ASAWO WƆTƆNƐ L’ƆTƐ A DUI WA LO LOHOSO: WETSHELO AKƆNA WAKONDJASO OMA LE MƆSƐ?
Mɔsɛ akinde?
Kanyi yakɔna yakoyɛ lam’okayɛ lokombo Mɔsɛ? Onde Wɛ mbɔɔsaka oko . . .
ɔna lele nyango akawoshɛ lo kisaka l’omamu wa ndjale ka Nilɛ?
dikɛnda dia pami diaki kombohɛ ndooko lushi dia nde aki ose Isariyɛlɛ ndo diakodiama lo dihole di’ɔngɔnyi l’Edjibito oma le ɔnaki Farawɔ la womoto?
olami w’ɛkɔkɔ wakadjasɛ ɛnɔnyi 40 la Midiyana?
onto lakasawola la Jehowaa la ntondo ka dikombokombo dialombalomba?
onto lakatokomɛ nkumekanga ka l’Edjibito la dihonga tshɛ lo mbɔlɔmba dia ntshungola ase Isariyɛlɛ oma lo lɔhɔmbɔ?
onto lakalɔmbwama oma le Nzambi dia mbewoya Asui Dikumi wakahombe komɛ ase Edjibito etena kakadjana nkumekanga ka lo wodja ɔsɔ tɔfwɛfwɛ nde la Nzambi ka mɛtɛ?
onto lakalɔmbɔla ase Isariyɛlɛ oma lo Edjibito?
onto lele Nzambi akakambe la nde dia kahanya Ndjale ka beela l’ahende?
onto lakatɛ ase Isariyɛlɛ Ɛlɛmbɛ Dikumi w’oma le Nzambi?
MƆSƐ akasale akambo woshilami la diko ango tshɛ ndo awui akina efula. Aha la taamu, pami ka kɔlamelo kɛsɔ akalɛmiyamaka efula oma le Akristo, ase Juda ndo oma le waa Mizilma.
Mbokɛmaka hwe dia Mɔsɛ aki omvutshi waki la ‘wolo wa mamba.’ (Euhwelu k’Elembe 34:10-12) Nde aketawɔ dia Nzambi nkamba la nde lo yoho ya diambo. Koko, Mɔsɛ aki onto k’onto. Oko omvutshi Elidja lakɛnama suke la Mɔsɛ lo ɛnɛlɔ lo nshi yakasambishaka Yeso la nkɛtɛ, Mɔsɛ aki “onto oko sho.” (Jakɔba 5:17; Mateo 17:1-9) Ekakatanu efula wahomana laso nshi nyɛ, Mɔsɛ akahomana la wɔ ndo akaatondoya.
Onde wɛ nangaka mbeya woho wakandasale dui sɔ? Tɔsɛdingole waonga asato w’ɛlɔlɔ wakakɛnɛmɔla Mɔsɛ ndo wetshelo wakokaso nkondja oma lo ɛnyɛlɔ kande.
a Jehowa ekɔ lokombo la Nzambi latanema lo Bible.