Mbiʼyuu Jeobá gíʼdoo numuu náa ikháanʼ

1, 2. Xú káʼnii eʼyáá dí i̱ndó mbiʼyuu Jeobá nindxu̱u̱ dí itháan gíʼdoo numuu náa Jesús rá.

DÍ ITHÁAN gíʼdoo numuu eʼyoo Jesús nindxu̱u̱ mbiʼyuu Jeobá. Ikhaa nindxu̱u̱ bi̱ phú nixnún eʼwíinʼ muniʼnuuʼ mbiʼyuu Anu̱u̱. Náa artículo dí ninújngoo ndiʼyáá dí Jesús nixtáa xawii makhañúu mu masngájma dí Jeobá nindxu̱u̱ kaʼwii ga̱jma̱a̱ dí xúgíʼ rí naʼni nindxu̱u̱ májánʼ (Mar. 14:36; Heb. 10:​7-9). Índo̱ gáwámbá dí maʼtáñajunʼ mbá Mil tsiguʼ, maxtáa xawii maxnájxi̱i̱ náa Anu̱u̱ rí niʼtáñajunʼ, mu xúʼko̱ maguma kaʼwi̱i̱ mbiʼyuu Jeobá (1 Cor. 15:​26-28). Xúgíʼ dí Jesús niʼni ga̱jma̱a̱ numuu Jeobá nasngájma dí ra̱ʼkhá tháan nandoo kaʼyoo.

² Jesús ni̱ʼkha̱ náa tsu̱du̱u̱ Ku̱ba̱ʼ mu maʼthúún xa̱bu̱ xúgíʼ dí Jeobá nandoo mbuyáá (Juan 5:43; 12:13). Nixnúún xa̱bi̱i̱ muniʼnuuʼ mbiʼyuu Anu̱u̱ (Juan 17:​6, 26). Nijmuu mbiʼyuu Jeobá mu maʼsngáa ma̱ngaa mu maʼni mbaʼa milagro (Juan 10:25). Índo̱ niʼtájkháan, nindo̱ʼo̱o̱ rígi̱ Jeobá ga̱jma̱a̱ numún xa̱bi̱i̱: “Atiewu̱u̱n ga̱jma̱a̱ numuu mbiʼyaaʼ”. Nakujmaa kaʼwu dí i̱ndó mbiʼyuu Jeobá gíʼdoo itháan numuu náa Jesús. Ikha jngóo, xú káʼnii gándoo gáʼthí mbáa xa̱bu̱ dí nindxu̱u̱ cristiano á mu tséʼninuuʼ ni má tséjmuu mbiʼyuu Jeobá rá.

3. Ndiéjunʼ gúʼyáá náa artículo rígi̱ rá.

³ Bi̱ nindxu̱lú cristianos gajkhun, nuʼnimíjna̱ mbuʼyaridáá Jesús. Ikha jngóo mangáánʼ nduʼyáá dí ra̱ʼkhá tháan gíʼdoo numuu mbiʼyuu Jeobá (1 Ped. 2:21). Náa artículo rígi̱ mbuʼyáá náá numuu dí Jeobá nixnún mbiʼyuu bi̱ nutaraʼa “ajngáa rí májánʼ ga̱jma̱a̱ numuu Xa̱bu̱ Ñajunʼ ndrígóo Dios” (Mat. 24:14). Ma̱ngaa mbuʼyáá ndíjkha dí gíʼmaa magiʼdoo numuu mbiʼyuu Jeobá náa mámbáa dí ikháanʼ.

“MBÁ XUAJEN RÍ MBAYÁ MBIʼYUU”

4. a) Ndiéjunʼ niʼthúún Jesús xa̱bi̱i̱ nákha inu maʼga̱a̱ mekhuíí rá. b) Ndiéjunʼ grajxe̱ gúriʼña̱a̱ rá.

⁴ Nákha Jesús inu maʼga̱a̱ mekhuíí, niʼthúún xa̱bi̱i̱: “Mundrígúla tsiakii índo̱ espíritu santo gáʼkha̱ náa ikháanʼla. Mu̱tala ga̱jma̱a̱ numuʼ náa Jerusalén, náa xúgíʼ Judea ga̱jma̱a̱ náa Samaria, ma̱ngaa asndu náa naguámbári̱go̱o̱ numbaaʼ” (Hech. 1:8). Ikha jngóo ajngáa rí májánʼ raʼkháa i̱ndó majuiʼtáraʼa náa Israel ma̱ngaa xa̱bu̱ bi̱ kúwá náa xúgíʼ xuajin ma̱ndoo maguánú mani̱ndxu̱ún xa̱bi̱i̱ Jesús (Mat. 28:​19, 20). Mú guʼyáá dí Jesús niʼthí: “Mu̱tala ga̱jma̱a̱ numuʼ”. Lá rígi̱ eyoo gáʼthúu̱n dí bi̱ ndiʼkúú mani̱ndxu̱ún xa̱bi̱i̱ i̱ndó muniʼnuuʼ mbiʼyuu Jesús o ma̱ngaa mbaʼyóoʼ muniʼnuuʼ mbiʼyuu Jeobá dxe̱ʼ. Hechos capítulo 15 nambáyulú mbuʼyáá xóo exti̱ʼña̱a̱ grajxe̱ rígi̱.

5. Xú káʼnii nisngajma apóstoles ga̱jma̱a̱ bi̱ kuya̱ edxu̱u̱ bi̱ nikúwá náa Jerusalén dí gíʼdoo numuu rí xúgíinʼ xa̱bu̱ muniʼnuuʼ mbiʼyuu Jeobá rá. (Atayáá ma̱ngaa xtiʼkhuu.)

⁵ Nákha tsiguʼ 49, apóstoles ga̱jma̱a̱ bi̱ kuya̱ edxu̱u̱ bi̱ kúwá náa Jerusalén, nigimbíin mu mutamijná rí ndayóoʼ muni̱ bi̱ raʼkhíin judíos mu mani̱ndxu̱ún cristianos. Índo̱ niguámbá reunión, Santiago giʼtio skojo̱o̱ Jesús, niʼthí: “Symeón [Pedro] niʼthúxu kuduun xú káʼnii timbá aʼphu̱ Dios nitanga̱a̱ ndiʼñún xa̱bu̱ bi̱ raʼkhíin judíos mu maríya̱ʼ mbá xuajen rí mbayá mbiʼyuu”. Tsáá mbiʼyuu rá. Nijmuu dí niʼnirámáʼ profeta Amós ga̱jma̱a̱ niʼthí xóó: “Mu xa̱bu̱ bi̱ gáguanún, mbuyáaʼ tsumáá Jeobá gajmiún xa̱bu̱ bi̱ kúwá náa xuajen, xa̱bu̱ bi̱ najmún mbiʼyuʼ. Xúʼko̱ eʼthí Jeobá” (Hech. 15:​14-18). Ikha jngóo bi̱ ndiʼkúú mani̱ndxu̱ún xa̱bi̱i̱ Jesús. Raʼkháa i̱ndó majmañún ga̱jma̱a̱ numuu Jeobá ma̱ngaa majmaʼnuuʼ ga̱jma̱a̱ numuu mbiʼyuu Dios. Rígi̱ nandoo gáʼthúu̱n dí musngúún eʼwíinʼ xa̱bu̱ ga̱jma̱a̱ numuu Jeobá.

6, 7. a) Náá numuu dí ni̱ʼkha̱ Jesús náa tsu̱du̱u̱ Ku̱ba̱ʼ rá. b) Náá i̱mba̱ numuu rí ni̱ʼkha̱ Jesús náa tsu̱du̱u̱ Ku̱ba̱ʼ rá.

⁶ Gármáʼáan a̱jkiu̱lú dí mbiʼyuu Jesús nandoo gáʼthúu̱n: “Jeobá nindxu̱u̱ bi̱ naʼni káwáánʼlú”. Ga̱jma̱a̱ xúʼko̱ má nirígá numuu dí Jeobá nijmiuu Jesús mu maʼni káwíin xúgíinʼ xa̱bu̱ bi̱ guáʼdáá fe. Jesús ni̱ʼkha̱ náa tsu̱du̱u̱ Ku̱ba̱ʼ mu maxnájximinaʼ makhañúu ga̱jma̱a̱ numún xa̱bu̱ (Mat. 20:28). Rígi̱ niʼni dí majngudi̱i̱ aʼkhúún ga̱jma̱a̱ ma̱ndoo makuwá kámuu mbiʼi (Juan 3:16).

⁷ Mú náá numuu rí ndiyóoʼ maguma káwíin xa̱bu̱ rá. Ga̱jma̱a̱ numuu dí nirígá náa jardín dí rígá náa Edén. Xó má ndiʼyáá náa artículo dí nijngoo, ga̱jma̱a̱ numuu dí Adán ga̱jma̱a̱ Eva túnimbu̱ún kuyáá Jeobá, ikha jngóo nánguá nindoo makuwá kámuu mbiʼi (Gén. 3:​6, 24). Mú, Jesús ni̱ʼkha̱ náa tsu̱du̱u̱ Ku̱ba̱ʼ mu maʼni mbá dí itháan gíʼdoo numuu ki xóo dí maʼni káwíin xa̱bu̱ numbaaʼ. Gixa̱a̱ niʼthí dí ragájkhun ga̱jma̱a̱ numuu Jeobá (Gén. 3:​4, 5). Ikha jngóo xa̱bu̱ ndiyóoʼ mbuyáá dí Jeobá na̱nguá niʼni dí ra̱májánʼ ga̱jma̱a̱ dí mbiʼyuu nindxu̱u̱ kaʼwu, Jesús nindxu̱u̱ bi̱ ma̱ndoo masngájma dí mbiʼyuu Jeobá nindxu̱u̱ kaʼwu, numuu rí Jeobá má nikungua̱a̱ʼ ga̱jma̱a̱ Jesús niʼni xúgíʼ dí Jeobá nindoo.

8. Ndiéjunʼ gáʼyóoʼ makru̱ʼu̱u̱n mbá xúgíinʼ cristianos rá.

⁸ Xúgíinʼ bi̱ gánindxu̱ún cristianos, mbaʼyóoʼ mbuyáá dí bi̱ phú naʼni káwíin nindxu̱u̱ Jeobá (Juan 17:3). Ga̱jma̱a̱ ikha̱á má xóo Jesús majmaʼnuuʼ ga̱jma̱a̱ numuu mbiʼyuu Jeobá, mbaʼyóoʼ makru̱ʼu̱u̱n ndíjkha dí gíʼdoo numuu maguma kaʼwi̱i̱ mbiʼyuu Jeobá, ga̱jma̱a̱ á mu nuni̱ kaʼwi̱i̱ ma̱ndoo maguma káwíin (Hech. 2:​21, 22). Ikha jngóo xúgíinʼ xa̱bu̱ bi̱ naguájun jmbu ndayóoʼ majmañún ga̱jma̱a̱ numuu Jeobá ma̱ngaa ga̱jma̱a̱ numuu Jesús. Ga̱jma̱a̱ numuu rígi̱ niʼthí ajngáa dí nuxkamaa náa Juan capítulo 17, índo̱ niguámbóo niʼtájkáan: “Ikhúúnʼ nixnu̱u̱n mbuyáá mbiʼyaaʼ ga̱jma̱a̱ maxnu̱u̱n mbuyáá má xúʼko̱, mu xó má nindaaʼ xta̱yo̱ʼ ikhúúnʼ xúʼko̱ má gáʼndaaʼ xtañún mangiin ga̱jma̱a̱ ikhúúnʼ maxtáá mbóó gajmíʼ ikhiin” (Juan 17:26).

“IKHÁANʼ NINDXA̱LA TESTIGOS NDRÍGÓʼ”

9. Xú káʼnii gándoo gúsngajmá dí gíʼdoo numuu mbiʼyuu Jeobá rá.

⁹ Xó má eʼyáá, rí maguma kaʼwi̱i̱ mbiʼyuu Jeobá nindxu̱u̱ dí itháan gíʼmaa magiʼdoo numuu náa xúgíinʼ cristianos bi̱ gajkhun (Mat. 6:​9, 10). Ikháanʼlú nduʼyáá dí mbiʼyuu Jeobá gíʼdoo itháan numuu, ma̱ngaa ndayóoʼ musngajma ga̱jma̱a̱ dí xóo nu̱ʼni̱ dí xúʼko̱ nindxu̱u̱. Ndiéjunʼ gándoo gúʼni mu maguma kaʼwi̱i̱ mbiʼyuu Jeobá ma̱ngaa mu musngajma dí ragájkhun dí Gixa̱a̱ niʼthí ga̱jma̱a̱ numuu xá.

10. Ndiéjunʼ eʼthí náa Isaías capítulo 42 asndu 44 rá. (Isaías 43:9; 44:​7-9; atayáá ma̱ngaa xtiʼkhuu.)

¹⁰ Náa Isaías capítulo 42 asndu 44, naʼthí rí ma̱ndoo mu̱ʼni̱ mu maguma kaʼwi̱i̱ mbiʼyuu Jeobá. Náa capítulos rígi̱ naʼthí dí Jeobá naʼthúún xa̱bu̱ bi̱ tséyamajkuíí rí musngajma á mu gajkhun kúwá xándú bi̱ nduyamajkhún, ma̱ngaa nandi̱ʼi̱i̱n testigos bi̱ muthi, mú nimbáa tséʼngo̱o̱ gásngájma dí nindxu̱u̱ gajkhun (atraxnuu Isaías 43:9; 44:​7-9).

11. Xó má eʼthí Isaías 43:​10-12, ndiéjunʼ eʼthúún Jeobá xa̱bi̱i̱ rá.

¹¹ (Atraxnuu Isaías 43:​10-12). Jeobá naʼthúún xa̱bi̱i̱: “Ikháanʼ nindxa̱la testigos ndrígóʼ [...] ikhúún nindxu̱ʼ Dios”. Naʼthúún dí muriʼña̱a̱ grajxe̱ rígi̱: “Lá xtáa i̱mba̱a̱ Dios xóo ikhúún ráʼ.” (Is. 44:8.) Ikháanʼlú ma̱ndoo muriʼña̱a̱ grajxe̱ rígi̱, á mu nuñewa̱a̱n xóo nuʼthá, xóo nu̱ʼni̱, á mu xúʼko̱ eʼni musngajmá dí mbáwíí Jeobá nindxu̱u̱ Dios ga̱jma̱a̱ dí i̱ndó mbiʼyuu ikhaa gíʼdoo itháan numuu. Ma̱ngaa xóo kúwáanʼ nasngájma dí gajkhun nandulúʼ kuʼyáá Jeobá ga̱jma̱a̱ dí naguajún jmbu náa ikhaa, tséʼniuu á mu Gixa̱a̱ naʼniminaʼ marikulú. Á mu xúʼko̱ eʼni muruguambáá mu maguma kaʼwi̱i̱ mbiʼyuu Dios.

12. Xú káʼnii nimbánuu kiʼtáriyaʼ dí na̱ʼkha̱ náa Isaías 40:​3, 5 rá.

¹² Isaías ma̱ngaa niʼthí dí maxtáa mbáa bi̱ maʼni májáanʼ o maʼni kaʼwi̱i̱ “kambo̱o̱ Jeobá” (Is. 40:3; nota). Xú káʼnii nimbánuu kiʼtáriyaʼ rígi̱ rá. Juan bi̱ nikumíinʼ iyááʼ xa̱bu̱, niʼni kaʼwi̱i̱ kamba̱a̱ náa ma̱ʼkha̱ Jesús, ikhaa ni̱ʼkha̱ ga̱jma̱a̱ numuu mbiʼyuu Jeobá ma̱ngaa niʼsngúún xa̱bu̱ mbiʼyuu Jeobá (Mat. 3:3; Mar. 1:​2-4; Luc. 3:​3-6). Isaías ma̱ngaa niʼtáriyaʼ: “Makujmaa tsiaki̱i̱ ndrígóo Jeobá” (Is. 40:5). Xú káʼnii nimbánuu ajngáa rígi̱ rá. Índo̱ Jesús ni̱ʼkha̱ náa tsu̱du̱u̱ Ku̱ba̱ʼ nisngájma mbájmbu xóo nindxu̱u̱ Anu̱u̱, rí ninindxu̱u̱ asndu xóo Jeobá má ni̱ʼkha̱ náa tsu̱du̱u̱ Ku̱ba̱ʼ (Juan 12:45).

13. Xú káʼnii gándoo gúʼyaridáá Jesús rá.

¹³ Índo̱ nuyambáá mu maguma kaʼwi̱i̱ mbiʼyuu Jeobá, kúwáanʼ ruʼyaridáá Jesucristo, xó má ikhaa, mangáánʼ nindxu̱lú testigos ndrígióo Jeobá. Nuʼthúún eʼwíinʼ xa̱bu̱ ga̱jma̱a̱ numuu mbiʼyuu Jeobá ma̱ngaa ga̱jma̱a̱ numuu xúgíʼ rí mitsaanʼ dí ikhaa niʼni. Mu ma̱ndoo muʼnimbáníí májánʼ ñajunʼ rígi̱, ndayóoʼ muʼthá rí Jesús niʼni ma̱ngaa dí maʼni nda̱wa̱á mu maʼni kaʼwi̱i̱ mbiʼyuu Jeobá (Hech. 1:8). Jesús nindxu̱u̱ Testigo bi̱ itháan gíʼdoo numuu ga̱jma̱a̱ ikháanʼ nduʼyaridáá (Apoc. 1:5). Mú, xú káʼnii gándoo gúsngajmá dí mbiʼyuu Jeobá gíʼdoo numuu náa ikháanʼlú rá.

GUSNGAJMÁ DÍ MBIʼYUU JEOBÁ GÍʼDOO NUMUU NÁA IKHÁANʼ

14. Xó má eʼthí náa Salmo 105:​3, xú káʼnii kumulúʼ ga̱jma̱a̱ numuu mbiʼyuu Jeobá rá.

¹⁴ Nadxulú ga̱jma̱a̱ numuu mbiʼyuuʼ Jeobá (atraxnuu Salmo 105:3). Jeobá nanigu̱u̱ʼ dí mu̱ʼni̱ mbaʼumíjna̱ ga̱jma̱a̱ numuu ikhaa (Jer. 9:​23, 24; 1 Cor. 1:31; 2 Cor. 10:17). Rí matanimbamínaʼ ga̱jma̱a̱ numuu Jeobá nandoo gáʼthúu̱n rí maʼdxaaʼ ga̱jma̱a̱ numuu mbiʼyuu. Gíʼdoo numuu ñajunʼ dí nikhánulú mu̱ʼni̱, dí muʼthúún eʼwíinʼ xa̱bu̱ rí Jeobá nindxu̱u̱ kaʼwii ga̱jma̱a̱ dí xúgíʼ rí naʼni nindxu̱u̱ májánʼ. Xáti̱yu̱lú muʼthá dí nindxu̱lú testigos de Jeobá, tséʼniuu á mu náa nuñajunʼ, náa nuʼnigajma̱a̱, náa xuajñulú o asndu náá má kuwáánʼ. Gixa̱a̱ nandoo dí muniʼñááʼ ruʼthá ga̱jma̱a̱ numuu Jeobá (Jer. 11:21; Apoc. 12:17). Ikhaa gajmíi̱n profetas bi̱ minduwiinʼ nandún rí xa̱bu̱ mambumún mbiʼyuu Jeobá (Jer. 23:​26, 27). Mú ikháánʼ ra̱ʼkhá tháan eyulú kuʼyáá mbiʼyuu Jeobá, ikha jngóo “xúgíʼ mbiʼi” nandulúʼ mu̱ʼni̱ mba̱a̱ (Sal. 5:11; 89:16).

15. Ndiéjunʼ eyoo gáʼthúu̱n rí mugríga̱a̱ mbiʼyuu Jeobá rá.

¹⁵ Nugriga̱a̱ má xúʼko̱ mbiʼyuu Jeobá (Joel 2:32; Rom. 10:​13, 14). Mu mugríga̱a̱ mbiʼyuu Jeobá, raʼkháa i̱ndó ndayóoʼ muniʼnuuʼ mbiʼyuu ga̱jma̱a̱ majmulú, ma̱ngaa ndayóoʼ mbuʼyáá xóo nindxu̱u̱, makumulú kuʼyáá ga̱jma̱a̱ munda̱ʼa̱a̱ dí mambáyulúʼ ma̱ngaa dí maxnúlú ikha (Sal. 20:7; 99:6; 116:4; 145:18). Gíʼmaa muʼthúún eʼwíinʼ xa̱bu̱ ga̱jma̱a̱ numuu mbiʼyuu, xóo nindxu̱u̱, ga̱jma̱a̱ dí mumbáñún matanga̱a̱ a̱jkiu̱ún ma̱ngaa dí muriʼkumijnáa mu muni̱ dí nanigu̱u̱ʼ Jeobá (Is. 12:4; Hech. 2:​21, 38).

16. Xú káʼnii gándoo gúsngajmá dí Gixa̱a̱ naʼni nduwaʼ rá.

¹⁶ Kúwáanʼ xawii mumíniiʼ ga̱jma̱a̱ numuu mbiʼyuu Jeobá (Sant. 5:​10, 11). Índo̱ nuguajún jmbu náa Jeobá maski ajndu numíniiʼ nusngajmá dí Gixa̱a̱ naʼni nduwaʼ. Mbiʼi dí nixtáa Job, Gixa̱a̱ niʼthí rígi̱ ga̱jma̱a̱ numún xúgíinʼ xa̱bi̱i̱ Dios: “Xa̱biya̱ maxná xúgíʼ rí gíʼdoo mu maʼnikríyaminaʼ” (Job 2:4). Niʼthí rí xa̱bu̱ i̱ndó muni̱ ñajuunʼ Jeobá á mu kúwá májánʼ, mú muniña̱a̱ʼ runi̱ ñajuunʼ á mu naguáʼníí dí ra̱májánʼ. Job niwi̱ji̱ jmbu, xúʼko̱ nisngájma dí niʼthí Gixa̱a̱ nindxu̱u̱ minduwaʼ, ikháánʼlú mangáánʼ ma̱ndoo musngajmá dí ikhaa naʼni nduwaʼ. Tséʼniuu má asndu ndiéjunʼ tsáʼkhá dí gágrui̱ga̱ Gixa̱a̱, nditháan xúniʼñáánʼ ru̱ʼni̱ ñajuunʼ Jeobá, nduʼyáá gajkhun dí ikhaa mañewu̱nlú má xúʼko̱ ga̱jma̱a̱ numuu mbiʼyuu (Juan 17:11).

17. Xó má eʼthí náa 1 Pedro 2:​12, ndiéjunʼ ma̱ngaa ma̱ndoo mu̱ʼni̱ mu maguma mba̱a̱ mbiʼyuu Jeobá rá.

¹⁷ Nu̱ʼni̱ asndu xó má eʼngo̱o̱ muʼthúún eʼwíinʼ ga̱jma̱a̱ numuu mbiʼyuu Jeobá (Prov. 30:9; Jer. 7:​8-11). Xa̱bu̱ nduyáá dí ikháanʼ nindxu̱lú testigos de Jeobá, ikha jngóo dí nu̱ʼni̱ ma̱ndoo maʼni mba̱a̱ mbiʼyuu Jeobá o maʼni gachúu (atraxnuu 1 Pedro 2:12). Maski ajndu nindxu̱lú xa̱bu̱ aʼkhá, ma̱ndoo muxnáá gamajkhu Jeobá á mu nuñewa̱a̱n ajngáa dí nuʼthá ga̱jma̱a̱ dí xóo nu̱ʼni̱.

18. Xú káʼnii gándoo gúsngajmá dí mbiʼyuu Jeobá gíʼdoo numuu náa ikháanʼlú rá. (Atayáá ma̱ngaa xtiʼkhuu.)

¹⁸ Nduʼyáá rí mbiʼyuu Jeobá gíʼdoo itháan numuu ki xóo dí nuthi xa̱bu̱ ga̱jma̱a̱ numulúʼ (Sal. 138:2). Numuu dí nandulúʼ kuʼyáá mbiʼyuu Jeobá, nu̱ʼni̱ xúgíʼ dí ikhaa nanigu̱u̱ʼ, mú nguáná ga̱jma̱a̱ numuu dí xígi̱ kaʼnii e̱ʼni̱ xa̱bu̱ nutsijma ma̱ngaa nuthi dí raʼkhí ga̱jma̱a̱ numulú.a Jesús nixtáa xawii makhañúu, maski ajndu xa̱bu̱ ndiyáá dí nindxu̱u̱ xóo mbáa xa̱bu̱ ra̱májánʼ. Xó má eʼthí náa Hebreos 12:​2-4, dí “táxmiéjuunʼ rí magajnúu gamajkuu”, xó muʼthá táxmiéjuunʼ ga̱jma̱a̱ numuu rí eʼwíinʼ e̱ndxa̱ʼwa̱míjna̱. Dí itháan nindoo nindxu̱u̱ rí maʼni dí nandoo Dios (Mat. 26:39).

19. Ndiéjunʼ ku̱ma̱a̱ʼ ikháán ga̱jma̱a̱ numuu mbiʼyuu Jeobá, ga̱jma̱a̱ náá numuu rá.

¹⁹ Nadxulú dí nu̱ʼni̱ ñajuunʼ Jeobá ga̱jma̱a̱ dí nagumbiʼyulú testigos de Jeobá. Ikha jngóo tsixmiéjunʼlú índo̱ eʼwíinʼ nutsijma o nuthi dí raʼkhí ga̱jma̱a̱ numulú. Mbiʼyuu Jeobá gíʼdoo itháan numuu ki xóo dí nundxa̱ʼwa̱míjna̱ eʼwíinʼ ga̱jma̱a̱ numulú. Ikha jngóo nandulúʼ mu̱ʼni̱ mba̱a̱ má xúʼko̱ Jeobá maski ajndu Gixa̱a̱ nagrui̱ga̱ tsáʼkhá inulú, xígi̱ esngajmálú dí mbiʼyuu Jeobá gíʼdoo numuu náa ikháanʼ xó má nigiʼdoo numuu náa Jesucristo.