Onde ekadimwelo wekɔ ohomba?

“Nyu nyayeya akambu wa mete, ku akambu wa mete wayunyutshungula.”—JOANI 8:32.

BIBLE kekɔ l’akambo wa mɛtɛ watotshungola l’okandokando ndo lo waetawɔ wa kashi lo dikambo dia Yeso. Onde ekadimwelo wa ambola wa kɛnɛ ketawɔso lo dikambo diande wekɔ ohomba? Eelo. Wekɔ ohomba le Jehowa, le Yeso ndo le so.

● Bonde kewɔ ohomba le Jehowa? Lo tshena pe, nɛ dia “[Nzambi] eli ngandji.” (1 Joani 4:8) Jehowa nangaka sho nsɛna l’ɔngɛnɔngɛnɔ pondjo pondjo. Yeso akate ate: “Ne dia [Nzambi] akalangi wa la kete utamanya, mbakandawasha On’andi etoi lakanduti, dia untu tshe lawetawo . . . ayali la lumu la pundju.” (Joani 3:16) Nzambi akatome Ɔnande dia ndjototshungola ndo ndjotodiholɛ mboka ka sho nsɛna pondjo lo Paradiso ka la nkɛtɛ lo ndjela sangwelo diande di’oma k’etatelo. (Etatelu 1:28) Nzambi nangaka mbisha wanɛ weka akambo wa mɛtɛ wendana l’Ɔnande ndo wasɛna lo yoho yɔtɔnɛ lawɔ lɔsɛnɔ la pondjo.—Romo 6:23.

● Bonde kewɔ ohomba le Yeso? Yeso nde lawɔ mbokaka anto ngandji. Nde akɛnya ngandji ka ndjahombia lo nkimɔ lɔsɛnɔ lande lo dikambo diaso. (Joani 15:13) Nde akeyaka dia paka nde mbakahombe ndjihola mboka k’otsha lo panda. (Joani 14:6) Onde tayâmba lo woho wele Yeso nangaka di’anto efula nkondja wahɔ oma l’olambo ande wa tshungo? Nde akasha ambeki ande wa mɛtɛ ɔkɛndɛ wa mbetsha anto wa l’andja w’otondo awui wendana la lolango la Nzambi ndo sangwelo diande.—Mateu 24:14; 28:19, 20.

● Bonde kewɔ ohomba le so? Ohokanyiya di’awui wele ohomba efula le yɛ, oko yônge yayɛ ndo nkumbo kayɛ. Shi wɛ nangaka monga la yônge ya dimɛna ndo la lɔsɛnɔ la dimɛna wɛ la wakiyɛ wa ngandji? Lo tshimbo ya Yeso, Jehowa ambonyosha elongamelo ka monga la yônge ya kokele ndo la lɔsɛnɔ laha l’ekomelo l’andja w’oyoyo, lɛnɛ ele asui hatonga nto. (Osambu 37:11, 29; Enyelo 21:3, 4) Onde wɛ nangaka ndjɔsɛna l’andja wa ngasɔ? Naka eelo, kete nsala dui dimɔ.

Nyomadia divɛsa diele l’ɛse k’ɔtɛ wa sawo diata ɔnɛ: “Nyu nyayeya akambu wa mete, ku akambu wa mete wayunyutshungula.” Akambo wa mɛtɛ wendana la Yeso ndo ɔkɛndɛ wele la nde l’okotshamelo wa sangwelo dia Nzambi koka totshungola oma lo lɔhɔmbɔ loleki tshɛ kɔlɔ, lɔhɔmbɔ la pɛkato la nyɔi. Koko dia ntshungɔ, wɛ pombaka ‘mbeya akambo wa mɛtɛ.’ Bonde kahayeke awui efula wendana l’akambo wa mɛtɛ asɔ ndo woho wayoyokoka wɛ la wakiyɛ wa ngandji ndjokondja ɛtshɔkɔ oma lɔkɔ? Ɛmɛnyi wa Jehowa wayɔngɛnangɛna dia kokimanyiya.