Petero la Ananiya wakate kashi—Wetshelo akɔna wakondjaso?

Oko wadieyaso, mbuta kashi kɛdikɛdi mbuta dui diele bu mɛtɛ. Onde wɛ atataka kashi?—a Kaanga anto efula wakokaka Nzambi ngandji wakate kashi. Ondo wɛ mbeyaka onto ɔmɔtshi la lo Bible lakate kashi, Petero mbele lokombo lande ɔmɔtshi wa l’atei w’apɔstɔlɔ 12 waki Yeso. Nyɛsɔ tɔsɛdingole ɔkɔndɔ ande kele tende woho akɔna wakandate kashi.

L’ɔkɔngɔ wa vɔ minda Yeso, vɔ wakatshu lande lo luudu laki ɔlɔmbɛdi a laadiko ndo dui sɔ diakasalema la kati k’otsho. Petero akɔtɔ lo sɛkɛ dia lokombo diaki ɔlɔmbɛdi a laadiko aha l’onto mboweya. Lam’akawahɛtsha dja, ose olimu waki ɔlɔmbɛdi a laadiko wa womoto lakeyaka Petero akate ate: “Ndo wɛ lawɔ mbaki la Yeso.” La wɔma tshɛ, Petero akanguna dia nde heye Yeso.

Bible mbutaka dia “ɔna womoto okina akawɛnyi.” Mbala kɛsɔ nto Petero akanguna. Yema tshitshɛ l’ɔkɔngɔ wa laasɔ, olui okina w’anto wakaye oyale nde ndo wakawotɛ ɔnɛ: “Lo mɛtɛ, wɛ ekɔ ɔmɔtshi la l’atei awɔ.”

Petero akandama la wɔma. Mbala ka sato kɛsɔ nto, Petero akate kashi lo mbuta ɔnɛ: “Dimi haleye onto ɔsɔ!” Mbala kakɔ ɔtɔi, nkɔkɔ kakeke. Yeso akende petero ndo Petero akohɔ mbala kakɔ ɔtɔi ɛtɛkɛta wakandawotɛ yema tshitshɛ la ntondo ka vɔ mbonda ate: “La ntondo ka nkɔkɔ mbeka, wɛ ayomanguna mbala shato.” Petero akatombe l’andja ndo akatatɛ ndela. Nde mɛtɛ aki la lonyangu l’efula.

Onde dui dia ngasɔ koka kokomɛ?— Tɔshi dia wɛ ekɔ lo kalasa ndo amboka ambeki akina watɛkɛta kɔlɔ lo dikambo di’Ɛmɛnyi wa Jehowa. Mbala kakɔ ɔtɔi, ɔmɔtshi ambota ate: “Ɛmɛnyi wa Jehowa hawɔtɛmɔla dalapo” ndo “Hawɔlwɛlɛ wodja awɔ.” Okina nde lawɔ ambota ate: “Vɔ mɛtɛ bu Akristo wa mɛtɛ dikambo hawosale fɛtɛ ka Nɔɛlɛ.” Ndo okina ambokenda tɛɛ akombola ate: “Shi ndo wɛ mbele Ɔmɛnyi wa Jehowa?” Ngande wayoyokadimola?—

Wɛ pombaka tayalɔngɔsɔdi dimɛna la ntondo dia mbisha ekadimwelo naka dui dia ngasɔ diambokokomɛ. Petero akate kashi nɛ dia nde kondjalɔngɔsɔla. Etena kakandasɛngiyama oma le anto, nde akate kashi. Lam’ele nde akayatshumoya lo kɛnɛ kakandasale Nzambi akoodimanyiya.

Ananiya ombeki wa Yeso ɔmɔtshi wakasɛnaka lo ntambe ka ntondo nde la wɔ akate kashi. Koko, Nzambi kombodimanyiya nde la wadɛnde Safira. Nde akasange lolimi la wadɛnde dia mbuta kashi. Nyɛsɔ tɔsɛdingole lande na kele Nzambi kodimanyiya Ananiya nde la Safira.

Nshi dikumi l’ɔkɔngɔ wa Yeso nkalola l’olongo, anto 3 000 wakabatizama la Jerusalɛma. Anto efula wakaye oma l’ahole w’etale oya lo fɛtɛ ka Pɛntɛkɔsta ndo l’ɔkɔngɔ wa vɔ nkoma ambeki wa Yeso, vɔ wakahombe ntshikala edja efula lɛkɔ dia mbeka akambo akina wendana la dietawɔ diawɔ di’oyoyo. Ɔnkɔnɛ, ambeki wa Yeso amɔtshi wakawakotshɛka ehomba awɔ la falanga yawɔ hita.

Ananiya nde la wadɛnde Safira wakasondja ɛtshi kawɔ k’ekambɔ dia vɔ kondja falanga yakimanyiya anangɛwɔ l’akadiyɛwɔ wakaye oma la Jerusalɛma dia ndjobatizama. Etena kakaye Ananiya la falanga oya le apɔstɔlɔ nde akawatɛ ɔnɛ tshɛ ka falanga kakamakondjisha kingo. Ko, tetele kashi mbakandawatɛ. Nde akashɛ falanga mɔtshi. Petero akeye dui sɔ l’ekimanyiyelo ka nyuma k’ekila ndo akatɛ Ananiya ate: “Aha anto mbakayakeshi, koko Nzambi.” Mbala kakɔ ɔtɔi Ananiya akakɔ la nkɛtɛ ndo akavu. Ondo l’ɔkɔngɔ wa wenya esato, wadɛnde Safira akakome. Aha la mbeya kɛnɛ kokome omɛnde, nde lawɔ akate kashi ndo akavu.

Wetshelo w’ohomba efula wakondjaso oma l’ɔkɔndɔ ɔnɛ ele: Sho pombaka mbutaka mɛtɛ l’oseka dui tshɛ. Ekɔ mɛtɛ dia sho tshɛ mbakondja wetshelo oma l’ɔkɔndɔ ɔnɛ. Sho tshɛ salaka wadja djekoleko nshi yakiso akɛnda. Onde wɛ bu l’ɔngɛnɔngɛnɔ nɛ dia Jehowa kolangaka ndo kodimanyiyaka oko wakandadimanyiya Petero?— Koko, eya dia kaanga mbediɔ ngasɔ, wɛ hahombe pondjo mbutaka kashi. Naka wɛ ambota kashi, kete we pombaka nsala la wolo dia nɔmba Nzambi edimanyielo. Kɛsɔ mbakasale Petero ndo Nzambi akodimanyiya. Naka sho nsala la wolo diaha mbutaka kashi l’oseka dui tshɛ, kete Nzambi ayotodimanyiya oko wakandadimanyiya Petero.