Ambutshi, nyokoke sango dianyu di’oshinga wolo
‘Lomba mbishaka ekokelo. Lɔ latolamaka akanga alɔ.’—UNDAKI 7:12.
1. Lande na kahomba ambutshi mbɔsa anawɔ oko woshasha?
AMBUTSHI mbôta onto l’oyoyo lasɛna lele la eongelo ka demba ndo la lonto lafɔna la lawɔ. Bible mbelɛka ɔna la tshitshɛ ɔsɔ ɔnɛ: “Ushasha [w’]uma le [Jehowa].” (Osambu 127:3) Lam’ele nde mbele Kiɔkɔ ya mɛtɛ ya lɔsɛnɔ, Jehowa mɛtɛ mbishaka ambutshi kɛnɛ kele kakinde. (Osambu 36:9) Ambutshi, ngande wɔsanyu woshasha w’oshinga wolo wakanyalongola oma le Nzambi ɔsɔ na?
2. Kakɔna kakasale Manɔa etena kakandeye ɔnɛ nde ayanga koma ombutshi wa pami?
2 Aha la tâmu, woshasha ɔsɔ pombaka nongɔma la okitshakitsha ndo la lowando. Ambeta ɛnɔnyi ndekana 3000, ose Isariyɛlɛ ɔmɔtshi lakawelɛka Manɔa akasale dikambo dimɔtshi etena kakatɛ ondjelo wadɛnde ɔnɛ, nde ayota ɔna. Etena kakandoke lokumu l’ɔlɔlɔ lɔsɔ, Manɔa akalɔmbɛ ate: “Khumemi li, etawo umvutshi aye ako lakayatumi nkalula le su, dia ntetsha akambu wayutuhumba ntshela ona layututa.” (Embadi 13:8) Ambutshi, wetshelo akɔna wakokanyu kondja oma lo ɛnyɛlɔ kaki Manɔa?
Lande na kele ekimanyiyelo kaki Nzambi kekɔ ohomba ɛlɔ kɛnɛ?
3. Lande na kele ekimanyielo kaki Nzambi kekɔ ohomba dia mbodia ana djekoleko ɛlɔ kɛnɛ?
3 Ɛlɔ kɛnɛ mbamboleka ambutshi monga l’ohomba wa ekimanyielo kaki Jehowa dia vɔ mbodia anawɔ. Lande na? Nɛ dia Satana Diabolo nde la andjelo ande wakakadjema oma l’olongo oya la nkɛtɛ. Bible mbutaka ɔnɛ: “Fono kayuyala la kete . . . ne dia uhimbanyi akayi le nyu. Ndi eko la kele ka wuki; ndi mbeyaka ati: Etena kami kambusukana.” (Enyelo 12:7-9, 12) Bible nembetshiyaka dia Satana ekɔ “uku tambwe ka dikita kayanga walendi.” (1 Petero 5:8) Tambwɛ mɔnganyaka nyama yoleki wɔdu, mbala efula y’akɛnda. Diakɔ diele ekɔ dui dia lomba le ambutshi wa Akristo dia vɔ nyangaka ɛlɔmbwɛlɔ ka Jehowa dia kokɛ anawɔ. Welo wa ngande wadjayɛ dia kokɛ anayɛ?
4. a) Etena keyawɔ dia tambwɛ kekɔ lo dikita lo ɛtshi kawɔ ka nkɛtɛ, kɛsɔ tshutshuyaka ambutshi dia sala dui diakɔna? b) Kakɔna kele l’ana ohomba dia vɔ ndjakokɛ?
4 Naka wɛ ambeya dia tambwɛ kekɔ lo dikita lo ɛtshi ka nkɛtɛ kodjashinyu, kete dui dia ntondo diayoyosala ele kokɛ anayɛ. Satana ekɔ ondjakanyi. Nde nyangaka dia minganyiya ekambi waki Nzambi, diaha vɔ mbetawɔma nto le nde. (Jobo 2:1-7; 1 Joani 5:19) Ana w’akɛnda wekɔ anto wa wɔdu munda. Dia pandɔ oma lo tolonga ta Diabolo, ana pombaka mbeya Jehowa ndo kitanyiya awui ande. Ewo k’oma lo Bible kekɔ ohomba. Yeso akate ate: “Lumu la pundju lone, eli [weke dia] nkêya, weme [Nzambi k]a mete, la Jesu Kristu, lakayatumi.” (Joani 17:3) Lâdiko dia lâsɔ, ana wa akɛnda wekɔ l’ohomba wa lomba, mbuta ate dikoka dia shihodia ndo kamba la kɛnɛ kekawɔ. Lam’ele ‘lomba latolamaka akanga alɔ,’ nyu ambutshi pombaka kɔkɔmiya akambo wa mɛtɛ l’etema w’ananyu. (Undaki 7:12) Ngande wayonyosala dikambo sɔ na?
5. a) Ngande wakoka ɔna kondja lomba? b) Ngande wɛnya dibuku dia Tukedi ohomba wa lomba?
5 Nyu kokaka ndo pombaka mbadiɛka ananyu Ɔtɛkɛta waki Nzambi. Koko dia mbakimanyiya dia vɔ nanga Jehowa ndo kitanyiya awui ande, ambutshi nɔmbamaka dia shihodia awui akɔ dimɛna aha paka mbadiɛka ana Ɔtɛkɛta waki Nzambi oto ko pe. Ɛnyɛlɔ: Vɔ mbeyaka mbutɛ ɔna diaha tenyanya otadimbo la ntondo ka nde menda lo wedi akɔ ehende. Koko ana amɔtshi hawokitanyiya dui sɔ. Lande na? Nɛ dia mbeyaka monga ko hawolembetshiyisha ɔna dia nde koka tɔtɛtama mutuka kana mbôkiya dimɛna wâle wele la dikambo sɔ, dia nde minya ‘nginyanginya’ yakoka mbôkonya lo wâle. Dia kimanyiya ɔna dia nde monga la lomba, dikambo sɔ nɔmbaka etena ka otale, ndo monga la lotutsha. Koko lomba lekɔ mɛtɛ ohomba! Bible mbutaka ɔnɛ: “Mbuka ya[l]o, yeli mbuka y’ongenongeno, ndu tuwuka ta[l]o teli ki. [L]o [l]eli utamba a lumu le wane watu[l]ekamaka. Untu tshe latutshikalaka la [l]o, watuwetaka vati: Kanga ongenongeno.”—Tukedi 3:13-18; 22:15.
Wetshelo washa lomba
6. a) Lande na kele mbala efula ana salaka awui aha la lomba? b) Ta diakɔna dialɔma?
6 Mbala efula ana w’akɛnda tshaka awui wa kɔlɔ, aha nɛ dia vɔ kombetshama kɛnɛ kele ɔlɔlɔ, koko nɛ dia wetshelo komunanda etema awɔ, mbuta ate lonto la l’etei. Diabolo ekɔ lo ndɔsha la wolo dia nɔmbɔla etema w’ana w’akɛnda. Yoho yasalande dikambo sɔ ele lo mbatshika dia vɔ sɛngiyama la awui wa kɔlɔ wa l’andja ande. Nde kambaka nto la nsaki ka sala pɛkato kakawahowɔ katshutshuya dia ntsha awui wa kɔlɔ. (Etatelu 8:21; Osambu 51:5) Ambutshi pombaka shihodia ɔnɛ ta dia mɛtɛ diekɔ lo ndɔma dia minganyiya etema wa anawɔ.
7. Lande na kele hatokoke tsho komɛ dia mbutɛ ɔna kɛnɛ kele ɔlɔlɔ kana kɛnɛ kele kɔlɔ?
7 Mbala efula ambutshi totɛka ɔna kɛnɛ kele ɔlɔlɔ kana kɔlɔ, wafɔnya ɔnɛ wambowetsha atɔndɔ amɔtshi wendana la lɔkɛwɔ. Vɔ mbeyaka mbutɛ ɔna ɔnɛ ekɔ kɔlɔ mbuta kashi, mbiva kana ɔnɛ wanɛ wahatatshukana hawokoke mbeyana. Koko, ɔna pombaka keketshama efula dia kitanyiya aha paka nɛ dia ambutshi ande wekɔ lo mbotɛ, koko nɛ dia awui asɔ wekɔ ɛlɛmbɛ waki Jehowa. Ɔna pombaka mbeya ɔnɛ ekɔ dui dia lomba kitanyiya ɛlɛmbɛ waki Nzambi.—Tukedi 6:16-19; Heberu 13:4.
8. Woho akɔna wa wetshelo wakoka kimanyiya ana dia vɔ sala akambo la lomba?
8 Woho wahakoke andja ɔnɛ manema fundo, diangɔ diotshikitanyi diele la lɔsɛnɔ, woho watshikitana deko, akambo asɔ tshɛ kokaka kimanyiya ɔna dikɛnda dia nde mbetawɔ ɔnɛ Otungi ɔmɔtshi wele la lomba tshɛ ekɔ. (Romo 1:20; Heberu 3:4) Lâdiko dia lâsɔ, pombaka mbetsha ɔna dia Nzambi mbolangaka ndo akɔshi yɛdikɔ oma lo olambo wa tshungo waki Ɔnande dia mbosha lɔsɛnɔ la pondjo ndo ɔnɛ nde kokaka ngɛnyangɛnya Nzambi lo kitanyiya kɛnɛ katande. Ondo lo etena kɛsɔ mbayoyɔsa ɔna yɛdikɔ ya kambɛ Jehowa, oyadi welo wayodja Diabolo dia mboshimba.—Tukedi 22:6; 27:11; Joani 3:16.
9. a) Kakɔna kalɔmba wetshelo washa lɔsɛnɔ? b) Kakɔna kahomba ambutshi sala ndo dikambo sɔ nɔmbaka na?
9 Woho wa wetshelo wakokɛ ɔna ndo wotshutshuya dia nde sala kɛnɛ kele ɔlɔlɔ nɔmbaka wenya, yambalo ndo monga la ekongelo kɛmɔtshi. Kɛsɔ nɔmbaka dia ambutshi mbetawɔ ɛlɔmbwɛlɔ k’oma le Nzambi. Bible mbutaka ɔnɛ: “Ndu nyu washi, . . . nyuwaudia lu elembe la lu wetshelu wa [Jehowa].” (Efeso 6:4) Dikambo sɔ alembetshiyadiɔ na? Lo Grɛkɛ kakatɛkɛtamaka ntondo, tshɛkɛta “wetshelu,” mbelaka kanyi ya “mbidja tokanyi lo.” Ɔnkɔnɛ ambutshi keketshamaka dia mbidja tokanyi ta Jehowa lo timba taki anawɔ. Ɔsɔ mɛtɛ ayoyala ekokelo ka woke le ana w’akɛnda! Naka ambutshi kɔkɔmiya tokanyi taki Nzambi ndo ekanelo kande ka yimba lo timba t’ana, kete vɔ wayokokamɛ oma l’awui wa kɔlɔ.
Nsaki kotshutshuyami la ngandji
10. Dia mbetsha ɔnayɛ lo yoho ya dimɛna, kakɔna kahombayɛ mbeya?
10 Koko, dia wɛ kotsha nsaki kayɛ ka mbodia ɔna dimɛna, welo ayɛ pombaka tshutshuyama la ngandji. Dui dimɔtshi di’ohomba diayokokimanyiya ele sawo di’ɔlɔlɔ. Yanga dia mbeya awui wakomɛ ɔnayɛ lo lɔsɛnɔ ndo kanyi yande l’awui akɔ. Lo diaaso di’ɔlɔlɔ, djasɛ la nde ndo keketshande la yewo dia nde tɛkɛta. Tena dimɔtshi, wɛ mbeyaka mamba kɛnɛ kayondokotɛ. Onga la yewo efula diaha dikambo sɔ kambiya lo yoho yamboleka. Koko, hokamɛnde la yambalo tshɛ.
11. Ngande wakoka ombutshi mbidja tokanyi ta Nzambi lo yimba ya ɔnande?
11 Lo mɛtɛ, mbeyaka monga ko nyambadiɛka ananyu ɛlɛmbɛ waki Nzambi w’oma lo Bible washimba awui wa mindo wa dieyanelo mbala efula. (1 Koreto 6:18; Efeso 5:5) Ondo dikambo sɔ diakakakatshiya lo wɛɔngɔ w’ananyu wa totshitshɛ kɛnɛ kangɛnyangɛnya Jehowa la kɛnɛ kahɔngɛnyangɛnya. Koko, dia mbidja tokanyi taki Jehowa lo wɛɔngɔ w’ananyu nɔmbaka dia mbidja welo efula. Ana wekɔ l’ohomba w’ekimanyielo dia kana yimba lo ohomba wa ɛlɛmbɛ wa Jehowa. Vɔ pombaka mbetawoyama ɔnɛ ɛlɛmbɛ ande wekɔ ɔlɔlɔ ndo mbelaka wahɔ ndo ɔnɛ ekɔ ohomba dia mbakitanyiya ndo ɔsɔ ekɔ dui dia dimɛna sala. Paka wɛ mbokanyi yimba la ɔnayɛ oma lo Afundelo dia nde mbetawɔ woho wɛna Nzambi awui mbakokadiɔ mbutama ɔnɛ wɛ ‘ambodja tokanyi tande’ lo yimba yande.
12. Ngande wakoka ombutshi kimanyiya ɔnande dia nde monga la kanyi y’ɔlɔlɔ lo kɛnɛ kendana l’awui wa dieyanelo?
12 Etena katɛkɛtayɛ la ɔna awui wendana la dieyanelo, wɛ koka mombola wate: “Onde wɛ mbetawɔka ɔnɛ kitanyiya ɔlɛmbɛ waki Jehowa washimba diaha mbeyana la onto la ntondo ka tshuki nimaka onto ɔngɛnɔngɛnɔ ɔmɔtshi?” Keketsha ɔnayɛ dia nde nembetshiya okadimwelo ande. L’ɔkɔngɔ wa nyu mvusola awui wa diambo wakasale Nzambi wendana la eotwelo k’ɔna, wɛ mbeyaka mombola ɔnɛ: “Onde wɛ fɔnyaka dia Nzambi kaso ka ngandji kokaka mbidja ɛlɛmbɛ watoshimba diaha sho ngɛnangɛna la lɔsɛnɔ? Kana onde wɛ fɔnyaka ɔnɛ ɛlɛmbɛ ande telaka ɔngɛnɔngɛnɔ ndo tokokɛka?” (Osambu 119:1, 2; Isaya 48:17) Eya kanyi yele l’ɔnayɛ lo dikambo sɔ. Oma lâsɔ wɛ mbeyaka ndjokotola yambalo yande lo bɛnyɛlɔ diɛnya woho wele awui wa mindo wa dieyanelo akakonya anto amɔtshi lo wâle ndo akawaela ekiyanu. (2 Samuele 13:1-33) Naka wɛ kanaka yimba la ɔnayɛ dia nde shihodia ndo mbetawɔ kanyi yaki Nzambi, kete wɛ ekɔ lo mbokimanyiya efula dia nde mbidja kanyi yaki Nzambi l’otema ande. Koko, ekɔ dikambo dikina diakokayɛ sala.
13. Dui diakɔna diayoleka tshutshuya ɔna dia nde kitanyiya Jehowa naka nde dishihodia?
13 La lomba tshɛ, wɛ hatetsha ɔnayɛ, paka etombelo wa kɔlɔ waya oma lo mpindolɛ Jehowa koko wɛ ayowolembtshiya ndo nganɛ wanandema Jehowa ndamɛ oma lo yoho ya lɔsɛnɔ yasɛnaso. Ɛnya ɔnayɛ oma lo Bible ɔnɛ sho koka nyangiya Jehowa etena katonaso dia ntsha lolango lande. (Osambu 78:41) Wɛ mbeyaka mombola wate: “Lande na kahayalange nyangiya Jehowa?” ndo mbolembetshiya ɔnɛ: “Satana, otunyi waki Nzambi sɛmaka ɔnɛ sho kambɛka Jehowa l’ɔtɛ wa eyango wa lokaki koko aha l’ɔtɛ wa ngandji kawokaso.” Oma lâsɔ, ko wɛ mbolembetshiya dia lo nama olowanyi ande, Jɔbɔ akangɛnyangɛnya otema wa Nzambi ndo akasha okadimwelo lo emamatanya wa kashi waki Satana. (Jobo 1:9-11; 27:5) Ɔnayɛ pombaka shihodia dia oma lo ditshelo diande, nde koka nyangiya kana ngɛnyangɛnya Jehowa. (Tukedi 27:11) Ɔna koka mbetshama wetshelo ɔsɔ ndo ekina efula w’ohomba lo ekimanyielo ka dibuku Etshama oma le Ombetsha a woke.a
Etombelo w’ɔlɔlɔ
14, 15. a) Wekelo akɔna wa lo dibuku Etshama wakonge la shɛngiya le ana? b) Etombelo akɔna w’ɛlɔlɔ wamboyokondja lo kamba la dibuku nɛ? (Enda ndo kiombo ya lo lɛkɛ 18-19)
14 Papa kɛmɔtshi ka lo wodja wa Croatie kakadɛ okana ande w’ɛnɔnyi esambele dibuku Etshama akafunde awui anɛ wakawotɛ ɔnɔsɔ ate: “Mama akambutɛ dia dimi sala dikambo dimɔtshi, koko dimi konanga disala. L’ɔkɔngɔ diko, lakayohɔ tshapita yata ɔnɛ: “Okitanyiya wayokokokɛ,” ko dimi lakatshu lakatowotɛ dia dimi layongaka l’okitanyiya otsha le nde.” Lo kɛnɛ kendana la tshapita yele l’ɔtɛ a dui ɔnɛ: “Sho hatohombe mbuta kashi,” atshukanyi amɔtshi wa la Florida, lo wodja w’États-Unis, wakate ɔnɛ: “Yɔ yekɔ la ambola walɔmba ana dia vɔ mbuta kɛnɛ kele lo etema awɔ ndo suya munga yele totowoyisuya.”
15 Dibuku Etshama diekɔ la esato ndekana 230, ndo osato kana esato tshɛ wekɔ la ɛtɛkɛta kana efundelo walembetshiya osato kana esato akɔ. Mama kɛmɔtshi akate la lowando tshɛ ate: “Mbala efula ɔnami tokaka washo lo osato ndo hatolangaka kadimula dikatshi. Esato hɔwɔngɛnyangɛnya tsho koko vɔ mbishaka ndo wetshelo ndo tshutshuyaka ana dia vɔ mboka ambola. Lo kɛnɛ kendana la osato wele ɔna ɔmɔtshi ekɔ lo menda televisiɔ lo luudu la wodjima, ɔnami akamumbola la dui diokiya ɔnɛ nde akeyaka dia kɛnɛ kakasalaka ɔnɔsɔ komonga dimɛna ate: ‘Mama, ɔna ɔnɛ asalande?’ ” Ɛtɛkɛta walembetshiya osato mbutaka ɔnɛ: “Akɔna akoka mɛna dui tshɛ diasalaso?”
Wetshelo w’ohomba ɛlɔ kɛnɛ
16. Dui diakɔna diele ohomba mbetsha ana ɛlɔ kɛnɛ, ndo lande na?
16 Ana pombaka mbeya yoho ya dimɛna ndo ya kɔlɔ yahombawɔ kamba la tenyi diawɔ dia demba dia dieyanelo. Koko, tɛkɛta dia tenyi dia demba dia dieyanelo hatongaka nshi tshɛ dikambo dia wɔdu. Ofundji ɔmɔtshi akate dia nde akole lo dihole diɔsawɔ onto latɛkɛta dia tenyi dia demba dia dieyanelo oko ɔsɛndji. Lo kɛnɛ kendana la wetshelo w’ɔnande, nde akafunde ate: “Dimi lakahombe ntondo minya ɔsɔnyi ami.” Lo mɛtɛ, naka ambutshi tona tɛkɛta l’ɔna dikambo dia tenyi dia demba dia dieyanelo l’ɔtɛ wa sɔnyi, kete dikambo sɔ hatokokɛ ɔna. Naka ana haweyi dikambo sɔ, kete wanɛ wateyana la ana la wolo mbeyaka teyana la wɔ. Dibuku Etshama oma le Ombetsha a woke tɛkɛtaka dia dikambo sɔ lo yoho ya dimɛna ndo ya kɛnɛmɔ. Tɛkɛta la ana awui wendana la dieyanelo halembetshiya mbaetsha dia vɔ sala awui akɔ, koko tona dia sala dikambo sɔ mbeyaka ndjâshishɛ lɔkɛwɔ lawɔ l’ɔlɔlɔ.
17. Ngande wakimanyiya dibuku Etshama ambutshi dia vɔ mbetsha anawɔ awui wendana la dieyanelo?
17 Lo tshapita 10, lɛnɛ ɔtɛkɛtshiwɔ dia andjelo wa kɔlɔ wakaye la nkɛtɛ ndo ndjota ana, vɔ mimbolaka ɔna ɔnɛ: “Eyayɛ lo kɛnɛ kendana la awui wa dieyanelo?” Dibuku sɔ mbishaka okadimwelo wa wɔdu ndo lo yoho ya kɛnɛmɔ. L’ɔkɔngɔ diko, tshapita 32 nembetshiyaka woho wakoka ana kokamɛ oma le anto weyana la ana la wolo. Wakatomɛ afundji wa dibuku sɔ mikanda efula wakɛnya dia wetshelo wa ngasɔ wekɔ ohomba. Mama kɛmɔtshi akafunde ate: “Lomingu letshi lama wakatshu ɔnami Javan dia tɛnana la dɔkɔtɛlɛ diande, nde akawombola dia kana sho tambosawolaka la nde lo kɛnɛ kendana la woho wa dimɛna wahombande kamba la tenyi diande dia demba dia dieyanelo. Nde akambe heyama dia mbeya ɔnɛ tambosalaka dikambo sɔ lo kamba la dibuku diaso di’oyoyo.”
18. Dibuku Etshama atadiɔ lo kɛnɛ kendana la memula dalapo?
18 Tshapita kina tɛkɛtaka dia ɔkɔndɔ wa lo Bible wendana la ɛlɔngɔlɔngɔ esato w’ase Hɛbɛru Shadarakɛ, Meshakɛ la Abɛdɛ-Nɛngɔ, wakatone dia kusamɛ lohingu lakalembetshiyaka Lowandji la Babilɔna. (Danyele 3:1-30) Mbeyaka monga ko amɔtshi haweye diɔtɔnganelo diele lam’asa tɛmɔla lohingu la memula dalapo, oko wadiɛnya dibuku Etshama. Koko, tende kɛnɛ kakate Edward Gaffney etena kakɔkɔnya wanɛ watondja jurnalɛ U.S. Catholic. Nde akate dia etena kakakawola ɔnande la womoto lushi la ntondo oma la kalasa ndo kakandawotɛ dia wakateka “dɔmbɛlɔ di’oyoyo,” nde akɔlɔmbɛ dia nde mbotɛ dɔmbɛlɔ diakɔ. Gaffney, mbutaka ate: “Ɔna akakitsha lonya lande lo tolo, ko akate la lokanyi tshɛ ate: ‘Dimi lambotombola dalapo . . . ’ ” Gaffney mbutaka nto dia: “Mbala kakɔ ɔtɔi nde akashihodia dia Ɛmɛnyi wa Jehowa wakikɔ la shadiya. Ekɔ dikambo dimɔtshi diendana la ɔtɛmwɛlɔ a wodja diele lo keketshama lo kalasa yaso oma ko kalasa ya totshitshɛ, dikambo diakɔ ko: monga la kɔlamelo tshɛ le wodja.”
Ekɔ ɔlɔlɔ mbidja welo tshɛ
19. Difuto diakɔna dionga oma lo mbetsha ana?
19 Lo mɛtɛ, ekɔ ɔlɔlɔ mbidja welo tshɛ dia mbetsha anayɛ. Mama kɛmɔtshi akakɛdia ndo asɔyi etena kakandalongola mukanda oma le ɔnande laki la Kansas, lo wodja wa Etats-Unis. Ɔnande ɔsɔ akofundɛ ate: “Lekɔ la ɔngɛnɔngɛnɔ efula nɛ dia woho wakamodiama ambokimanyiya dia dimi monga la yimba ya shikaa ndo la wɛdimo. Wɛ la Papa kokaka mandɔma.” (Tukedi 31:28) Dibuku Etshama oma le Ombetsha a woke kokaka kimanyiya ambutshi efula dia mbetsha ana, mbuta ate dia vɔ mbeya kokɛ sango sɔ di’oshinga wolo.
20. Kakɔna kahomba ambutshi mbohɔka mbala tshɛ, ndo dikambo sɔ diekɔ la shɛngiya yakɔna le wɔ?
20 Ekɔ ɔlɔlɔ kamba la wenya aso ndo la welo aso dikambo dia anaso ndo mbadja yimba. Vɔ mongaka akɛnda paka lo tshanda mɔtshi tsho. Nyokambe dimɛna la diaaso tshɛ diakondjanyu dia monga kâmɛ la wɔ ndo dia mbâkimanyiya. Nyu hanyonyangaki pondjo lo sala dikambo sɔ. Vɔ wayonyoka ngandji. Nyohɔke mbala tshɛ dia ananyu wekɔ woshasha wakanyosha Nzambi. Ana wekɔ mɛtɛ sango di’oshinga wolo! (Osambu 127:3-5) Ɔnkɔnɛ, nyakoke dimɛna, nɛ dia nyu nyayoyokoya la Nzambi lo woho wawaodianyu dikambo nyu mbele la ɔkɛndɛ awɔ.
[Nɔtɛ ka l’ɛse ka dikatshi]
a Diakatondjama oma le Ɛmɛnyi wa Jehowa. Enda tshapita 40 yele l’ɔtɛ a dui ɔnɛ: “Woho wa ngɛnyangɛnya Nzambi.”
Ngande wayoyokadimola?
• Lande na kele ekɔ ohomba efula djekoleko nshi nyɛ dia ambutshi kokɛ anawɔ?
• Woho akɔna wa wetshelo washa lomba?
• Akambo akɔna w’ohomba efula wahombayɛ sawolaka la anayɛ ɛlɔ kɛnɛ?
• Ngande wambokimanyiya dibuku Etshama ambutshi dia vɔ mbetsha anawɔ?
[Osato wa lo lɛkɛ 25]
Ambutshi, wetshelo akɔna wakokanyu kondja oma l’ɛnyɛlɔ kaki Manɔa?
[Osato wa lo lɛkɛ 26]
Ana w’akɛnda, wetshelo akɔna wakokanyu kondja oma l’ɛnyɛlɔ k’ase Hɛbɛru asato anɛ?
[Esato wa lo lɛkɛ 27]
Esato wele lo dibuku “Etshama” ndo ɛtɛkɛta walembetshiya esato akɔ wekɔ dihomɔ dia wolo efula dia wetshelo
Kashi kakɔna kakatɛka Ananiya Petero lanɛ?
Akɔna akoka mɛna dui tshɛ diasalaso?