Pasulungin ang Kakayahan sa Ministeryo—Ipakita ang Pag-aaral sa Bibliya Gamit ang Aklat na Itinuturo ng Bibliya

Kung Bakit Mahalaga: Baka hindi maintindihan ng marami ang ibig nating sabihin kapag nag-aalok tayo ng libreng pantahanang pag-aaral sa Bibliya. Baka iniisip nila na kailangan nilang makipag-aral sa isang grupo o na isa itong pormal na kurso na ginagawa sa bahay. Sa halip na basta mag-alok ng pag-aaral, bakit hindi ipakita kung paano ito ginagawa? Maipapakita mo sa may-bahay sa loob lang ng ilang minuto kung gaano kadali at kasiya-siyang mag-aral ng Bibliya. Puwede mo pa ngang gawin ito kahit sa may pintuan.

Kung Paano Ito Gagawin:

Matapos magpakilala, tanungin ang may-bahay kung pinag-iisipan niya ang mangyayari sa hinaharap.
Banggitin na maraming tao ang ganoon din ang iniisip, at ipakita sa kaniya ang talaan ng mga nilalaman ng aklat na Itinuturo ng Bibliya. Sabihin na ang mga aralin sa aklat na ito ay madaling maintindihan at na ipinapakita rito ang itinuturo ng Bibliya tungkol sa mangyayari sa hinaharap at sa iba pang paksa. Saka siya papiliin ng kabanatang gusto niyang pag-usapan.
Abutan siya ng aklat, at buksan ito sa kabanatang napili niya. Ipaliwanag na ang mga tanong sa simula ng kabanata ay sasagutin ng sumusunod na mga parapo.
Kung komportable ang may-bahay na bumasa, ipabasa sa kaniya ang unang parapo. Pagkatapos, basahin ang tanong para sa parapong iyon at magkasama ninyong hanapin ang sagot. Buksan at talakayin ang mga teksto sa parapo na may kaugnayan sa sagot. Ipakita ang mga sagot na minarkahan mo sa iyong aklat.
Talakayin ang kasunod na parapo, pero sa pagkakataong ito, hilingan ang may-bahay na sagutin ang tanong sa sarili niyang pananalita.
Komendahan siya, at makipag-appointment para ipagpatuloy ang aralin sa susunod na pagdalaw.
Kung angkop, ipakita sa kaniya ang video sa jw.org na Paano Ginagawa ang Pag-aaral sa Bibliya?

Subukan Ito Ngayong Buwan:

Manalangin kay Jehova na pagpalain ang iyong pagsisikap na makapagbukas ng bagong pag-aaral sa Bibliya.—Fil. 2:13.
Subukang ipakita kung paano ginagawa ang pag-aaral sa Bibliya gamit ang aklat na Itinuturo ng Bibliya o ipapanood ang video na Paano Ginagawa ang Pag-aaral sa Bibliya? kahit isang beses kapag lumalabas sa larangan.