Ngɔndɔ ka sato

Ngandji kokaso Nzambi ndo Ɔtɛkɛta ande tokeketshaka dia nkitanyiya Jehowa oyadi etena kalanga ase nkumbo kana angɛnyi aso wele la tokanyi t’ɛlɔlɔ totshutshuya dia ndjasha lo ditshelo diahɔtɔnɛ l’Afundelo diendana la wanɛ wavɔ. Vɔ koka tootsha nsɔnyi naka sho hatoyasha lo ditshelo sɔ, ondo lo mbuta ɔnɛ hatolange kana hatɔlɛmiya ɔnɛ lambovɔ. Kana vɔ koka mbuta ɔnɛ lɔkɛwɔ laso koka salɛ ɔnɛ lambovɔ kɔlɔ dia nde tɔsɛna dihole dikina. Lo disɛnga dimɔ dia lo Caraïbes, anto efula mbetawɔka ɔnɛ l’ɔkɔngɔ wa nyɔi k’onto, “okishi” ande koka ntshikala laawɔ ndo mbisha wanɛ wakosalɛ kɔlɔ dilanya. Dibuku dimɔ mbutaka ɔnɛ: “Okishi” koka kaanga “mfukutanya tshunda.” Ekɔ mbekelo kɛmɔ ka l’Afrikɛ ka mbifɛ talatala ya lo luudu la ɔnɛ lambovɔ ndo nkadimola foto otsha l’ehele. Lande na? Amɔtshi mbutaka ɔnɛ diaha wanɛ wambovɔ ndjoyaɛna vɔamɛ! Oko weso ekambi wa Jehowa, sho hatetawɔ ɛkɔndɔ kana ditshelo tshɛ diasukɛ kashi ya Satana!​—1 Kɔr. 10:21, 22. w19.04 16 od. 11-12

Yeso aketsha atɔndɔ wahomba nkimanyiya ambeki ande dia salɛ anto akina akambo la losembwe. Tɔshi ɛnyɛlɔ kendana la woho wa salanɛ akambo. Sho tshɛ nangaka di’anto tosalɛ akambo la losembwe. Diakɔ diele, sho la dia salɛ anto akina akambo la losembwe. Naka sho nsala ngasɔ, vɔ koka sɛngiyama dia tosalɛ akambo la losembwe. Ko kayotota naka wambotosalɛ akambo aha la losembwe? Yeso aketsha ambeki ande nto dia monga l’eshikikelo ɔnɛ Jehowa ayosala “dia dikambo dia [wanɛ] woolelɛ otsho la yanyi sambɔma la losembwe tshɛ.” (Luka 18:6, 7) Ɛtɛkɛta ɛsɔ wekɔ daka di’ɔnɛ: Nzambi kaso kele la losembwe mbeyaka ehemba wahomana la so lo nshi nyɛ y’ekomelo ndo nde ayosala dia dikambo diaso sambɔma la losembwe tshɛ l’etena kahombama. (2 Tɛs. 1:6) Naka sho ndjela atɔndɔ waketsha Yeso, kete tayosalɛ anto akina akambo la losembwe. Ndo naka wekɔ lo tosalɛ akambo aha la losembwe l’andja wa Satana, kete sho koka nkondja esambelo lo mbeya dia Jehowa ayosala dia dikambo diaso sambɔma la losembwe tshɛ. w19.05 5 od. 18-19

Onde wɛ ekɔ ɔlɔngɔlɔngɔ wɔtɔ kalasa? Ondo asekayɛ wa la kalasa mbetawɔka wetshelo w’ohilwelo. Wɛ nangaka mamɛ wetshelo wa lo Bible, koko ondo wɛ ekɔ lo mboka dia wɛ bu l’akoka wa nsala dui sɔ. Diakɔ diele wɛ pombaka mbeka! Wɛ koka ndjadjɛ eyango ehende ɛnɛ: 1) nkeketsha mbetawɔ kayɛ ɔnɛ Nzambi mbakatonge diangɔ tshɛ ndo 2) ndowanya akoka ayɛ wa mamɛ akambo wa mɛtɛ. (Rɔmɔ 1:20) Wɛ koka ndjambola ɔnɛ: ‘Awui akɔna wata asekami wa la kalasa dia nsukɛ wetshelo w’ohilwelo?’ Oma laasɔ nsala eyangelo wa lotshimola lo nkamba la ekanda aso. Nembetshiya dietawɔ diayɛ koka monga ko bu wolo oko wafɔnyayɛ. Anto efula mbetawɔka tsho wetshelo w’ohilwelo l’ɔtɛ wa onto ɔmɔ lalɛmiyawɔ akawatɛ ɔnɛ wekɔ mɛtɛ. Naka wɛ ntana dui dimɔ kana awui ahende wakokayɛ kahana la wɔ, wɛ koka nkimanyiya onto ɔmɔ lele mɛtɛ la nsaki ka ntana ekadimwelo.​—Kɔl. 4:6. w19.05 29 od. 13

Etena kakatalawɔka omvutshi Elidja diaha vɔ mbodiaka, nde akakɔmɔ efula ndo akakombola nyɔi. Jehowa akatome ondjelo waki la wolo dia ndjenda pami kakakɔmɔ kɛsɔ. Ondjelo akawosha ekimanyielo kahombama. Nde akasha Elidja yangɔ ya ndɛ ya dja ndo akokeketsha dia nde ndɛ. (1 Ku. 19:5-8) Ɔkɔndɔ ɔnɛ totɛka dui dia mɛtɛ di’ohomba efula: Lo tena dimɔ tshelo tshɔi ya tshitshɛ y’ɔlɔlɔ koka nkimanyiya onto efula. Mbeyaka monga yangɔ ya ndɛ, woshasha wa tshitshɛ, kana fundɛ onto mukanda, koka nshikikɛ ɔnangɛso kana kadiyɛso kele l’ɔkɔmwɛlɔ dia sho mbokaka ngandji ndo ndjakiyanyaka dikambo diande. Naka bu dui dia wɔdu le so dia nsawola l’onto ɔmɔ lo kɛnɛ kendana l’ekiyanu ande, ondo sho koka mbisha ekimanyielo ka ngasɔ. Lo yoho ya dihindo, Jehowa akasha Elidja ekimanyielo kakinde l’ohomba dia munda lɔkɛndɔ l’otale otsha lo dikona dia Hɔrɛbɛ, mangana etale efula la wanɛ wakayangaka mbosalɛ kɔlɔ. Wetshelo akɔna wakokaso nkondja? Naka sho nangaka nsamba anto wakaweyana la wɔ la wolo, kete sho pombaka ntondo mbakimanyiya dia vɔ ndjaoka lo ekokelo, oyadi la ngelo yawɔ kana lo Mbalasa ka Diolelo. w19.05 16 od. 11; 17 od. 13-14

Ohɔsa dia wɛ ekɔ lo mbadia tshapita 12 ya prɔfɛsiya ka Zɛkariya, yatɛkɛta dikambo dia nyɔi ka Mɛsiya. (Zɛk. 12:10) Etena kakomayɛ lo divɛsa dia 12, wɛ ayadia ɔnɛ “nkumbo ka luudu la Natana” wayolela efula etena kayovɔ Mɛsiya. Lo dihole dia mbeta esadi esadi, wɛ la dia memala ndo ndjambola ɔnɛ: ‘Diɔtɔnganelo diakɔna diele lam’asa luudu la Natana la Mɛsiya?’ Wɛ koka nsala eyangelo. Rɛferansɛ watoma otsha lo avɛsa akina koka kotoma lo 2 Samuɛlɛ 5:13, 14, lɛnɛ ayoyadia ɔnɛ Natana aki ɔnaki nkumekanga Davidɛ. Rɛferansɛ okina wa lo Luka 3:23, 31, mɛnyaka dia Yeso ekɔ kanula ya Natana lo tshimbo ya Mariya. Mbala kakɔ ɔtɔi dui sɔ diambokotola yambalo yayɛ! Wɛ mbeyaka dia wakate dia Yeso ekɔ kanula ya Davidɛ. (Mat. 22:42) Koko Davidɛ aki l’ana ndekana 20. Onde bu dui dia diambo dia Zɛkariya ntɛkɛta lo yoho ya laande dikambo dia luudu la Natana oko wanɛ wele l’ɔkɔkɔ wa ndela dikambo dia nyɔi ka Yeso? w19.05 30 od. 17

Ahombaso nsala? Naka sho mbekaka mbala la mbala, kete sho koka nshikikɛ shoamɛ akambo wa mɛtɛ wakateke oma lo Bible. Sho koka monga l’eshikikelo tshɛ lo tshɛ ɔnɛ atɔndɔ wa Jehowa wekɔ osembɔki. Oma laasɔ, oko osongo wele l’edio wohikami wolo, tayohikama wolo, mbuta ate ‘shikimala lo mbetawɔ.’ (Kɔl. 2:6, 7) Ohɔ dia ndooko onto okina lakoka shikimadia mbetawɔ kayɛ, diakɔ diele tetemala monga oyoyo lo wolo walɔmbɔla yimba yayɛ. Tetemala nɔmba; sɛngasɛnga Jehowa dia kokimanyiya la nyuma kande. Kanaka yimba efula; tetemala nsɛdingola tokanyi ndo nsaki yayɛ. Sɔna angɛnyi w’eshika; ongaka kaamɛ l’anto wayokokimanyiya dia mpiloya yimba yayɛ. Lo nsala ngasɔ, wɛ ayosuwola etombelo wa lɔlɛngɔ wa andja wa Satana ndo wɛ ayotondoya dia minya “tokanyi ndo oseka wekamu tshɛ walɔshana la ewo ka Nzambi.”​—2 Kɔr. 10:5. w19.06 13 od. 17-18

Paka oko wakatshikala Ruta kaamɛ la Naɔmi laki wadi aki odo, mbele sho la dia ntetemala nsukɛ wanɛ wakavusha onto ɔmɔ lokawɔ ngandji. (Ruta 1:16, 17) Paula, mbutaka ate: “Kam’akavu omɛmi, lakakondja osukɔ w’efula. Koko l’ɔkɔngɔ w’etena kɛmɔ, anto wakayoyasha l’elimu awɔ wa lushi la lushi. Koko, lɔsɛnɔ lami lakatshikitana tshɛ lo tshɛ. Mongaka ekimanyielo k’efula etena kashihodia anto akina dia onto lele la lɔkɔnyɔ ekɔ l’ohomba w’osukɔ ngɔndɔ kana ɛnɔnyi efula l’ɔkɔngɔ wa nde mvusha.” Lo mɛtɛ, anto ntshikitana. Mɛnamaka dia amɔ ndjaɔtɔnganyiyaka la dikambo diawɔ esadi eto. Koko le akina, etena tshɛ kasalawɔ dui diakawasalaka la wakiwɔ wa ngandji wakavu, mbaoholakawɔ. Woho wonga anto la lɔkɔnyɔ ntshikitana. Tohɔ dia Jehowa toshaka diɛsɛ ndo ɔkɛndɛ wa nkokɛ wanɛ wakavusha olonganyi awɔ. w19.06 24 od. 16

Naka wamboshimba ɔtɛmwɛlɔ aso, sho la dia mbeyaka “etena ka mbɔlama.” (Ond. 3:7) Sho la dia nama toseke, ɛnyɛlɔ nkombo y’anangɛso l’akadiyɛso, dihole diasanganaso, woho wasambishaso ndo woho walongolaso mbo ya ndɛ ya lo nyuma. Tatotɛke aseka lɛɛta, angɛnyi aso, ewotɔ aso wa lo wodja aso kana wa lo wedja ekina akambo asɔ. Naka sho nkɔ lo djonga shɔ, kete tayodja nsɛnɔ y’anangɛso lo waale. Tatetawɔke dia towuiwui ta totshitshɛ tokakitola. Satana mbeyaka dia naka luudu lambatɔna, kete lɔ layohandjɔ. (Makɔ 3:24, 25) Nde ayotetemala nsala la wolo dia mbidja diatɔnelo lam’asaso. Lo nsala ngasɔ, nde nongamɛka dia tayotatɛ ndɔshana lam’asaso lo dihole dia sho ndɔshana la nde. Kaanga Akristo wambotshunda la dia ndjalama diaha nkɔ lo djonga shɔ. Naka sho nsala la wolo dia nkandola ekakatanu wele lam’asaso l’anangɛso, kete tayewɔ djonga ya nkakitɔna la wɔ.​—Kɔl. 3:13, 14. w19.07 11-12 od. 14-16

Mbala efula, anto mbetawɔka losango laso aha l’ɔtɛ wa kɛnɛ kataso, koko l’ɔtɛ wa woho wakitaso. Vɔ ngɛnangɛnaka etena kongaso ɔlɔlɔ, la ɔkɔmi ndo kayashaso l’otema ɔtɔi le wɔ. Hatowatshutshuya la wolo dia tohokamɛ. Koko, sho salaka la wolo dia mbeya tokanyi tele la wɔ lo dikambo di’ɔtɛmwɛlɔ ndo mbidja yimba lo nsaki yawɔ. Ɛnyɛlɔ, etena kakandasawolaka l’ase Juda, Pɔɔlɔ akakanaka la wɔ yimba oma l’Afundelo. Koko, etena kakandasawolaka l’ambeyi wa filozofi w’ase Ngirika la Areopango, nde kokamba la Bible mbala kakɔ ɔtɔi. (Ets. 17:2, 3, 22-31) Ngande wakokaso mbokoya ɛnyɛlɔ ka Pɔɔlɔ? Naka wɛ ambohomana l’onto lahetawɔ Bible, kete hatoleka dimɛna nkamba la tɔ mbala kakɔ ɔtɔi etena kakanayɛ la nde yimba. Naka wɛ amboshihodia di’onto ɔmɔ hangɛnangɛna di’anto mbɛna adia Bible kaamɛ la yɛ, kete sala la wolo dia mbɛnya Afundelo lo yoho yahatokoka anto mɛna, ɛnyɛlɔ lo telefɔnɛ, tablɛtɛ kana ɔrdinatɛrɛ. w19.07 21 od. 5-6

Satana akahembe ase Isariyɛlɛ la mayɛlɛ tshɛ dia vɔ ntɛmɔla dikishi lo nkamba la woho wakiwɔ l’ohomba wa mbo ya ndɛ dia mbakonya dia vɔ nsala lolango lande. Etena kakɔtɔ ase Isariyɛlɛ lo Nkɛtɛ ya Daka vɔ wakahombe ntshikitanya toho takakambaka la wɔ dia monɛ diononɛ. Etena kakiwɔ l’Edjibito, ase Isariyɛlɛ wakakambaka l’ashi w’oma lo ɔkɛdi wa Nilɛ dia mbitɛ lo dikambɔ diawɔ. Koko, dikambɔ dia lo Nkɛtɛ ya Daka diakalɔyamaka aha l’ɔkɛdi wa woke, koko la mvula ndo la lɔpɔpɔ latɔlɔyaka diononɛ. (Eoh. 11:10-15; Isa. 18:4, 5) Diakɔ diele ase Isariyɛlɛ wakahombe mbeka toho tokina ta nkamba dikambɔ. Lande na kakahɛmɔla Jehowa diaha ntɛmɔla tozambizambi ta kashi etena kele nde akawatɛka dia mbeka toho tokina ta nkamba dikambɔ? Jehowa akeyaka dia ase Isariyɛlɛ wayohembama dia mbeka oma le apanganu wakaadinge toho ta nkamba dikambɔ takakambaka lawɔ ndo ɔnɛ tokanyi t’akambi wa dikambɔ w’ase Kanana asɔ takasɛngiyamaka la dietawɔ dia Baala.​—Wal. 25:3, 5; Emb. 2:13; 1 Ku. 18:18. w19.06 3 od. 4-6

Etena kakakome ɔpɔstɔlɔ Pɔɔlɔ, Silasɛ, Luka ndo Timɔte la Filipɛ, osomba wakalɔmbɔmaka oma le ase Rɔmɔ, vɔ wakatane anto efula wakayashaka lo losango la Diolelo. Anangɛso anɛi waki l’ohetoheto asɔ wakasha lonya dia etshumanelo kengama ndo ambeki tshɛ wakatatɛ nsangana kaamɛ, ondo lo luudu la Ludiya ombetawudi ɔmɔtshi wakalongɔnaka dimɛna. (Ets. 16:40) Kombeta edja, etshumanelo k’oyoyo kɛsɔ kakahomana l’okakatanu ɔmɔtshi. Satana akatshutshuya atunyi w’akambo wa mɛtɛ dia ndɔshana l’olimu w’esambishelo wakasalaka Akristo wa kɔlamelo asɔ. Wakande Pɔɔlɔ la Silasɛ, wakaakɔmɔla eshingɔ ndo wakawadje lo lokanu. L’ɔkɔngɔ wa vɔ mbatondja oma lo lokanu, vɔ wakembola ambeki w’eyoyo asɔ ndo wakaakeketsha. Oma laasɔ, Pɔɔlɔ, Silasɛ ndo Timɔte wakakalola koko ondo Luka akatshikala lɛkɔ. Kakɔna kakahombe anangɛso l’akadiyɛso w’eyoyo asɔ nsala? L’ekimanyielo ka nyuma ka Jehowa, ambetawudi w’eyoyo asɔ wakatetemala kambɛ Jehowa l’ohetoheto. (Flpɛ. 2:12) Pɔɔlɔ aki l’ɔkɔkɔ w’oshika wa monga l’ofunu lo dikambo diawɔ! w19.08 8 od. 1-2

Onde wɛ akonɔ atete edja? Wonwelo koka nɔmba falanga efula ndo nkonya onto esadi eto l’abasa. Dia nkitshakitsha abasa, ewɔ mbɔsa abasa wa diangɔ dieyɛ mɛtɛ bu l’ohomba. (Tok. 22:3) Etena keso l’okakatanu ɔmɔtshi, ɛnyɛlɔ nkokɛ wakiso wa ngandji wele la hemɔ, sho koka monga l’okakatanu dia mbeya yɛdikɔ ya falanga ya nsɔmba. Lo tena dia ngasɔ, ohɔ dia “dɔmbɛlɔ la ɛsɛngɔsɛngɔ” koka kokimanyiya dia mbɔsa tɛdikɔ t’amɛna. Jehowa koka nkadimola alɔmbɛlɔ ayɛ lo kosha wɔladi ‘wayolama otema ayɛ la yimba yayɛ’ wayokokimanyiya dia mbeya kɛnɛ koleki dimɛna nsala. (Flpɛ. 4:6, 7; 1 Pe. 5:7) Onga la diɔtɔnganelo dia dimɛna l’anto akina. Tɛ angɛnyi ayɛ w’eshika woho wayaokayɛ ndo ekakatanu wele layɛ, djekoleko wanɛ wakahomana l’ekakatanu wa woho akɔ. Nsala ngasɔ koka kokimanyiya dia ndjaoka dimɛna. (Ond. 4:9, 10) Angɛnyi waki la yɛ ntondo ka wɛ monɔ wayotetemala monga angɛnyi ayɛ. w19.08 22 od. 9-10

Lande na kakɔtɔnganyiya Jehowa ta dia woke dia lushi l’ekomelo la Mengido? Mengido la Okidi wa Jezɛrɛlɛ waki suke la wɔ mbaki ahole wakalɔmaka ata efula. Lo waaso amɔ, Jehowa akekɛka lonya mbala kakɔ ɔtɔi lo ata asɔ. Ɛnyɛlɔ, “l’omamu w’ashi wa Mengido,” Nzambi akakimanyiya shushi ya l’Isariyɛlɛ Baraka dia nɛndja asɔlayi amɔtshi w’ase Kanana wakalɔmbɔmaka oma le Sisɛra. Baraka nde la omvutshi Dɛbɔra wakasha Jehowa losaka l’ɔtɛ wakawalɛndja lo yoho ya dihindo. Vɔ wakembe ɔnɛ: “Tɔɔtɔ takalɔsha oma l’olongo . . . Sisɛra . . . Ɔnkɔnɛ, Jehowa le, atunyi ayɛ tshɛ walanyeme, koko wanɛ wakolanga wayale oko wonya lam’ahotɔwɔ la lotombo lawɔ.” (Emb. 5:19-21, 31) Woho akɔ waamɛ mbele, lo Aramangɛdɔna atunyi wa Nzambi wayolanyema, koko anto woka Nzambi ngandji wayoshimbamɛ. Koko otshikitanu wa woke wayoyala lam’asa ata ahende asɔ. Lo Aramangɛdɔna, ekambi wa Nzambi hawotɔlɔ ta. Vɔ hawotoyala kaanga la dihomɔ dia ta! “Wolo a[wɔ] wayonga lo ntshikala ki ndo lo mɛnya wɛkamu” awɔ le Jehowa ndo le alembe ande wa l’olongo.​—Isa. 30:15; Ɛny. 19:11-15. w19.09 9 od. 4-5

Yoho mɔtshi yakokaso ‘ndja le’ Yeso ele lo mbeka awui wakandate ndo wakandasale lo ndjela akoka aso. (Luka 1:1-4) Ndooko onto okina lakoka tosalɛ dui sɔ, sho la dia mbeka ɛkɔndɔ ɛsɔ dikambo diaso shoamɛ. Sho ‘ndjaka nto le’ Yeso lo mbɔsa yɛdikɔ ya batizama ndo monga ombeki wa Kristo. Yoho kina yakokaso ‘ndja le’ Yeso ele ntshɔ le dikumanyi dia l’etshumanelo etena keso l’ohomba w’ekimanyielo. Yeso kambaka la “apami wele oko weshasha” asɔ dia nkokɛ ɛkɔkɔ ande. (Ɛf. 4:7, 8, 11; Jni. 21:16; 1 Pe. 5:1-3) Sho la dia ntakola nna dia ntondo dia nɔmba ekimanyielo kawɔ. Hatokoke nongamɛ ɔnɛ dikumanyi wayeya kɛnɛ kakanyiyaso ndo wayeya kɛnɛ keso l’ohomba. Tɔsɛdingole kɛnɛ kata ɔnangɛso Julian: “Lakayɔlɔmba ekimanyielo ndo wembwelo awɔ akonge woshasha woleki dimɛna efula le mi.” Dikumanyi diele la kɔlamelo, ɛnyɛlɔ pende diakatshu dia tembola Julian, koka tokimanyiya dia mbeya “yimba ya Kristo,” mbuta ate nshihodia ndo mbokoya ekanelo kande ka yimba ndo lɔkɛwɔ lande. (1 Kɔr. 2:16; 1 Pe. 2:21) Ɔsɔ mbele mɛtɛ woshasha woleki dimɛna wakokawɔ tosha. w19.09 21 od. 4-5

Lo Afundelo, sho mbadiaka dikambo dia apami la wamato waki la mbetawɔ wakalɔmbwama la nyuma k’ekila, koko vɔ bu l’atei w’anto 144 000. Joani Obatizanyi ekɔ ɛnyɛlɔ kɛmɔ. (Mat. 11:11) Davidɛ ekɔ ɛnyɛlɔ kekina. (Ets. 2:34) Vɔ ndo anto akina waheyama mbadia wayolɔ dia ndjɔsɛna lo paradiso ka la nkɛtɛ. Vɔ tshɛ, kaamɛ ndo olui a woke w’anto wayokondja diaaso dia mɛnya kɔlamelo yawɔ le Jehowa ndo lowandji lande. Ndooko lushi lakatshumanya Nzambi miliyɔ y’anto oma lo wedja tshɛ oko wambodiosalema nshi nyɛ. Oyadi tekɔ l’elongamelo ka tɔsɛna l’olongo kana la nkɛtɛ, sho la dia nkimanyiya anto efula dia vɔ monga l’atei w’olui a woke w’anto wele “ɛkɔkɔ ekina.” Keema edja, Jehowa ayanga mbela mfɔnu ka woke kakatama dia ndanya mandji y’ana w’anto ndo ɛtɛmwɛlɔ wambosoya anto efula. Ande diɛsɛ dia woke diele la ntondo k’anto tshɛ wele lo olui a woke w’anto dia kambɛ Jehowa pondjo pondjo la nkɛtɛ lee!​—Ɛny. 7:14. w19.09 31 od. 18-19

Oko watasukana dikongɛ dia Satana nɛ otsha l’ekomelo kadiɔ, sho koka nongamɛ dia mpomana l’ehemba woleki wolo wendana la kɔlamelo yaso le Nzambi ndo Diolelo diande. Ondo anto wayotetemala tɔsɔka. Ondo dui sɔ diayosalema djekoleko etena kayoleka lomangemange laso mbɔtɔ l’ohemba. Sho la dia nkeketsha kɔlamelo yaso kakianɛ dia sho ndjotshikala la kɔlamelo lo mfɔnu ka woke. Lo mfɔnu ka woke, otshikitanu ɔmɔ wayosalema lo dikambo di’anangɛso walɔmbɔla la nkɛtɛ. Lo etena kɛmɔ, akitami tshɛ weke la nkɛtɛ wayotshumana l’olongo dia tosha lonya lo ta dia Aramangɛdɔna. (Mat. 24:31; Ɛny. 2:26, 27) Dui sɔ nembetshiyaka dia Olui-walɔmbɔla hatoyala nto kaamɛ la so la nkɛtɛ. Koko, olui a woke w’anto wayotetemala kongɛma. Anangɛso wakotsha kɛnɛ kalɔmbama wele l’atei w’ɛkɔkɔ ekina wayɔlɔmbɔla. Ayonga ohomba dia sho monga la kɔlamelo lo nsukɛ anangɛso asɔ ndo lo ndjela ɛlɔmbwɛlɔ k’oma le Nzambi kayowotoshaka. Panda kaso kayolemanɛ la dui sɔ! w19.10 17 od. 13-14

Naɔmi aki womoto laki la kɔlamelo lakalangaka Jehowa. Koko l’ɔkɔngɔ w’omɛnde ndo anande ahende mvɔ, nde akalange ntshikitanya lokombo lande la Naɔmi otsha lo “Mara,” mbuta ate “ololo.” (Ruta 1:3, 5, 20, nɔtɛ, 21) Ruta laki okilo wa Naɔmi akatshikala kaamɛ la nde edja tshɛ kakinde l’ehemba. Ruta akasha Naɔmi aha tsho ekimanyielo kahombama, koko akakambe ndo l’ɛtɛkɛta w’esambelo. Ruta akɛnya Naɔmi ngandji ndo akoosukɛ lo nkamba l’ɛtɛkɛta w’oma k’ɛse otema. Etena kavusha ose nkumbo kaso ka lo nyuma olonganyi ande, nde ekɔ l’ohomba w’osukɔ aso. Wadi l’omi koka mbɛdikama la esongo ehende watoole suke suke. L’edja k’ɛnɔnyi, edio w’esongo akɔ mbeketanaka. Etena kakundɔ osongo ɔmɔ l’atei awɔ kana kavɔwɔ, osongo okina koka sɛngiyama efula. Woho akɔ waamɛ mbele, etena kavusha onto ɔmɔ olonganyi ande, nde koka monga la lɔkɔnyɔ l’efula edja efula. w19.06 23 od. 12-13

Sho la dia sɔnaka aha tsho weho wa tɔkɛnyɔ koko ndo yɛdikɔ ya wenya wetshaso lɔkɔ. Naka hatosadi ngasɔ, kete sho koka mbetsha wenya efula lo tɔkɛnyɔ oleki wenya wakambɛso Jehowa. Ntondotondo eya lofulo la wenya l’etshayɛ l’etena kɛsɔ lo kɛnyɔ yakɔ. Onde wɛ hakoke mfunda yɛdikɔ ya wenya wetshayɛ lo lomingu? Funda lo alamanaka ayɛ wenya engana wetshayɛ lo menda televiziɔ, mbɔtɔ l’Ɛtɛrnɛtɛ ndo nkɛnya tɔkɛnyɔ lo tablɛtɛ, l’ɔrdinatɛrɛ kana lo telefɔnɛ kayɛ. Naka wɛ mɛnaka dia wɛ mbetshaka wenya amboleka, kete nsala ekongelo. Kongɛ dia nsala akambo woleki ohomba ntondo, ndo etena ka tɔkɛnyɔ l’ɔkɔngɔ. Oma laasɔ, lɔmba Jehowa dia kokimanyiya dia nɛmiya ekongelo kayɛ. Lo nsala ngasɔ, wɛ ayokondja etena ndo wolo weyɛ l’ohomba dia salaka wekelo wa Bible w’onto ndamɛ, ɔtɛmwɛlɔ wa lo nkumbo, mbɔtɔka nsanganya ya l’etshumanelo, ndo kambɛ Jehowa lo nsambisha ndo mbetɛ anto ambeki. Ndo nto, wɛ ayoleka ngɛnangɛna etena ketshayɛ lo tɔkɛnyɔ nɛ dia wɛ ekɔ lo mbetsha Jehowa lo dihole dia ntondo. w19.10 30 od. 14, 16; 31 od. 17

Oya lo 55 T.D., ase Kɔrɛtɔ wakɔshi yɛdikɔ y’ohomba efula. Vɔ wakeye ɔnɛ anangɛwɔ wa la Jɛrusalɛma ndo wa la Judeya waki lo dihombo, ko vɔ wakɔshi yɛdikɔ ya nkimɔ weshasha dia mbakimanyiya. (1 Kɔr. 16:1; 2 Kɔr. 8:6) Koko ngɔndɔ ngana l’ɔkɔngɔ, ɔpɔstɔlɔ Pɔɔlɔ akoke dia ase Kɔrɛtɔ kokotsha yɛdikɔ yakawɔshi. Etombelo wakonge ele, ondo weshasha awɔ komonga suke etena kakawahombe tomama la Jɛrusalɛma kaamɛ la weshasha wakakimɔ tshumanelo dikina. (2 Kɔr. 9:4, 5) Ase Kɔrɛtɔ wakɔshi yɛdikɔ ya dimɛna, ndo Pɔɔlɔ akawawandola l’ɔtɛ wa mbetawɔ kawɔ ka wolo ndo nsaki k’efula kaki lawɔ ka monga anto wele la lokaho. Koko nde akahombe nto mbakeketsha dia nshidiya kɛnɛ kakawatatɛ nsala. (2 Kɔr. 8:7, 10, 11) Kɛnɛ kakaakomɛ kɛsɔ tetshaka ɔnɛ oyadi Akristo wele la kɔlamelo koka monga l’okakatanu wa nkotsha yɛdikɔ mɔtshi y’ɔlɔlɔ. Lande na? L’ɔtɛ weso bu kokele, sho koka tsho ntaloya akambo. Kana awui wa shashimoya koka nsala ko aya wolo dia sho nkotsha yɛdikɔ yakatɔshi.​—Ond. 9:11. w19.11 26-27 od. 3-5

Oko wakokɛ engawo ka woke etenyi ka woke ka demba, mbetawɔ kayɛ kokokɛka oma l’awui wa mindo, wa ngala ndo oma lo tɔsɛngiya ta kɔlɔ ta dikongɛ di’akambo dia kɔlɔ nɛ. Oko weso Akristo, tekɔ lo ndɔ ta dia lo nyuma ndo l’atei w’atunyi aso mbele ndo nyuma ya kɔlɔ. (Ɛf. 6:10-12) Ngande wakokayɛ ndjashikikɛ dia wɛ ekɔ suke dia ntokomɛ ehemba? Dui dia ntondo ele, wɛ pombaka nɔmba Nzambi ekimanyielo. Oma laasɔ, wɛ la dia nkamba l’Ɔtɛkɛta wa Nzambi dia kokimanyiya dia ndjaɛna wɛmɛ woho wakɛna Nzambi. (Hɛb. 4:12) Bible mbutaka ɔnɛ: “Yaɛkɛ le Jehowa la otema ayɛ tshɛ, tɛkamake yimba yayɛ hita.” (Tok. 3:5, 6) Lo ndjela avɛsa asɔ, onde wɛ hakoke nyomɔsɛdingola tɛdikɔ tɔmɔ takayɔshi atete edja? Ɛnyɛlɔ, onde wɛ ekɔ lo diɛnɛ l’okakatanu ɔmɔ wa wolo wendana l’ekondjelo? Onde wɛ akakane yimba la daka dia Jehowa diele lo Hɛbɛru 13:5 diata ɔnɛ: “Dimi hakotshikaki ndo hakokalɛki pondjo”? Onde daka sɔ diakakosha eshikikelo ɔnɛ Jehowa ayokokimanyiya? Naka ngasɔ, kete dui sɔ mɛnyaka dia wɛ ekɔ lo nsala dia engawo kayɛ ka mbetawɔ tshikalaka dimɛna. w19.11 14 od. 1, 4

Ombutshi tshɛ la dia mbetsha wenya ndo nkamba la wolo ande lo dikambo di’ɔna. Diakɔ diele, naka atshukanyi mbota ana efula ma ma, kete vɔ koka monga l’okakatanu dia mbidja ɔna tshɛ yimba lo yoho yahombama. Atshukanyi amɔ wele l’ana efula wa tokusela wakate dia vɔ wakayaoke dia wambɔkɔmɔ. Ombutshi wa womoto koka mongaka la ɔlɛmbɛlɔ wonya tshɛ lo demba ndo lo yimba. Nde koka monga l’ɔlɛmbɛlɔ w’efula polo ndo lo monga ko nde aya bu la wolo wa mbeka, nɔmba kana nsambisha mbala la mbala. Ndo nto, nde koka monga l’okakatanu wa mbidja yimba lo nsanganya y’Akristo ndo nkondja wahɔ oma lɔkɔ. Lo mɛtɛ, omi lele la ngandji ayosala tshɛ dia nsukɛ wadɛnde etena konga ohomba dia mbidja ana yimba, oyadi lo nsanganya kana la ngelo. Ɛnyɛlɔ, nde koka nkimanyiya wadɛnde la elimu wa la ngelo. Nde la dia nsala la wolo dia ndjashikikɛ di’ase nkumbo tshɛ wekɔ lo nkondja wahɔ oma l’ekongelo k’Ɔtɛmwɛlɔ wa lo nkumbo kasalema mbala la mbala. Ndo ombutshi wa pami w’Okristo la dia tombaka la nkumbo kande mbala la mbala l’esambishelo. w19.12 24 od. 8

Ngande wakakondjaka ase Isariyɛlɛ wahɔ oma lo Jibile? Tɔshi di’ose Isariyɛlɛ ɔmɔ akakama abasa efula ndo l’ɔtɛ wa dikambo sɔ, nde akatshutshuyama dia nsondja ɛtshi kande ka nkɛtɛ dia mfuta abasa akɔ. Lo ɔnɔnyi wa Jibile, wakahombaka mbokaloya ɛtshi ka nkɛtɛ kɛsɔ. Ɔnkɔnɛ, onto akɔ akakokaka ‘nkalola l’ɛtshi kande ka nkɛtɛ,’ ndo l’ɔkɔngɔ diko anande wakahombaka ndjokita ɛtshi kakɔ ka nkɛtɛ. Lo wedi okina, onto laki lo tena dia paa akakokaka nsondja ɔnande ɔmɔ kana ndjasondja ndamɛ lo lɔhɔmbɔ l’oyango wa mfuta abasa. Lo ɔnɔnyi wa Jibile, mfumbe akahombaka ‘nkalola lo nkumbo kande.’ (Lɛw. 25:10) Ɔnkɔnɛ, ndooko onto lakahombaka monga mfumbe pondjo pondjo aha la elongamelo ka ntshungɔ! Laadiko dia laasɔ Jehowa akate ate: “Ndooko onto l’atei anyu layonga ose wola, nɛ dia lo mɛtɛ Jehowa ayonyɔtshɔkɔla lo wodja wayanga nyosha Jehowa Nzambi kanyu oko etenyi k’okitɔ.” (Eoh. 15:4) Dui sɔ ntshikitana efula la kɛnɛ kasalema l’andja wa nshi nyɛ wele mbala efula akanga w’ɛngɔnyi talekaka ngɔna tsho ndo akanga wa wola talekaka monga wola! w19.12 8-9 od. 3-4

Etena kakinde la ntondo k’ehemba, Yeso akalɔmbaka “la ekoko wa wolo ndo la asɔyi lo washo.” (Hɛb. 5:7) Alɔmbɛlɔ ande wa l’otema ɔtɔi wakɛnyaka dia nde aki la kɔlamelo le Jehowa ndo wakakeketsha yɛdikɔ yande ya ndeka monga l’okitanyiya. Le Jehowa, alɔmbɛlɔ wa Yeso waki oko opumu wa dimɛna wa tshɔ. Lɔsɛnɔ la Yeso l’otondo lakangɛnyangɛnya She efula ndo lakayindja lowandji Lande. Sho koka mbokoya Yeso lo nsala kɛnɛ tshɛ kakokaso nsala dia nkitanyiya ndo monga la kɔlamelo le Jehowa. Etena keso la ntondo k’ehemba, tɔlɔmbake l’etete dia nkondja ekimanyielo ka Jehowa nɛ dia sho nangaka mbɔngɛnyangɛnya. Sho mbeyaka dia Jehowa heetawɔ alɔmbɛlɔ aso naka tekɔ lo nsala awui wahetshande. Koko, naka sho nsɛna lo yoho yɔtɔnɛ l’atɔndɔ wa Jehowa, kete sho koka monga l’eshikikelo ɔnɛ alɔmbɛlɔ aso w’oma k’ɛse otema wayoyala oko opumu wa tshɔ wa dimɛna le Jehowa. Ndo sho koka monga l’eshikikelo ɔnɛ olowanyi ndo okitanyiya aso wa la kɔlamelo ngɛnyangɛnyaka Shɛso lele l’olongo. w19.11 21-22 od. 7-8

Lo 1919, Yeso akasɔnɛ djui ya tshitshɛ y’anango w’akitami oko “ɔhɔmbɔ wa kɔlamelo ndo kɛsɔ.” Ɔhɔmbɔ ɔsɔ ekɔ lo nɔmbɔla olimu w’esambishelo ndo mbishaka ambeki wa Kristo “mbo ya ndɛ . . . lo etena kahombama.” Satana la andja ande wambosala awui efula dia nshimba olimu wakamba ɔhɔmbɔ wa kɔlamelo ɔsɔ, otondongaka Jehowa hakimanyiya ɔhɔmbɔ ɔsɔ, tshike olimu ɔsɔ hawokoke kambema. Kaanga mbakalɔma ata ahende wa l’andja w’otondo, ɛhɛnyɔhɛnyɔ waha pe, ekakatanu wa l’andja w’otondo wendana l’ekondjelo ndo mbaasalɛwɔ akambo waha la losembwe, ɔhɔmbɔ wa kɔlamelo ndo kɛsɔ ekɔ lo ntetemala mbisha ambeki wa Kristo wa la nkɛtɛ mbo ya ndɛ ya lo nyuma. Ohokanyiya woho wakondjaso mbo ya ndɛ ya lo nyuma efula ɛlɔ kɛnɛ ofele, lo ɛtɛkɛta ndekana 900! Ɔsɔ ekɔ djembetelo ya mamba yɛnya dia Nzambi ekɔ lo nsukɛ ɔhɔmbɔ. Tɔsɛdingole djembetelo kina yɛnya dia Jehowa ekɔ lo ntshɔkɔla: olimu w’esambishelo. Lo mɛtɛ, lokumu l’ɔlɔlɔ lekɔ lo sambishama “lo nkɛtɛ k’otondo.”​—Mat. 24:14. w19.11 24 od. 15-16

Ɔnɔnyi tshɛ lo Lushi l’Ekombelo ka pɛkato, ɔlɔmbɛdi a laadiko akahombaka ntshumba tshɔ ntondo ka nde nambola elambo. Lo nsala ngasɔ, nde akayashikikɛka dia nde aketawɔmaka le Nzambi etena kakandalambolaka elambo. Etena kakinde la nkɛtɛ, Yeso akahombe nsala dui dimɔ di’ohomba, dui diakaleke mbisha anto panda ohomba ntondo ka nde nkimɔ lɔsɛnɔ lande oko olambo. Dui diakɔna sɔ? Lo monga l’olowanyi ndo la kɔlamelo lɔsɛnɔ lande l’otondo, Yeso akalɔngɔsɔla woho wa Jehowa ndjetawɔ olambo ande. Lo nsala ngasɔ, Yeso akɛnya ɔnɛ nsala akambo lo yoho yalanga Jehowa mbele yoho ya lɔsɛnɔ ya dimɛna. Yeso akayindja lowandji la She kana yoho yande ya nɔmbɔla. L’edja tshɛ ka lɔsɛnɔ lande la nkɛtɛ, Yeso akakitanyiya atɔndɔ wa Jehowa wosembwe lo yoho ya kokele. Oyadi ehemba kana asui, ndooko dui diakakoke nkitshakitsha nsaki kande ka mamɛ yoho ya nɔmbɔla ya She.​—Flpɛ. 2:8. w19.11 21 od. 6-7

L’edja kakasambishaka Yeso, apɔstɔlɔ wa kɔlamelo wakonge angɛnyi wa mɛtɛ le Yeso. (Tok. 18:24) Yeso akɔsaka angɛnyi asɔ la nɛmɔ. L’edja k’olimu ande, ndooko ɔnango la lo demba lakonge la mbetawɔ le nde. (Jni. 7:3-5) L’etena kɛmɔ, ewotɔ ande wakakome polo lo mfɔnya ɔnɛ nde ambodjɔ dadi. (Makɔ 3:21) Otshikitanyi la wɔ, Yeso akatɛ apɔstɔlɔ ande wa kɔlamelo ɛtɛkɛta wele lo divɛsa di’ɛlɔ l’otsho wa la ntondo ka nde mvɔ. Lo waaso amɔtshi apɔstɔlɔ wakanyangiya Yeso, koko nde kombidja yimba lo munga yawɔ ndo akɛnyi dia vɔ waki la mbetawɔ le nde. (Mat. 26:40; Makɔ 10:13, 14; Jni. 6:66-69) L’otsho w’ekomelo wakinde kaamɛ la wɔ ntondo ka nde ndjakema, Yeso akatɛ apami wa kɔlamelo asɔ ate: “Dimi lambonyelɛ angɛnyi, nɛ dia akambo tshɛ wakamoke le Papa, dimi lambonyewoyawɔ.” (Jni. 15:15) Aha la taamu, angɛnyi wa Yeso waki kiɔkɔ y’ekeketshelo k’efula le nde. w19.04 11 od. 11-12

Ngande weya onto dia nde ambolongola leeta la ntshɔ l’olongo? Sho tanaka okadimwelo wa hwe l’ɛtɛkɛta wa Pɔɔlɔ wakandafundɛ ase Rɔmɔ ‘wakelamɛ ekilami.’ Laadiko dia ɛtɛkɛta wele lo divɛsa di’ɛlɔ, nde akawatɛ ate: “Nyu konongola nyuma ka lɔhɔmbɔ kanyosha wɔma nto, koko nyakalongola nyuma kanyetɛ ana. L’ekimanyielo ka nyuma kakɔ mbataso la dui dia wolo shate: ‘Aba, Papa!’” (Rɔmɔ 1:7; 8:15) Ɔnkɔnɛ, lo tshimbo ya nyuma k’ekila, Nzambi salaka di’akitami mɛna hwe ɔnɛ vɔ wambolongola leeta l’otsha l’olongo. (1 Tɛs. 2:12) Jehowa salaka dia minya taamu lo timba ndo l’etema wa wanɛ walongola leeta la ntshɔ l’olongo. (1 Jni. 2:20, 27) Akristo w’akitami bu l’ohomba w’onto ɔmɔ mbashikikɛ ɔnɛ vɔ wekɔ akitami. w20.01 22 od. 7-8

“Ɔlɛmbɛ wa Kristo” mpikama l’etshina koleki dimɛna, mbuta ate ngandji. (Ngal. 6:2) Yeso akatshutshuyamaka la ngandji lo kɛnɛ tshɛ kakandasalaka. Kɛtshi kana kandji ekɔ tolembetelo ta ngandji. Yeso akasɛngiyama la kɛtshi dia mbetsha elui w’anto, nkɔnɔla ase hemɔ, mbalesha ndo mbolola wanɛ wakavu. (Mat. 14:14; 15:32-38; Makɔ 6:34; Luka 7:11-15) Yeso aketsha ehomba w’anto akina la ntondo ka wande. Kɛnɛ koleki tshɛ ele, nde akɛnya ngandji k’efula lo nkimɔ lɔsɛnɔ lande lo dikambo di’anto akina. Sho koka mbokoya Yeso lo mbetsha ehomba w’anto akina la ntondo ka waso. Sho koka nto mbookoya lo mboka anto wa l’ɛtshi kaso ka nkɛtɛ kɛtshi k’efula. Etena katshutshuyamaso la kɛtshi ka ngasɔ dia mbetsha ndo nsambisha lokumu l’ɔlɔlɔ, tekɔ lo nkitanyiya ɔlɛmbɛ wa Kristo. w19.05 4 od. 8-10

Yeso akakimanyiya anto dia ntshungɔ oma lo wetshelo wa kɔlɔ w’ewandji w’ɛtɛmwɛlɔ. Ase Juda efula wa lo nshi yakɔ waki mfumbe ya mbekelo y’ashidi ndo ya waetawɔ wa kashi. (Mat. 5:31-37; 15:1-11) Wanɛ wakataka dia wakakimanyiyaka anto dia kambɛ Nzambi vɔamɛ kokambɛka Nzambi lo yoho ya dimɛna, vɔ waki oko totshungu. Lo ntona Mɛsiya ndo wetshelo wakandetshaka, vɔ wakatshikala lo wodjima ndo lo pɛkato. (Jni. 9:1, 14-16, 35-41) Diɛsɛ la wetshelo ndo la ɛnyɛlɔ kande ka dimɛna, Yeso akɛnya akanga w’okitshakitsha woho wakokawɔ ntshungɔ oma lo wetshelo wa kashi. (Makɔ 1:22; 2:23–3:5) Ndo nto, Yeso akasale di’anto ntshungɔ oma lo lɔhɔmbɔ la pɛkato lakatahowɔ. Diɛsɛ l’olambo wa Yeso, Nzambi koka dimanyiya pɛkato y’anto wɛnya mbetawɔ ndo wetawɔ oshinga w’etshungwelo wakandakimɔ.​—Hɛb. 10:12-18. w19.12 10 od. 8; 11 od. 10-11

Jehowa kambaka la nyuma kande dia mɛnya Akristo asɔ hwe ɔnɛ vɔ wambɔsɔnama. Lo nsala ngasɔ, nyuma k’ekila kekɔ “ɔkɔlɛ [ɛngɔ ka lotshungɛ kana daka]” diawashikikɛ ɔnɛ lo nshi yayaye vɔ wayɔsɛna pondjo pondjo l’olongo, koko aha la nkɛtɛ. (2 Kɔr. 1:21, 22) Naka Okristo ekɔ okitami, kete laasɔ weho akɔ tshɛ nde ayolongola difuto diande dia l’olongo? Ndooko. Nde ekɔ l’eshikikelo dia nde akasɔnama dia ntshɔ l’olongo. Koko, nde pombaka mbohɔ ɔhɛmwɛlɔ ɔnɛ: “Analengo le, nyoleke mbidja etete k’efula dia nkukutɛ diɛsɛ diele la nyu dia mbelamɛ ndo sɔnama, nɛ dia naka nyu ntetemala nsala akambo asɔ, kete hanyɔkɔki pondjo.” (2 Pe. 1:10) Diakɔ diele, kaanga naka Okristo w’okitami akelamɛ dia ntshɔ l’olongo, nde ayolongola difuto diande paka naka nde ntshikala la kɔlamelo.​—Flpɛ. 3:12-14; Hɛb. 3:1; Ɛny. 2:10. w20.01 21-22 od. 5-6

Ɔkɔkɔ ɔmɔ wakakonya asambi asato wa kashi wa Jɔbɔ diaha mbooka kɛtshi ele, vɔ koshihodiaka mɛtɛ woho waki okakatanu ande. Etombelo waki la dui sɔ ele, vɔ wakasha tokanyi ta kɔlɔ ndo wakasalɛ Jɔbɔ akambo aha la kɛtshi. Akokaso nsala dia mbewɔ nsala munga ka ngasɔ? Teye dia paka Jehowa oto mbeeya awui tshɛ wendana la okakatanu wele l’onto. Hokamɛ la yambalo tshɛ kɛnɛ kakotɛ onto lele la paa. Sala akambo efula lo dihole dia mpokamɛ tsho kɛnɛ katande ndo nsala la wolo nto dia nshihodia paa kele la nde. Paka lo nsala ngasɔ mbakokayɛ mɛnya dia wɛ mbokaka ɔnanyɔ kana kadiyɛyɛ kɛtshi ka mɛtɛ. Kɛtshi kayotoshimba diaha nsanya awui wa kɔlɔ lo kɛnɛ kendana l’ekakatanu wele l’anto akina. Kanga lɔtɛndɔ hakeketsha etshumanelo, koko nde mbidjaka diatɔnelo. (Tok. 20:19; Rɔmɔ 14:19) Nde koka mpomuya onto lele la paa. (Ɛf. 4:31, 32) Ayoleka dimɛna sho mbika washo lo waonga w’amɛna wele l’onto ndo nkanyiya woho wakokaso mbokimanyiya dia ndɔshana l’ehemba. w19.06 21-22 od. 8-9