“Nyu tshe nyayuyala la ongenongeno”

“Kanyulamaki lushi la wuki le [Jehowa] . . . , ku nyu tshe nyayuyala la ongenongeno.”​—EUHWELU K’ELEMBE 16:15.

1. a) Akambo akɔna wakonyiya Satana? b) Kakɔna kakewoya Jehowa l’ɔkɔngɔ wa Adama la Eva tɔmbɔkɔ?

ETENA kakatshutshuya Satana Adama la Eva dia vɔ tɔmbɔkwɛ Otungi awɔ, nde akonyiya akambo ahende w’ohomba efula. Ntondotondo, nde akɛnya dia Jehowa ekɔ kanga kashi ndo halɔmbɔla dimɛna. Dui dia hende, Satana akɛnya di’anto kambɛka Nzambi paka l’ɔtɛ w’eyango awɔ wa lokaki. Dui dia hende sɔ diakayɛnamaka hwe lo nshi ya Jɔbɔ. (Etatelu 3:1-6; Jobo 1:9, 10; 2:4, 5) Koko, Jehowa akɔshi yɛdikɔ esadi eto dia kandola dikambo sɔ. Kânga etena kaki Adama la Eva weke l’ekambɔ k’Ɛdɛna, Jehowa akewoya woho wayondokandola akambo asɔ. Nde akewoya oyelo wa ‘kanula’ yele, l’ɔkɔngɔ wa nde numatama lo etshindji, ayoyominola Satana l’ɔtɛ.​—Etatelu 3:15.

2. Osase akɔna wakangamula Jehowa lo woho wakandahombe kotsha prɔfɛsiya kele lo Etatelu 3:15?

² Lam’akatetaka nshi, Jehowa akayashaka eokelo ka prɔfɛsiya kɛsɔ dia mɛnya mɛtɛ woho wayotokotshama. Ɛnyɛlɔ, Nzambi akatɛ Abarahama dia ‘kanula’ shɔ yakahombe tomba oma le anande. (Etatelu 22:15-18) Jakɔba y’okana waki Abarahama akakome she waoho dikumi l’ahende w’Isariyɛlɛ. Lo 1513 ntondo ka tena diaso nɛ, etena kakayokomaka waoho asɔ tshondo ya wodja, Jehowa akawasha ɛlɛmbɛ wakonge la weho wa fɛtɛ yotshikitanyi yakasalemaka ɔnɔnyi tshɛ. Ɔpɔstɔlɔ Paulo akate dia fɛtɛ shɔ yaki “didjidji di’akambu wayayi.” (Kolosai 2:16, 17; Heberu 10:1) Fɛtɛ shɔ yaki ɛnɛlɔ ka ntondo k’ekotshamelo ka sangwelo dia Jehowa diendana la Kanula. Osalelo wa fɛtɛ shɔ akashaka ase Isariyɛlɛ ɔngɛnɔngɛnɔ w’efula. Ɔsɛdingwelo wa lo hiembola wa fɛtɛ shɔ ayokeketsha mbetawɔ kaso lo mɛtɛ k’alaka wa Jehowa.

Kanula yambɛnama

3. Akɔna aki Kanula yakalakema ndo ngande wakandalumatama lo etshindji?

³ Ɛnɔnyi ndekana 4 000 l’ɔkɔngɔ wa Jehowa mbisha prɔfɛsiya kande ka ntondo, Kanula yakalakema yakɛnama. Yeso mbaki kanula shɔ. (Ngalatiya 3:16) Oko wakinde onto la kokele, Yeso akalame kɔlamelo yande polo lo nyɔi ndo akɛnya dia ɛsɔngwɛlɔ wa Satana waki kashi. Ndo nto, lam’ele Yeso kosala pɛkato, nyɔi kande aki olambo waki la nɛmɔ di’efula. Lo tshimbo yawɔ, Yeso akatshungola ekana waki Adama la Eva wele la kɔlamelo oma lo pɛkato la nyɔi. Nyɔi ka Yeso l’otamba w’asui mbaki ‘olumatamelo wa l’etshindji’ wa Kanula yakalakema.​—Heberu 9:11-14.

4. Ɛngɔ kakɔna kaki didjidji di’olambo waki Yeso?

⁴ Yeso akavu lo Nisana 14, 33 lo tena diaso nɛ.a Lo wodja w’Isariyɛlɛ, Nisana 14 aki lushi l’ɔngɛnɔngɛnɔ etena kakawasalaka dambo di’Elekanelo. Ɔnɔnyi tshɛ lo lushi lɔsɔ, nkumbo tshɛ wakalɛka dambo diakakatemaka la ɔsɔngɔ w’ɔkɔkɔ waha l’ɛkɔmɔ. Lo sala ngasɔ, vɔ wakohɔka wakahombaka dikila di’ɔn’ɔkɔkɔ shimbɛ ana wa nondo w’ase Isariyɛlɛ oma le ondjelo wakadiake ana wa nondo wa lo wodja w’Edjibito lo Nisana 14, 1513 ntondo ka tena diaso nɛ. (Etumbelu 12:1-14) Ɔn’ɔkɔkɔ w’Elekanelo ɔsɔ aki didjidji dia Yeso, ɔnɛ lele Paulo akate lo dikambo diande ate: “Kristu On’okoko asu w’elekanelu, akadiakema.” (1 Koreto 5:7) L’ɛnyɛlɔ ka dikila dia Ɔn’ɔkɔkɔ w’Elekanelo, dikila dia Yeso diakatshulwama mbishaka anto efula panda.​—Joani 3:16, 36.

‘Ɔlɔnga a wane wakavu’

5, 6. a) Etena kakɔna kakolɔ Yeso, ndo dui diakɔna dia l’Ɛlɛmbɛ diaki didjidji dia eolwelo kakɔ? b) Ngande wele eolwelo ka Yeso akakimanyiya dia Etatelu 3:15 kotshama?

⁵ Lo lushi la sato, Yeso akolɔ dia nde tosha She nɛmɔ di’olambo ande. (Heberu 9:24) Difɛstɔ dikina diaki nto didjidji dia eolwelo ka Yeso. Lushi lakayelanaka la Nisana 14 aki etatelo ka fɛtɛ k’Ekate waha la wodoya. Lushi lakayelanaka, mbuta ate lo Nisana 16, ase Isariyɛlɛ wakelaka asudu w’eponga w’ɔlɔnga wa dinela diakasalemaka l’Isariyɛlɛ dia ɔlɔmbɛdi mbowaetshetsha la ntondo ka Jehowa. (Akambu w’Ase Lewi 23:6-14) Lo Nisana 16, 33 lo tena diaso nɛ, Jehowa aki la shadiya ya kitsha Satana tatala lo welo w’efula wakandadje dia ndjaka “omenyi [ande] wa kolamelu la mete,” lo mbolola Yeso oma lo nyɔi ko mbosha lɔsɛnɔ la lo nyuma lahavu.​—Enyelo 3:14; 1 Petero 3:18.

⁶ Yeso akakome “olonga a wane wakavu.” (1 Koreto 15:20) Otshikitanyi l’anto wakolɔ la ntondo kande ko ndjovɔ nto, Yeso komvɔ nto. Koko, nde akadɛ l’olongo lo lonya l’omi la Jehowa, lɛnɛ akandatokongɛ polo etena kakandahombe mbahenyama l’okudi oko Nkumekanga ka lo Diolelo diaki Jehowa dia l’olongo. (Osambu 110:1; Etsha 2:32, 33; Heberu 10:12, 13) Tatɛ lam’akandahenyama l’okudi oko Nkumekanga, Yeso aya l’akoka wa minola Satana otunyi wa woke l’ɔtɛ ko mbolanya lo pondjo ndo ndanya tukanula tande.​—Enyelo 11:15, 18; 20:1-3, 10.

Kanula y’Abarahama kengama l’anto efula

7. Ngande wakasalemaka fɛtɛ ka Mingu?

⁷ Yeso mbaki Kanula yakalakema lo ekambɔ k’Ɛdɛna ndo oma lo tshimbo yande mbele Jehowa “[ayo]lanya elimu wa uhimbanyi.” (1 Joani 3:8) Koko, etena kakatɛkɛta Jehowa la Abarahama, Nde akɛnya dia ‘kanula’ y’Abarahama honga paka onto ɔtɔi oto. Tɔ takahombe monga “uku toto ta l’ulungu ndu uku efula ka seke ya lokongo, yatuyalaka l’umamu w’ashi.” (Etatelu 22:17) Fɛtɛ kekina k’ɔngɛnɔngɛnɔ kaki didjidji dia ɛnamelo k’anto akina wa lo ‘kanula.’ Nshi akumi atanu oma lo Nisana 16, ase Isariyɛlɛ wakasalaka fɛtɛ ka Mingu. Ɛlɛmbɛ wakataka lo dikambo dia fɛtɛ kɛsɔ ɔnɛ: “Kanyali nshi akumi atanu edja ndu wedi a pindju wa lushi l’ekila l’esambeli. Ku nyu ndjukimo ulambu wa shima wa tongo y’eyuyu le [Jehowa]. Kanyela ekama ehendi wa ma dia ndjetshetsha uma lu mvudu yanyu, wakatshama uma lu tenyi pendi dia dikumi dia efa, dia vo ndjetshetshama. Vo kawuyali wa shima ka pudipudi, kawukatemi la edya, dia vo ndjala olonga le [Jehowa].”b​—Akambu w’Asi Lewi 23:16, 17, 20.

8. Ekambokambo kakɔna kakasalema lo Pɛntɛkɔsta ka l’ɔnɔnyi 33 lo tena diaso nɛ?

⁸ Etena kaki Yeso la nkɛtɛ, fɛtɛ ka Mingu akeyamaka oko Pɛntɛkɔsta (oma lo tshɛkɛta ya lo Grɛkɛ yalembetshiya “la akumi atanu.”) Lo Pɛntɛkɔsta ka l’ɔnɔnyi 33 lo tena diaso nɛ, Ɔlɔmbɛdi a woke a Lâdiko, Yeso Kristo lakolɔ, akatshulwɛ djui y’ambeki 120 waki la Jerusalɛma nyuma k’ekila. Ɔnkɔnɛ ambeki w’akitami asɔ wakakome ana wa Nzambi wambokitama nyuma ndo anango Yeso Kristo. (Romo 8:15-17) Vɔ wakakome wodja w’oyoyo, “Isariyele wa [Nzambi].” (Ngalatiya 6:16) Oma lo lofulo la tshitshɛ lakiwɔ l’etatelo, wodja ɔsɔ wayokoma l’ekomelo anto 144 000.​—Enyelo 7:1-4.

9, 10. Lo Pɛntɛkɔsta, ɛngɔ kakɔna kaki didjidji di’etshumanelo k’Akristo w’akitami?

⁹ Mapa ehende wele la wodoya waketshetshamaka la ntondo ka Jehowa lo Pɛntɛkɔsta tshɛ aki didjidji di’etshumanelo k’Akristo w’akitami. Wodoyelo wa mapa ɛsɔ akɛnyaka dia Akristo w’akitami wayongaka la wodoya wa pɛkato kakatahowɔ. Koko, vɔ kokaka ndjasukanya le Jehowa lo tshimbo y’olambo wa tshungo wa Yeso. (Romo 5:1, 2) Lande na mapa ehende? Ondo dui sɔ diakɛnyaka di’ana wa Nzambi w’akitami wayotomba oma l’elui ehende, ntondotondo oma l’atei w’ase Juda wa lôtɔ ndo l’ɔkɔngɔ oma l’atei w’ase Wedja.​—Ngalatiya 3:26-29; Efeso 2:13-18.

¹⁰ Mapa ehende wakalambɔmaka lo Pɛntɛkɔsta wakɔsamaka oma lo ɔlɔnga wa dinela di’eponga. Lo yoho yɔtɔnɛ la dikambo sɔ, Akristo wotɔ lo nyuma mbelamɛka ɔnɛ: “Elua wa ntundu wa ditungelu diandi tshe.” (Jakoba 1:18) Vɔ mbele anto wa ntondo wadimanyiyama pɛkato yawɔ oma lo dikila dia Yeso diakatshulwama, ndo dui sɔ mbakonyaka dia vɔ nongola difuto dia lɔsɛnɔ lahavu l’olongo, lɛnɛ ayowotolɛ vɔ la Yeso lo Diolelo diande. (1 Koreto 15:53; Filipi 3:20, 21; Enyelo 20:6) Oko ana wa l’olongo, kem’edja vɔ “[wayolɛ] wedja la ukalimba a luwulu” ndo wayɛna ‘lam’ayominɔma Satana l’ɔtɛ l’ɛse k’ekolo awɔ.’ (Enyelo 2:26, 27; Romo 16:20) Ɔpɔstɔlɔ Joani akate ate: “Vo mbatuyelaka Ona-Okoko lu ahuli tshe watshondi. Vo wakasumbama uma l’atei w’antu, ne dia ndjala elua wa ntundu le [Nzambi] ndu le Ona-Okoko.”​—Enyelo 14:4.

Lushi lakakaka epole ɔsɛkɛ dikambo dia etshungwelo

11, 12. a) Kakɔna kakasalemaka lo Lushi l’Ekesanelo? b) Ɛtshɔkɔ akɔna wakakondjaka ase Isariyɛlɛ oma l’elambo wa ngɔmbɛ ndo wa mbudi?

¹¹ Lo lushi la dikumi la Etanima (lakayelamɛka l’ɔkɔngɔ ɔnɛ Tishiri),c ase Isariyɛlɛ wakasalaka fɛtɛ kaki didjidji di’ɛtshɔkɔ wayokondja anto oma l’olambo wa Yeso wa tshungo. Lo lushi lɔsɔ, wodja w’otondo wakasanganaka kâmɛ Lushi l’Ekesanelo dia kimɔ weshasha lo wahɔ awɔ, dia komba pɛkato yawɔ.​—Akambu w’Asi Lewi 16:29, 30.

¹² Lo Lushi l’Ekesanelo, ɔlɔmbɛdi a lâdiko akadiakaka ɔsɔngɔ a ngɔmbɛ ndo lo Dihole Dioleki Ekila, nde akatɛka dikila diawɔ dimɔtshi mbala esambele la ntondo k’ofidi w’Ɔshɛtɛ, ɔnkɔnɛ tshelo shɔ yaki oko onto lalambola dikila la ntondo ka Jehowa. Olambo ɔsɔ aki dikambo dia pɛkato y’ɔlɔmbɛdi a lâdiko ndo “wa lu luudu landi,” ɛlɔmbɛdi wa l’ɛse ndo ase Lɛwi. Oma lâsɔ, ɔlɔmbɛdi a lâdiko akɔsaka weombe ehende wa mbudi. Nde akadiakaka kɛmɔtshi oko olambo wa pɛkato ya “antu.” Wakatɛka yema ya dikila diatɔ dimɔ la ntondo k’ofidi w’Ɔshɛtɛ lo Dihole Dioleki Ekila. Oma lâsɔ, ɔlɔmbɛdi a lâdiko akakitshaka anya ande lâdiko dia mbudi ka hende ndo akasuyaka munga y’ana w’ase Isariyɛlɛ. L’ɔkɔngɔ diko, nde akatshikaka dia mbudi kakɔ ndawɔ otsha l’oswe dia mɛmba pɛkato ya wodja lo yoho ya didjidji.​—Akambu w’Asi Lewi 16:3-16, 21, 22.

13. Ngande wele akambo wakasalemaka lo Lushi l’Ekesanelo aki didjidji dia ɔkɛndɛ wele la Yeso?

¹³ Oko waki ditshelo sɔ didjidji, Ɔlɔmbɛdi a Lâdiko, Yeso kambaka la nɛmɔ dia dikila diande dia lɔsɛnɔ dia dimanyiya anto pɛkato. Nɛmɔ dia dikila diande mbelaka ɛtshɔkɔ ntondotondo le “luudu la nyuma” l’Akristo w’akitami 144 000, lo mbakimanyiya dia vɔ mbɔsama oko anto w’ɔlɔlɔ ndo vɔ monga pudipudi la ntondo ka Jehowa. (1 Petero 2:5; 1 Koreto 6:11) Olambo wa ɔsɔngɔ a ngɔmbɛ aki didjidji dia dui sɔ. Ɔnkɔnɛ vɔ waya la diaaso dia kondja sango diawɔ dia l’olongo. Dui dia hende, nɛmɔ dia dikila dia Yeso mbelaka ɛtshɔkɔ le miliyɔ y’anto akina wele la mbetawɔ le Kristo, oko wakadiɛnyaka olambo wa mbudi. Vɔ wayolongola woshasha wa lɔsɛnɔ la pondjo lanɛ la nkɛtɛ, mbuta ate sango diakashisha Adama la Eva. (Osambu 37:10, 11) Diɛsɛ oma lo dikila diande, Yeso mɛmbaka pɛkato tshɛ y’anto, oko woho wakɛmbaka mbudi pɛkato tshɛ y’ase Isariyɛlɛ otsha l’oswe.​—Isaya 53:4, 5.

Wakangɛnangɛnaka la ntondo ka Jehowa

14, 15. Kakɔna kakatombaka lo fɛtɛ ka Totombotombo ndo dikambo sɔ akadioholaka ase Isariyɛlɛ?

¹⁴ L’ɔkɔngɔ wa Lushi l’Ekesanelo, ase Isariyɛlɛ wakasalaka fɛtɛ ka Totombotombo, fɛtɛ kakaleke ɔngɛnɔngɛnɔ ka l’ɔnɔnyi k’ase Juda. (Akambu w’Asi Lewi 23:34-43) Fɛtɛ kɛsɔ kakasalemaka oma lo Ngɔndɔ ka Etanima 15 polo 21 ndo kakakomɛka la losanganya l’ekila lo lushi la 22 la ngɔndɔ kakɔ. Tɔ kakɛnyaka ekomelo k’otshumanyelo wa diangɔ dia dinela ndo aki etena ka eokelo ka losaka l’ɔtɛ w’ɛlɔlɔ wa Nzambi. L’ɔkɔkɔ ɔsɔ mbakadjangɛ Jehowa anto wakasalaka fɛtɛ kɛsɔ ate: “[Jehowa Nzambi k]anyu, ayunyotshokola lu anela anyu tshe ndu l’elimu tshe watunyutshaka l’anya, ku nyu tshe nyayuyala la ongenongeno.” (Euhwelu k’Elembe 16:15) Ɔsɔ mɛtɛ aki etena k’ɔngɛnɔngɛnɔ!

¹⁵ L’edja kakasalemaka fɛtɛ kɛsɔ, ase Isariyɛlɛ wakadjasɛka lo totombotombo nshi esambele. Vɔ wakohɔka dia l’etena kɛmɔtshi vɔ wakadjasɛka lo totombotombo l’oswe wa shɛnga. Fɛtɛ kɛsɔ akawashaka diaaso dia vɔ kana yimba lo woho wakâkokɛ Jehowa. (Euhwelu k’Elembe 8:15, 16) Ndo lam’ele anto tshɛ, mbuta ate akanga w’ɛngɔnyi ndo ase wola wakadjasɛka lo totombotombo ta woho ɔtɔi, ase Isariyɛlɛ wakohɔka dia vɔ tshɛ waki popo lo kɛnɛ kendana la fɛtɛ.​—Nehemiya 8:14-16.

16. Fɛtɛ ka Totombotombo aki didjidji dia na?

¹⁶ Fɛtɛ ka Totombotombo aki fɛtɛ ka dinela, fɛtɛ k’ɔngɛnɔngɛnɔ k’otshumanyelo wa diangɔ dia dinela, ndo tɔ kaki didjidji dia otshumanyelo w’ɔngɛnɔngɛnɔ wa wanɛ wele la mbetawɔ le Yeso Kristo. Otshumanyelo ɔsɔ wakatatɛ lo Pɛntɛkɔsta 33 lo tena diaso nɛ, etena kakakitama ambeki wa Yeso 120 nyuma dia monga amɔtshi wa l’atei wa “elombedi w’ekila.” Oko wakasɛnɛ ase Isariyɛlɛ lo totombotombo nshi yema tshitshɛ, akitami mbeyaka dia vɔ wekɔ paka “angendangenda” l’andja ɔnɛ wa kɔlɔ. Elongamelo kawɔ ele ka ntshɔ l’olongo. (1 Petero 2:5, 11) Otshumanyelo w’Akristo w’akitami wotatshu otsha l’ekomelo katɔ lo “nshi y’ekumelu” nyɛ, etena kasalema otshumanyelo w’anto w’ekomelo wa l’olui w’anto 144 000.​—2 Timote 3:1.

17, 18. a) Kakɔna kɛnya dia lâdiko di’Akristo w’akitami anto akina wayokondja wahɔ oma l’olambo wa Yeso? b) Ɛlɔ kɛnɛ waa na wakondja wahɔ oma lo fɛtɛ ka Totombotombo ka mɛtɛ mɛtɛ ndo etena kakɔna kayokoma ɔngɛnɔngɛnɔ wa fɛtɛ kakɔ lo kondoko yatɔ?

¹⁷ Diakɔ diele lo fɛtɛ ka totombotombo kɛsɔ, wakalambolaka ɛsɔngɔ wa ngɔmbɛ 70. (Walelu 29:12-34) Lofulo 70 ekɔ 7 dodia lo 10, lofulo lele lo Bible nembetshiyaka kɛnɛ kele kokele l’olongo ndo la nkɛtɛ. Omalɔkɔ, olambo wa Yeso ayonga la wahɔ le anto wa kɔlamelo w’oma lo nkumbo 70 yakaye oma le Nɔa. (Etatelu 10:1-29) Lo yoho yɔtɔnɛ la dikambo sɔ, lo nshi yaso nyɛ otshumanyelo ɔsɔ wambohama polo lo mbidja ndo anto w’oma lo wedja tshɛ wele la mbetawɔ le Yeso ndo wele l’elongamelo ka nsɛna lo paradiso ka la nkɛtɛ.

¹⁸ Ɔpɔstɔlɔ Joani akɛnyi otshumanyelo wasalema nshi nyɛ ɔsɔ lo ɛnɛlɔ. Ntondotondo, nde akoke diewoyelo dia mbidja anto w’ekomelo wakenga anto 144 000 tolembetelo. Oma lâsɔ, nde akɛnyi “ului a wuki w’antu waheyama mbala,” wemadi la ntondo ka Jehowa ndo ka Yeso, wele la “wanga w’atuku l’anya awo.” Vɔ “wambuya uma lu pa ka wuki” ndo wayɔtɔ l’andja w’oyoyo. Vɔ lawɔ wekɔ ɛlɔ kɛnɛ angɛndangɛnda lo tshanda mɔtshi lo dikongɛ di’akambo di’omusu nɛ, ndo wekɔ lo kongɛ l’eshikikelo tshɛ etena kele “Ona-Okoko . . . ayuyala ulami awo, ayâlombola utsha lu teko di’ashi a lumu.” L’etena kɛsɔ, “[Nzambi] ayâkitula asoi tshe uma lu ashu awo.” (Enyelo 7:1-10, 14-17) Fɛtɛ ka mɛtɛ mɛtɛ ka Totombotombo kayokoma lo kondoko yatɔ l’ɔkɔngɔ w’ekomelo ka Diolelo di’Ɛnɔnyi Kinunu diaki Kristo, etena kayokondja olui a woke kâmɛ la wanɛ wayolɔ lɔsɛnɔ la pondjo.​—Enyelo 20:5.

19. Ngande wakondjaso wahɔ oma l’ɔsɛdingwelo wa fɛtɛ yakasalemaka lo Isariyɛlɛ?

¹⁹ Sho lawɔ kokaka monga “la ongenongeno” etena kakanaso yimba lo kitshimudi ya fɛtɛ y’edjedja y’ase Juda. Ekɔ ɔngɛnɔngɛnɔ efula dia mɛna dia Jehowa akɛnya yema la ntondo woho wakahombe kotshama prɔfɛsiya kakandasha lo Ɛdɛna, ndo ekɔ ɔngɛnɔngɛnɔ efula dia mɛna woho wakotshamatɔ nshi nyɛ yema yema. Ɛlɔ kɛnɛ, tambeya dia Kanula shɔ yambɛnamaka ndo nde amboshilaka la numatema lo etshindji. Kakianɛ nde ekɔ Nkumekanga l’olongo. Lâdiko dia lâsɔ, efula k’anto wa l’atei w’anto 144 000 wamboshilaka la mɛnya kɔlamelo yawɔ polo lo nyɔi. Kakɔna kambotshikala dia salema na? Ngande wayokotshama prɔfɛsiya kɛsɔ tshɛ lo tshɛ kema edja nto na? Awui asɔ wayɔsɛdingɔma lo sawo diayela.

[Nɔte ya l’ɛse ka dikatshi]

Onde wɛ kokaka nembetshiya?

• Kakɔna kaki didjidji dia ɔn’ɔkɔkɔ w’Elekanelo?

• Fɛtɛ ka Pɛntɛkɔsta aki didjidji dia otshumanyelo akɔna?

• Awui akɔna wakasalemaka lo Lushi l’Ekesanelo wɛnya woho wayoyokondja anto wahɔ oma l’olambo wa tshungo wa Yeso?

• Lo woho akɔna waki fɛtɛ ka Totombotombo didjidji dia otshumanyelo w’Akristo?

[Tablo ka lo lɛkɛ 24, 25]

(Dia mbeya awui tshɛ enda l’okanda)

Elekanelo

Nisana 14

Dikambo:

Ɔn’ɔkɔkɔ w’Elekanelo akadiakemaka

Didjidji diadɔ:

Olambo wa Yeso

Fɛtɛ ka Ekate waha la wodoya lakolwama (Nisana 15-21)

Nisana 15

Dikambo:

Sabato

Nisana 16

Dikambo:

Olambo wa nɔnɔ

Didjidji diadɔ:

Yeso lakolwama

Nshi 50

Fɛtɛ ka Mingu (Pɛntɛkɔsta)

Sivana 6

Dikambo:

Olambo wa mapa ehende

Didjidji diadɔ:

Yeso akasha Jehowa anango w’akitami

Lushi l’Ekesanelo

Tishiri 10

Dikambo:

Olambo wa ngɔmbɛ ndo mbudi hiende

Didjidji diadɔ:

Yeso akakimɔ nɛmɔ dia dikila diande lo wahɔ w’anto tshɛ

Fɛtɛ ka Totombotombowaki (Otshumanyelo, Tabɛrnakɛlɛ)

Tishiri 15-21

Dikambo:

Isariyɛlɛ waki l’ɔlɔ lo totombotombo ndo wakangɛnangɛnaka dinela, ngɔmbɛ 70 yakalambɔmaka

Didjidji diadɔ:

Otshumanyelo w’akitami ndo “olui a wuki”

[Esato wa lo lɛkɛ 23]

L’ɛnyɛlɔ ka dikila di’ɔn’ɔkɔkɔ w’Elekanelo, anto efula kondjaka panda oma lo dikila dia Yeso

[Esato wa lo lɛkɛ 24]

Ɔlɔnga wa dinela di’eponga wakalambɔmaka lo Nisana 16 aki didjidji dia eolwelo ka Yeso

[Esato wa lo lɛkɛ 25]

Mapa ehende wakalambɔmaka lo Pɛntɛkɔsta aki didjidji di’etshumanelo k’Akristo w’akitami

[Esato wa lo lɛkɛ 26]

Fɛtɛ ka Totombotombo aki didjidji dia otshumanyelo w’ɔngɛnɔngɛnɔ w’akitami ndo wa “ului a wuki” w’oma lo wedja tshɛ