Xóo guʼni mu maʼndulú kuʼyamijná itháán

1, 2. a) Ndíjkha rí niʼthí apóstol Pablo rí ngajua nindxu̱u̱ “rí itháan gíʼdoo numuu” rá. b) Ndiéjunʼ graxe̱ guriʼña̱a̱ rá.

ÍNDO̱ apóstol Pablo niʼthí ajtsú cualidad rígi̱: Fe, rí maguáʼthi̱i̱n rí marigá nda̱wa̱á ga̱jma̱a̱ ngajua ga̱jma̱a̱ niʼthí xóó: “Mú ngajua gíʼdoo itháan numuu” (1 Cor. 13:13). Náá numuu niʼthí xúʼko̱ xá. Numuu rí nda̱wa̱á nánguá mbaʼyulú maguaʼdáá fe náa rí nakudaminaʼ maʼni Dios náa tsu̱du̱u̱ Ku̱ba̱ʼ nuxi̱ʼ, numuu rí ikhú nimbánuu má. Mú mbaʼyoo rí maʼndulú kuʼyáá má xúʼko̱ Jeobá mangiin a̱ngiu̱lú. Ga̱jma̱a̱ ngajua rí kuaʼdáá, rúʼko̱ gáxkaxáanʼ rí maʼndulú kuʼyamijná má xúʼko̱ kámuu mbiʼi.

² Numuu rí mbaʼyoo maʼndulú kuʼyamijná má xúʼko̱, guriʼña̱a̱ ajtsú graxe̱ rígi̱. Timbá, náá numuu rí ndayóoʼ maʼndulú kuʼyamijná rá. Ragajma, xú káʼnii gándoo gusngajmá rí nandulúʼ kuʼyamijná rá. Ragajtsú, xú káʼnii gándoo guʼni rí maʼndulú kuʼyamijná itháán rá.

NÁÁ NUMUU NDAYÓOʼ MAʼNDULÚ KUʼYAMIJNÁ RÁ.

3. Ndíí numuu kuaʼdáá mu maʼndulú kuʼyamijná rá.

³ Ndíjkha rí gíʼdoo numuu maʼndulú kuʼyamijná rá. Xúʼko̱ nusngajmá rí nindxu̱lú cristianos gajkhun. Jesús niʼthún apóstoles ndrígióo: “Á mu nuni̱la xúgi̱ kaʼnii, xúgíinʼ gúyáá rí ikháanʼ nindxa̱la xa̱bi̱ʼ: Á mu nandala kuyamíjna̱” (Juan 13:35). Ma̱ngaa rí nandulúʼ kuʼyamijná naʼni rí makuwáánʼlú mbá nduʼ. Ikha jngóo, Pablo niʼthí: “Dí rígi̱ naruwi̱i̱n xa̱bu̱” (Col. 3:14). Rígá imbo̱o̱ rí gíʼdoo wéñuuʼ numuu rí ndayóoʼ maʼndulú kuʼyamijná. Apóstol Juan niʼnirámáʼ náa inún cristianos: “Bi̱ nandoo kaʼyoo Dios ma̱ngaa gaʼndoo kaʼyoo ndxájuu” (1 Juan 4:21). Ikha jngóo, rí maʼndulú kuʼñúún a̱ngiu̱lú, xúʼko̱ nusngajma rí nandulúʼ kuʼyáá Jeobá ma̱ngaa.

4, 5. Atagíʼ mbá xkri̱da náa nasngájma rí nambríguii xóo rí nandulúʼ kuʼyáá Dios ga̱jma̱a̱ a̱ngiu̱lú.

⁴ Xú káʼnii mbríguii ngajua rí kuáʼdáá náa Dios ga̱jma̱a̱ rí nandulúʼ kuʼñúún a̱ngiu̱lú rá. Mu ma̱ndoo makru̱ʼu̱lú májánʼ rígi̱, gundxaʼwamíjna̱lú xú káʼnii mbríguii dí rígá náa a̱jkiu̱lú ga̱jma̱a̱ i̱ʼwáʼ dí rígá náa xuyulúʼ. Mú mbáa doctor mbaʼyoo xú káʼnii ñajunʼ a̱jkiu̱u̱n bi̱ naʼni thanuu mbaʼyoo rí makujmbi̱i̱ aphuu ñawuun. Ndiéjunʼ eʼsngúlú xkri̱da rígi̱ rá.

⁵ Xó má eʼni mbáa doctor índo̱ nakujmbi̱i̱ aphuu ñawuun xa̱bu̱ bi̱ naʼni thanuu, mu mbaʼyoo xú káʼnii ñajunʼ a̱jkiu̱u̱n á mu rí na̱jkha̱ rakáguámbáa o gújkuiiʼ xóó, xúʼko̱ má mangáánʼ ma̱ndoo mbuʼyáálú xú káʼnii eyulú kuʼñúún eʼwíinʼ. Rúʼko̱ gámbáyulú mbuʼyáa nguáthá mba̱a̱ ngajua rí kuaʼdáálú náa Jeobá, á mu nduʼyáá rí na̱jkha̱ raguámbáa rí xóo nandulúʼ kuʼñúún a̱ngiu̱lú, mbáa xúʼko̱ má ma̱ngaa rí nandulúʼ kuʼyáá Jeobá. Mú á mu naguʼunlú rí musngajmúún a̱ngiu̱lú rí nandulúʼ kuʼñúún, rúʼko̱ nandoo gaʼthí rí xóo nandulúʼ kuʼyáá Jeobá na̱jkha̱ raʼni itháán mba̱a̱.

6. Ndíjkha rí ndayóoʼ maxmiéjunlu á mu rí xóo nandulúʼ kuʼñúún a̱ngiu̱lú na̱jkha̱ raguámbáa rá. (1 Juan 4:​7-9, 11.)

⁶ Ndíjkha rí ndayóoʼ maxmiéjunlú á mu rí na̱jkha̱ raguámbáa xóo rí nandulúʼ kuʼñúún a̱ngiu̱lú rá. Numuu dí rúʼko̱ gamíi maʼni rí nánguá ma̱ndoo mambájxulú májánʼ gajmiúlú Dios. Rígi̱ nasngájma kaʼwu ajngáa rí niʼthí apóstol Juan: “Bi̱ tsíyoo kaʼyoo ndxájuu bi̱ ndaʼyoo ga̱jma̱a̱ iduu, nda̱a̱ xóo maʼndoo kaʼyoo Dios bi̱ na̱nguá eʼngo̱o̱ gáʼyoo” (1 Juan 4:20). Ndiéjunʼ eʼsngúlú rá. Rí i̱ndó ma̱ndoo muʼni mba̱a̱ Jeobá á mu nandulúʼ kuʼyamijná. (Atraxnuu 1 Juan 4:​7-9, 11).

XÚ KÁʼNII GÁNDOO GUSNGAJMÁ RÍ NANDULÚʼ KUʼYAMIJNÁ RÁ.

7, 8. Xú káʼnii gándoo gusngajmá rí nandulú kuʼyamijná rá.

⁷ Náa Biblia nuxkamaa mbaʼa nuthu kiʼtáñajunʼ rígi̱: “Rí maʼndalá kuyamíjna̱” (Juan 15:​12, 17; Rom. 13:8; 1 Tes. 4:9; 1 Ped. 1:22; 1 Juan 4:11). Mú ngajua nindxu̱u̱ rí nda̱ja̱a̱ náa a̱jkiu̱lú; náa rí nimbáa xándoo mbaʼyoo. Á mu xúʼko̱, xú káʼnii gándoo gusngajmalúʼ, mu eʼwíinʼ mbuyáá dí rígá náa awúún a̱jkiu̱lú rá. Xóo nuʼthá ga̱jma̱a̱ rí nuʼni.

⁸ Mbaʼa xóo ma̱ndoo musngajmá rí nandulúʼ kuʼñúún a̱ngiu̱lú. Náa Biblia naʼthí tikhuʼ xkri̱da. Rí “guthu̱u̱n rí gajkhun eʼwíinʼ” (Zac. 8:16). “Gakuwáanʼ tsímáá má xúʼko̱” (Mar. 9:50). “Gináanʼ ikháanʼ gúyamajkúnla eʼwíinʼ” (Rom. 12:10). “Gundríguíin eʼwíinʼ ga̱jma̱a̱ gagi” (Rom. 15:7). “Gu̱ni̱ [...] mba̱a̱ a̱jkia̱la kuyamíjna̱” (Col. 3:13). “Gumbáyumíjnála má xúʼko̱ ga̱jma̱a̱ rí ku̱da” (Gál. 6:2). “Guxnamíjnála má xúʼko̱ tsiakii” (1 Tes. 4:18). “Ikha jngóo [...] gumbáyumijnálá” (1 Tes. 5:11). “Gutajkáan ga̱jma̱a̱ numún eʼwíinʼ” (Sant. 5:16).

9. Ndíjkha nuʼthá rí muʼni̱i̱ a̱jkiu̱ún eʼwíinʼ nindxu̱u̱ xóo ma̱ndoo musngajmúún rí nandulúʼ kuʼñúún xá. (Atayáá ma̱ngaa xtiʼkhuu.)

⁹ Guʼyálú xóo itháán xóo ma̱ndoo musngajmá rí nandulúʼ kuʼñúún a̱ngiu̱lú, xó ma ndiʼyáá náa kutriga̱ ginii. Pablo niʼthí: “Gu̱ni̱i̱ má xúʼko̱ a̱jkia̱la”. Náá numuu nuʼthá rí muʼni̱i̱ a̱jkiu̱ún eʼwíinʼ, xúʼko̱ nusngajmún rí nandulúʼ kuʼñúún xá. Náa mbá Biblia niʼthí dí ajngáa rí nijmuu Pablo “rí maʼni̱i̱ a̱jkia̱a̱nʼ” náa ajngáa griega nandoo gáʼthúu̱n “rí mariejún náa nijniuu mbáa xa̱bu̱ mu xúʼko̱ maraxna̱ tsiakii maʼngo̱o̱ maraʼnuu xkujndu gakhi̱i̱”. Ikha jngóo índo̱ nuʼni̱i̱ a̱jkiu̱ún a̱ngiu̱lú bi̱ kúwá rumíniiʼ, xúʼko̱ numbáñunlú mu majngruigu̱u̱n má xúʼko̱ náa kamba̱a̱ rí gajkhun. Mambá rí índo̱ mbáa ndxájulú namínúuʼ, nuʼtháán rí kuwáanʼ ga̱jma̱á nindxu̱u̱, ma̱ngaa rí nandulúʼ kuʼyáá (2 Cor. 7:​6, 7, 13).

10. Ndíjkha nuʼthá rí magáwíinʼ a̱jkiu̱lú ga̱jma̱a̱ rí muʼni̱i̱ a̱jkiu̱ún eʼwíinʼ ikháá má gíʼdoo numuu rá.

¹⁰ Rí magáwíinʼ a̱jkiu̱lú ga̱jma̱a̱ rí muʼni̱i̱ a̱jkiu̱ún eʼwíinʼ ikháá má gíʼdoo numuu. Xú káʼnii eʼyáá rá. Numuu rí índo̱ mbáa xa̱bu̱ nagáwíinʼ a̱jkiu̱u̱n kaʼyoo mbáa bi̱ namínúuʼ nandoo maʼni̱i̱ a̱jkiu̱u̱n ga̱jma̱a̱ nandoo mambáyúu. Rí nuʼnilú ginii nagáwíinʼ a̱jkiu̱lú ga̱jma̱a̱ ikhú naxkajxáánʼ muʼni̱i̱ a̱jkiu̱u̱n. Xúʼko̱ má eʼni Jeobá ma̱ngaa. Pablo niʼthí rí nagáwíinʼ a̱jkiu̱u̱n Dios kaʼñún xa̱bu̱, rúʼko̱ naxkajxi̱i̱ mu maʼni̱i̱ a̱jkiu̱ún. Niʼthí rí Jeobá nindxu̱u̱ mbáa: “Anu̱lú bi̱ nagáwiinʼ a̱jkiu̱u̱n kaʼyulú ga̱jma̱a̱ Dios bi̱ naʼni̱i̱ a̱jkiu̱lú náa xúgíʼ” (2 Cor. 1:3). Ajngáa “nagáwiinʼ a̱jkiu̱u̱n” Pablo niʼthí rí nindxu̱u̱ mbá dí nagáwíinʼ a̱jkiu̱u̱n ga̱jma̱a̱ niʼthí rí Jeobá nindxu̱u̱ mbáa “Anu̱lú” o náa narígá “nagáwiinʼ a̱jkiu̱u̱n kaʼyulú” numuu rí nagáwíinʼ a̱jkiu̱u̱n rí narígá náa ikhaa. Ga̱jma̱a̱ rúʼko̱ naxkaxi̱i̱ mu maʼni a̱jkiu̱ún xa̱bu̱ “náa xúgíʼ gamiéjunʼ” (2 Cor. 1:4). Xó má mbáa xa̱bu̱ bi̱ naʼga̱a̱n iyáʼ nawi̱ji̱i̱ rakandawuuʼ, xúʼko̱ má Jeobá naʼni̱i̱ a̱jkiu̱ún xa̱bu̱ bi̱ kúwá rumíniiʼ. Ndiéjunʼ gámbáyulú mu magáwíinʼ a̱jkiu̱lú ga̱jma̱a̱ muʼni̱i̱ a̱jkiu̱ún eʼwíinʼ xó má eʼni Jeobá rá. Rí maguaʼdáálu cualidad rí mambáyulú muʼni a̱jkiu̱ún eʼwíinʼ. Guʼyáá tikhuʼ rí ikhaa.

11. Xó má eʼthí náa Colosenses 3:12 ga̱jma̱a̱ 1 Pedro 3:​8, ndiéjunʼ cualidad mambáyulú mu maʼndulú kuʼñúún ga̱jma̱a̱ muʼni̱i̱ a̱jkiu̱ún eʼwíinʼ rá.

¹¹ Ndiéjunʼ gambáyúlú mu maʼndulú kuʼyamijná má xúʼko̱ ga̱jma̱a̱ rí muʼni̱i̱ a̱jkiu̱lú xúgíʼ mbiʼi rá. Rí maguaʼdáálu cualidad xóo rígi̱, rí makumulú xóó eʼwíinʼ, rí maʼndulú kuʼyamijná gajkhun ga̱jma̱a̱ gúʼnilú rí májánʼ (Atraxnuu Colosenses 3:12; 1 Pedro 3:8). Índo̱ rí nagáwíinʼ a̱jkiu̱lú ga̱jma̱a̱ i̱ʼwáʼ cualidad xóo rígi̱, naguáʼdáá rúʼko̱ naxkaxáanʼ mu muʼni̱i̱ a̱jkiu̱ún bi̱ kúwá rumíniiʼ ga̱jma̱a̱ numuu xkujndu. Jesús niʼthí: “Numuu dí gíwánʼ náa a̱jkiu̱u̱n xa̱bu̱, rúʼko̱ má eʼthí. Mbáa xa̱bu̱ májáanʼ, májánʼ má dí eguwíi náa a̱jkiu̱u̱n” (Mat. 12:​34, 35). Nakujmaa kaʼwu rí muʼni̱i̱ a̱jkiu̱ún a̱ngiu̱lú gíʼdoo wéñuuʼ numuu, xúʼko̱ nusngajmún rí nandulúʼ kuʼñúún.

XÓO GÁNDOO GUʼNI RÍ MAʼNDULÚ KUʼÑÚÚN MÁ XÚʼKO̱ A̱NGIU̱LÚ RÁ.

12. a) Ndíjkha rí ndayóo muñewumijna̱lú rá. b) Ndiéjunʼ graxe̱ guriʼña̱a̱lu xúgi̱ rá.

¹² Xúgiáanʼ ndayóoʼ muʼnimbulú kiʼthá ñajunʼ rígi̱: “Gaʼndulúʼ kuʼyamijná má xúʼko̱ kaníkháanʼ” (1 Juan 4:7). Mú ragíʼmaa magumulúʼ rí niʼthí Jesús: “Mbaʼin xa̱bu̱ ni xáʼndúún kuyamijná” (Mat. 24:12). Índo̱ niʼthí Jesús rígi̱, na̱nguá nindoo gaʼthí rí mbaʼin xa̱bi̱i̱ muniñaaʼ raʼndúún kuyamijná maski asndu xúʼko̱ gíʼmaa muñeumíjna̱lú mu xúʼni̱ xó má enii xa̱bu̱ náa numbaaʼ rígi̱. Xúgi̱ dí nikru̱ʼu̱lú má rígi̱, muriʼña̱a̱lú graxe̱ rígi̱ rá. Lá rígá imbo̱o̱ xóo ma̱ndoo muʼni mu maʼndulú kuʼñúún itháán a̱ngiu̱lú rá.

13. Náá minaaʼ rí ma̱ndoo musngajmálú rí nandulúʼ kuʼñúún a̱ngiu̱lú rá.

¹³ Mbáa xóo ma̱ndoo mbuʼyáálú á mu nandulúʼ kuʼñúún itháán a̱ngiu̱lú, nindxu̱u̱ xóo índo̱ rígá mbá dí nuraʼniilú (2 Cor. 8:8). Mbá dí rígi̱ niʼthí apóstol Pedro: “Mú gaʼndala kuyamíjna̱ wéñuuʼ numuu rí ngajua narugurámuuʼ mbaʼa aʼkhá” (1 Ped. 4:8). Ikha jngóo índo̱ a̱ngiu̱lú najngawi̱i̱n o nunigawúnlú ikhú ma̱ndoo mbuʼyáá nguáthá mba̱a̱ nandulúʼ kuʼñúún.

14. Xó má eʼthí náa 1 Pedro 4:​8, ndiéjunʼ ngajua rí ndayúlú rá. Atagíʼ mbá xkri̱da

¹⁴ Guʼyáá xóo itháán ajngáa rí niʼthí Pedro. Náa nagíʼduu versículo 8 naʼthí xóo nindxu̱u̱ ngajua rí gíʼmaa maguaʼdáá “gaʼndala kuyamíjna̱”. Náa ajngáa griega ajngáa rí nijmuu Pedro kuyamíjna̱ nandoo gáʼthúu̱n rí “naguaja̱n” náa versículo na̱ʼkha̱ raʼthí xóó, ndiéjunʼ dí naʼngo̱o̱ naʼni ngajua rígi̱ dí narugoo aʼkhá ndrígún a̱ngiu̱lú, gi̱i̱ naʼni mbríguii ngajua ga̱jma̱a̱ xóo mbá xtíin rí ma̱ndoo mataxuajan maʼni mba̱a̱, dí raʼkháa marugoo mbóó o a̱jma̱ aʼkhá, rí marugoo “mbaʼa aʼkhá”. Gi̱i̱ nandoo nduʼyáálú ajngáa rí marugoo nandoo gáʼthúu̱n matani mba̱a̱ a̱jkia̱a̱nʼ xó má mbá xuíʼtóo mbá xtíin ma̱ndoo marugoo náa niguma gachíí, xúʼko̱ má ngajua ma̱ndoo marugoo náa rí najngawi̱i̱n a̱ngiu̱lú.

15. Ndiéjunʼ rí naʼngo̱o̱ nuʼni índo̱ nandulúʼ kuʼñúún itháán a̱ngiu̱lú rá. (Colosenses 3:13).

¹⁵ Ngajua rí kuáʼdáá náa a̱ngiu̱lú gíʼmaa maʼni itháán mba̱a̱ mu xúʼko̱ maxkajxáánʼ muʼni mba̱a̱ a̱jkiu̱lú kuʼñúún náa rí najngawi̱i̱n, maski asndu nguáná makujmaa rí nindxu̱u̱ gakhi̱i̱ (atraxnuu Colosenses 3:13). Índo̱ naʼngulú nuʼni mba̱a̱ a̱jkiu̱lú kuʼñúún a̱ngiu̱lú, xúʼko̱ nusngajmá ngajua nindxu̱u̱ itháán mba̱a̱ ga̱jma̱a̱ rí nandulúʼ muʼni mba̱a̱ Jeobá. Ndiéjunʼ gambáyulúʼ mu muʼni mba̱a̱ a̱jkiu̱lú rí náa najngawi̱i̱n ga̱jma̱a̱ náa nuni̱ gawúnlú eʼwíinʼ rá.

16, 17. Ndiéjunʼ ma̱ndoo mambáyulú mu muʼni mba̱a̱ a̱jkiu̱lú kuʼñúún eʼwíinʼ índo̱ nakiéʼkúún rá. Atagíʼ mbá xkri̱da (Atayáá ma̱ngaa xtiʼkhuu).

¹⁶ Guʼyáá rí náa májánʼ eni̱ a̱ngiu̱lú raʼkháa náa najngawi̱i̱n. Gundxa̱ʼwa̱míjna rígi̱, mbá mbiʼi ikháán naraxtaa gagi gajmiáanʼ eʼwíinʼ a̱ngiu̱lú ga̱jma̱a̱ nda̱wa̱á nu̱tala rí muríyaʼ mbá foto. Mu xúʼko̱ ma̱ndoo marmáʼáan a̱jkia̱la xóo nikuwánlá gagi mbiʼi rúʼko̱, nurawíila ajtsú foto. Mbá dí ikhaa mbáa ndxájulú tágajnuu májánʼ fotiuu. Ndiéjunʼ gátani̱ ga̱jma̱a̱ʼ foto rúʼko̱ rá. Matani̱ jngudi̱i̱, ga̱jma̱a̱ mawanáaʼ ga̱jma̱a̱ káaʼ a̱jma̱ foto, náa rí nakujmiin mbá xúgíinʼ kúwá randuʼwá.

¹⁷ Foto rí nurajxilu nindxu̱u̱ rí náa mbiʼi rí nikuwáanʼ gagi. Numuu rí narmáʼáan a̱jkiu̱lú xóo mitsaanʼ nikuwáanʼ gajmiúlú a̱ngiu̱lú, gundxaʼwamíjna̱lú rí náa mbiʼi rúʼko̱ mbáa ndxájulú niʼthí o niʼni mbá dí raʼkhí. Ndiéjunʼ gatani ga̱jma̱a̱ foto rúʼko̱ rá. Náa numuu jngóo tsétani ngudi̱i̱ xóo má nitani̱ ga̱jma̱a̱ i̱ʼwáʼ rá. (Prov. 19:11; Efes. 4:32.) Numuu rí itháán má mbaʼa nuthu rí nakúwánʼlu gagi gajmiúlú ndxájulú buʼko̱, rúʼko̱ gambáyulúʼ mu xáʼniulu gakhi̱i̱ muʼnilú mba̱a̱ a̱jkiu̱lú kuʼyáá náa rí nikiéʼkúun. Itháán májánʼ dí mura̱jxi̱i̱lu foto rí “nindxu̱u̱ rí mitsaanʼ”.

NDÍJKHA RÍ GÍʼDOO NUMUU MUGUAʼDÁÁ NGAJUA RÍ MBIʼI XÚGI̱ RÁ.

18. Ndiéjunʼ rí itháán ni̱ʼkha̱ raʼthí náa artículo rígi̱ rá.

¹⁸ Ndíjkha rí ndayóoʼ rí maʼndulú kuʼyamíjna̱ itháán rá. Xó má ndiʼyáá, índo̱ nandulúʼ kuʼñúún a̱ngiu̱lú xúʼko̱ esngajmálú rí nandulúʼ kuʼyáá Jeobá. Xú káʼnii gándoo gusngajmún a̱ngiu̱lú rí nandulúʼ kuʼñúún rá. Mbá rí ma̱ndoo muʼni rí muʼni̱i̱ a̱jkiu̱ún. Mu muʼni má xúʼko̱ rígi̱, ndayóoʼ rí magawíínʼ a̱jkiu̱lú. Xú káʼnii gándoo guʼni mu maʼndulú kuʼyamijná itháán má xúʼko̱ rá. Guʼni má xúʼko̱ xúgíʼ xó má eʼngo̱o̱ rí muʼni̱ mba̱a̱ a̱jkiu̱lú kuʼñúún náa rí najngawi̱i̱n.

19. Ndíjkha rí gíʼdoo numuu musngajmá rí nandulúʼ kuʼyamijná rí mbiʼi xúgi̱ rá.

¹⁹ Lá gíʼdoo numuu rí musngajmá ngajua rí mbiʼi xúgi̱ rá. Guʼyalú rí niʼthí Pedro: “Mbiʼi rí mambáa xúgíʼ dí rígá nijngiyúu má. Ikha jngóo, [...] Mú gaʼndala kuyamíjna̱” (1 Ped. 4:​7, 8). Ndiéjunʼ rí kuaʼthi̱i̱n marigá xó má na̱jkha̱ rangijyúu mbiʼi ndrígóo Dios rá. Jesús niʼthúún xa̱bi̱i̱ rígi̱: “Xúgíinʼ xa̱bu̱ mawiñu̱u̱nʼ kuyala ga̱jma̱a̱ numuu mbiʼyuʼ” (Mat. 24:9). Mu muʼnilú má xúʼko̱ ñajuunʼ Jeobá maski ajndu nawiñunʼ kuyulú ndayóoʼ rí makuwáanʼlu jnduʼ. Gixa̱a̱ nandoo rí xákuwáanʼ jnduʼ, mu xáʼngo̱o̱ ikhaa, á mu nandulúʼ kuʼyamijná numuu rí ngajua “naruwi̱i̱n xa̱bu̱” (Col. 3:14; Filip. 2:​1, 2).