Wambɔsama oko anto wakoka nɔmbwama otsha lo tɛkɔ di’ashi wa lɔsɛnɔ
‘Ɔna Ɔkɔkɔ ayâlɔmbɔla otsha lo tɛkɔ di’ashi wa lɔsɛnɔ.’—ENY. 7:17.
1. Ngande welɛ Ɔtɛkɛta wa Nzambi Akristo w’akitami, ndo Yeso akawasha ɔkɛndɛ akɔna?
ƆTƐKƐTA wa Nzambi mbelɛka Akristo w’akitami walama diangɔ diaki Kristo dia lanɛ la nkɛtɛ ɔnɛ ‘ɔhɔmbɔ wa kɔlamelo ndo wa kɛsɔ.’ Etena kakaye Kristo dia ndjenda ‘ɔhɔmbɔ’ ɔsɔ lo 1918, nde akatane akitami asɔ wa la nkɛtɛ washa anto wa lo luudu lande ‘mbo ya ndɛ ya lo nyuma lo etena kahombama’ la kɔlamelo tshɛ. Oma lâsɔ, Owandji Yeso akangɛnangɛna dia mbâkitsha ‘lâdiko dia diango diande tshɛ.’ (Adia Mateu 24:45-47.) Lo yoho shɔ mbakambɛ akitami atɛmɔdi akina wa Jehowa wa lanɛ la nkɛtɛ la ntondo ka vɔ nongola sango diawɔ dia l’olongo.
2. Shila diangɔ diaki Yeso.
2 Owandji ekɔ la lowandji lâdiko dia diangɔ diande ndo nde kokaka kamba ladiɔ woho walangande. Diangɔ diaki Yeso Kristo lakahenyama oko Nkumekanga oma le Jehowa, mendanaka la diangɔ tshɛ diendana la Diolelo ndo la ambolami wa Diolelo diakɔ wele lanɛ la nkɛtɛ. L’atei wa diangɔ diakɔ mbele ndo “ului a wuki” wakɛnyi ɔpɔstɔlɔ Joani lo ɛnɛlɔ. Lo kɛnɛ kendana la olui a woke ɔsɔ, Joani mbutaka ate: “Lakenyi ului a wuki w’antu waheyama mbala, uma lu wedja tshe, ndu uma lu wauhu tshe ndu uma lu weuhu w’antu tshe, ndu w’eteketa tshe, wemadi la ntundu ka kiti ka diulelu ka Ona-Okoko, wolotshi ahondo a wema, la wanga w’atuku l’anya awo.”—Eny. 7:9.
3, 4. Naa diɛsɛ dia woke diele la wanɛ wakenga olui a woke?
3 Anto wakenga olui a woke ɔsɔ wekɔ l’atei w’anto wakelɛ Yeso ɔnɛ “ekoko ekina.” (Joa. 10:16) Vɔ wekɔ la elongamelo ka nsɛna pondjo pondjo lo paradiso ka la nkɛtɛ. Vɔ wekɔ la eshikikelo ɔnɛ Yeso ‘ayowalɔmbɔla otsha lo tɛkɔ di’ashi wa lɔsɛnɔ’ ndo ɔnɛ ‘Nzambi ayokitola asɔi tshɛ lo washo awɔ.’ L’ɔtɛ wa elongamelo kɛsɔ, vɔ “wakotsha ahondo awo wakawaedia la dikila dia Ona-Okoko.” (Eny. 7:14, 17) Vɔ wekɔ la mbetawɔ l’olambo waki Yeso, diakɔ diele lo washo wa Nzambi, vɔ wekɔ la ‘ekutu wa wɛma.’ Vɔ mbɔsamaka oko anto w’ɛlɔlɔ ndo oko angɛnyi waki Nzambi, l’ɛnyɛlɔ k’Abarahama.
4 Ndo nto, lam’ele olui a woke w’ɛkɔkɔ ekina watatetemala fulanɛ wambɔsama oko anto w’ɛlɔlɔ le Nzambi, vɔ kokaka nongamɛ dia ndjohanda lo elanyelo ka dikongɛ nɛ di’akambo lo fɔnu ka woke. (Jak. 2:23-26) Vɔ kokaka ndjasukanya la Jehowa, ndo oko olui, vɔ wekɔ la elongamelo ka diambo ka panda lo Aramangɛdɔna. (Jak. 4:8; Eny. 7:15) Vɔ hawoyalɔmbɔla vɔamɛ, koko vɔ mbetawɔka kamba lo ɛlɔmbwɛlɔ ka Nkumekanga ka l’olongo ndo k’akitami w’anango wa lanɛ la nkɛtɛ.
5. Olui a woke ngande wasukɛwɔ anango Kristo w’akitami?
5 Akristo w’akitami wekɔ lo pomana ndo wayotetemala pomana la ɔlɔshamelo wa wolo oma le andja ɔnɛ waki Satana. Koko, vɔ kokaka ndjaɛkɛ l’osukɔ waki asekawɔ wa lo olui a woke. Etena kɛnɛ kele Akristo w’akitami waya yema tshitshɛ, ɔnɔnyi tshɛ nkama ya nunu yekɔ lo takotshama lo olui a woke. Akitami vɔamɛ ato hawokoke nɔmbɔla yɛdikɔ ya tshumanelo oko 100000 di’Akristo diele lo andja w’otondo. Ɔnkɔnɛ, yoho mɔtshi yakimanyiyama akitami oma le ɛkɔkɔ ekina ele apami amɔtshi wakoka wa l’olui a woke wekɔ lo kamba oko dikumanyi lo tshumanelo. Vɔ kimanyiyaka lo nama miliyɔ y’Akristo yambowasha ‘ɔhɔmbɔ wa kɔlamelo ndo wa kɛsɔ’ ɔkɛndɛ.
6. Ngande wakadiatatami dia ɛkɔkɔ ekina wayosukɛ Akristo w’akitami?
6 Woho wetawɔ ɛkɔkɔ ekina dia sukɛ Akristo w’akitami la lolango lawɔ akatatami oma le ɔprɔfɛta Isaya. Nde akafunde ate: ‘As’olimu wahafutama w’ase Edjibito, ndo amundji w’okanda w’ase Etiyɔpiya ndo w’ase Sɛba, akongote w’apami wayeta lakayɛ ndo wayoyala anto ayɛ. Wayɔkɛndakɛnda l’ɔkɔngɔ ayɛ wokelekami mɔlɔla, wayokoyela, wayokokusamɛ, wayokɔlɛmiya vɔate: Nzambi ekɔ la yɛ. Ndoko Nzambi kekina kekɔ; ndoko Nzambi kekina paka nde.’ (Is. 45:14) Lo yoho ya didjidji, ɛlɔ kɛnɛ Akristo wele la elongamelo ka nsɛna la nkɛtɛ wekɔ lo takɛndakɛnda l’ɔkɔngɔ w’olui w’ɔhɔmbɔ w’akitami ndo wa Olui-walɔmbɔla, lo ndjela ɛlɔmbwɛlɔ kawɔ. Oko ‘as’olimu wahafutama,’ ɛkɔkɔ ekina kambaka la wolo awɔ ndo la ekundji awɔ la lolango lawɔ ndo l’otema ɔtɔi dia sukɛ olimu w’esambishelo wakambema lo andja w’otondo wakasha Kristo ambeki ande w’akitami weke lanɛ la nkɛtɛ.—Etsha 1:8; Eny. 12:17.
7. Olui a woke wekɔ lo mbetshama dia dikambo diakɔna?
7 Etena kasukɛwɔ anangɛwɔ w’akitami, anto wa lo olui a woke wekɔ lo mbetshama oma le wɔ dia vɔ monga anto wa ntondo wayokenga tshunda di’oyoyo di’anto diayonga l’ɔkɔngɔ wa Aramangɛdɔna. Anto wa ntondo asɔ pombaka monga nge, ndo vɔ pombaka mbetawɔ ndo ndjela ɛlɔmbwɛlɔ kaki Owandji la lolango lawɔ. Okristo tshɛ ekɔ lo kondja diaaso dia mɛnya ɔnɛ Nkumekanga, Yeso Kristo kokaka kamba la nde. Lo monga la mbetawɔ ndo la kɔlamelo oma ko kakianɛ, nde mɛnyaka dia nde ayoyonga suke dia ndjela ɛlɔmbwɛlɔ kayowosha Nkumekanga lo andja w’oyoyo.
Olui a woke wekɔ lo mɛnya mbetawɔ kawɔ
8, 9. Ngande wɛnya anto wa lo olui a woke mbetawɔ kawɔ?
8 Ɛkɔkɔ ekina wakamba kâmɛ la etshumanelo k’Akristo w’akitami mɛnyaka mbetawɔ kawɔ lo toho totshikitanyi. Ntondotondo, vɔ sukɛka akitami lo sambisha lokumu l’ɔlɔlɔ la Diolelo diaki Nzambi. (Mat. 24:14; 28:19, 20) Dui dia hende, vɔ mbetawɔka dia ndjela ɛlɔmbwɛlɔ kasha Olui-walɔmbɔla la lolango lawɔ.—Heb. 13:17; adia Zekaria 8:23.
9 Dui dia sato, anto wa l’olui a woke sukɛka anangɛwɔ w’akitami lo nsɛna lo yoho yɔtɔnɛ la atɔndɔ wosembwe waki Jehowa. Vɔ salaka la wolo dia monga la ‘ngandji, ɔngɛnɔngɛnɔ, wɔladi, lotutsha, lɔsɛngɔ, ɔlɔlɔ, mbetawɔ, memakana ndo la ndjakimɛ.’ (Ngal. 5:22, 23) Ɛlɔ kɛnɛ, anto woleka ngɛnangɛna kɛnɛmɔla “etsha wa dimba” lo dihole dia kɛnɛmɔla waonga asɔ. Koko, anto wa lo olui a woke wamboyashikikɛ dia mbewɔ “munanyi, akambu wa sonyi, saki y’akambu wa kolo, otemwelo wa dikishi, doka, lutunu, utshanu, kandjema, kele, diatanelu, lundju, tamu, okomiya, edjwelu ka wanu, engenongeno wa kolo, la akambu wa wuhu [ɔsɔ].”—Ngal. 5:19-21.
10. Kakɔna kamboyashikikɛ anto wa l’olui a woke dia sala?
10 Lam’ele sho kema kokele, kokaka monga wolo dia sho kɛnɛmɔla elowa wa nyuma k’ekila, mbewɔ etsha wa demba ndo shika tanga la ntondo ka tɔsɛngiya ta lo andja ɔnɛ waki Satana. Koko, tamboyashikikɛ diaha mbetawɔ dia ɔkɔmwɛlɔ w’otema woye oma lo wɛɔdu aso hita, kana woye oma lo woho wakitaso tatala lo tshanda mɔtshi dia mbokoya Yeso kana woye oma lo ekakatanu aso wa lo demba kitshakitsha wolo wa mbetawɔ kaso kana ngandji kokaso Jehowa. Sho mbeyaka dia Jehowa ayokotsha kɛnɛ kakandalake, mbuta ate kokɛ olui a woke oma lo fɔnu ka woke.
11. Toho takɔna takamba la Satana dia tɛwɔla mbetawɔ k’Akristo?
11 Koko, sho tetemalaka ndjâlama nɛ dia sho mbeyaka dia otunyi aso wa mɛtɛ ekɔ Diabolo, ndo nde hatohekɔ esadi etena katɔlɔshande. (Adia 1 Petero 5:8.) Nde pembaka dia kamba la waa apɔsta ndo la anto akina dia tetawoya dia wetshelo wayelaso wekɔ kashi. Koko mbala efula nde kitaka tatala lo kamba la shambo shɔ. Woho akɔ wâmɛ mbele, kânga mbele mbala mɔtshi ɛhɛnyɔhɛnyɔ wakakitshakitsha olimu w’esambishelo, mbala efula ɛhɛnyɔhɛnyɔ akɔ wakakeketsha mbetawɔ ka wanɛ wakahɛnyahɛnyama. Diakɔ diele Satana ekɔ lo taleke kamba la toho tɛnande dia tayoleka tɛwɔla mbetawɔ kaso. Nde kambaka la ɔkɔmwɛlɔ w’otema wônga laso. Wakahɛmɔla Akristo wa lo ntambe ka ntondo lo kɛnɛ kendana la wâle ɔsɔ ɔnɛ: ‘Nyokane yimba dimɛna dikambo dia Kristo ɔnɛ lakakikɛ diɔnyɔ dia ngasɔ oma le anto wa kɔlɔ wakayangaka wahɔ awɔ hita.’ Lande na? ‘Diaha nyu nɛmba ndo kɔmɔ etema.’—Heb. 12:3.
12. Ngande wakeketsha alako wa lo Bible wanɛ wambɔkɔmɔ etema?
12 Onde tatayaokaka ndoko lushi diele oko tambohekɔ dia kambɛ Jehowa? Onde sho toyaokaka tena dimɔtshi dia tambokita tatala lo welo wadjaso dia kambɛ Jehowa? Naka ngasɔ, kete tatetawɔke dia Satana kamba la tokanyi tɔsɔ dia toshimba dia kambɛ Jehowa. Wekelo wa Bible wa lotshimola, dɔmbɛlɔ dia l’etete, wɔtwɛlɔ wa lo nsanganya mbala la mbala ndo diɔtɔnganelo dia l’asekaso Akristo ayotokeketsha ndo ayotokimanyiya ‘diaha sho nkɔmɔ lo anima aso.’ Jehowa akalake dia nde ayokimanyiya wanɛ wôkambɛ dia nyomonga la wolo ndo sho kokaka mbɛkɛ etema aso lo daka diande sɔ. (Adia Isaya 40:30, 31.) Totetemale ndjasha tshɛ l’olimu wa Diolelo. Tewɔ tɔkɛnyɔ tatɔsɛ wenya aso tshɛ ndo toyasha tshɛ dia kimanyiya anto akina. Lo sala ngasɔ, tayokeketshama dia mbikikɛ koyanga tambɔkɔmɔ etema.—Ngal. 6:1, 2.
Wambotshungɔ oma lo fɔnu ndo wambɔtɔ lo andja w’oyoyo
13. Olimu akɔna wakongɛ wanɛ wayoka lo Aramangɛdɔna?
13 L’ɔkɔngɔ w’Aramangɛdɔna, nyemba y’anto wa kɔlɔ wayolɔ wayonga la ohomba wa mbetshama mboka ya Jehowa. (Etsha 24:15) Vɔ wayonga l’ohomba wa mbeka awui wendana la olambo wa tshungo waki Yeso. Vɔ pombaka mbetshama nto dia monga la mbetawɔ l’olambo ɔsɔ dia vɔ kondja ɛlɔlɔ w’oma lɔkɔ. Vɔ wayohomba mbikasha tokanyi ta kashi t’ɛtɛmwɛlɔ taki lawɔ ntondo ndo mboka yoho yawɔ ya lɔsɛnɔ l’edjedja ɔkɔngɔ. Vɔ wayohomba mbeka dia ndɔta lonto l’oyoyo leyama Akristo wa mɛtɛ. (Ef. 4:22-24; Kol. 3:9, 10) Ɛkɔkɔ ekina wanɛ wayoka lo Aramangɛdɔna wayonga la olimu efula wa sala. Ande ɔngɛnɔngɛnɔ wayonga lawɔ dia kambɛ Jehowa olimu wa ngasɔ, aha la ekakatanu ndo la tɔsɛngiya ta dikongɛ dia kɔlɔ nɛ mbaekola yimba lee!
14, 15. Kɔndɔla awui wayetshanya wanɛ wayoka lo fɔnu ka woke vɔ la anto w’ɛlɔlɔ wayolwama.
14 Ekambi wa kɔlamelo waki Jehowa wakavu la ntondo ka Yeso ndjokamba olimu ande wa la nkɛtɛ, wayonga vɔ lawɔ la awui efula wa mbeka lo etena kɛsɔ. Vɔ wayeka dia mbeya ele Mɛsiya wakalakema, wakawalongamɛka l’asolo walomɔlomɔ koko vɔ kombɛna. Lo nshi yakiwɔ la lɔsɛnɔ, vɔ wakashile mɛnya woho wakawetawɔka la lolango lawɔ dia mbetshama oma le Jehowa. Tokanyiya ɔngɛnɔngɛnɔ ndo diɛsɛ diayonga laso, sho ase olui a woke dia mbâkimanyiya, ɛnyɛlɔ, nembetshiya Danyɛlɛ ekotshamelo ka prɔfɛsiya yakandafunde koko nde kondjishihodia!—Dan. 12:8, 9.
15 Lo mɛtɛ, kânga mbayonga ambolwami l’awui efula wa mbeka oma le so, sho lawɔ tayonga la ambola efula wa mbaoka. Vɔ wayokoka tolembetshiya dimɛna dimɛna awui wɔtɛkɛtami lo Bible, koko hawolembetshiyami tshɛ lo tshɛ. Tokanyiya ɔngɛnɔngɛnɔ wayonga dia mbeya awui tshɛ wendana la Yeso, oma le Joani Obatizanyi y’ɔnango. Awui wayoteka oma le ɛmɛnyi wa kɔlamelo ɛsɔ wayotosha mɛtɛ eokelo k’efula k’Ɔtɛkɛta wa Nzambi koleki kɛnɛ kele laso etena kɛnɛ. Ekambi wa kɔlamelo waki Jehowa wakavu, mbidja ndo anto wa l’olui a woke wavɔ lo etena k’ekomelo wayolɔ lo ‘eolwelo koleki dimɛna.’ Vɔ wakatatɛ kambɛ Jehowa lo andja wakalɔmbwamaka oma le Satana. Ande ɔngɛnɔngɛnɔ wayonga lawɔ dia tetemala la olimu awɔ lo andja w’oyoyo lɛnɛ ayonga anto la lɔsɛnɔ la dimɛna efula lee!—Heb. 11:35; 1 Joa. 5:19.
16. Lo ndjela prɔfɛsiya, awui akɔna wayosalema lo Lushi l’Elombwelo?
16 Lo etena kɛmɔtshi ka lo Lushi l’Elombwelo, wɛɔmbɔ w’abuku wayofɔma. Oma lo awui wofundami lo Bible ndo lo wɛɔmbɔ ɛsɔ mbayolomboshama wanɛ tshɛ wele la lɔsɛnɔ dia menda kana vɔ kokaka nongola lɔsɛnɔ la pondjo. (Adia Enyelo 20:12, 13.) Oya l’ekomelo ka Lushi l’Elombwelo, onto tshɛ ayokondja diaaso di’ɔlɔlɔ dia mɛnya wedi akɔna wende lo kɛnɛ kendana la lowandji la lo andja w’otondo. Onde nde ayosukɛ Diolelo diaki Nzambi ndo mbetawɔ dia Ɔn’Ɔkɔkɔ mbɔlɔmbɔla otsha lo ‘tɛkɔ di’ashi wa lɔsɛnɔ’? Kana onde nde ayotona dia ndjakitshakitsha l’ɛse ka Diolelo diaki Nzambi? (Eny. 7:17; Is. 65:20) Etena kɛsɔ, onto tshɛ la la nkɛtɛ ayokondja diaaso dia mbɔsa yɛdikɔ, aha la sɛngiyama la pɛkato k’ohowɔ kana la anto wa kɔlɔ. Ndoko onto layokoka mbuta dia Jehowa bu la lotshungɔ la mbela elombwelo k’ekomelo. Paka anto wa kɔlɔ mbayolanyema lo pondjo.—Eny. 20:14, 15.
17, 18. La ɔngɛnɔngɛnɔ wa ngande wakongɛ Akristo w’akitami ndo ɛkɔkɔ ekina Lushi l’Elombwelo?
17 Akristo w’akitami wa nshi nyɛ, wambɔsama oko anto wakoka nongola Diolelo, wekɔ lo nongamɛ l’asolo walomɔlomɔ dia tôlɛ lo Lushi l’Elombwelo. Ande diɛsɛ dia woke diayonga lawɔ lee! Elongamelo kɛsɔ mbâtshutshuyaka dia ndjela dako diakasha Petero anangɛwɔ wa lo ntambe ka ntondo ate: “Nyutetemali dia nshikimala lu leta lanyu la lu osonamelu anyu. Naka nyu nyayutsha akambo aso, ku hanyutakana pundju. Okone wayunyusha eotwelo ka lu diulelu dia pundju dia Khumesu, Ushimbedi Jesu Kristu.”—2 Pet. 1:10, 11.
18 Ɛkɔkɔ ekina ngɛnangɛnaka kâmɛ l’anangɛwɔ w’akitami. Vɔ wamboyashikikɛ dia mbasukɛ. Oko wewɔ angɛnyi waki Nzambi wa nshi nyɛ, vɔ tshutshuyamaka dia sala kɛnɛ tshɛ kakokawɔ sala l’olimu ande. Lo Lushi l’Elombwelo, vɔ wayɔngɛnangɛna dia sukɛ tɛdikɔ taki Nzambi l’otema ɔtɔi etena kayowalɔmbɔla Yeso otsha lo tɛkɔ di’ashi wa lɔsɛnɔ. L’ekomelo, vɔ wayɔsama oko ekambi wa Jehowa wa la nkɛtɛ lo pondjo pondjo!—Romo 8:20, 21; Eny. 21:1-7.
Onde wɛ âkohɔ?
• Diangɔ diaki Yeso mendanaka la na?
• Ngande wasukɛ anto wa l’olui a woke anangɛwɔ w’akitami?
• Naa waɛsɛ ndo elongamelo kele la wanɛ wakenga olui a woke?
• Ngande wɔsayɛ Lushi l’Elombwelo?
[Osato wa lo lɛkɛ 25]
Ase olui a woke wakɔtsha ekutu awɔ ndo wakawaɛdia lo dikila dia Ɔn’Ɔkɔkɔ
[Osato wa lo lɛkɛ 27]
Alongamɛyɛ dia ndjeka oma le akanga wa kɔlamelo wayolwama?