ప్రశ్నాభాగము

• సంఘ పుస్తకపఠనమునకు హాజరైనప్పుడు మనమెట్లు క్రైస్తవ మర్యాదలను ప్రదర్శించగలము?

సాధారణముగా మన పొరుగువారు మనలను గమనించుచుండుటయేగాక కొన్నిసార్లు మనలను గూర్చి వ్యాఖ్యానించటము, మన ప్రవర్తననుబట్టి ప్రతిస్పందించటము జరుగును. (1 కొరిం. 4:9 ని పోల్చుము) యెహోవా సేవకులుగా మన నడవడినిగూర్చిన వారి వ్యాఖ్యానము మరియు ప్రతిస్పందన అనుకూలమైనదిగా ఉండవలెనని కోరుదము. (1 పేతు. 2:12) సంఘపుస్తకపఠన సంబంధముగా మనము మెలగు విషయములోను ఇది సత్యమైయున్నది. వీటిలో ఎక్కువభాగము వ్యక్తిగత గృహములలో జరుగును గనుక, మనము చేయు ప్రతికార్యమందును మన మర్యాదలు బాగుగా ప్రతిబింబించులాగున ప్రత్యేక జాగ్రత్త వహించవలసియున్నాము. మనము పుస్తకపఠనము జరుపుకొనువారి పొరుగు ప్రాంతమందు వాహనములు నిలుపుకొనుస్థలము తక్కువగాయుండును గనుక పొరుగువారియెడలగల మన ప్రేమ మన వాహనమును వారికి ఇబ్బంది, లేక బాధ కలిగించురీతిగా పెట్టకుండునట్లు మనలను నిలుపుచేయును.

మనము కలుసుకొన్నప్పుడు ఆనందిస్తాము. గనుక తరచుగా కూటముల ముందు లేక తరువాత మాట్లాడుకొనటం జరుగుతుంది. (మీకా 2:12) ఆ సమయములో మంచి మర్యాదలు, ఇతరులను గూర్చిన ఆలోచన మనము మాట్లాడుకునే శబ్దము తగుమాత్రపురీతిలో యుండునట్లు మనలను తప్పక నడిపించును. (మత్త. 7:12; గల. 6:10) క్రైస్తవప్రేమ మన పిల్లలు బయట పరుగెత్తకుండా ఆపుటకును, ఇతరుల వస్తువులను పాడుచేయకుండునట్లు చూచుటకు మనలను బలవంతపెట్టును. (సామె. 29:15; 1 కొరిం. 13:4, 5) దీనిలో పుస్తకపఠనము జరుగు గృహములో గౌరవనీయమైన ప్రవర్తనతో మెలగుటయు యిమిడియున్నది. ఏమైన అసభ్యకర ప్రవర్తనను గమనించినప్పుడు, అది పొరుగువారి ఫిర్యాదులకు కారణమై, అతిథ్యముతో పుస్తకపఠనము కొరకై గృహమును తెరచిన యింటివారికి కష్టము లేక ఆ పుస్తకపఠన ప్రాంతములో హాజరగువారికి ఇబ్బందియు కలుగకుండునట్లు ప్రేమగల మరియు గట్టిసలహాను యిచ్చుటకు పెద్దలు ఆలస్యము చేయకూడదు.