1 Коринфлилер
4 Гой, адамлар бизе Месихиң хызматкәрлери ве Худайың мукаддес сырының иш доландырыҗылары хөкмүнде гарасынлар. 2 Йөне бу меселеде иш доландырыҗылар вепалы болмалы. 3 Үстүмден сиз я-да ынсан казыети хөкүм чыкарса-да, мунуң мениң үчин әхмиети ёкдур. Аслында, мен өзүме-де хөкүм чыкармаярын. 4 Себәби ынсабым маңа хич бир затда эзъет бермейәр. Эмма шонда-да өзүми догры адам хасапламага хакым ёкдур. Аслында, маңа хөкүм чыкарян Еховадыр*. 5 Шонуң үчин Халыпамыз гелмәнкә, вагтындан өң хич задың үстүнден хөкүм чыкармаң. Халыпамыз геленде, гараңкылыкдакы гизлин затлары ягтылыга чыкарар ве йүрек ислеглерини аян эдер, шонда хер бир мынасып адам Худайдан алкыш алар.
6 Доганлар, мен булары өзүме ве Аполлоса дегишли эдип, сизиң пейдаңыз үчин айдярын. Мен сизиң биз аркалы: «Язгыларда айдыланлардан дашары хич зат этмәң» диен дүзгүни өвренмегиңизи ислейәрин. Шонда сиз текепбирликден яңа хондан бәрси болуп, бир адамы башга биринден ёкары тутмарсыңыз. 7 Себәби сениң башгалардан нәме артыкмачлыгың бар? Эйсем, Худайдан алмадык задың бармы? Алан болсаң, оны өз гүйҗүң билен алан ялы, өвүнмәң нәме?
8 Нәме, сизиң эййәм хемме задыңыз бармы? Сиз эййәм баядыңызмы? Сиз патышалар болуп, бизсиз хөкүм сүрүп башладыңызмы? Аслында, мен сизиң патыша болуп хөкүм сүрмегиңизи ислейәрин, себәби бизем шонда патыша болуп хөкүм сүрүп билерис. 9 Мениң пикиримче, Худай бизи, ягны ресуллары иң соңкы тапгырда өлүме хөкүм эдиленлер кимин хеммелер гөрер ялы, дүнйәниң, перишделериң ве адамларың өңүне сахна чыкарды. 10 Месихиң ызына эерйәндигимиз үчин, бизи акмак хасапласалар-да, сиз онуң билен бирликде боландыгыңыз үчин, өзүңизи акыллы сайярсыңыз; биз эҗиз, сиз болса гүйчли; сиз хорматланярсыңыз, биз болса кемсидилйәрис. 11 Биз шу вагта ченли ач, тешне, ярым-ялаңач, урлуп ве өйсүз-өвзарсыз гезип йөрүс. 12 Өз эллеримиз билен ишләп, агыр зәхмет чекйәрис. Бизе сөгенлери паталаярыс; ызарланларында, сабырлылык билен чыдаярыс; 13 төхмет атанларында, юмшаклык билен җогап берйәрис; бизи шу вагта ченли дүнйәниң зир-зибили ве хапа затлары ялы гөрйәрлер.
14 Мен булары сизи утандырмак үчин дәл-де, сөйгүли чагаларым хөкмүнде үндемек үчин язярын. 15 Месихиң шәгиртлериниң арасында сизиң мүңлерче тербиечиңиз болса-да, атаңыз көп дәлдир; мен сизе хош хабары ве Месих Исаның ызына эермеги өвретмек билен, сизиң атаңыз болдум. 16 Шейлеликде, мен сизи гөрелдәме эермәге чагырярын. 17 Ине, шонуң үчин хем сизиң яныңыза Халыпамызың ёлунда сөйгүли хем-де вепалы оглум Тимотеосы ёллаярын. Әхли йыгнакларда өвредишим ялы, ол сизе Месих Исада эдйән гуллугымда уланян усулларымы ятладар.
18 Мен яныңыза бармарын өйдүп, кәбириңиз текепбирликден яңа өзүни ёкары тутяр. 19 Йөне Ехова* ислесе, мен тизден яныңыза барарын ве текепбирликден яңа өзүни ёкары тутянларың айдян сөзлери билен гызыкланман, гайтам, оларда Худайың гүйҗүниң бардыгыны я-да ёкдугыны билҗек боларын. 20 Себәби адамың Худайың Патышалыгына табын боляндыгыны онуң сөзлеринден дәл-де, онда Худайың гүйҗүниң бардыгындан билсе боляр. 21 Сизиң яныңыза нәдип бармагымы ислейәрсиңиз? Таяклымы я-да сөйги ве юмшаклык билен?