2 Подшоҳон

19 Ба Юоб чунин хабар доданд: «Подшоҳ барои Абшолӯм+ гиря мекунад ва мотам гирифтааст». 2 Шодии ғалаба* дар он рӯз барои тамоми халқ ба мотам табдил ёфт, зеро онҳо шуниданд, ки подшоҳ барои писараш андуҳгин аст. 3 Халқ дар он рӯз монанди касоне, ки аз майдони ҷанг гурехта, дуздвор бармегарданд, оҳиста ба шаҳр медаромад.+ 4 Подшоҳ рӯйи худро пӯшонда, бо овози баланд фарёд мезаду мегуфт: «Вой, писарам Абшолӯм! Эй вой, писарам Абшолӯм, вой, писарам!»+

5 Юоб ба назди подшоҳ, ба хонаи ӯ, даромада, гуфт: «Ту имрӯз ҳамаи ходимонатро, ки ҷони ту, ҷони писарону+ духтаронат+ ва ҷони занону сурриягонатро+ наҷот доданд, шармсор кардӣ. 6 Ту бадбинони худро дӯст медорӣ ва касонеро, ки туро дӯст медоранд, бад мебинӣ. Ту имрӯз нишон додӣ, ки сардорон ва ходимонат дар назари ту ҳеҷанд, зеро бовар дорам, ки, агар имрӯз ҳамаи мо мемурдему Абшолӯм зинда мемонд, ин дар назари ту писанд меомад. 7 Пас, хеста, берун ой ва дили ходимонатро бардор, зеро, ба номи Яҳува қасам ки, агар набароӣ, имшаб бо ту касе намемонад ва ин бароят аз ҳамаи азобҳое, ки аз ҷавоният то имрӯз ба сарат омадааст, бадтар хоҳад буд». 8 Подшоҳ хеста, назди дарвозаи шаҳр нишаст ва ба мардум гуфтанд: «Подшоҳ назди дарвоза нишастааст». Инро шунида ҳамаи мардум дар назди подшоҳ ҷамъ омад.

Исроилиён бошанд, ҳар яке ба хонаи худ гурехтанд.+ 9 Мардуми ҳама қабилаҳои Исроил баҳсу мунозира карда мегуфтанд: «Подшоҳ моро аз душманонамон халос кард+ ва аз фалиштиён наҷот дод, аммо акнун аз дасти Абшолӯм аз ин замин гурехтааст.+ 10 Ҳоло бошад, Абшолӯм, ки мо ӯро тадҳин намуда* подшоҳи худ кардем,+ дар ҷанг мурдааст.+ Пас, чаро шумо барои баргардонидани подшоҳ чорае намеандешед?»

11 Шоҳ Довуд ба коҳинон Содӯқ+ ва Абётор+ хабар фиристода, гуфт: «Ба пирони Яҳудо+ бигӯед: “Ба хонаи подшоҳ хабар доданд, ки тамоми Исроил ӯро ба қасраш баргардонидан мехоҳад. Пас, чаро шумо дар ин кор охирон шавед? 12 Шумо бародарони ман, гӯшту устухони ман, ҳастед, пас, чаро дар баргардонидани подшоҳ охирон шавед? 13 Ба Амосо+ бигӯед: “Ту гӯшту устухони ман ҳастӣ. Бигзор Худо маро ба балоҳо гирифтор кунад, агар аз имрӯз сар карда ту ба ҷойи Юоб+ сарлашкари ман нашавӣ”».

14 Ӯ дили тамоми мардуми Яҳудоро, якто намонда, ба даст овард ва онҳо ба назди подшоҳ кас фиристода, гуфтанд: «Ту ва ҳамаи ходимонат баргардед».

15 Подшоҳ роҳи бозгаштро пеш гирифт ва ба Урдун расид ва мардуми Яҳудо то Ҷилҷол+ омад, то подшоҳро пешвоз гирифта, аз Урдун гузаронад. 16 Он гоҳ Шимъии+ писари Ҷерои бинёминӣ, ки аз Баҳурим буд, шитобон ҳамроҳи мардуми Яҳудо ба пешвози шоҳ Довуд поён омад 17 ва ҳамроҳаш 1000 марде аз Бинёмин буд. Ҳамчунин Сибои+ хизматгузори хонадони Шоул ҳамроҳи 15 писар ва 20 хизматгораш сӯйи Урдун пеши подшоҳ шитофтанд. 18 Ӯ* аз пастоб гузашт, то хонадони подшоҳро аз дарё гузаронад ва ҳар он чиро, ки подшоҳ хоҳиш кунад, ба ҷо орад. Вақте подшоҳ аз Урдун гузаштанӣ буд, Шимъии писари Ҷеро худро пеши пойи подшоҳ партофта, 19 гуфт: «Бигзор хоҷаам маро айбдор нашуморад ва хатои бандаашро, ки ӯ ҳангоми аз Ерусалим берун омадани хоҷаам подшоҳ карда буд, ба хотир наорад.+ Бигзор подшоҳ инро ба дил нагирад, 20 зеро бандаат нағз медонад, ки гуноҳ кардааст. Аз ин рӯ ман имрӯз аз тамоми хонадони Юсуф якум ба пешвози хоҷаам подшоҳ омадам».

21 Он гоҳ Абишойи+ писари Саруё+ гуфт: «Магар Шимъӣ барои дашном додани масеҳи* Яҳува сазовори марг нест?»+ 22 Аммо Довуд гуфт: «Шумо ба ин чӣ кор доред, эй писарони Саруё,+ ва чаро ба ман имрӯз зид мебароед? Оё равост, ки имрӯз дар Исроил ягон кас кушта шавад? Охир, ман медонам, ки имрӯз боз бар Исроил подшоҳ шудам». 23 Он гоҳ подшоҳ ба Шимъӣ гуфт: «Ту нахоҳӣ мурд», ва подшоҳ ба ӯ қасам хӯрд.+

24 Мефибӯшети+ набераи Шоул низ ба пешвози подшоҳ баромад. Ӯ, аз он рӯзе ки подшоҳ рафт, то рӯзе ки сиҳату саломат баргашт, на пойҳояшро шуста буд, на мӯйлабашро қайчӣ зада буд ва на либосашро шуста буд. 25 Вақте ӯ ба пешвози подшоҳ ба* Ерусалим омад, подшоҳ ба ӯ гуфт: «Эй Мефибӯшет, чаро ҳамроҳам нарафтӣ?» 26 Ӯ дар ҷавоб гуфт: «Эй хоҷаам подшоҳ, хизматгорам+ маро фиреб дод. Бандаат гуфт: “Харамро зин зан, то бар он савор шуда, бо подшоҳ биравам”, зеро бандаат ланг аст.+ 27 Аммо ӯ маро ба хоҷаам подшоҳ туҳмат кард.+ Лекин хоҷаам подшоҳ мисли фариштаи Худост, аз ин рӯ ҳар чӣ дар назарат писанд ояд, бикун. 28 Хоҷаам подшоҳ метавонист тамоми хонадони падарамро ба марг маҳкум кунад, лекин ту бандаатро дар миёни касоне, ки аз дастархони подшоҳ мехӯранд, ҷой додӣ.+ Пас, ман чӣ ҳақ дорам, ки аз подшоҳ боз ягон чиз биталабам?»

29 Аммо подшоҳ гуфт: «Дигар дар ин бора гап назан. Ман қарор кардам, ки туву Сибо киштзорро байни ҳам тақсим кунед».+ 30 Мефибӯшет дар ҷавоб гуфт: «Бигзор ҳамаашро гирад, сиҳату саломат ба хона баргаштани хоҷаам подшоҳ барои ман бас аст».

31 Барзилойи+ ҷилъодӣ аз Руҷлим сӯйи Урдун фаромад, то подшоҳро ба он тарафи Урдун гусел кунад. 32 Барзилой хеле солхӯрда буд ва ба синни 80 расида буд. Ӯ подшоҳро ҳангоми дар Маҳаноим буданаш бо хӯрок таъмин мекард,+ зеро хеле бой буд. 33 Подшоҳ ба Барзилой гуфт: «Ҳамроҳи ман гузар ва ман дар Ерусалим туро бо хӯрду хӯрок таъмин мекунам».+ 34 Аммо Барзилой ба подшоҳ гуфт: «Чанд рӯзи умрам боқӣ мондааст ки, ман бо подшоҳ ба Ерусалим равам? 35 Ман аллакай ба 80 даромадам.+ Оё ман метавонам неку бадро фарқ кунам? Оё бандаат мазаи чизи хӯрдаву нӯшидаашро мефаҳмад? Оё овози мардону занони сарояндаро мешунавад?+ Пас, чаро бандаат ба хоҷаам подшоҳ бор шавад? 36 Барои бандаат басанда аст, ки подшоҳро то Урдун гусел кард. Чаро подшоҳ маро чунин мукофот диҳад? 37 Илтимос, иҷозат деҳ, ки бандаат баргардад, ва бигузор, ки дар шаҳри худ, назди қабри падару модарам, бимирам.+ Ана бандаат Кимҳом,+ бигзор ӯ бо ту аз дарё гузарад ва бо ӯ, ҳамон тавре ки дар назарат писанд ояд, амал кун».

38 Он гоҳ подшоҳ гуфт: «Кимҳом бо ман меравад ва ман бо ӯ, ҳамон тавре ки дар назари ту писанд бошад, амал мекунам. Чизе аз ман хоҳиш кунӣ, бароят ба ҷо меорам». 39 Тамоми мардум аз Урдун гузаштанд ва, вақте подшоҳ аз дарё мегузашт, Барзилойро бӯсид+ ва дуои нек кард ва Барзилой ба хонаи худ баргашт. 40 Вақте подшоҳ сӯйи Ҷилҷол+ равона шуд, Кимҳом низ ҳамроҳи ӯ рафт. Тамоми мардуми Яҳудо ва нисфи мардуми Исроил подшоҳро ҳамроҳӣ карданд.+

41 Он гоҳ тамоми мардуми Исроил назди подшоҳ омада, гуфтанд: «Чаро бародарони мо, мардуми Яҳудо, туро дуздиданд ва подшоҳро бо хонадонаш ва тамоми одамонаш аз Урдун гузаронданд?»+ 42 Тамоми мардуми Яҳудо ба мардуми Исроил ҷавоб доданд: «Зеро подшоҳ хеши мост.+ Чаро шумо аз ин ба хашм омадед? Оё мо аз ҳисоби подшоҳ ягон чиз хӯрдем ё ба мо туҳфае доданд?»

43 Аммо мардуми Исроил ба мардуми Яҳудо ҷавоб дода гуфт: «Мо дар мамлакат даҳ ҳисса дорем, аз ин рӯ аз шумо дида ба Довуд даҳ баробар бештар ҳақ дорем. Чаро ба мо нописандӣ кардед? Магар набояд мо дар овардани подшоҳамон якум мешудем?» Аммо мардуми Яҳудо дар ин баҳс аз мардуми Исроил зӯр баромад.