సన్నిహితంగా అనుసరించడానికి ఒక మాదిరి

¹ నిస్సందేహంగా, జీవించినవారిలోకెల్లా యేసు మహాగొప్ప మనిషి. ఆయన తన శిష్యులకొరకు పరిపూర్ణమైన మాదిరినుంచాడు. మనం ఆయన పరిపూర్ణస్థాయికి సరితూగలేకపోయినప్పటికీ, మనం ‘ఆయన అడుగుజాడలయందు నడుచుకోవాలని’ పురికొల్పబడుతున్నాము. (1 పేతు. 2:21) ఆసక్తితో సత్యాన్ని యితరులతో పంచుకుంటూ, మనకు సాధ్యమైనంత వరకు యేసులా ఉండేందుకు కోరుకోవాలి.

² యేసు కేవలం ప్రసంగీకుడు కాదు; ఆయన మహాగొప్ప బోధకుడు. ‘జనసమూహములు ఆయన బోధించే విధానమునకు ఆశ్చర్యపడుచుండిరి.’ (మత్త. 7:28) ఆయన ఎందుకంత ప్రభావవంతంగా ఉన్నాడు? ‘ఆయన బోధించే విధానమును’ సరిగ్గా పరిశీలిద్దాము.

³ మనం యేసును ఎలా అనుసరించగలము: యేసుకు ఆయన తండ్రి నేర్పించాడు. (యోహా. 8:28) యెహోవాను ఘనపరచి, ఆయన నామాన్ని మహిమపరచాలనేదే ఆయన ఉద్దేశం. (యోహా. 17:4, 26) మన ప్రకటన పనిలోను, బోధనలోను మనవైపు శ్రద్ధనాకర్షించాలని కాక, యెహోవాను ఘనపరచాలనేది కూడా మన ఉద్దేశమై ఉండాలి.

⁴ యేసు నేర్పించిన ప్రతిదీ దేవుని వాక్యంపై ఆధారపడినదే. ఆయన ప్రేరేపిత లేఖనాల్లో వ్రాయబడిన దానిని ఎడతెగక సూచించాడు. (మత్త. 4:4, 7; 19:5; 22:32) బైబిలు వైపుకు మన శ్రోతల శ్రద్ధ మళ్ళించాలని కోరుకుంటాం; అలా మనం ప్రకటించేది, బోధించేది మిక్కిలి అధికారపూర్వకమైన దానిపై ఆధారపడినదని వారు తెలుసుకోడానికి అనుమతిస్తాము.

⁵ యేసు క్లుప్తమైన, ఆచరణయోగ్యమైన, జటిలముకాని రీతులను ఉపయోగించాడు. ఉదాహరణకు, మనం దేవుని క్షమాపణను ఎలా పొందగలమో వివరిస్తూ, మనం యితరులను క్షమించాలని ఆయన ప్రోత్సహించాడు. (మత్త. 6:14, 15) మనం సరళమైన, సూటైన పదాల్లో రాజ్య వర్తమానాన్ని వివరించడానికి ప్రయత్నం చేయాలి.

⁶ యేసు యితరులను ఆలోచింపజేసే దృష్టాంతాలను, ప్రశ్నలను నైపుణ్యంగా ఉపయోగించాడు. (మత్త. 13:34, 35; 22:20-22) సామాన్యమైన, దైనందిన విషయాలను గూర్చిన దృష్టాంతాలు, సంకీర్ణమైన బైబిలు సిద్ధాంతాలను అర్థం చేసుకోడానికి ప్రజలకు సహాయపడగలవు. వినేదానిని గూర్చి యోచించడానికి శ్రోతలను ప్రోత్సహించే ప్రశ్నలను మనం అడగాలి. నడిపింపునిచ్చే ప్రశ్నలు వారు సరైన నిర్ధారణకు రావడానికి వారికి సహాయపడగలవు.

⁷ ఎక్కువ సమాచారాన్ని కోరిన వారికి క్లిష్టమైన విషయాలను వివరించేందుకు యేసు సమయాన్ని వెచ్చించాడు. ఆయన శిష్యులవలె, నిజంగా ఆసక్తిగలవారు యేసు బోధించినవాటి భావాన్ని గ్రహించగలిగారు. (మత్త. 13:36) యథార్థంగా ప్రశ్నలు అడగబడినప్పుడు మనం కూడా సహాయపడేవారిగా ఉండాలి. మనకు జవాబులు తెలియనట్లయితే, మనం ఆ అంశాన్ని గూర్చి పరిశోధన జరిపి, ఆ సమాచారంతో మరొక సమయంలో పునర్దర్శనం చేయగలము.

⁸ యేసు బోధించడానికి ప్రత్యక్ష దృష్టాంతాలను ఉపయోగించాడు. ఆయన తన శిష్యులకు యజమానుడైనప్పటికీ, తాను వారి కాళ్ళను కడగడం దీనికొక ఉదాహరణ. (యోహా. 13:2-16) మనం దీన స్వభావాన్ని చూపిస్తే, బోధించబడేవారు తాము నేర్చుకుంటున్నవాటిని అన్వర్తించుకోడానికి పురికొల్పబడుతారు.

⁹ ప్రజల హృదయాన్ని, నీతియెడల వారికి గల ప్రేమను యేసు ఆకర్షించాడు. మనం హృదయాలను కూడా చేరాలని కోరుకుంటాం. అత్యున్నతుడ్ని ఆరాధించాలని, యితరులతో సమాధానంగా, సంతోషంగా కలిసి జీవించాలనే జన్మసిద్ధమైన కోరికను రేకెత్తించడానికి మనం ప్రయత్నం చేస్తాము.

¹⁰ డిశంబరులో, జీవించిన వారిలోకెల్లా మహా గొప్ప మనిషి అనే పుస్తకాన్ని అందించడం ద్వారా యేసును గూర్చి మనం నేర్చుకున్న విషయాలను యితరులతో పంచుకోగలము. యేసు బోధనా విధానాలను మనం అనుకరించడం ద్వారా, మనం ఆయన బోధించినవాటిని వివరిస్తుండగా, యథార్థవంతులు వినడానికి పురికొల్పబడవచ్చు.—మత్త. 10:40.