Ɔtɛkɛta wa Jehowa wekɔ la lɔsɛnɔ
Akambo w’ohomba w’oma lo dibuku dia Mateu
ONTO la ntondo lakafunde ɔkɔndɔ wa dimɛna efula wendana la lɔsɛnɔ ndo la olimu wa Yeso ko, Mateo, ɔngɛnyi ɔmɔtshi w’oshika waki Yeso Kristo waki ntondo olongodi w’elambo. Evanjiliɔ wa Mateu wakafundama ntondo lo Hɛbɛru, ko l’ɔkɔngɔ diko vɔ ndjokadimɔma lo Grɛkɛ, wakashile fundama oya lo 41 tena diaso nɛ ndo vɔ mbakakatanya Afundelo wa lo Hɛbɛru la Afundelo w’Akristo wa lo Grɛkɛ.
Evanjiliɔ wakeketsha ndo w’ohomba ɔsɔ wele ondo wakafundama ntondo dikambo di’ase Juda, mɛnyaka dia Yeso mbele Mɛsiya wakalakema, Ɔna Nzambi. Naka sho mbidja yimba efula lo losango lele lɔkɔ, kete dui sɔ diayokeketsha mbetawɔ kaso le Nzambi ka mɛtɛ, le Ɔnande ndo lo alaka Ande.—Heb. 4:12.
“DIULELU DIA L’ULUNGU DIAYA SUKI”
Mateo akake epole ɔsɛkɛ lo ɔtɛ a dui wendana la Diolelo ndo lo wetshelo waki Yeso, kânga mbele sala ngasɔ akalembetshiyaka funda akambo aha la mbalɔnga lo ndjela woho wakawayasalemaka. Ɛnyɛlɔ, Dako dia lo dikona fundama lo etatelo ka dibuku, kânga mbele Yeso akadisha oya l’atei atei wa olimu ande.
Etena kakandakambaka olimu ande la Ngalileya, Yeso akasale ahindo, akasha apɔstɔlɔ ande 12 alako wendana la olimu w’esambishelo, akânya Afarisɛ, ndo akakambe la wɛɛla wakakaka epole ɔsɛkɛ lo awui wendana la Diolelo. Oma lâsɔ, nde akamɔ oma la Ngalileya ko akaye “lu beke dia Judiya, la wedi wa Jorodana.” (Mat. 19:1) Lam’akiwɔ lo mboka, Yeso akatɛ ambeki ande ate: ‘Sho anɛ watatshu otsha la Jerusalɛma, Ɔna onto ayanyema dia nde mvɔ ndo lushi la sato nde ayolɔ oma lo nyɔi.’—Mat. 20:18, 19.
Ekadimwelo lo ambola w’oma l’Afundelo:
3:16—Lo yoho yakɔna ‘yakadihɔ olongo’ etena kakabatizama Yeso? Ondo dui sɔ mɛnyaka dia Yeso akohɔ lɔsɛnɔ lakandasɛnaka l’olongo la ntondo ka nde ndjoya la nkɛtɛ.
5:21, 22—Onde tondjɛ onto ɛtɛkɛta wa kɔlɔ la kɛlɛ ndeka tetemala mbomalɛ kɔlɔ? Yeso akewola dia onto latetemala momalɛ ɔnango ambosala pɛkato ka woke. Koko tondja ɛtɛkɛta wa kɔlɔ la kɛlɛ ndeka kɔlɔ, ndo dui sɔ akakoke konya di’onto tosamba lo tuminadi ta lâdiko lo dihole dia samba le toshushi ta lo ngelo kakinde.
5:48—Onde sho kokaka mɛtɛ monga ‘kokele, oko wele Shɛso lele l’olongo kokele’? Eelo, koko lo yoho yele la elelo. Lanɛ Yeso akatɛkɛtaka dikambo dia ngandji ndo nde akatɛ ampokami ande dia mbokoya Nzambi ndo monga kokele lo ngandji kawɔ. (Mat. 5:43-47) Lo yoho yakɔna? Lo mboka ndo atunyi awɔ ngandji.
7:16—Oma lo “elua” akɔna weyama ɔtɛmwɛlɔ wa mɛtɛ? Elowa ɛsɔ hawendana tsho la lɔkɛwɔ laso. Vɔ mendanaka nto la dietawɔ diaso, mbuta ate wetshelo wayelaso.
10:34-38—Onde losango la lo Afundelo pombaka manyema ɔnɛ lɔ mbadja diatɔnelo lo nkumbo? Kema. Diatɔnelo diɔtɔ lo nkumbo ndjaka oma lo dionga diayala la ase nkumbo wele kema ambetawudi. Vɔ mbeyaka tona kana ndɔshana la Lokristo, dui sɔ mbadja diatɔnelo lo nkumbo.—Luka 12:51-53.
11:2-6—Naka oma l’ɔkɔngɔ wa nde mboka dui diaki Nzambi, Joani akeye dia Yeso mbaki Mɛsiya, lande na kakandambola Yeso nto ɔnɛ wɛ “keli nd’ako layayi”? Ondo Joani akoke dimbola sɔ dia nde kondja eshikikelo oma le Yeso ndamɛ. Ndo nto, Joani akalange mbeya dia kana aki “ukina” lakahombe ndja lo lowandji la Diolelo ndo ndjokotshɛ ase Juda awui tshɛ wakawalongamɛka. Okadimwelo waki Yeso wakɛnya dia ndoko onto lakahombe ndjoya l’ɔkɔngɔ ande nto.
19:28—‘Waoho dikumi la ahende wa Isariyɛlɛ’ wayohomba nomboshama wekɔ didjidji dia na? Vɔ kema didjidji dia waoho dikumi la ahende wa Isariyɛlɛ wa lo nyuma. (Ngal. 6:16; Eny. 7:4-8) Apɔstɔlɔ wakatɛkɛtaka Yeso dikambo diawɔ wakahombe ndjonga anto amɔtshi wa lo Isariyɛlɛ wa lo nyuma, koko aha toshushi ta wanɛ wakenga Isariyɛlɛ wa lo nyuma. Yeso akadje ‘sheke nde la wɔ dikambo dia diolelo,’ ndo vɔ wakahombe monga ‘diolelo ndo ɛlɔmbɛdi wa Nzambi.’ (Luka 22:28-30; Eny. 5:10) Wanɛ wakenga Isariyɛlɛ wa lo nyuma “wayulumbuya wa la kete.” (1 Kor. 6:2) Ɔnkɔnɛ, ‘waoho dikumi la ahende wa Isariyɛlɛ,’ wayolomboshama oma le wanɛ wele lo kiti ya diolelo ya l’olongo, wekɔ lo nembetshiya ondo andja ɔnɛ wele bu l’atei wa olui wa nkumi ya dikanga, kana w’ɛlɔmbɛdi, oko wakadiɛnyaka waoho 12 lo Lushi l’Ekesanelo.—Lew., tshap. 16.
Wetshelo le so:
4:1-10. Ɔkɔndɔ ɔnɛ tetshaka dia Satana ekɔ onto la mɛtɛ koko aha didjidji dia kɔlɔ. Nde kambaka la “saki ka dimba, ndu saki ka ashu, ndu utaku a lumu,” dia tohemba. Koko, kamba la atɔndɔ wa lo Afundelo ayotokimanyiya dia sho tshikala la kɔlamelo le Nzambi.—1 Joani 2:16.
5:1–7:29. Teyake ehomba aso wa lo nyuma. Tonge anto walanga wɔladi. Totone tokanyi ta mindo. Tokotshake ɛtɛkɛta aso. Etena kalɔmbaso, tetshake wahɔ wa lo nyuma la ntondo ka wahɔ wa l’emunyi. Tonge ɛngɔnyi le Nzambi. Toyange ntondotondo Diolelo ndo ɔlɔlɔ wa Nzambi. Tatolomboshake anto akina. Tosalake lolango la Nzambi. Dako dia lo dikona diekɔ mɛtɛ la wetshelo w’ohomba efula!
9:37, 38. Sho pombaka sala akambo lo yoho yɔtɔnɛ la kɛnɛ kalɔmbaso Owandji dia nde ‘toma ekambi lo dinela diande,’ mbuta ate sho pombaka ndjasha la ohetoheto tshɛ l’olimu wa mbetɛ anto ambeki.—Mat. 28:19, 20.
10:32, 33. Hatohombe pondjo mboka wɔma dia tɛkɛta dikambo dia mbetawɔ kaso.
13:51, 52. Shihodia akambo wa mɛtɛ wendana la Diolelo totshutshuyaka dia mbetsha anto akina ndo mbakimanyiya dia vɔ lawɔ shihodia akambo wa mɛtɛ w’ohomba asɔ.
14:12, 13, 23. Tena diayaokaso oko ana wa tshike diekɔ tena dia kana yimba dimɛna.—Mako 6:46; Luka 6:12.
17:20. Dia mbekola wekamu wele oko akona watoshimba dia sho pama lo nyuma ndo dia ndɔshana la ekakatanu, sho pombaka monga la mbetawɔ. Hatohombe minya yimba dia keketsha mbetawɔ kaso le Jehowa ndo lo alaka ande.—Mako 11:23; Luka 17:6.
18:1-4; 20:20-28. Woho wakiwɔ komonga kokele ndo kɛnɛ kaketaka lo ɛtɛmwɛlɔ wakâdinge wakalekaka mbika epole ɔsɛkɛ lo dihole dia lokumu diele la onto akakonya ambeki wa Yeso dia vɔ ndeka ndjakiyanya dikambo dia ahole wa lokumu. Sho pombaka monga la okitshakitsha, mbewɔ tokanyi ta kɔlɔ ndo monga la kanyi y’ɔlɔlɔ lo kɛnɛ kendana la waɛsɛ w’olimu ndo la ɛkɛndɛ wa l’atei w’etshumanelo.
“ON’A UNTU AYUTUKIMWAMA”
Yeso akɔtɔ la Jerusalɛma lo Nisana 9, 33 lo tena diaso nɛ “ahemi ladiku dia punda.” (Mat. 21:5) Lushi lakayele, nde akatshu lo tɛmpɛlɔ ndo akakiɛdia. Lo Nisana 11, nde aketsha lo tɛmpɛlɔ, akânya afundji la Afarisɛ, ndo oma lâsɔ, nde akasha ambeki ande ‘djembetelo ya wôngelo ande ndo ya ekomelo ka dikongɛ nɛ di’akambo.’ (Mat. 24:3) Lushi lakayele, nde akawatɛ ate: “Nyu mbeyaka nyati: L’okongo a nshi hyendi, lushi la wuki l’Elekanelu layuyala. On’a untu ayukimoma dia vo [mbohanɛ l’otamba].”—Mat. 26:1, 2.
Tekɔ lo Nisana 14. L’ɔkɔngɔ wa nde mpɔhɔla Eohwelo ka nyɔi kande kaki ka emembe, mbakafungama Yeso, mbakawawonde, mbakawolombosha ndo wakawohanɛ l’otamba. Lo lushi la sato, nde akolwama oma lo nyɔi. La ntondo ka nde mbidɛ l’olongo, Yeso lakolwama, akadjangɛ ambeki ande ate: ‘Nyotshu ndo nyetɛ anto wa lo wedja tshɛ ambeki.’—Mat. 28:19.
Ekadimwelo lo ambola w’oma l’Afundelo:
22:3, 4, 9—Etena kakɔna kakashama ndjeta shato y’oya lo dambo dia tshuki? Leeta la ntondo la tshumanya olui w’otshukami lakashama etena kakatatɛ Yeso la ambeki ande sambisha lo 29 tena diaso nɛ, ndo lakatetemala polo lo 33 tena diaso nɛ. Leeta la hende lakashama oma lo etena kakalongola ambeki nyuma k’ekila lo Pɛntɛkɔsta ka lo 33 tena diaso nɛ polo lo 36 tena diaso nɛ. Ndjeta yakɔ hiende yakashama le ase Juda, le ambetawudi w’ase Wedja, ndo le ase Samariya. Koko leeta la sato lakashama le anto waki l’andja w’osomba, mbuta ate, ase Wedja waki kombahema ohekele, lɔ lakashama tatɛ lo 36 tena diaso nɛ, etena kakakome Kɔnɛliyo owandji w’alembe w’ase Rɔma ombetawudi ndo lɔ lekɔ lo tetemala polo lo nshi yaso nyɛ.
23:15—Lande na kele onto lakakomaka ombetawudi oma le Afarisɛ ‘akahombaka ntshɔ lo Ngɛhɛna mbala hiende’ oleki Afarisɛ vɔamɛ? Mbeyaka monga ko anto amɔtshi wakakome ambetawudi oma le Afarisɛ waki ntondo atshi wa pɛkato ya weke. Ɔnkɔnɛ, lo koma ambetawudi waki Afarisɛ, vɔ wakaleke ntsha kɔlɔ, ndo wakaleke manyema oleki embetsha awɔ. Omalɔkɔ, mbakawahombe ‘ntshɔ lo Ngɛhɛna’ mbala hiende, mbuta ate nongola dilanya diakaleke ndo dia Afarisɛ w’ase Juda.
27:3-5—Lonyangu laki Judasɛ lakendanaka la na? Ndoko kɛnya dia lonyangu lakonge la Judasɛ laki ndjatshumoya ka mɛtɛ. Lo dihole dia nde nyanga edimanyielo kaki Nzambi, nde akatoshola kɔlɔ kande le ewandji w’ɛlɔmbɛdi ndo le dikumanyi di’anto. Lo sala ‘pɛkato kakonya lo nyɔi,’ Judasɛ akayaoke mɛtɛ dia nde amɛmba onongo ndo aya ndoko la elongamelo. (1 Joa. 5:16) Lonyangu laki lande lakendanaka la woho wakinde komonga ndoko la elongamelo nto.
Wetshelo le so:
21:28-31. Kɛnɛ koleki ohomba lo washo wa Jehowa, ele woho wasalaso lolango lande. Ɛnyɛlɔ, sho pombaka ndjasha la ohetoheto tshɛ lo esambishelo ka Diolelo ndo l’olimu wa mbetɛ anto ambeki.—Mat. 24:14; 28:19, 20.
22:37-39. Ɛlɛmbɛ ehende woleki weke mɛnyaka mɛtɛ lo tshena pe kɛnɛ kalɔmba Nzambi wanɛ wɔ̂tɛmɔla!
[Osato wa lo lɛkɛ 31]
Onde tekɔ la ohetoheto l’olimu wa dinela?
[Efundelo wɛnya kanga]
© 2003 BiblePlaces.com
[Osato wa lo lɛkɛ 31]
Mateo akatɔtɔmiya ɔtɛ a dui wendana la Diolelo