ƆKƆNDƆ 40

Mɔsɛ ambɔkɔmɔla dive

ƐNƆNYI 10,20,30,39 wambeta! Ko Ase Isariyɛlɛ weke paka l’oswe wa shɛnga. Koko Jehowa akakokɛka anto ande ɛnɔnyi ɛsɔ tshɛ. Nde akâleshaka mana. Nde akâlɔmbɔlaka la yanyi l’ekundji ka dinge ndo l’otsho l’ekundji ka dja. Edja k’ɛnɔnyi ɛsɔ tshɛ, ahɔndɔ awɔ kɔnɛmba ndo ekolo awɔ kotomba ahoha.

Kakianɛ waya lo ngɔndɔ ka ntondo l’ɔnɔnyi wa 40 wambowotomba oma l’Edjibito. Ase Isariyɛlɛ wamboyohanga la Kadɛshɛ nto. Vɔ wakadjasɛ lâwɔ etena kakatome Mɔsɛ atɔpi 12 dia tokemba kɛtɛ ya Kanana, ambeta suke l’ɛnɔnyi 40. Lâwɔ mbakavu Miriama, kadiyɛnde la Mɔsɛ. Ndo, oko mbala kakete, mpokoso kakatombe lâwɔ nto.

Anto kokoka kondja kânga dipɔpɔ di’ashi. Omalɔkɔ, vɔ wakatoyakiyanya le Mɔsɛ vate: ‘Otoleka dimɛna otondonga takavu. Ɔkɔkɔ akɔna wakayatotondja oma l’Edjibito dia têla lo dihole nɛ diahatombe ndoko ema na? Hɛnɛ kânga nɔnɔ, kânga elowa wa fingo, kânga wa vinyɔ, kânga dikɔmi di’etamba. Hɛnɛ kânga ashi wa nnɔ.’

Lam’akatshu Mɔsɛ nde la Arɔna latɔlɔmba lo tabɛrnakɛlɛ, Jehowa akatotɛ Mɔsɛ ate: ‘Tshumanya anto lo dihole ɔtɔi. L’ɔkɔngɔ diko, kɔtɛkɛtɛ dive la ntondo kawɔ vɔ tshɛ. Ashi wayotomba efula dia anto la nyama yawɔ tshɛ nnɔ.’

Ko Mɔsɛ akatshumanya anto lo dihole ɔtɔi, ndo nde akate ate: ‘Nyolonge, nyu wanɛ wahɛkama Nzambi! Onde Dimi l’Arɔna mbahomba nyotondjɛ ashi oma lo dive nɛ?’ Ko Mɔsɛ akakɔmɔla danga lo dive mbala hiende, ko ashi wakatshutshumɔ oma lo dive. Ashi akɔ akakoke di’anto tshɛ ndo wa nyama nnɔ.

Koko Jehowa akômalɛ Mɔsɛ l’Arɔna efula. Wɛ mbeyaka lande na? Nɛ dia Mɔsɛ l’Arɔna wakate vate: vɔ mbakahombe tondja ashi oma lo dive. Tete le, mɛtɛ, Jehowa mbakatondja ashi. Nɛ dia Mɔsɛ nde l’Arɔna kombuta mɛtɛ lo dikambo sɔ, Jehowa akawatɛ dia nde ayanga mbasha dilanya. Nde akawatɛ ate: ‘Nyu hanyotɔtshiya anto ami lo Kanana.’

Kem’edja, Ase Isariyɛlɛ wakamɔ oma la Kadɛshɛ. Kem’edja vɔ wakakome lo Dikona dia Hɔra. Lâwɔ mbakavu Arɔna lo shɔdi ya dikona diakɔ. Nde akavu l’ɛnɔnyi 123. Ase Isariyɛlɛ wakoke kandji efula ko wakôlele nshi 30. Ɔnande Eliazara akôkite l’olimu w’ɔlɔmbɛdi wa lâdiko wa wodja w’Isariyɛlɛ.

Walelu 20:​1-13; 22-29; Etumbelu 29:⁠5.