Ehomɔ ka nkamba la tɔ dia nkimanyiya ɛlɔngɔlɔngɔ

dia mbohɔka Otungi awɔ

AMBETA ɛnɔnyi oko 3 000 wakafunde Sɔlɔmɔna pami ka lomba ate: “Nyohɔ Otungi anyu etena kekenyu ɛlɔngɔlɔngɔ.” (Und. 12:1, Today’s English Version) Ɛlɔngɔlɔngɔ la esekaseka w’Akristo wambokondja ehomɔ kekina kayowakimanyiya dia vɔ nsala dikambo sɔ. Dibuku Les jeunes s’interrogent — Réponses pratiques, volume 2, diakatondjama lo Losanganya la distrikɛ l’Ɛmɛnyi wa Jehowa lakasalema l’andja w’otondo oma lo Ngɔndɔ ka tanu 2008 polo lo Ngɔndɔ ka ntondo 2009 laki l’ɔtɛ a dui ɔnɛ: “Nyuma kaki Nzambi kekɔ lo tɔlɔmbɔla.”

Lohoso la l’etei ka dibuku sɔ lekɔ la mukanda wakafundɛ Olui-walɔmbɔla ɛlɔngɔlɔngɔ la esekaseka. Etenyi kɛmɔtshi ka mukanda ɔsɔ mbutaka ɔnɛ: “Tekɔ lo nɔmba l’otema ɔtɔi di’awui wele lo dibuku nɛ nyokimanyiya dia nyu nshika tanga la ntondo ka tɔsɛngiya ndo ehemba wahomana la nyu, nyu ɛlɔngɔlɔngɔ la esekaseka ɛlɔ kɛnɛ ndo nyɛnya woho wakokanyu mbɔsa tɛdikɔ tɔtɔnɛ la lolango laki Nzambi.”

Ambutshi kombolaka mɛtɛ dia mbodia anawɔ “lu elembe la lu wetshelu wa Khumadiondjo.” (Ef. 6:4) Koko, etena kakotshawɔ ɛnɔnyi dikumi l’ɛmɔtshi, ɛlɔngɔlɔngɔ la esekaseka efula shishaka wɛkamu wele la wɔ le wɔ vɔamɛ ndo mongaka la ohomba w’efula wa ɛlɔmbwɛlɔ. Naka wɛ ekɔ ombutshi wele la ɔna laya la ɛnɔnyi dikumi l’ɛmɔtshi, ngande wakokayɛ mbôkimanyiya dia nde ndeka nkondja wahɔ oma lo dibuku nɛ? Alako amɔtshi wakokayɛ ndjela vɔanɛ:

▪ Onga la dibuku diayɛ hita ndo yaekesanyiya la diɔ dimɛna. Kɛsɔ nɔmbaka diaha nkomɛ tsho lo diada. Sala nto la wolo dia nembetɛ woho wolembetshiyami tokanyi lɔkɔ. Lo dihole dia mbutɛ tsho ɛlɔngɔlɔngɔ la esekaseka kɛnɛ kele ɔlɔlɔ la kɛnɛ kele kɔlɔ, dibuku sɔ salaka la wolo dia ndowanya ‘akoka awɔ w’ekanelo ka yimba.’ (Heb. 5:14) Diɔ mbashaka nto alako w’ohomba wendana la woho wakokawɔ mbeta lo wedi w’akambo wa mɛtɛ. Ɛnyɛlɔ, tshapita 15 (“Ngande wakokami nshika tanga la ntondo ka tɔsɛngiya t’asekami?”) hatɛ tsho ɛlɔngɔlɔngɔ la esekaseka dia vɔ nshika tanga la ntondo ka tɔsɛngiya tɔsɔ. Yɔ mbalembetshiyaka woho wa nkamba la atɔndɔ wa lo Bible dia nkandola ekakatanu ndo mbashaka ekadimwelo w’eshika wayowakimanyiya dia mbeya “nkaluya untu tshe diui.”—Kol. 4:6.

▪ Kamba la tenyi dia lɔkɔ dialɔmba di’onto nkadimola. Kânga mbele tenyi sɔ diakalɔngɔswama dikambo dia ɛlɔngɔlɔngɔ la esekaseka, lande na kahayafunde ekadimwelo lo dibuku diayɛ naka kokaka?a Ɛnyɛlɔ, etena kasɛdingolayɛ ambola ahende walɔmba onto dia nkadimola wele lo lɛkɛ 16 wendana la diembwanelo di’otsha lo diwala, sala la wolo dia mbohɔ woho wakayaokaka etena kakiyɛ la ɛnɔnyi wele la ɔnayɛ. Ondo wɛ ayolanga mfunda ekadimwelo ayɛ lo ahole wakawatshike dia mfunda okadimwelo, mbuta ate woho wakayakoke nkadimola lo ambola asɔ lo etena kɛsɔ. Oma lâsɔ, yambola wate: ‘Ngande wambotshikitana tokanyi tami lo dikambo sɔ lo edja k’ɛnɔnyi wambeta? Eokelo kakɔna kambomokondja ntatɛ lam’akimi la ɛnɔnyi dikumi l’ɛmɔtshi, ndo ngande wakokami kisambiyɛ ɔnami dimɛna?’

▪ Lɛmiya awui wa sheke w’ɔnayɛ. Tenyi dia lo dibuku dialɔmba onto dia nkadimola diakalɔngɔswama dia nkeketsha ɔnayɛ dia ntɛkɛta ndo dia nde mfunda okadimwelo lo dibuku diande kana monga l’okadimwelo lo yimba. Oyango ayɛ ele wa mbeya kɛnɛ kele l’otema ande, koko aha kɛnɛ kele lo dibuku diande. Lo lɛkɛ 3 lo etenyi kele l’ɔtɛ a dui ɔnɛ: “Diewoyelo le ambutshi,” dibuku mbutaka ɔnɛ: “Dia nkeketsha anayɛ wele la ɛnɔnyi dikumi l’ɛmɔtshi dia vɔ mfunda awui hwe hwe lo abuku awɔ, shawɔ diaaso dia vɔ salaka awui amɔtshi lo sheke. L’ɔkɔngɔ, vɔ mbeyaka ndjokosholɛ akambo wakawafunde.”

Ehomɔ ka nkamba la tɔ lo wekelo wa Bible wa lo nkumbo

Les jeunes s’interrogent, volume 2, ekɔ ehomɔ ka dimɛna efula ka nkamba la tɔ lo Ɔtɛmwɛlɔ wa lo nkumbo. Lam’ele dibuku diakɔ bu la ambola wa wekelo wa odingɔ la odingɔ, ngande wakokanyu nkamba la diɔ na? Lande na kahanyatshikitanya yoho yasalanyu wekelo ɔsɔ lo nkamba la yoho mɔtshi yayoleka monga la etombelo w’ɛlɔlɔ le ananyu na?

Ɛnyɛlɔ, nkumbo mɔtshi mbeyaka mɛna ɔlɔlɔ salaka wɛnyɛlɔ etena kasɛdingolawɔ etenyi kele l’ɔtɛ a dui ɔnɛ: “Woho wa ndɔshana la tɔsɛngiya t’oma le olui w’anto” wele lo lɛkɛ 132 ndo la 133. Dimbola dia ntondo diele lo lɛkɛ 132 kokaka nkimanyiya ɔnayɛ dia nde mbeya okakatanu woleki wolo le nde. Dimbola dia hende mɛnyaka lo dikambo diakɔna diakokande mpomana la shɛngiya shɔ. L’ɔkɔngɔ wa nyu nsɛdingola etombelo waya lo nkɔ kana nshika tanga la ntondo ka tɔsɛngiya t’oma le angɛnyi, ɔnayɛ nɔmbamaka dia nɔngɔsɔla ekadimwelo ɛmɔtshi wakokande mbisha asekande wɛnya dia nde ambetawɔ, ambotona dia nsala kɛnɛ kawotɛwɔ kana ambowaoka dimbola. Kimanyiya ɔnayɛ dia nde mbeya kɛnɛ kakokande mbuta ndo nɔngɔsɔla ekadimwelo wayondokoka mbisha asekande la eshikikelo ndo la dietawɔ tshɛ.—Osam. 119:46.

Ehomɔ kakimanyiya dia nsawola

Les jeunes s’interrogent, volume 2, keketshaka ɛlɔngɔlɔngɔ la esekaseka dia vɔ sawolaka la ambutshi awɔ. Ɛnyɛlɔ kiombo yele l’ɔtɛ a dui ɔnɛ: “Ngande wakokami nsawola la mama kana la papa lo kɛnɛ kendana l’awui wa dieyanelo?” (lɛkɛ 63-64) ndo yele l’ɔtɛ a dui ɔnɛ: “Sawola la ambutshi ayɛ!” (lɛkɛ 189) mbishaka alako w’eshika wendana la woho wa ntatɛ sawo diendana l’awui wahalange ambutshi mboka kana mɛna. Ɔna womoto ɔmɔtshi lele la ɛnɔnyi 13 akafunde ate: “Dibuku nɛ diakambisha dihonga dia dimi mbutɛ ambutshi ami awui waki lo yimba yami, oyadi awui wakamasale.”

Dibuku diakɔ keketshaka sawo lo toho tokina nto. L’ekomelo ka tshapita tshɛ, sho tanaka kiombo yele l’ɔtɛ a dui ɔnɛ: “Akanayɛ?” Sho kokaka nkamba la kiombo shɔ aha paka di’ovuswelo, koko ndo dia nkongɛ awui wa ndjɔkɛtshanya lo wekelo wa lo nkumbo. Otsha l’ekomelo ka tshapita tshɛ, sho tanaka nto kiombo yele l’ɔtɛ a dui ɔnɛ: “Woho wa nkamba l’awui wambomeka!” Kiombo shɔ mbishaka ɛlɔngɔlɔngɔ la esekaseka diaaso dia vɔ mfunda toho ta shikaa takokawɔ nkamba la kɛnɛ kamboweka lo tshapita yakɔ. Etenyi k’ekomelo ka kiombo tshɛ yele l’ɔtɛ a dui ɔnɛ: “Woho wa nkamba l’awui wambomeka!” mbutaka ɔnɛ: “Kɛnɛ kayomolanga mimbola papa kana mama lo dikambo nɛ ele . . .” Kɛsɔ kokaka nkimanyiya ɛlɔngɔlɔngɔ la esekaseka dia vɔ nyanga alako w’eshika oma le ambutshi awɔ.

Nanda otema!

Oko weyɛ ombutshi, oyango ayɛ ele wa munanda otema w’ɔnayɛ. Dibuku Les jeunes s’interrogent, volume 2, kokaka kokimanyiya dia wɛ nsala dikambo sɔ. Tɔsɛdingole woho wakonge ombutshi ɔmɔtshi l’akoka wa nkamba la dibuku sɔ dia nkeketsha sawo lam’asande l’ɔnande la womoto.

“Dimi la Rebekah taki l’ahole amɔtshi w’amɛna wakatalangaka mbeteta l’ekolo, lo dikalo kana lo mutuka. Ahole asɔ wakatoshaka diaaso dia sho dihwanɛ etema.

“Etenyi ka ntondo kakatasɛdingola lo dibuku diakɔ ele mukanda w’oma le Olui-walɔmbɔla ndo ‘Diewoyelo le ambutshi.’ Dimi lakalangaka dia ɔnami la womoto mbeya dia oko wofundamidiɔ lo lɛkɛ 3, nde hakoke mengenga dia mfunda kɛnɛ kalangande lo dibuku diande. Dimi hatoyanga dia menda kɛnɛ kakandafunde.

“Lakasha Rebekah diaaso dia nde nsɔna totshapita talangande sho nkɛtshanya ndo nyɛ yayondolanga sho ntatɛ la yɔ. Tshapita yakandasɔnɛ ntondo aki nyɛ yele l’ɔtɛ a dui ɔnɛ: ‘Onde dimi pombaka nkɛnya tɔkɛnyɔ ta lo vidɛo?’ Dimi kɔfɔnyaka kânga yema dia nde ayɔsɔna tshapita shɔ! Koko nde aki l’ɔkɔkɔ wakandasɔnɛ tshapita shɔ. Efula k’angɛnyi ande wakakɛnyaka kɛnyɔ mɔtshi y’awui a ngala yakawalangaka efula. Dimi kombeyaka awui wa ngala ndo ɛtɛkɛta wa kɔlɔ waki lɔkɔ! Koko lakayeyaka awui asɔ tshɛ etena kakatakɛtshanya kiombo yele lo lɛkɛ 251 yele l’ɔtɛ a dui ɔnɛ: “Woho wa nkamba l’awui wambomeka!” Ndo kiombo shɔ yakakimanyiya Rebekah dia nɔngɔsɔla okadimwelo ɔmɔtshi wakokande mbisha onto tshɛ layowɔsɛngiya dia nkɛnya kɛnyɔ shɔ.

“Etena kɛsɔ, Rebekah komengenga dia mbutɛmi kɛnɛ kakandafunde lo dibuku diande. Wekelo aso wakayokomaka sawo di’otale. Takatengɔnyaka wadielo ndo oma lâsɔ nde akalangaka nembetshiya dikambo tshɛ, mbidja ndo esato kana awui wa lo tokombo. Dikambo sɔ diakambisha diaaso dia dimi mbotɛ woho wakimi etena kakimi la ɛnɔnyi ande, ko oma lâsɔ nde mbutɛmi woho wele akambo nshi nyɛ. Nde akalangaka mbutɛmi oseka dikambo tshɛ!”

Naka wɛ ekɔ ombutshi, kete aha la tâmu wɛ aki la ɔngɛnɔngɛnɔ etena kakatombe dibuku sɔ. Kakianɛ, wɛ aya la diaaso dia nkamba la diɔ dimɛna. Olui-walɔmbɔla nongamɛka dia dibuku Les jeunes s’interrogent — Réponses pratiques, volume 2, diayonga tshondo y’ɔtshɔkɔ le nkumbo kayɛ. Dibuku sɔ diakimanyiya anto tshɛ, djekoleko ɛlɔngɔlɔngɔ la esekaseka aso wa ngandji dia vɔ ‘ntetemala nkɛndakɛnda la nyuma k’ekila.’—Ngal. 5:16.

[Nɔte ka l’ɛse ka dikatshi]

[Kiombo ya lo lɛkɛ 30]

Kɛnɛ kakate ɛlɔngɔlɔngɔ la esekaseka ɛmɔtshi

“Ɔnɛ ekɔ dibuku diele wɛ pombaka mbidjasɛ ndo mbɔsa kidiyɔ kayɛ ko diada ɔkɔkɛ ɔkɔkɛ. Woho wakadialɔngɔswama oko jurnalɛ y’onto ndamɛ mbishaka onto diaaso dia nde nkana yimba l’awui wa lɔkɔ lo ndamɛ la oyango wa nde mbeya yoho ya lɔsɛnɔ yoleki dimɛna yahombande monga la yɔ.”—Nicola.

“Anto efula, mbidja ndo wanɛ wakɛnamaka dia vɔ ndjakiyanyaka dikambo diami wakasɛngiyaka dia dimi membwana dikambo dia diwala. Etenyi ka ntondo ka dibuku nɛ kakambetawoya dia oyadi kakɔna kayombutɛ onto akɔna tshɛ, dimi bu suke dia membwana dikambo dia diwala.”—Katrina.

“Kiombo yele l’ɔtɛ a dui ɔnɛ: ‘Onde wɛ ekɔ lo nkana yimba dia batizama’ yambokimanyiya dia mbɔsa batismu kami oko dui di’ohomba efula. Yɔ yambokeketsha dia dimi nyomɔsɛdingola mbekelo yami yendana la wekelo ndo la dɔmbɛlɔ.”—Ashley.

“Kânga mbele ambutshi ami w’Akristo wakambetsha oma ko dikɛnda diami, dibuku nɛ diambokimanyiya dia dimi nkana yimba lo dimɛ lo kɛnɛ kendana la wanya wahombami ntakula lo lɔsɛnɔ. Diɔ diambokimanyiya nto dia dimi ndeka dihwɛ ambutshi ami otema.”—Zamira.

[Osato wa lo lɛkɛ 31]

Ambutshi le, nyoleke ndjaekesanyiya la dibuku nɛ

[Osato wa lo lɛkɛ 32]

Yadjɛ oyango wa munanda otema w’ɔnayɛ