ƆKƆNDƆ 39
Danga diaki Arɔna diambotomba alɛmbɔlɛmbɔ
OHENDA alɛmbɔlɛmbɔ l’elowa w’amandɛ wambotshunda engo lo danga. Ongo ekɔ danga diaki Arɔna. Danga di’Arɔna ndo diakatombi alɛmbɔlɛmbɔ l’otsho! Tênde lande na.
Aya tshanda yambekekɔ Ase Isariyɛlɛ l’oswe wa shɛnga. Anto amɔtshi l’atei awɔ kɔngɛnangɛnaka dia Mɔsɛ ndjâla ɔnɔmbɔdi ndo Arɔna ɔlɔmbɛdi a lâdiko. L’olui ɔsɔ aki: Kɔra, Datana, Abirama ndo ewandji wa wodja 250. Lushi lɔmɔtshi, vɔ tshɛ wakaye la ndjotɛ Mɔsɛ vate: ‘Ɔkɔkɔ akɔna ayadjayɛ lâdiko diaso sho tshɛ na?’
Mɔsɛ akatɛ Kɔra l’anto ande ate: ‘Lui la pindju kanyɔsɛ poso yanyu y’ɛmbawɔ dja ko nyu mbidja tshɔ lɔkɔ. Kanyoye lo tabɛrnakɛlɛ kaki Jehowa. Sho tayoyeya akɔna ayɔsɔnama oma le Jehowa.’
La wedi a pindju Kɔra l’anto ande 250 wakaye lo tabɛrnakɛlɛ. Anto akina efula wakaye la ndjasukɛ. Jehowa aki la kɛlɛ efula. Ko Mɔsɛ akate ate: ‘Nyomɔ suke la tîdu t’apɛma t’apami wa kɔlɔ anɛ. Tonyonandake ndoko ema kawɔ ɔtɔi.’ Ko anto wakamɔ suke la tîdu t’apɛma ta Kɔra, Datana la Abirama.
Ko Mɔsɛ akate ate: ‘Nyu nyayeya ɔnɛ lakasɔnama oma le Jehowa lo dikambo nɛ: kɛtɛ yayâtɛ ndo yayɔmɛna anto wa kɔlɔ.’
Kam’akashidiya Mɔsɛ ɔtɛkɛta, kɛtɛ yakâtɛ palala. Luudu la Kɔra la diangɔ diande tshɛ ndo Datana la Abirama la mbo yawɔ tshɛ wakɔtɔ ko kɛtɛ yakâkukumɛ. Lam’akôke anto alelo awɔ, vɔ wakate vate: ‘Nyɛsɔ tolawɔ! Kɛtɛ yatokoyotɔmɛna ndo sho!’
Kɔra l’anto ande 250 wakatetemala la memala tsho suke la tabɛrnakɛlɛ. Ɔnkɔnɛ Jehowa akatome dja, ko vɔ tshɛ wakalongola. Ko Jehowa akatɛ Eliazara ɔn’aki Arɔna dia nde mbɔsa poso y’ɛmbawɔ dja y’anto wambovɔ asɔ kele asale layɔ ofidi w’ediakelo. Ofidi w’ediakelo ɔsɔ aki eohwelo le Ase Isariyɛlɛ di’aha onto k’onto, laha Arɔna l’anande sala olimu w’ɔlɔmbɛdi wa Jehowa.
Koko Jehowa akalange mɛnya hwe ɔnɛ Arɔna l’anande mbakandasɔnɔla dia vɔ ndjâla ɛlɔmbɛdi. Ɔnkɔnɛ nde akatɛ Mɔsɛ ate: ‘Tɛ̂ owandji wa lo dioho la dioho di’Isariyɛlɛ dia nde mbela danga diande. Lo dioho dia Lɛwi, tɛ̂ Arɔna dia nde mbela danga diande. Kokitsha alanga asɔ tshɛ lo tabɛrnakɛlɛ la ntondo k’ɔshɛtɛ wa sheke. Danga di’onto lakamasɔnɛ dia ndjâla ɔlɔmbɛdi, diayotomba alɛmbɔlɛmbɔ.’
Lam’akayendaka Mɔsɛ la wedi a pindju, ɛnyi ko danga diaki Arɔna diambotomba alɛmbɔlɛmbɔ ndo elowa w’amandɛ wambotshunda! Wɛ ambôka kakianɛ, lande na akatondja Jehowa alɛmbɔlɛmbɔ lo danga diaki Arɔna?
Walelu 16:1-49; 17:1-11; 26:10.