Nakabilanggo Dahil sa Kanilang Pananampalataya—Crimea

Ang walang-awang pang-uusig ng Russia sa mga Saksi ni Jehova ay umabot na sa Crimea. Sa Russia, hindi lang ipinagbawal ng gobyerno ang legal na korporasyon ng mga Saksi, ipinakita rin nilang gusto nilang alisin ang mapayapang pagsamba ng mga ito. Nang magsimula ang pagbabawal noong Abril 2017, maraming beses nang ni-raid ng mga awtoridad sa Russia ang mga pagtitipon ng mga Saksi sa buong bansa, kaya maraming Saksi ang inaresto at ipinakulong. Iyan din ang nararanasan ngayon ng mga Saksi ni Jehova sa Crimea.

Ang unang malawakang pag-raid sa Crimea ay naganap noong Nobyembre 15, 2018, sa Dzhankoy, nang i-raid ng mga 200 pulis ang walong bahay kung saan nagtitipon ang mga Saksi para basahin at pag-usapan ang Bibliya. Pinasok ng di-bababa sa 35 armado at nakamaskarang pulis ang bahay ni Sergey Filatov, kung saan anim na Saksi ang nandoon. Na-trauma ang mga Saksi sa pangyayaring ito. Sa ginawang raid ng mga pulis, isang 78-anyos na lalaki ang itinulak sa pader, pinadapa, pinosasan, at binugbog kaya kinailangan siyang dalhin sa ospital. Sa pagkabigla at sa sobrang stress, dalawang may-edad na brother ang tumaas ang presyon ng dugo at kinailangang isugod sa ospital. Nakakalungkot din na sa isang bahay na ni-raid, isang sister ang nakunan.

Pagkatapos ng raid, kinasuhan si Mr. Filatov ng pag-oorganisa ng gawain ng “ekstremistang organisasyon” batay sa Article 282.2(1) ng Russian Criminal Code. Noong Marso 5, 2020, sinentensiyahan ng isang district court sa Crimea si Mr. Filatov ng anim-na-taóng pagkabilanggo sa isang general regime prison colony. Pagkatapos ng sentensiya, ikinulong siya agad.

Pagkatapos ng raid sa Dzhankoy noong 2018, patuloy na hinahalughog ng mga opisyal ng special forces ang mga bahay ng mga Saksi na inaakusahang gumagawa ng ekstremistang mga gawain. Nangyari ang pinakahuling raid noong Agosto 7, 2024. Hinalughog ng ilang armado at nakamaskarang pulis ang bahay ng limang Saksi. Kasama dito ang bahay ng 68-taóng-gulang na si Tamara Brattseva na nakatira sa nayon ng Razdolnoye. Kasalukuyang nililitis si Tamara Brattseva sa kasong pag-oorganisa ng mga gawain ng isang ekstremistang organisasyon. Noong Oktubre 2024, ang dalawang brother na sina Yuriy Gerashchenko at Sergey Parfenovich ay sinentensiyahan ng anim-na-taóng pagkakakulong sa isang penal colony. Pareho silang nasa ilalim ng probation noon. Pero gusto ng prosecutor na bigyan sila ng mas mabigat na sentensiya, at pinayagan naman ito ng korte. Kaagad silang inaresto at dinala sila sa bilangguan.

Pagkatapos ng mga raid na ito, may mga sinampahan ng kaso at hinatulan. Sa ngayon, 14 na brother ang nakakulong at may mga sentensiyang hanggang anim at kalahating taon. Silang lahat ay inakusahan na nagtataguyod ng mga gawain ng isang ekstremistang organisasyon.

Bilanggo Dahil sa Pagsunod sa Konsensiya

Sergey Parfenovich

Isa si Sergey Parfenovich sa mga kinasuhan matapos maging biktima ng ginawang paghalughog ng mga pulis sa bahay ng mga Saksi ni Jehova sa Crimea noong Setyembre 2022. Nang panahong iyon, mayroon siyang anim na anak. Ipinanganak si Sergey noong Mayo 1972 sa nayon ng Mirnoye, Crimea. Retirado na ang mga magulang niya at mayroon siyang dalawang kapatid na babae. Noong bata siya, mahilig siya sa football.

Nakapagtapos si Sergey sa isang vocational school ng isang kurso tungkol sa pagre-repair ng mga electrical equipment. Nakapagtrabaho siya sa isang bakery at construction site. Nagtrabaho din siya bilang manggagawa ng furniture at tagalinis sa isang sports complex. Mula noong Enero 2020, inaalagaan din niya ang tatay niyang may sakit.

Nang malaman ni Sergey mula sa Bibliya ang tungkol sa Diyos at kay Jesus, nakita niya ang layunin ng buhay. Namangha siya at nagustuhan niya ang pangako ng Bibliya na sa hinaharap, magiging paraiso ang lupa at mabubuhay dito ang mga tao magpakailanman. Dahil sa mga natutuhan niya at sa pag-ibig niya sa Diyos, napakilos si Sergey na maging isang Saksi ni Jehova noong 1993.

Noong 1997, pinakasalan ni Sergey si Marina, isang primary school teacher. Nagkaroon sila ng apat na anak na lalaki at dalawang anak na babae. Retirado na ngayon si Marina. Siya at ang anim nilang anak ay naniniwala rin sa mga paniniwala ni Sergey. Sinusuportahan din nila si Sergey sa mahirap na hamon sa buhay niya. Gustong-gusto nilang mag-asawa na makasama ang mga anak at kaibigan nila. Mahilig pa rin si Sergey sa football at madalas siyang nakikipaglaro sa mga anak at kaibigan niya. Mahilig din siyang mag-chess at mamasyal sa mga bundok at dagat.

Malaki ang naging epekto sa pamilya ni Sergey noong makasuhan siya. Nakabukod na ang apat nilang anak. Kaya noong makulong si Sergey, ang asawa at dalawang pinakabatang anak na niya ang nag-aasikaso sa mga pananagutan niya. May malalang sakit sa puso si Marina at iba pang malulubhang sakit na mas lumala dahil sa stress.

Dahil sa pagkakakulong ni Sergey, naging mas malapít sa isa’t isa ang pamilya nila. Sinisikap nilang manatiling positibo at huwag mawalan ng pag-asa.

Time Line

Marso 18, 2025

Labing-apat na Saksi ni Jehova mula sa Crimea ang nakakulong ngayon.
Oktubre 3, 2023

Sinentensiyahan nang anim-na-taóng pagkakabilanggo sa penal colony sina Yuriy Gerashchenko at Sergey Parfenovich.
Agosto 7, 2024

Hinalughog ng mga pulis ang limang bahay ng mga Saksi sa Alushta, Razdolnoye, at Senokosnoye. Sinampahan ng kasong kriminal si Tamara Brattseva.
Agosto 5, 2021

Hinalughog ang walong bahay ng mga Saksi. Inaresto sina Aleksandr Dubovenko at Aleksandr Litvinyuk.
Oktubre 1, 2020

Siyam na bahay ang ni-raid sa Sevastopol. Si Igor Shmidt ay inaresto at kinulong bago litisin.
Hunyo 4, 2019

Ni-raid ng mga opisyal ng special force ang 10 bahay sa Sevastopol. Pagkatapos, kinasuhan si Mr. Stashevskiy ng pag-oorganisa ng mga ekstremistang gawain.
Marso 20, 2019

Ni-raid ng mga opisyal ng special force ang walong bahay sa Alupka at Yalta. Isinailalim si Mr. Gerasimov sa interogasyon at, nang maglaon, kinasuhan siya dahil sa pag-oorganisa ng ekstremistang mga gawain.
Nobyembre 15, 2018

Ni-raid ng mahigit 200 pulis ang walong bahay sa Dzhankoy, pati na ang bahay ni Mr. Filatov.