Lande na ndjela atɔndɔ wa lo Bible?

ONDE kɛnɛ kata Bible lo dikambo di’awui wa dieyanelo kambeta loowe kana tɔ toshimbaka awui amɔ oshimbashimba? Bu. Kɛnɛ katatɔ lo dikambo dia dieyanelo tokimanyiyaka dia mbewɔ:

▪ Hemɔ yasambemɛ oma lo dieyanelo

▪ Waemi wa l’andja wa diwala

▪ Etombelo wa kɔlɔ w’oma l’odiakelo wa diwala

▪ Nkum’otema katɛndja onongo

▪ Sɔnyi k’efula kaya lo woho wakeyanyi onto la so paka dia nshidiya mposa yande

Jehowa Nzambia lele Otungi aso nangaka dia sho ngɛnangɛna ndo nkondja wahɔ lo woho wakambaso la weshasha ande. Nzambi mbele ɔnɛ “latuketshaka dia we nduwana.” (Isaya 48:17) Onto lasɛna lo yoho yɔtɔnɛ l’atɔndɔ wa lo Bible wendana la dieyanelo:

▪ Mbetawɔmaka le Nzambi

▪ Mongaka la ki ka lo yimba

▪ Mongaka la diokanelo dia ma ma l’ase nkumbo kande

▪ Mongaka la lokumu l’ɔlɔlɔ

▪ Ndjalɛnyaka

Ko, kayotota naka wɛ hayele atɔndɔ wa lo Bible wendana la lɔkɛwɔ? Onde wɛ koka ntshikitanya yoho yayɛ ya lɔsɛnɔ? Onde Nzambi ayoyokosha dilanya l’ɔtɛ wa pɛkato yakayasale?

Enda dikambo nɛ: Anto amɔ waki l’etshumanelo k’Akristo ka lo ntambe ka ntondo, waki a monanyi, akanga a loseka ndo wakasalaka dieyanelo di’asa pami la pami kana womoto la womoto. Vɔ wakatshikitanya yoho yawɔ ya lɔsɛnɔ ndo wakatshɔkwama. (1 Koreto 6:9-11) Ɛlɔ kɛnɛ, nunu di’anto dia l’andja w’otondo wakasale etshikitanu wa ngasɔ. Vɔ wakatshike lɔkɛwɔ la kɔlɔ ndo wakakondja ɛtshɔkɔ efula lo ndjela atɔndɔ wa lo Bible. Ɛnyɛlɔ, tende kɛnɛ kakakomɛ Sarah lakatatɛkɛtshi lo sawo dia mbɔtwɛlɔ.

“Esadi eto lakayaoke dia lambotshungɔ”

Sarah akayɛnaka dia yoho yande ya lɔsɛnɔ la mindo kombela lotshungɔ ndo ɔngɛnɔngɛnɔ wakandakombolaka. Nde mbutaka ate: “Nkum’otema kami kakayokomaka lonyu. Laki la sɔnyi ndo la wɔma wa mbɔsa diemi kana hemɔ ka sɔnyi. Dimi koshisha dietawɔ di’ɔnɛ Nzambi ekɔ ndo lakeyaka ɔnɛ yoho yami ya lɔsɛnɔ yekɔ lo mbonyangiya. Lakayaɔsaka wɔnɔnyi ndo dui sɔ diakambishaka lonyangu l’efula.”

L’ekomelo, Sarah akayokondjaka wolo wa ntshikitanya lɔsɛnɔ lande. Nde akayange ekimanyiyelo k’ambutshi ande waki Ɛmɛnyi wa Jehowa. Ndo akayange ekimanyiyelo ka dikumanyi di’Akristo dia l’etshumanelo kawɔ. Sarah mbutaka ate: “Laki l’ɔngɛnɔngɛnɔ ndo lakambe efula lo menda kɛtshi ndo ngandji kakamboke ambutshi ami ndo dikumanyi. Esadi eto lakayaoke dia lambotshungɔ.”

Ɛlɔ kɛnɛ, Sarah ekɔ lo mbodia anande ahende ndamɛ. Nde mbutaka ate: “Dimi mbutɛka anami hwe ɔsɔnwɛlɔ wa kɔlɔ wakamasale. Dimi kombolaka dia vɔ nshihodia lonyangu lele la mi lo woho wakamatone ndjela atɔndɔ waki Nzambi. Lekɔ l’oyango wa mbâkimanyiya dia vɔ nshihodia ɛlɔlɔ wa lo demba, wa lo yimba ndo wa longandji waya lo ndjela atɔndɔ waki Nzambi wendana l’awui wa dieyanelo. Lamboshikikɛ dia Nzambi akatosha atɔndɔ wendana la lɔkɛwɔ nɛ dia nde halange sho mpomɔ mpokoso.”

Wɛ lawɔ kokaka nkondja ɛlɔlɔ waya lo ndjela ɛlɔmbwɛlɔ kaki Nzambi koludi la ngandji. Bible ndakaka ɔnɛ: “Adjangu wa [Jehowa] weli usimbwi, watongenyangenyaka utema; elembe wa [Jehowa] weli pudipudi, watosenyaka ashu. . . . Wane watuyilamaka, weko la difutu dia wuki.”—Osambu 19:8, 11.b

[Nɔte ya l’ɛse ka dikatshi]

[Efundelo wa l’etei w’odingɔ wa lo lɛkɛ 8]

Wanɛ wɔnyɔla atɔndɔ wa lo Bible diɛnɛka mbala efula la pâ ya lo yimba

[Efundelo wa l’etei w’odingɔ wa lo lɛkɛ 9]

Wanɛ l’atɔndɔ wa lo Bible wekɔ la nkum’otema ka pudipudi ndo la diokanelo dia ma ma l’ase nkumbo yawɔ