Pasulungin ang Kakayahan sa Ministeryo—Paglalatag ng Pundasyon Para sa Pagdalaw-Muli

Kung Bakit Mahalaga: Kapag may natagpuan tayong interesado, gusto nating mabalikan siya para madilig ang binhi ng katotohanan na itinanim natin. (1 Cor. 3:6) Kaya kadalasan bago umalis, inaalam natin kung kailan tayo puwedeng bumalik. Makabubuti rin kung mag-iiwan tayo ng tanong na pag-uusapan sa susunod na pagdalaw natin. Makakatulong ito para manabik ang may-bahay, at kung ang tanong ay sinasagot sa publikasyong iniwan natin, mas malamang na basahin niya iyon. Kapag inilalatag natin ang pundasyon para sa susunod na pag-uusap, nagiging mas madali ring dumalaw-muli dahil may paksa nang tatalakayin, at alam na ng may-bahay kung ano ang aasahan niya. Sa pagdalaw-muli, puwede nating sabihin na bumalik tayo para sagutin ang tanong na iniwan natin, at saka magpatuloy.

Kung Paano Ito Gagawin:

Kapag naghahanda ng presentasyon, maghanda rin ng tanong na sasagutin sa susunod na pagdalaw. Puwedeng batay ito sa isang paksa sa literaturang iaalok mo o isang tanong na sinasagot sa publikasyong ginagamit natin sa pagtuturo, na puwede mong ipakita kapag bumalik ka.
Bago magpaalam, sabihin sa interesado na gusto mo siyang makausap ulit at iwan ang tanong na inihanda mo. Sa ilang teritoryo, napaka-busy ng mga tao kaya baka mag-alangan silang pumayag na dumalaw kang muli. Puwede mong sabihin: “Nandito ka lang ba sa bahay n’yo kapag ganitong oras? [Hayaang sumagot.] Gusto ko sanang dumaan dito sa susunod na linggo para sagutin ang tanong na ‘to . . . Kung busy ka sa panahong ‘yon, sabihin mo lang.”
Kapag nagsabi ka sa may-bahay ng espesipikong oras kung kailan ka babalik, tuparin iyon. (Mat. 5:37) Sa pagtatapos ng pagdalaw-muli, ilatag ang pundasyon para sa susunod na pagdalaw.

Subukan Ito Ngayong Buwan:

Kapag naghahanda ng presentasyon, maghanda rin ng tanong na sasagutin mo sa susunod na pagdalaw. Sabihin ito sa mga nakakapartner mo sa ministeryo.