Dikambo dimɔtshi dialɔmba anto wa l’andja w’otondo

OHOKANYIYA dia nkama ya miliyɔ y’anto, kana miliyara y’anto wekɔ lo nɔmba vɔ tshɛ ɛngɔ kakɔ kâmɛ. Vɔ wekɔ lo nɔmba owandji wâheme lâdiko dia tshɛ dia nde mbakotshɛ dikambo dia shikaa diɔlɔmbawɔ sɔ. Koko, paka anto yema tshitshɛ tsho l’atei awɔ mbeya shikaa kɛnɛ kalɔmbawɔ. Onde dui dia ngasɔ kokaka salema? Eelo, diɔ salemaka lushi tshɛ. Kakɔna kalɔmba anto asɔ tshɛ na? Vɔ wekɔ lo nɔmba dia Diolelo diaki Nzambi ndja!

Lo ndjela ɛfɔnyɛlɔ ɛmɔtshi wakasalema, ekɔ suke l’ɛtɛmwɛlɔ 37 000 wayaɔsa ɔnɛ Akristo mbewɔ ndo wetawɔ ɔnɛ Yeso Kristo kele Ɔnɔmbɔdi awɔ. Ekɔ anto ndekana miliyara hiende wele l’ɛtɛmwɛlɔ ɛsɔ. Efula ka l’atei awɔ nɔmbaka dɔmbɛlɔ dielamɛ mbala efula ɔnɛ: Dɔmbɛlɔ dia Shɛso. Onde wɛ mbeyaka dɔmbɛlɔ sɔ? Oko wakadietsha Yeso ambeki ande, diɔ tatɛka ɔnɛ: “Shesu le l’ulungu, lukumbu laye la[kidiame]. Diulelu diaye diayi. Lulangu laye latshami la kete uku atshamalo l’ulungu.”​—Mateu 6:9, 10.

Aya ɛnɔnyi nkama wele, atɛmɔdi efula wekɔ lo mbuta ɛtɛkɛta ɛsɔ la dilɛmiɛlɔ tshɛ l’ɛtɛmwɛlɔ awɔ mbala ko mbala. Vɔ mbutaka ɛtɛkɛta ɛsɔ nto mbala la mbala l’atei wa nkumbo kana l’onto ndamɛ, lo tena di’ɔlɔlɔ ndo lo tena dia kɔlɔ. Vɔ salaka dɔmbɛlɔ sɔ l’otema ɔtɔi, ndo l’etete tshɛ. Anto akina wambowakimɛka l’ɔtɛ, koko hawoleke mbeya kana haweye kânga yema kitshimudi yawɔ. Aha anto asɔ wa lo Lokristokristo ato mbalongamɛ ndo mbalɔmba dia Diolelo diaki Nzambi ndja.

Dikambo dialɔmba ndo ɛtɛmwɛlɔ wele bu w’Akristo

Dɔmbɛlɔ dieyama efula dia ase Juda ekɔ dɔmbɛlɔ dielɛwɔ ɔnɛ Kaddish, mbuta ate dɔmbɛlɔ diasalawɔ lushi la lushi lo shinangɔnga yawɔ kana etena kavɔ owotɔ awɔ ɔmɔtshi wa kasuke. Kânga mbahadialeke mendana la nyɔi kana la dui di’ɔkɛi, diɔ mbutamaka mbala efula lo tena diavɔ anto. Lo dɔmbɛlɔ sɔ vɔ nɔmbaka ɔnɛ: “[Nzambi] ashikikɛ Diolelo diande etena kekeyɛ la lɔsɛnɔ . . . asale dui sɔ esadi esadi.”a Dɔmbɛlɔ dikina di’edjedja diakasalemaka lo shinangɔnga tɛkɛtaka dikambo di’elongamelo ka Diolelo diaki Mɛsiya w’oma lo nkumbo ka Davidi.

Anto akina waki komonga Akristo wakangɛnangɛnaka kanyi yendana la Diolelo diaki Nzambi. Lo ndjela jurnalɛ The Times of India, owandji ɔmɔtshi wa lokumu wa lo ɔtɛmwɛlɔ w’ase Inde wa lo ntambe 19, ɔnɛ lakayashaka efula dia mbidja diokanelo lam’asa waa Hindu, waa Mizilma ndo Akristo, akate ate: “Diolelo dia mɛtɛ diaki Nzambi hadiotonga naka wedja wa lo ɛstɛ la wa lo owɛstɛ watonge kâmɛ.” Owandji ɔmɔtshi wa kalasa kɛmɔtshi ka waa Mizilma ka la Strathfield lo wodja wa Australie, akafunde atete edja lo jurnalɛ mɔtshi ate: “L’ɛnyɛlɔ ka waa Mizilma tshɛ, dimi mbetawɔka [dia] Yeso ayokalola ndo ayoyoshikikɛ Diolelo dia mɛtɛ diaki Nzambi.”

Aha la tâmu, ɛlɔ kɛnɛ miliyara y’anto wekɔ l’elongamelo ndo wekɔ lo nɔmba dikambo dia Diolelo diaki Nzambi. Koko tɔsɛdingole dikambo dimɔtshi dia diambo.

Ondo wɛ mbeyaka dia sho Ɛmɛnyi wa Jehowa, wanɛ watondja periodikɛ kɛnɛ, ntshɔka lo luudu la luudu dia tasawolaka la asukanyi ayɛ awui wendana la Bible. Etena kanyofundɛso kɛnɛ, tekɔ lo kamba olimu ɔsɔ lo andja w’otondo, lo wedja oko 236 ndo lo ɛtɛkɛta ndekana 400. Ɔtɛ a dui w’ohomba efula w’esambishelo kaso ekɔ Diolelo diaki Nzambi. Omalɔkɔ, lembetɛ dia ɔtɛ adui wa woke wa periodikɛ kɛnɛ ekɔ: Tshoto y’Etangelo mbewoyaka Diolelo diaki Jehowa. Sho mimbolaka anto mbala efula dia kana vɔ nɔmbaka dikambo dia Diolelo sɔ. Efula ka l’atei awɔ kadimolaka ɔnɛ eelo. Koko, etena kawambolaso ɔnɛ Diolelo sɔ kɛdikɛdi na, anto efula kadimolaka ɔnɛ: “Dimi haleye,” kana vɔ kadimolaka awui wahokɛma ndo wele bu l’eshikikelo.

Ko lande na kalɔmba anto efula dia Diolelo diaki Nzambi ndja lam’ele vɔ hawokoke dilembetshiya na? Onde l’ɔtɛ w’ɔnɛ Diolelo diaki Nzambi diekɔ dikambo diahamanema fundo? Ndooko. Diolelo diaki Nzambi nembetshiyama hwe lo Bible. Lâdiko dia lâsɔ, losango la lo Bible lendana la Diolelo kokaka kosha elongamelo ka shikaa lo tena di’ofukutanu nɛ. Lo sawo diayela, tayɛna woho walambetshiya Bible elongamelo kɛsɔ. Oma lâsɔ, tayɛna etena kakɔna kayokadimwama dɔmbɛlɔ diaki Yeso diendana la oyelo wa Diolelo.

[Nɔte ka l’ɛse ka dikatshi]