“Ɔlɛmbɛ akɔna woleki ekina woke?”

Kakɔna katɔlɔmba Nzambi? Onde Nzambi todjɛka listɛ lɔmɔtshi la dɛmbɛlɛmbɛ lahombaso nkitanyiya? Ndooko. Lo ndjela kɛnɛ kakate Yeso y’Ɔna Nzambi, kɛnɛ katɔlɔmba Nzambi koka nembetshiyama lo tshɛkɛta tshɔi.​—Adia Makɔ 12:28-31.

Ntondotondo, tɔsɛdingole woho wakalembetshiya Yeso dui sɔ. Shi ngana la ntondo ka nyɔi kande, nde akasambisha lo tɛmpɛlɔ lo Ngɔndɔ ka Nisana 11. Atunyi ande wakaye ndjoohemba lo mbooka ambola w’ekanda sɔdu. Mbala tshɛ, nde akaadihaka enyɔ lo mbasha ekadimwelo w’eshika. Lo diaaso dimɔtshi, vɔ wakawoke dimbola diele lo divɛsa 28 diata ɔnɛ: “Ɔlɛmbɛ akɔna woleki ekina woke?”

Ɔsɔ aki mɛtɛ dimbola diakatshindja anto efula wɔɔngɔ. Ase Juda amɔtshi wakayangiayangia l’atei w’Ɛlɛmbɛ wa Mɔsɛ 600 dia mbeya wakɔna woleki woke. Mɛnamaka di’akina wakate dia ndooko ɔlɛmbɛ woleki okina woke ndo ekɔ dui dia kɔlɔ mbɛdika ɛlɛmbɛ dia mbeya wakɔna woleki woke. Ngande wakaakadimola Yeso?

Lo ekadimwelo ande, Yeso kokamba l’ɔlɛmbɛ ɔtɔi, koko ehende. Ntondotondo, nde akate kɛnɛ katanaso lo divɛsa 30 ate: “Ɔnkɔnɛ, olange Jehowa Nzambi kayɛ l’otema ayɛ tshɛ, la anima ayɛ tshɛ, la yimba yayɛ tshɛ ndo la wolo ayɛ tshɛ.” (Euhwelu k’Elembe 6:5) Nde kokamba la tɔtɛkɛta “otema,” “yimba,” “anima” ndo “wolo” okambakamba.a Tɔ tekɔ la kitshimudi y’ohomba efula nɛ dia paka sho mbokambi l’akoka ndo l’ekondjelo kaso, mbakokaso mboka Jehowa ngandji ka l’otema ɔtɔi. Elembetshiyelo ɛmɔtshi washa Bible mɛnyaka dia “sho pombaka nanga Nzambi la tshondo yaso tshɛ.” Ɔnkɔnɛ, naka wɛ mbokaka Nzambi ngandji, kete wɛ pombaka nsala kɛnɛ tshɛ keyɛ l’akoka dia mbetawɔma le nde.​—1 Joani 5:3.

Dui dia hende diakawatɛ Yeso tanemaka lo divɛsa 31 diata ɔnɛ: “Olange wonyayɛ onto oko wayalangayɛ.” (Akambu w’asi Lewi 19:18) Naka sho mbokaka Nzambi ngandji, kete sho pombaka mboka anto tshɛ ngandji. (1 Joani 4:20, 21) Naka sho mbokaka anto tshɛ ngandji oko wayaokaso, kete tayowasalɛka akambo oko walangaso vɔ tosalɛ. (Mateo 7:12) Lo nsala ngasɔ, sho mɛnyaka dia sho mbokaka Nzambi lakatotonge lo efanelo kande ngandji.​—Etatelu 1:26.

Lande na kele ekɔ ohomba mboka Nzambi ndo asekaso anto ngandji? Lo divɛsa diakɔ diaamɛ, Yeso akate ate: “Ndooko ɔlɛmbɛ woleki wɛsɔ woke” L’ɔkɔndɔ akɔ waamɛ, Yeso akɛnya dia lo ɛlɛmbɛ ɛsɔ ehende mbokelekami Ɛlɛmbɛ ekina tshɛ.​—Mateo 22:40.

Ngɛnyangɛnya Nzambi bu dui dia wolo. Kɛnɛ tshɛ katɔlɔmbande koka mbutama lo tshɛkɛta tshɔi ɔnɛ: Ngandji. Ɔsɔ ekɔ ndo ayotshikalaka nshi tshɛ djembetelo y’atɛmɔdi wa mɛtɛ. Sho kɛnɛmɔlaka ngandji oma l’etsha aso koko aha oma l’ɛtɛkɛta. (1 Joani 3:18) Lande na kahayeke dia nkɛnɛmɔla ngandji kokayɛ Jehowa, latɛkɛta Bible lo dikambo diande ɔnɛ: Nzambi “ekɔ ngandji”?​—1 Joani 4:8.