1 Коринфлилер
6 Араңызда дава туранда, мукаддеслере йүз тутмагың дерегине, сиз нәдип казыете барып, иман этмейән адамлара йүз тутуп билйәрсиңиз? 2 Я-да сиз мукаддеслериң дүнйәни хөкүм этҗекдигини билмейәрсиңизми? Эгер дүнйә сиз аркалы хөкүм эдилҗек болса, онда уҗыпсыз меселелери өз араңызда чөзмеги башармарсыңызмы? 3 Бизиң перишделери-де хөкүм этҗекдигимизи билмейәрсиңизми? Онда нәме үчин дурмушда йүзе чыкян меселелери чөзүп билмерис өйдйәрсиңиз? 4 Эгер сизиң дурмушда чөзүлмели меселелериңиз бар болса, онда нәме үчин йыгнакда казылык этмек үчин белленен доганлара йүз тутмаярсыңыз? 5 Мен муны сизи утандырмак үчин айдярын. Эйсем, араңызда доганлара казылык эдип билҗек екеҗе пайхаслы адам хем ёкмы? 6 Муңа дерек бири-бирине гаршы чыкан доганлар казыете йүз тутуп, иман этмейән адамлардан давасыны чөзүп бермеги хайыш эдйәрлер!
7 Аслында, казыете йүз тутуп, бири-бириңизиң үстүнден арз этмегиң өзи-де сизиң үчин утанчдыр. Муңа дерек адалатсызлыкдан эҗир чекениңиз говы дәлми? Я-да алданан болсаңыз говы болмазмыды? 8 Гайтам, сизиң өзүңиз доганларыңызы алдап, оларың гөвнүне дегйәрсиңиз!
9 Я-да сиз догрулык этмейән адамларың Худайың Патышалыгыны мирас алмаҗакдыгыны билмейәрсиңизми? Өзүңизи алдамаң. Ахлаксызлык* эдйәнлер, бутпаразлар, зынахорлар, азгын эркеклер*, бечебазлар*, 10 огрулар, ачгөзлер, аракхорлар, башгалара сөгйәнлер, талаңчылар Худайың Патышалыгыны мирас алмазлар. 11 Хава, сизиң хем кәбириңиз шейледиңиз. Эмма сиз ювлуп арассаландыңыз; мукаддес эдилдиңиз; Халыпамыз Иса Месихиң ады ве Худайың рухы аркалы догры адамлар хасапландыңыз.
12 Маңа хемме зат ругсат эдилендир, йөне хемме зат пейдалы дәлдир. Маңа хемме зат ругсат эдилендир, йөне мен хич зада үстүмден агалык этмәге ёл бермейәрин. 13 Иймит беден үчиндир, беден хем иймит үчиндир. Йөне Худай оларың икисини-де хич зат эдер. Беден ахлаксызлык* үчин дәл-де, Халыпамыз үчин ниетленендир, Халыпамыз болса беден үчиндир. 14 Эмма Худай гүйҗи аркалы Халыпамызы дирелтди, ол бизи-де гүйҗи аркалы өлүмден дирелдер.
15 Эйсем, сиз бедениңизиң Месихиң бедениниң агзаларыдыгыны билмейәрсиңизми? Онда мен нәдип Месихиң беденине дегишли боланлары айрып, бозук аялың беденине гошайын? Бу асла болуп билҗек зат дәл ахырын! 16 Я-да сиз бозук аяла гошулян адамың онуң билен бир беден боляндыгыны билмейәрсиңизми? Себәби Худай: «Икиси бир беден болар» диййәр. 17 Эмма Халыпамыза гошулан адам онуң билен бир пикирде боляндыр. 18 Ахлаксызлыкдан* гачың! Адамың эдйән ислендик гүнәси онуң беденине гаршы дәлдир. Эмма ахлаксызлык эдйән адам өз беденине гаршы гүнә эдйәндир. 19 Сиз бедениңизиң мукаддес рухуң ыбадатханасыдыгыны билмейәрсиңизми? Хава, сиз ичиңизде яшаян шол рухы Худайдан алансыңыз. Сиз өзүңизе дәл-де, Худая дегишлисиңиз. 20 Себәби сиз гыммат баха сатын алындыңыз. Шонуң үчин бедениңиз билен Худайы шөхратландырың.