ANDJA WAMBOLOLA L’EKAKATANU

1 | Nkokɛ yoonge yayɛ

OHOMBA WA DUI SƆ

Mpokoso koka monga la shɛngiya le so lo toho efula totshikitanyi.

Ekakatanu mbishaka anto efula ɔkɔmwɛlɔ ndo mbala efula anto wonga l’ɔkɔmwɛlɔ l’etena k’otale tataka hemɔ.
Hemɔ yasambemɛ koka nkonya mpitadi l’okakatanu wa mbisha esakelo ndo mpomba ekanga wa nsakɛ anto.
Mpokoso konyaka anto dia monga l’okakatanu wa nsomba diangɔ diewɔ l’ohomba diele oko diangɔ dia ndɛ ndo ekanga dia nkokɛ yoonge.

Kɛnɛ kahombayɛ mbeya

Hemɔ ka wolo ndo ɔkɔmwɛlɔ wa lo yimba koka kokonya dia mbɔsa tɛdikɔ ta kɔlɔ ndo dui sɔ koka kokonya dia wɛ ndjohɛ nsala awui w’amɛna dia nkokɛ yoonge yayɛ. Etombelo wayonga la dui sɔ ele, wɛ mbeyaka ndjokoma onto la tohemɔ hemɔ.
Naka wɛ hadje yimba dia nkokɛ yoonge yayɛ, kete ekakatanu wendana la yoonge koka monga wolo ndo mbidja lɔsɛnɔ layɛ lo waale.
Naka wɛ ekɔ la yoonge ya dimɛna, kete wɛ ayonga suke dia mbɔsa tɛdikɔ t’amɛna l’andja ɔnɛ wambolola tɔɔ l’ekakatanu.
Oyadi wɛ ekɔ l’ekondjelo kana bu, wɛ koka nkokɛ yoonge yayɛ.

Kɛnɛ kakokayɛ nsala oma ko kakianɛ

Naka kokaka onto lele la lomba mɛnaka waale la ntondo ndo nde mbɔsaka tɛdikɔ dia mbewɔ. Dui sɔ mbeyaka mendana nto la yoonge. Mbala efula wɛ koka nkitshakitsha waale wa mbɔsa hemɔ kana diaha tɔ koheka, lo ntetemala nkokɛ yoonge yayɛ ndo mbetɛka luudu layɛ pudipudi. Ndeka dimɛna nkokɛ yoonge yayɛ, lo dihole dia ndjoyanga okanga wonya wa hemɔ.

“Naka sho ntetemala monga pudipudi ndo mbetɛka luudu lodjashiso pudipudi, kete hatotoleka nshisha falanga ya tshɔka le onganga kana l’osombelo w’ekanga.”—Andreas.a

a Nkombo mɔtshi ya lo emɔ kɛnɛ yakatshikitanyema.

WOHO WA NTONDOYA—Alako w’ohomba

Lo ntena di’ekakatanu nɛ, nkokɛ yoonge yayɛ lo nsala awui wayela anɛ:

ONGAKA LA MBEKELO Y’AMƐNA YENDANA LA PUDIPUDI

Ongaka la mbekelo y’amɛna yendana la pudipudi

Bible mbutaka ɔnɛ: “Kanga yewo atɛnaka waale, ko nde atoyashɛka.” (Tokedi 22:3) Sala la wolo dia mbeya dui la ntondo ndo ewɔ waale wakoka monga lo yoonge yayɛ.

Solaka anya mbala la mbala la savɔ ndo l’ashi, djekoleko la ntondo ka minanda mbo ya ndɛ kana l’ɔkɔngɔ wa wɛ nkalola oma lo nkomba.
Solaka anya ndo luudu layɛ mbala la mbala, djekoleko ahole ndo diangɔ dialekayɛ minanda.
Naka kokaka ewɔ monga suke suke l’onto lele la hemɔ kasambemɛ.

LƐKAKA MBO YA NDƐ Y’AMƐNA

Lɛkaka mbo ya ndɛ y’amɛna

Bible mbutaka ɔnɛ: “Ndooko pami kahetsha demba diande hita, koko nde dileshaka ndo dilɔngɔsɔlaka.” (Ɛfɛsɔ 5:29) Sho mɛnyaka dia sho nangaka demba diaso lo mbidja yimba lo kɛnɛ kalɛso ndo kanɔso.

Nɔkaka ashi efula.
Lɛkaka weho w’elowa wotshikitanyi ndo akatshikatshi.
Ewɔ ndɛ diangɔ di’esɔ, lɛɛhɔ ndo sukadi efula.
Tɔnɔke mfɔka kana wanu wadjoya kana didjoyadjoya dikina.

“Dia mbewɔ hemɔ, sho pombaka nsala la wolo dia ndɛka mbo ya ndɛ y’amɛna, naka hatosadi ngasɔ kete tayoshishaka falanga yakondjaso le adɔkɔtɛlɛ ndo lo sombaka ekanga. Sho kambaka la falanga yaso dia sombaka mbo ya ndɛ y’amɛna.”—Carlos.

KƆKƆLAKA DEMBA NDO OMUYAKA EFULA

Omuyaka

Bible mbutaka ɔnɛ: “Ndeka dimɛna monga la yema ya diomuyelo tshitshɛ lo dihole dia monga la olimu efula wa wolo ko tatshanyaka lɔpɛpɛ.” (Ondaki 4:6) Ekɔ ohomba nkamba olimu, koko tekɔ nto l’ohomba wa di’omuyelo.

Sala la wolo dia monga la yoonge ya dimɛna. Wɛ mbeyaka ntatɛ lo kɛndakɛndaka mbala la mbala. Ɔkɔkwɛlɔ wa demba koka kokimanyiya dia monga la yoonge ya dimɛna oyadi wɛ aya opalanga, aya bu la wolo wa nkɛndakɛnda kana aya la elelo ɛmɔtshi w’oma lo hemɔ kahakɔnɔ.
Kɔkɔlaka demba

Omuyaka efula. Lo tshena pe, naka wɛ homuya efula, kete dui sɔ koka kokonya dia monga l’ekiyanu efula ndo nkitshakitsha akoka ayɛ wa mbidja yimba lo dikambo. Naka wɛ homuya efula, kete dui sɔ koka kokonya dia wɛ ntata hemɔ ya wolo.
Shikikɛ wonya wahombayɛ ndalaka ndo lɛnyaka wonya akɔ. Salaka la wolo dia tshɔ lo mbeto toshama ndo emɔka wonya akɔ waamɛ lushi tshɛ.
Ewɔ mendaka televisiɔ kana kambaka la telefɔnɛ kana tablɛtɛ wonya weyɛ lo mbeto.
Ewɔ ndɛka diangɔ dia wetsho, eloko ndo waanu la ntondo ka wɛ ntshɔ toshama.

“Lambɛna dia djɔ yalalami mongaka la shɛngiya l’awui tshɛ wendana la yoonge yami. Naka handadi dimɛna, ntena dimɔtshi dimi tataka l’ɔtɛ ndo dimi nɛmbaka. Koko etena kalalami efula dimi ndjaokaka dimɛna ndo mongaka suke dia nsala kɛnɛ tshɛ kemi l’ohomba wa nsala. Lekɔ la wolo efula wa demba ndo haleke ntata”—Justin.