Andja wahayokananɛ anto kɔlɔ wayonga Etena kakɔna?

“DIMI lakɛnyi dɔ.” Ambeta ɛnɔnyi akumi atanu, wakate yɔnɛ Martin Luther King laki ɔnɔmbɔdi wa tshunda diendana la lotshungɔ lele l’anto l’Amɛrikɛ ɛtɛkɛta ɛsɔ wele l’atei w’ɛtɛkɛta ande wa diambo, mbuta ate lo Ngɔndɔ k’enanɛi 28, 1963. Lo nkamba l’ɛtɛkɛta ɛsɔ, nde akalembetshiya dɔ diande, kana elongamelo kaki la nde k’ɔnɛ lushi lɔmɔtshi, anto hawotokananɛ kɔlɔ nto l’ɔtɛ wotshikitanyiwɔ lokoho la demba. Kaanga mbele ase États-Unis mbakandatɛ ɛtɛkɛta ande ɛsɔ, anto wa lo wedja efula waketawɔ kɛnɛ kakandate.

Ngɔndɔ shato l’ɔkɔngɔ wa kɛnɛ kakate Martin Luther King lo Ngɔndɔ ka dikumi l’ɔtɔi 20, 1963, anto wa lo wedja ndekana 100 waketawɔ kɛnɛ kakate Nations-unies lo kɛnɛ kendana la Oshidiyelo wa weho tshɛ wa diɛngiyelo dioye oma lo woho wele anto bu la lokoho la demba ɔtɔi. Tɛdikɔ tokina tendana la dikambo sɔ takɔsama l’ɛnɔnyi akumi wakayele. Welo wadjama ɛsɔ tshɛ monyiyaka dimbola di’ɔnɛ: Etombelo akɔna wambonga la dui sɔ?

Lo Ngɔndɔ ka sato 21, 2012, Ban Ki-moon sekeletɛlɛ ka O.N.U. akate ate: “Takɔtɔ toseke efula ndo takɔshi tɛdikɔ efula t’ohomba ndo takakongɛ akambo dia nshimba kana minya tshelo ya kananɛ kɔlɔ kana ya mɛngiyana l’ɔtɛ wa lokoho la demba, woho wele anto bu wodja ɔtɔi ndo awui akina wa woho ɔsɔ. Koko l’andja w’otondo, miliyɔ y’anto yekɔ lo ntetemala diɛnɛ l’ɔtɛ w’awui asɔ.”

Oyadi lo wedja wambosala yema y’ehamelo l’ɔlɔshanelo wa la lohetsho la lam’asa anto wele bu lokoho ɔtɔi la demba ndo la weho ekina wa totshelo ta kananɛ kɔlɔ, dimbola diakambɔma diɔ nɛ: Onde vɔ mɛtɛ wambotondoya dia minya awui asɔ ko kana wambetsha anto diaha nsala awui asɔ lo sɛkɛ? Anto amɔtshi fɔnyaka dia welo wadjama ɛsɔ wambokitshakitsha yema ya diɛngiya, koko watanya tshelo ya kananɛ kɔlɔ. Lande na ngasɔ? Nɛ dia diɛngiya kokaka mɛnama la washo ndo onto lɛngiya osekande kokaka nongola dilanya lo ndjela ɛlɛmbɛ, koko kananɛ kɔlɔ mendanaka la tokanyi ndo la nsaki yele l’etei k’otema w’onto, tele bu wɔdu ndjahemɛ.

Ɔnkɔnɛ, dia ndɔshana la tshelo ya kananɛ kɔlɔ, hatohombe tsho nshimba anto dia mɛngiyana, koko ndo dia ntshikitanya tokanyi ta kɔlɔ tele lawɔ otsha le anto akina. Onde dui sɔ kokaka salema mɛtɛ? Naka eelo, lo woho akɔna? Nyɛsɔ tɔsɛdingole bɛnyɛlɔ di’anto amɔtshi diayotokimanyiya dia mɛna aha tsho ɔnɛ anto kokaka ntshikitanya dionga diawɔ, koko ndo kɛnɛ kakoka mbakimanyiya dia vɔ nsala dui sɔ.

BIBLE AKAAKIMANYIYA DIA MINYA TSHIKA KANANƐ KƆLƆ

Linda: Dimi lakotɔ l’Afrique du Sud. Lakɔsaka anto tshɛ waki komonga asungu l’Afrique du Sud oko anto w’anyanya, waheye mukanda, wahamakoke mbɛkɛ otema le wɔ ndo oko abɔyi w’asungu. Lakayotatɛ kanɛ anto kɔlɔ aha la dimi mbeya. Koko, lakatatɛ ntshikitanya dionga sɔ lam’akamatatɛ mbeka Bible. Lakeke dia “Nzambi keema la shɔnɔdi” ndo kɛnɛ kele l’otema w’onto mboleki ohomba, koko aha lokoho lande la demba kana ɔtɛkɛta watɛkɛtande. (Etsha 10:34, 35; Tukedi 17:3) Ɛtɛkɛta wele lo Filipɛ 2:3 wakakimanyiya dia dimi mɛna ɔnɛ naka dimi mbɔsa di’anto akina ndekami, kete dimi layotshika mbekelo ka kanɛ anto akina kɔlɔ. Nkitanyiya atɔndɔ wa lo Bible wele oko wa lo divɛsa sɔ akakimanyiya dia ndjasha le anto akina, oyadi lokoho lawɔ la demba. Kakianɛ, handjokanɛ anto akina kɔlɔ.

Michael: Lakole l’osomba wakadjasɛka asungu efula w’oma lo wodja w’Australie, ndo laki la kanyi ya kɔlɔ efula otsha le ase Asie, djekoleko ase Chine. Etena tshɛ kakamatakɛndjakɛndjaka mutuka ndo kakamɛnaka onto ɔmɔtshi lafɔna l’ose Asie, paka dimi mpoloya tovitrɛ ta mutuka ko mbotɛ la diɔnyɔ tshɛ ɔnɛ: “Yaa wɛ, nkalola lakanyu l’Asie!” Koko etena kakamayotatɛ mbeka Bible, lakayeyaka woho wɔsa Nzambi anto. Nde nangaka anto tshɛ, oyadi wodja kana woho wewɔ. Ngandji ka Nzambi kɛsɔ kakananda otema ami, ndo lohetsho laki la mi otsha le anto asɔ lakayokadimɔka ngandji. Aki dui dia diambo dia dimi nsala etshikitanu wa ngasɔ. Kakianɛ, laya l’ɔngɛnɔngɛnɔ w’efula lo woho wayami kaamɛ l’anto w’oma lo wedja tshɛ ndo wele la nsɛnɔ yotshikitanyi. Kɛsɔ kambotshikitanya lɔsɛnɔ lami ndo kambombisha ɔngɛnɔngɛnɔ w’efula.

Sandra: Mama akotɔ l’osomba wa Umunede lo wodja wa Nigéria. Koko, papa aki ose osomba wa Edo ndo akatɛkɛtaka ɔtɛkɛta wa Esan. L’ɔtɛ w’etshikitanu ɛsɔ, ase nkumbo ka papa waki la tokanyi ta kɔlɔ efula otsha le mama polo lo nyɔi kande. Ɔnkɔnɛ, lakɔshi yɛdikɔ dia halokoke pondjo mbokana l’onto tshɛ latɛkɛta ɔtɛkɛta wa Esan kana ntshukana l’onto loye oma l’osomba wa Edo. Koko etena kakamatatɛ mbeka Bible, lakayotshikitanyaka kanyi yami. Lam’ele Bible mbutaka dia Nzambi keema la shɔnɔdi y’anto ndo ɔnɛ onto tshɛ lawoka wɔma mbetawɔmaka le nde, dimi eemi dia mpetsha anto akina l’ɔtɛ wa dioho diawɔ kana l’ɔtɛ w’ɔtɛkɛta awɔ? Lakatshikitanya ekanelo kami, ndo lakadje wɔladi lam’asami l’ase nkumbo ka papa. Nkamba l’atɔndɔ wa lo Bible ambombisha ɔngɛnɔngɛnɔ ndo ki ka lo yimba. Vɔ wambokimanyiya nto dia dimi monga kaamɛ l’anto akina oyadi dioho diawɔ, lokoho lawɔ, ɔtɛkɛta awɔ kana wodja awɔ. Ko onde nyu mbeyaka pami kakayotshukaka? Pami k’oma l’osomba wa Edo ndo katɛkɛta ɔtɛkɛta wa Esan!

Lande na kaki Bible l’akoka wa nkimanyiya anto woshidiso ango ndo akina dia vɔ ndɔshana la lohetsho ndo la tshelo ya kanɛ anto akina kɔlɔ? Nɛ dia Bible ekɔ Ɔtɛkɛta wa Nzambi. Tɔ kekɔ la wolo wa ntshikitanya tokanyi ndo yoho yɔsa onto anto akina. Ndo nto, Bible tɛnyaka dui dikina diele ohomba dia minya totshelo tshɛ tendana la kanɛ anto akina kɔlɔ.

DIOLELO DIAKI NZAMBI DIAYOKOMIYA AWUI TSHƐ WENDANA LA KANƐ ANTO AKINA KƆLƆ

Kaanga mbakoka Bible tokimanyiya dia sho mbahemɛ tokanyi taso ndo tinya oma l’etema aso, ekɔ awui akina ahende wahombaso ndɔshana la wɔ la ntondo ka ndjonya tshɛ lo tshɛ tshelo ya kanɛ anto akina kɔlɔ. Dui dia ntondo ele, pɛkato ndo eongelo kaso kele keema kokele. Bible mbutaka ɔnɛ: “Nduku untu leko lahatshaka kolo.” (1 Khumi ya Dikanga 8:46) Diakɔ diele, oyadi welo akɔna tshɛ wayotodja, tekɔ paka l’okakatanu wele oko wɔnɛ waki l’ɔpɔstɔlɔ Pɔɔlɔ lakafunde ate: “Lam’alangami nsala kɛnɛ kele ɔlɔlɔ, kɛnɛ kele kɔlɔ kekɔ le mi.” (Rɔmɔ 7:21) Ɔnkɔnɛ, tena la tena, eongelo kaso k’anto wele keema kokele totshutshuyaka dia monga la “tokanyi ta kɔlɔ” takoka tokonya dia kanɛ anto akina kɔlɔ.​—Makɔ 7:21.

Dui dia hende ele, tɔsɛngiya t’oma le Satana Diabolo. Bible mbeelɛka ɔnɛ “ondjakanyi” ndo “ɔnɛ langanyiya [anto wa lo] nkɛtɛ k’otondo.” (Joani 8:44; Ɛnyɛlɔ 12:9) L’ɔtɛ wa dikambo sɔ mbamboleka kokanɛ tshelo ya kanɛ anto akina kɔlɔ ndo mbele ekɔ wolo di’anto minya awui wa diɛngiya, awui wa kananɛ kɔlɔ, lohetsho lele lam’asa anto l’ɔtɛ wewɔ bu dioho ɔtɔi, lokoho ɔtɔi la demba, ɔtɛmwɛlɔ ɔtɔi ndo dihole diamɛ lo tshunda.

Ɔnkɔnɛ, la ntondo k’anto minya tshɛ lo tshɛ tshelo ya kananɛ kɔlɔ, paka pɛkato, eongelo kele keema kokele ndo shɛngiya yaki Satana Diabolo tokonyɛma. Bible mɛnyaka dia kɛsɔ mbayosala Diolelo diaki Nzambi.

Yeso Kristo aketsha ambeki ande dia vɔ nɔmbaka Nzambi ɔnɛ: “Diolelo diayɛ diaye. Lolango layɛ latshame la nkɛtɛ oko watshamalɔ l’olongo.” (Mateo 6:10) Diolelo diaki Nzambi mbayonya wɛngiya tshɛ, ndo mbekelo tshɛ yendana la kananɛ kɔlɔ.

Etena kayoya Diolelo diaki Nzambi ndo kayodotatɛ nɔmbɔla nkɛtɛ k’otondo, Satana ‘ayokelekama,’ ndo ayoshimbama “diaha nde minganyiya wedja nto.” (Ɛnyɛlɔ 20:2, 3) Oma laasɔ, mbayoyala “nkɛtɛ k’oyoyo,” lɛnɛ ayodjasɛ anto wa “losembwe.”a​—2 Petero 3:13.

Anto tshɛ wayodjasɛ l’andja ɔsɔ wa losembwe wayokoma kokele ndo wayotshungɔ oma lo pɛkato. (Rɔmɔ 8:21) Oko wayowonga ambolami wa Diolelo diaki Nzambi, ‘vɔ hawotosala ndooko dui dia kɔlɔ ndo hawotolanya kaanga ɛngɔ.’ Lande na? “Ne dia kete ayulula la ewu ka [Jehowa].” (Isaya 11:9) L’etena kɛsɔ, anto tshɛ wayetshama mboka ya Jehowa Nzambi ndo wayookoya dionga diande dia ngandji. Kɛsɔ mɛnyaka di’awui tshɛ wendana la kananɛ kɔlɔ wayonyɛma lo pondjo, “nɛ dia Nzambi keema la shɔnɔdi.”​—Rɔmɔ 2:11.