సంఖ్యాకాండం
25 ఇశ్రాయేలీయులు షిత్తీములో+ నివసిస్తున్నప్పుడు ప్రజలు మోయాబు స్త్రీలతో లైంగిక పాపం చేయడం మొదలుపెట్టారు.+ 2 ఆ స్త్రీలు తమ దేవుళ్లకు బలులు అర్పిస్తున్నప్పుడు వాళ్లను ఆహ్వానించారు;+ దాంతో ప్రజలు వాటిని తిని, వాళ్ల దేవుళ్లకు వంగి నమస్కరించడం మొదలుపెట్టారు.+ 3 అలా ఇశ్రాయేలీయులు వాళ్లతో చేరి పెయోరులోని బయలును పూజించారు,+ అప్పుడు యెహోవాకు ఇశ్రాయేలీయుల మీద చాలా కోపం వచ్చింది. 4 కాబట్టి యెహోవా మోషేతో ఇలా అన్నాడు: “ఈ ప్రజల నాయకులందర్నీ* తీసుకొని పట్టపగలే యెహోవా ముందు వేలాడదీయి, అప్పుడు మండుతున్న యెహోవా కోపం ఇశ్రాయేలీయుల మీది నుండి పక్కకు మళ్లుతుంది.” 5 దాంతో మోషే ఇశ్రాయేలు న్యాయమూర్తులతో+ ఇలా అన్నాడు: “మీలో ప్రతీ ఒక్కరు పెయోరులోని బయలు పూజలో పాల్గొన్న మీ మనుషుల్ని చంపేయాలి.”+
6 సరిగ్గా అప్పుడే, ప్రజలు ప్రత్యక్ష గుడారపు ప్రవేశ ద్వారం దగ్గర ఏడుస్తుండగా, ఒక ఇశ్రాయేలీయుడు మోషే కళ్లముందు, ఇశ్రాయేలీయులందరి కళ్లముందు ఒక మిద్యాను స్త్రీని+ తన సహోదరుల దగ్గరికి తీసుకొచ్చాడు. 7 ఎలియాజరు కుమారుడూ, యాజకుడైన అహరోను మనవడూ అయిన ఫీనెహాసు+ అది చూసినప్పుడు, వెంటనే సమాజం మధ్య నుండి లేచి తన చేతిలో ఈటె* తీసుకున్నాడు. 8 తర్వాత అతను ఆ ఇశ్రాయేలీయుడి వెంట ఆ డేరాలోకి వెళ్లి ఆ స్త్రీ కడుపులో గుండా వాళ్లిద్దర్నీ పొడిచాడు. దాంతో ఇశ్రాయేలీయుల మీదికి వచ్చిన తెగులు ఆగిపోయింది.+ 9 ఆ తెగులు వల్ల మొత్తం 24,000 మంది చనిపోయారు.+
10 అప్పుడు యెహోవా మోషేతో ఇలా అన్నాడు: 11 “ఎలియాజరు కుమారుడూ, యాజకుడైన అహరోను మనవడూ అయిన ఫీనెహాసు+ ఇశ్రాయేలీయుల మధ్య నా విషయంలో ఎలాంటి నమ్మకద్రోహ ప్రవర్తననూ సహించలేదు; అలా అతను ఇశ్రాయేలీయుల మీది నుండి నా ఉగ్రతను పక్కకు మళ్లించాడు.+ కాబట్టి, నేను సంపూర్ణ భక్తిని కోరుకునే దేవుణ్ణి అయినప్పటికీ వాళ్లను పూర్తిగా తుడిచిపెట్టలేదు.+ 12 అందుకే నువ్వు అతనితో ఇలా చెప్పాలి: ‘నేను అతనితో నా శాంతి ఒప్పందం చేస్తున్నాను. 13 ఈ ఒప్పందం ప్రకారం, యాజకత్వం ఎప్పటికీ అతనికి, అతని తర్వాత అతని సంతానానికి చెందుతుంది.+ ఎందుకంటే, అతను తన దేవుని విషయంలో ఎలాంటి నమ్మకద్రోహ ప్రవర్తననూ సహించలేదు;+ అలాగే ఇశ్రాయేలు ప్రజల కోసం అతను ప్రాయశ్చిత్తం చేశాడు.’ ”
14 ఆ మిద్యాను స్త్రీతో పాటు చంపబడిన ఇశ్రాయేలీయుడి పేరు జిమ్రీ, అతను సాలూ కుమారుడు; అతను షిమ్యోనీయుల పూర్వీకుల కుటుంబాల్లో ఒకదానికి ప్రధానుడు. 15 చంపబడిన ఆ మిద్యాను స్త్రీ పేరు కొజ్బీ, ఆమె సూరు+ కూతురు; ఇతను మిద్యానీయుల + పూర్వీకుల కుటుంబాల్లో ఒకదానికి నాయకుడు.
16 తర్వాత యెహోవా మోషేతో ఇలా అన్నాడు: 17 “మీరు మిద్యానీయుల మీద దాడిచేసి వాళ్లను చంపేయండి.+ 18 ఎందుకంటే, పెయోరు విషయంలో+ వాళ్లు మీతో కుయుక్తితో వ్యవహరించి, మీరు పాపం చేసేలా ప్రలోభపెట్టి మీ మీదికి విపత్తు రప్పించారు; పెయోరు విషయంలో మీ మీదికి తెగులు వచ్చిన రోజు+ చంపబడిన మిద్యాను ప్రధానుడి కూతురు కొజ్బీ+ ద్వారా కూడా పాపం చేసేలా వాళ్లు మిమ్మల్ని ప్రలోభపెట్టారు.”