Eolwelo ka Yeso mbishaka anto lɔsɛnɔ
EOLWELO ka Yeso kema tshɔi ya eolwelo yakasalema yahatakoke nshihodia. Ɔpɔstɔlɔ Pɔɔlɔ akate ate: “Kristo akolɔ oma lo nyɔi, nde ekɔ ɔlɔnga wa wanɛ woladi djɔ lo nyɔi. Nɛ dia lam’ele nyɔi kakaye oma le onto ɔtɔi, eolwelo k’anto wavɔ kayoya nto oma le onto ɔtɔi. Nɛ dia oko wele anto tshɛ wekɔ lo mvɔ oma le Adama, mbele ndo anto tshɛ wayonga la lɔsɛnɔ oma le Kristo.”—1 Kɔrɛtɔ 15:20-22.
Yeso akolwama lo Ngɔndɔ ka Nisana 16, 33 T.D., lushi lakalambolaka ase Juda Jehowa Nzambi ɛlɔnga w’oma lo dikambɔ diawɔ lo dihole di’ekila dia lo tɛmpɛlɔ ka la Jerusalema. Lo mbelɛ Yeso ɔnɛ ɔlɔnga, Pɔɔlɔ akalange mbuta ɔnɛ anto akina wakahombe ndjolwama.
Ɛtɛkɛta wa Pɔɔlɔ wayela ɛnɛ, mɛnyaka kɛnɛ kakasalema diɛsɛ la eolwelo ka Yeso. Nde akate ate: “Nɛ dia oko wele anto tshɛ wekɔ lo mvɔ oma le Adama, mbele ndo anto tshɛ wayonga la lɔsɛnɔ oma le Kristo.” Tekɔ lo mvɔ nɛ dia takahowɔ pɛkato oma le Adama. Koko, diɛsɛ la lɔsɛnɔ la nde la kokele, Yeso akakimɔ olambo w’etshungwelo wakimanyiya anto tshɛ dia vɔ ndjolwama lo nshi yayaye ndo ntshungɔ oma lo lɔhɔmbɔ la pɛkato la nyɔi. Lo Rɔmɔ 6:23, Pɔɔlɔ akate ate: “Nɛ dia difuto dia pɛkato ele nyɔi, koko woshasha washana Nzambi ele lɔsɛnɔ la pondjo oma le Kristo Yeso Nkumɛso.”
Yeso ndamɛ akɛnya waahɔ wakondjaso oma lo nyɔi ndo eolwelo kande. Nde akate ate: “Ɔna onto [ayodiyama], dia onto tshɛ lawetawɔ nkondja lɔsɛnɔ la pondjo. Nɛ dia Nzambi akalange andja lo yɛdikɔ y’efula, diakɔ diakandakimɔ Ɔnande ɛtɔi lakandote, dia onto tshɛ longa la mbetawɔ le nde atovɔke, koko akondja lɔsɛnɔ la pondjo.”—Joani 3:14-16.
Ohotokokanyiya ɔngɛnɔngɛnɔ wayonga la so dia monga la lɔsɛnɔ la pondjo lele bu l’ekakatanu ndo l’asui. (Ɛnyɛlɔ 21:3, 4) Ande ɔngɛnɔngɛnɔ watosha elongamelo kɛsɔ lee! Nomb’ewo kɛmɔtshi akate ate: “Oko watɛnya waombo woho wele lɔsɛnɔ mondo mbele ndo eolwelo toshikikɛka dia nyɔi kekɔ dui dia lo tshanda mɔtshi tsho.” Ɔnkɔnɛ aha la taamu, eolwelo ka Yeso mɛtɛ, mbayotosha lɔsɛnɔ la pondjo.