Naa ohomba wele la pudipudi?

PUDIPUDI nembetshiyamaka lo toho totshikitanyi oma le anto efula. Ɛnyɛlɔ etena katɛ ombutshi wa womoto ɔnande dia nde sola anya la elongi kande, ɔna mbeyaka fɔnya dia nde ekɔ lo mbotɛ tsho dia tambiya anya l’ashi kana sola ɛlɔmɔ tsho kete ambokoka. Koko Mama salaka akambo efula oleki lâsɔ. Nde mbɔsaka ɔna ko tatɛ mbosola anya l’elongi dimɛna la savɔ, oyadi kânga ɔna kotonaka la wolo tshɛ!

Lo mɛtɛ, ɛlɛmbɛ wendana la pudipudi tshikitana lo dihole la dihole, ndo anto mbolaka la tokanyi totshikitanyi lo kɛnɛ kendana la pudipudi. Lo nshi y’edjedja, lo wedja efula, ahole wa kalasa wele pudipudi ndo tɔkɔmba wakakimanyiyaka ambeki dia monga la mbekelo y’ɔlɔlɔ yendana la pudipudi. Ɛlɔ kɛnɛ, ahole amɔtshi wa kalasa ndola la mindo ndo wɔsamaka oko ahole wakashawɔ mindo koko aha oko ahole wa tɔkɛnyɔ. Ko kayotota lo dikambo dia mvudu ya kalasa na? Darren, onami ɔmɔtshi wa soko wa kalasa kɛmɔtshi ka sekɔndɛrɛ ka l’Australie, akate ate: “Tôkoma polo ndo lo mɛna mindo l’etei ka kalasa.” Woshaka ambeki amɔtshi dilanya dia “tota” kana “mɔmba” mindo shɔ. Dikambo diele lanɛ ele embetsha ɛmɔtshi wɔsaka wɔmbɛlɔ wa kalasa oko dilanya dia vɔ mbisha ambeki.

Lo wedi okina, epalanga hawoleke mbisha ɛnyɛlɔ lo kɛnɛ kendana la pudipudi, oyadi lo lɔsɛnɔ lawɔ la lushi la lushi kana l’awui w’okanda. Ɛnyɛlɔ anto tshikaka mindo l’ahole efula watshumanawɔ ndo ahole akɔ mongaka paka nyɔmi keto. Izinɛ ɛmɔtshi wekɔ lo nanya ashi, hiɛlɛlɛ kana ahole wadjasɛ anto. Koko aha izinɛ mbalanya ashi, hiɛlɛlɛ kana ahole wadjasɛ anto koko anto. Kânga mbele l’andja w’otondo lokaki ekɔ kiɔkɔ yoleki woke y’olanyelo wa hiɛlɛlɛ, w’ashi kana w’ahole wadjasɛ anto, dikambo sɔ ndja nto oma lo mbekelo yele l’anto ya mbidjasɛ lo mindo. Owandji w’edjedja wa lo tshunda dielɛwɔ Commonwealth akasukɛ kanyi shɔ lam’akandate ate: “Lo tshena pe, dia kandola ekakatanu wendana la yonge y’anto tshɛ, pombaka onto l’onto mbisha lonya, oyadi pami, womoto, kana ɔna.”

Koko, amɔtshi fɔnyaka dia pudipudi ekɔ dikambo diendana l’onto ndamɛ ndo hadiohombe mendana l’onto okina. Onde mɛtɛ mbediɔ ngasɔ?

Pudipudi kekɔ ohomba efula djekoleko lo kɛnɛ kendana la diangɔ dia ndɛ, oyadi lo lobingu mbodisombiso, lo rɛstora kana laka ɔngɛnyi aso mbadilɛso. Nɔmbamaka dia wanɛ watoka kana watokitshɛ diangɔ dia ndɛ la mɛsa monga pudipudi k’efula. Naka anya awɔ kana waso wekɔ mindo, kete kɛsɔ mbeyaka monga kiɔkɔ ya wa hemɔ efula. Kayotota dikambo dia mpitadi, ahole walongamɛso dia monga pudipudi ndeka ahole akina tshɛ na? Jurunalɛ (The New England Journal of Medicine) yakate dia woho wahɔtsha adɔkɔtɛlɛ ndo ɛfɛlɛmɛ ɛmɔtshi anya, mbeyaka nembetshiya bonde kele ɛkɔnyi ɛmɔtshi mbɔsaka hemɔ mɔtshi yele l’ɔnɔnyi anto wekɔ lo shisha miliyara dikumi ya dɔlara di’ase Amɛrikɛ dia kɔnɔ. Sho nongamɛka dia ndoko onto layodja yonge yaso lo wâle l’ɔtɛ wende kema la mbekelo ka monga pudipudi.

Ndo nto, mongaka tshondo ya dikambo dia woke efula naka onto ambolanya ahole wombaso ashi l’okonda kana aha la kanyiya. Kema ekɔ wâle wa mamba le onto latakɛndakɛnda ekolo hwe lo ditshu l’ahole wakoka tanema sɛrɛngɛ yakakasha wanɛ waka didjoyadjoya lo demba kana anto akina? Ondo ekɔ ohomba efula di’onto l’onto ndjaoka wombola ɔnɛ: Onde ase nkumbo kaso wekɔ lo nɛnya ɛlɛmbɛ wendana la pudipudi?

Suellen Hoy akambola lo dibuku diande (Chasing Dirt) ate: “Onde tekɔ pudipudi oko wahombaso monga?” Nde akakadimola ate: “Ondo bu.” Nde ate, ɔkɔkɔ woleki ele anto wambonya yimba oma lo mbekelo kɛsɔ. Lam’ele anto hawoyoleka mbidjasɛ lawakawɔ, vɔ wofutaka tsho onto ɔmɔtshi dia mbadjɛka pudipudi l’ahole wadjasɛwɔ. Ɔnkɔnɛ, mbidja pudipudi l’ahole wadjasɛ anto aya bu nto dui dioleki ohomba le anto. Pami kɛmɔtshi akate ate: “Dimi hasale dia monga pudipudi di’anto mɛnami, koko dikambo diami dimamɛ. Oyadi kânga diangɔ dia luudu lami kongaka mindo, ka dimi lekɔ pudipudi.”

Koko pudipudi hendana tsho l’ɛnamelo ka lo washo. Tɔ mendanaka la yoho yaso ya lɔsɛnɔ l’otondo. Tɔ kekɔ nto dionga dia lo yimba ndo dia l’otema diendana l’ɛlɛmbɛ aso wa lɔkɛwɔ ndo l’ɔtɛmwɛlɔ aso. Nyɛsɔ tende bonde kele dikambo sɔ ngasɔ.