Ɛngɔ kayotokimanyiya dia minya lo pondjo tshelo ya nkanɛ anto kɔlɔ

Miliyɔ y’anto wakakambe la atɔndɔ wakatɛnyi lo asawo wetshi ndo wakasale la wolo dia minya totshelo ta nkanɛ anto kɔlɔ taki l’etema awɔ. Koko kɛnɛ kele mɛtɛ ele, hatokokaki pondjo minya totshelo ta nkanɛ anto kɔlɔ tele l’etema aso. Onde laasɔ, totshelo ta nkanɛ anto kɔlɔ hatoshilaki?

Lowandji lɔmɔtshi la kokele

Mandji y’ana w’anto yambokita tatala dia minya totshelo ta nkanɛ anto kɔlɔ tele l’anto. Ko onde laasɔ kɛsɔ mɛnyaka dia ndooko lowandji lakoka minya totshelo ta nkanɛ anto kɔlɔ?

Lowandji ɔtɔi lakoka nshidiya totshelo ta nkanɛ anto kɔlɔ ayonga l’ohomba wa:

1. 1. Tshutshuya anto dia vɔ ntshikitanya yoho y’ekanelo kawɔ ka yimba ndo woho wɔsawɔ anto akina

2. 2. Shidiya akambo wakonya anto diaha salɛ anto akina akambo la losembwe tshɛ

3. 3. Ɛnɔmbɔdi wahayɛkayɛka lo olowanyi awɔ ndo wɔsa di’anto tshɛ wekɔ woho ɔtɔi

4. 4. Di’anto wa lo wedja tshɛ monga kaamɛ

Bible toshikikɛka dia Nzambi mbakatonge lowandji lɔsɔ. Lowandji lɔsɔ mbelamɛka ɔnɛ: “Diolelo dia Nzambi.”​—Luka 4:43.

Tɔsɛdingole kɛnɛ kayosala lowandji lɔsɔ:

1. Wetshelo woleki tshɛ

“Wanɛ wodjashi lo wodja [wayeka] losembwe.”​—ISAYA 26:9.

“Wɔladi mbayonga etombelo w’oma lo losembwe la mɛtɛ,ndo ki la lotui tshitshi la pondjo mbayonga elowa w’oma lo losembwe la mɛtɛ.”​—ISAYA 32:17.

Kakɔna katetsha divɛsa nɛ? Diolelo dia Nzambi diayetsha anto losembwe. Etena kayeka anto kɛnɛ kele ɔlɔlɔ oma lo kɔlɔ, losembwe oma lo awui wele keema losembwe, ekanelo kawɔ ka yimba k’otsha le anto akina kayotshikitana. Anto tshɛ wayoshihodia kɛnɛ kele ɔlɔlɔ nsala, mbuta ate mboka weho w’anto tshɛ ngandji.

2. Diolelo dia Nzambi diayokomiya awui wele keema losembwe

Nzambi “ayokitola asɔyi tshɛ oma lo washo awɔ, nyɔi hatoyala nto, otanda hatoyala nto, delo hatoyala nto, kaanga kandji hatoyala nto. Akambo wa ntondo wamboshila.”​—ƐNYƐLƆ 21:4.

Kakɔna katetsha divɛsa nɛ? Diolelo dia Nzambi diayoshidiya paa tshɛ yoye oma l’awui wele keema losembwe. Wanɛ wakawasalɛka akambo la ngala tshɛ, hawotonga la ɔkɔkɔ wa mombanɛ tokumbɛkumbɛ.

3. Ɔnɔmbɔdi w’ɔlɔlɔ

“Nde hatolombosha lo ndjela kɛnɛ kɛnande la washo ande, ndo hatohangɔ tsho lo ndjela kɛnɛ kokande la atoyi ande. Nde ayolombosha tombolambola la losembwe, ndo nde ayohangɔ lo yoho yosembwe lo wahɔ wa akanga wa memakana wa la nkɛtɛ.”​—ISAYA 11:3, 4.

Kakɔna katetsha divɛsa nɛ? Yeso Kristo, lele Nkumekanga ka Diolelo dia Nzambi, ayolɛ la losembwe ndo nde hatosalɛ anto wa lo nkɛtɛ k’otondo akambo la shɔnɔdi. Yeso hatosemula wodja ɔmɔtshi ko nsenya wodja okina ndo anto wa l’andja w’otondo wayokitanyiya ɛlɛmbɛ ande.

4. Kaamɛ

Diolelo dia Nzambi diekɔ lo mbetsha anto dia “monga la kanyi yaamɛ ndo [monga] la ngandji ka woho waamɛ, nyele nyu tshɛ kaamɛ ndo nyele la kanyi yaamɛ.”​—FILIPƐ 2:2.

Kakɔna katetsha divɛsa nɛ? Kaamɛ kele l’atei wa ambolami wa Diolelo dia Nzambi kayonyomoleka monga efula lo dihole dia monga tsho l’ɛnamelo kele oko anto wele kaamɛ. Vɔ tshɛ wayokana ngandji ka mɛtɛ lam’asawɔ.