramíjíin ni xákúwi̱i̱n. Náa asamblea regional dí nirígá tsiguʼ 2014 ni̱ʼkha̱ mbá demostración. Ikhí ndiʼyáá xú káʼnii mbáa ndxájulú xa̱biya̱ naʼtáminaʼ gajmíi̱n bi̱ kúwíin náa goʼwóo, ga̱jma̱a̱ numuu xú káʼnii gáʼthí rí na̱ʼkha̱ náa 2 Timoteo 3:​1-5 á mu nindxu̱u̱ mbá profecía náa naʼthí ga̱jma̱a̱ numuu Ku̱ba̱ʼ mitsaanʼ: “Náa numbaaʼ nuxi̱ʼ makuwáanʼ gagi. Numuu rí xa̱bu̱ maʼndún kuñúún a̱ngiu̱ún; maʼndún kuyáá Dios, xúni̱ mbaʼumíjna̱, mani̱ndxu̱ún xa̱bu̱ guabaaʼ, mbuyamajkuíí Dios, munimbu̱ún kuñún anu̱ún, muxnáa núma̱aʼ ga̱jma̱a̱ musngajma ngajua rí tsétumuu, maʼndún kuñún familia ndrígu̱ún, mambanún mu makuwá tsímáá, muthi rí májánʼ ga̱jma̱a̱ numún eʼwíinʼ, muñewa̱a̱n rí muni̱, mani̱ndxu̱u̱n xa̱bu̱ guabaaʼ, maʼndún kuyáá rí májánʼ, matatsimbaaʼ xtañún ga̱jma̱a̱ awa̱án gúyáá, xúni̱ mbaʼumíjna̱, maʼndún kuyáá Dios ki xóo rí nanigu̱u̱nʼ ikhiin ga̱jma̱a̱ gajkhun musngajma rí phú nduyamajkuíí Dios. Ayuʼ kanuu náa ikhiin”. Naguʼwúnlú muʼtámíjná gajmiúlú bi̱ kúwíin náa guʼwúlú o bi̱ nambájxulú gajmiúlú xú káʼni gákuwáanʼ náa numbaaʼ nuxi̱ʼ ráʼ. w24.01 6 kutriga̱ 13, 14

Ra̱ʼkhá tháan mitsaanʼ dí “Jeobá nadxuu a̱jkiu̱u̱n ga̱jma̱a̱ numuu xuajñuu” (Sal. 149:4). Mbáa nguáná muʼni guabamijná ga̱jma̱a̱ mundxaʼwamíjna̱: “Gajkhun má dí Jeobá nadxuu a̱jkiu̱u̱n kaʼyoo xuajñuu, mu lá nadxuu a̱jkiu̱u̱n kaʼyoʼ ikhúún xáʼ.” Mbaʼin xa̱bi̱i̱ Dios bi̱ nikúwá nákha wajyúuʼ niʼniún gakhi̱i̱ maku̱mu̱ún dí Dios nadxuu a̱jkiu̱u̱n kaʼñúún (1 Sam. 1:​6-10; Job 29:​2, 4; Sal. 51:11). Náa Biblia naʼthí kaʼwu dí maski ajndu nindxu̱lú xa̱bu̱ aʼkhá ma̱ndoo muʼni dí maʼdxuu Jeobá. Ndiéjunʼ gáʼyóoʼ muʼni rá. Musngajmá dí kuaʼdáá fe náa Jesús ga̱jma̱a̱ majngúlú iyááʼ (Juan 3:16). Xúʼko̱ gúsngajmá náa inún xúgíinʼ, dí nitanga̱a̱ a̱jkiu̱lú ga̱jma̱a̱ numuu aʼkhá ndrígulú ma̱ngaa dí nuxuʼdamíjná mu̱ʼni̱ ñajuunʼ Dios (Hech. 2:38; 3:19). Jeobá ra̱ʼkhá tháán xtáa gagi índo̱ nu̱ʼni̱ rígi̱ mu mambajxúlúʼ gajmiúlú. Á mu nu̱ʼni̱ tsiakimíjna̱ muʼni dí nixuʼdámíjná náa Jeobá maʼdxuu a̱jkiu̱u̱n kaʼyulú ga̱jma̱a̱ mambajxúu ga̱jma̱á nindxu̱lú (Sal. 25:14). w24.03 26 kutriga̱ 1, 2

Ma̱ndoo mbuʼyaridáá xkri̱da ndrígún discípulos buʼko̱ ga̱jma̱a̱ rí xúniʼñááʼ ruʼtáraʼa índo̱ xa̱bu̱ ñajunʼ gútulú rí muniʼñááʼ. Ma̱ndoo mbuʼyáá gajkhun dí Jeobá mambáyulú muʼni ñajuunʼ. Ikha jngóo guʼtákháñii maxnúlú kúmáa. Gunda̱ʼa̱a̱ Jeobá rí mambáyulú mu muraʼníí xkujndu. Mbaʼánʼ rí ikháanʼ numíniiʼ ga̱jma̱a̱ numuu dí niʼnimbáti̱ga̱a̱ mbáa bi̱ nandulú kuʼyáá, numuu dí nuni̱ gináanlu, nandoo káñulú, rí naxmiéjunlú xóo kúwíin bi̱ kuʼñún, ga̱jma̱a̱ numuu nandii dí nirígá náa xúgíʼ numbaaʼ ga̱jma̱a̱ guerra niʼni dí maku̱mu̱u̱ itháán xkujndu rígi̱. Ikha jngóo aratháán Jeobá ga̱jma̱a̱ xúgííʼ a̱jkia̱a̱nʼ, aratháán xúgííʼ rí naku̱ma̱a̱ʼ xó má naratháán mbáa bi̱ nambájxáaʼ májánʼ ga̱jma̱a̱ʼ. Ma̱ndoo ma̱ta̱ya̱a̱ gajkhun rí Jeobá má gámbáyáaʼ (Sal. 37:​3, 5). Dí muʼtájkáan má xúʼko̱ nambáyulú muraʼníí xkujndu (Rom. 12:12). Jeobá ndaʼyoo xúgííʼ dí kúwíin ruguaʼníí xa̱bi̱i̱, ikhaa naʼdxawuun índo̱ “nutakáñíí rí mambáñun” (Sal. 145:​18, 19). w23.05 5, 6 kutriga̱ 12-15

Índo̱ gúraʼwíí mbá dí gíʼdoo numuu muʼni, gíʼmaa mbuʼyáa “ndiéjunʼ rí nandoo Jeobá” ga̱jma̱a̱ nda̱wa̱á mugíʼ muʼni (Efes. 5:17). Índo̱ nduʼyáʼ ikha dí na̱ʼkha̱ náa Biblia mu mambáyúlú, xúʼko̱ nusngajmá dí nandulúʼ mbuʼyáá xóo endxa̱ʼwáminaʼ Jeobá ga̱jma̱a̱ numuu dí nandulúʼ muʼni. Á mu nuʼnimbulú ikha rígi̱, xúʼko̱ ma̱ndoo muraʼwíí májánʼ dí muʼni. Gixa̱a̱ nanigu̱u̱ʼ mbaʼyulú muʼni dí rígá náa numbaaʼ rí asndu xáguaʼdáá mbiʼi mu muʼni ñajuunʼ Dios (1 Juan 5:19). Ra̱mingíjyúuʼ nindxu̱u̱ rí mbáa cristiano manigu̱u̱ʼ magiʼdoo itháan, rí maʼnigajmaa i̱mba̱ escuela o mañajunʼ ki xóo mbaʼyáʼ maʼni itháán ñajuunʼ Jeobá. Á mu xúʼko̱ eguáʼníílú, xúʼko̱ nusngájma dí kúwáanʼ rundxa̱ʼwa̱míjna̱ xóo má endxaʼwamíjna̱ xa̱bu̱ numbaaʼ. Na̱nguá má nindxu̱u̱ ra̱májánʼ rí maraʼdáá, mú ragíʼmaa magiʼdoo itháan numuu rígi̱ náa vida ndrígulú. w24.03 24 kutriga̱ 16, 17