1 Коринфлилер

5 Мен сизиң араңызда бириниң өз какасының аялы билен яшаяндыгыны* эшитдим. Шейле ахлаксызлык* хатда башга халкларың арасында хем эдилмейәр. 2 Сиз шейле эрбет иш эдйән адамы йыгнакдан чыкарып, хасрат чекмегиң дерегине, гайтам, оңа гуванярсыңызмы? 3 Мен яныңызда болмасам-да, йүрегим сизиң билендир. Шонуң үчин мен эдил сизиң яныңызда ялы болуп, бейле иш эден адамы эййәм хөкүм эдендирин. 4 Сиз Халыпамыз Исаның ады билен йыгнанышаныңызда, мен хем пикиримде Халыпамыз Исаның гүйҗи билен сизиң яныңыздадырын. 5 Шонуң үчин Халыпамызың гүнүнде йыгнак агзаларының гүнәли ишлере болан гарайшы ёюлман сакланар ялы, сиз бейле адамы Шейтана табшырмалысыңыз.

6 Сиз өвнүп, нәдогры эдйәрсиңиз. Эйсем, азаҗык хамырмаяның тутуш хамыры туршадяндыгыны билмейәрсиңизми? 7 Сиз хамырмаядан азатсыңыз. Шонуң үчин тәзе хамыр болар ялы, көне хамырмаяны айрың. Себәби Пасхалык гузымыз болан Месих эййәм гурбан эдилендир. 8 Шоңа гөрә-де Пасханы белләнимизде, гүнәниң ве эрбетлигиң нышаны болан хамырмаяны уланман, гайтам, ягшылыгың хем-де хакыкатың нышаны болан хамырмаясыз чөреги иелиң.

9 Мен хатымда сизе ахлаксызлык* эдйәнлер билен гатнашмазлыгы языпдым. 10 Йөне мен шу дүнйәниң ахлаксыз, ачгөз, талаңчы ве бутпараз адамларыны гөз өңүнде тутмандым. Ёгсам, сиз дүнйәден чыкмалы болардыңыз. 11 Инди болса шуны язярын: эгер доган ахлаксыз, ачгөз, бутпараз, башгалара сөгйән, аракхор я талаңчы болса, онуң билен гатнашмаң, хатда чөрек хем иймәң. 12 Мен йыгнагың агзасы болмадык адамлары нәме үчин хөкүм эдейин? Сиз йыгнакдакылары хөкүм этмелисиңиз. 13 Дүнйәдәки адамлары болса Худай хөкүм эдер. Язгыларда: «Эрбетлик эдйән адамы араңыздан айрың» дийилйәндир.