1 Коринфлилер
3 Доганлар, мен сизе рухы адамлара йүзленишим ялы йүзленип билмейәрин. Себәби сиз Месихиң ёлунда бәбек кимин тен хөвеслерине эерип яшаярсыңыз. 2 Агыр нахары сиңдирип билмейәндигиңиз үчин, мен сизи агыр нахар билен дәл-де, сүйт билен нахарладым. Аслында, агыр нахары иймәге-де тайын дәлсиңиз, 3 себәби сиз хенизем тен хөвеслерине гөрә яшаярсыңыз. Араңызда гөриплик, дава-җенҗел бар болса, эйсем, сиз тен хөвеслерине эерип, өзүңизи дүнйәдәки адамлар ялы алып бармаярсыңызмы нәме? 4 Бири «Мен Павлусың шәгирди», башга бири «Мен Аполлосың шәгирди» диййән болса, онда сизиң дүнйәдәки адамлара меңзедигиңиз болмазмы?
5 Аслында, Аполлос ким? Павлус ким? Олар Худайымызың табшыран ишини ерине етирйән гуллукчылардыр. Сиз хем олар аркалы Халыпамызың шәгирди болдуңыз. 6 Мен тохумы экдим, Аполлос оны суварды, йөне өсдүрйән Худайдыр. 7 Шонуң үчин экен я-да суваран адам дәл-де, тохумы өсдүрен Худай шөхрата мынасыпдыр. 8 Тохумы экен адам билен суваран агзыбир ишлешсе-де*, оларың херси эден ишине гөрә сылагыны алар. 9 Себәби биз Худайың ишдешлеридирис. Сиз болса Худайың өсдүрип етишдирйән экин мейданысыңыз, Худайың гуран бинасысыңыз.
10 Худайың маңа эден мерхеметине гөрә, мен өкде гурлушыкчы* кимин бинаның дүйбүни тутдум. Эмма башга бири-де шол дүйпде гуряр. Йөне, гой, хер кес онуң үстүнде нәдип гуряндыгына үнсли болсун. 11 Себәби хич ким тутулан дүйпден башга дүйби тутуп билмез. Ол дүйп — Иса Месихдир. 12 Бири алтын, күмүш, гымматбаха дашлары уланып гурса, бейлекиси агач, беде я-да саман уланып, шол дүйбүң үстүнде гуряр. 13 Сынаг дөрәнде, оларың херсиниң эден ишиниң хили аян болар. Оларың эден ишиниң говудыгы я-да эрбетдиги от билен сыналар. 14 Эгер бириниң гуран зады йыкылмаса, ол сылаг алар. 15 Эгер бириниң эден иши янса, өзи хеләкчиликден халас болаянда-да, ол улы йитги чекер. Шейле ягдайда ол янгындан халас болан адам ялы болар.
16 Сиз Худайың ыбадатханасыдыгыңызы ве ичиңизде Онуң рухуның яшаяндыгыны билмейәрмисиңиз? 17 Эгер бири Худайың ыбадатханасыны юмурса, Худай хем оны ёк эдер; себәби Худайың ыбадатханасы мукаддесдир, сиз болса шол ыбадатханасыңыз.
18 Гой, хич ким өз-өзүни алдамасын: араңызда бири өзүни шу дүнйәде* акылдар сайян болса, гой, ол акмак болсун. Шонда ол, хакыкатдан-да, акылдар болар. 19 Себәби дүнйәниң акылдарлыгы Худай үчин акмаклыкдыр. Чүнки шейле язылгы: «Ол акылдарлары оларың өз мекирлигиниң дузагына дүшүрйәр». 20 Шейле-де: «Ехова* акылдар адамларың пикирлериниң бидерекдигини билйәндир» дийип язылгыдыр. 21 Шонуң үчин, гой, хич ким бириниң эдйән ишлери билен өвүнмесин; себәби әхли зат сизиңкидир. 22 Хава, Павлус болсун, Аполлос я Кифа* болсун, дүнйә болсун, яшайыш я өлүм болсун, хәзирки я гелеҗекки затлар болсун, хеммеси сизиңкидир. 23 Сиз болса Месихиңки, Месих хем Худайыңкыдыр.