Yeso akɛnya woho wa monga la lɔsɛnɔ l’ɔngɛnɔngɛnɔ

OKO wakatadiɛnyi lo sawo dietshi, Yeso akasɛnɛ lɔsɛnɔ l’ɔngɛnɔngɛnɔ. Ɔnkɔnɛ, naka sho nangaka monga la lɔsɛnɔ l’ɔngɛnɔngɛnɔ, sho ladia mbokoya ɛnyɛlɔ kande ndo mpokamɛ alako ande.

Jehowa tokeketshaka dia nsɛna nganɛ wakasɛnɛ Yeso oko wɛnyamidiɔ lo divɛsa diele la diko ndo. Dui sɔ tɔlɔmbaka dia mbɔtɔnganyiya lɔsɛnɔ laso l’otondo l’ɛnyɛlɔ ndo la wetshelo ande. Lo nsala ngasɔ, tayetawɔma le Nzambi ndo tayonga la lɔsɛnɔ l’ɔngɛnɔngɛnɔ.

Wetshelo wa Yeso wekɔ l’atɔndɔ wakoka tokimanyiya dia nsɛna woho wakandasɛnɛ. Sho tanaka atɔndɔ amɔtshi lo sawo diande dimɔtshi dielɛwɔ Dako dia lo dikona. Nyɛsɔ tɔsɛdingola atɔndɔ amɔtshi angana ndo tende woho wakokaso nkamba lawɔ lo lɔsɛnɔ laso.

TƆNDƆ: “Ɔngɛnɔngɛnɔ le wanɛ weya dia wekɔ l’ohomba wa mbeya akambo waki Nzambi.”—Mateo 5:3.

WOHO WATOKIMANYIYA TƆNDƆ NƐ DIA MONGA LA LƆSƐNƆ L’ƆNGƐNƆNGƐNƆ:

Yeso akɛnya dia anto mbotɔka la mposa ka mbeya Nzambi. Tekɔ lo nomɔlomɔ dia kondja ekadimwelo lo ambola wele oko: Lande na keso la lɔsɛnɔ? Lande na kambolola lɔsɛnɔ l’ekakatanu? Onde mɛtɛ Nzambi ndjakiyanyaka dikambo diaso? Onde lɔsɛnɔ lɔmɔtshi lekɔ l’ɔkɔngɔ wa nyɔi? Tekɔ l’ohomba wa nkondja ekadimwelo lo ambola asɔ dia monga la lɔsɛnɔ l’ɔngɛnɔngɛnɔ. Yeso akeyaka dia kiɔkɔ yaamɛ yahombaso ndjaɛkɛ lɔkɔ dia nkondja ekadimwelo ele l’Ɔtɛkɛta wa Nzambi. Lo dɔmbɛlɔ dimɔtshi diakandalɔmbɛ She, Yeso akate ate: “Ɔtɛkɛta ayɛ wekɔ mɛtɛ.” (Joani 17:17) Onde Ɔtɛkɛta waki Nzambi kokaka tokimanyiya mɛtɛ dia mbeya Nzambi ndo monga l’ɔngɛnɔngɛnɔ?

ƐNYƐLƆ KA MƐtƐ:

Oko wakinde ɔnɔmbɔdi w’amembi w’esambo, Esa aki l’akoka wa ndjokoma omembi w’esambo wa lokumu. Kaanga mbakidiɔ ngasɔ, Esa komonga l’ɔngɛnɔngɛnɔ. Nde mbutaka ɔnɛ: “Kaanga mbakamangɛnangɛnaka olimu ami, lakakombolaka dia ndeka monga la lɔsɛnɔ l’ɔngɛnɔngɛnɔ.” Esa akayohomanaka l’Ɔmɛnyi wa Jehowa ɔmɔtshi. Nde suyaka ɔnɛ: “Lakɔpɔpɛ ambola, koko ekadimwelo ande wa lomba wotombi oma l’Afundelo wakamambiya efula, ko laketawɔ dia mbeka Bible.” Kɛnɛ kakeke Esa oma lo Bible kakananda otema ande ndo kakootshutshuya dia ndjakimɔ le Jehowa. Nde mbutaka ɔnɛ: “Ntondo lakadiɛnɛka l’ekakatanu, koko kakianɛ, laya la lɔsɛnɔ l’ɔngɛnɔngɛnɔ.”a

TƆNDƆ: “Ɔngɛnɔngɛnɔ le wanɛ wokana kɛtshi.”—Mateo 5:7.

WOHO WATOKIMANYIYA TƆNDƆ NƐ DIA MONGA LA LƆSƐNƆ L’ƆNGƐNƆNGƐNƆ:

Mboka anto kɛtshi kɛdikɛdi mbaoka kandji, monga la lɔsɛngɔ ndo ndjakiyanya dikambo diawɔ. Yeso akokaka anto waki lo dihombo kɛtshi. Dionga sɔ diakootshutshuya dia kɔnɔla wanɛ waki la hemɔ. (Mateo 14:14; 20:34) Naka sho mbokoya ɛnyɛlɔ ka Yeso lo mbokanaka kɛtshi, kete tayonga la lɔsɛnɔ l’ɔngɛnɔngɛnɔ nɛ dia wanɛ wokana kɛtshi mongaka l’ɔngɛnɔngɛnɔ. (Etsha 20:35) Sho koka mɛnya kɛtshi kokaso anto akina oma l’ɛtɛkɛta ndo oma l’etsha aso w’amɛna lo nkimanyiya wanɛ wele lo dihombo. Onde mɛtɛ mbokana kɛtshi kimanyiyaka di’onto monga la lɔsɛnɔ l’ɔngɛnɔngɛnɔ?

ƐNYƐLƆ KA MƐTƐ:

Mariya nde l’omɛnde Carlos wekɔ bɛnyɛlɔ d’anto wokana kɛtshi. She aki Maria akavusha wadɛnde ndo l’ɛnɔnyi weke ka mbeta ɛnɛ nde aki baka la hemɔ. Maria nde la Carlos wakawɔshi dia nde ndjodjasɛ la wɔ ndo wekɔ lo mbokotshɛ ehomba ande tshɛ. Mbala efula vɔ ndalaka engondo ndo mbɛɛmbaka otsha lo lopitadi etena koheka hemɔ ka diabɛtɛ kele lande. Vɔ mbutaka dia tena dimɔtshi vɔ nɛmbaka. Koko, vɔ wekɔ l’ɔngɛnɔngɛnɔ oko wakadite Yeso, nɛ dia vɔ wekɔ l’ɔlɔ w’efula lo mbeya dia wekɔ lo kotshɛ she aki Maria ehomba ande.

TƆNDƆ: “Ɔngɛnɔngɛnɔ le wanɛ wadja wɔladi.”​—Mateo 5:9.

WOHO WATOKIMANYIYA TƆNDƆ NƐ DIA MONGA LA LƆSƐNƆ L’ƆNGƐNƆNGƐNƆ:

Ngande wele mbidja wɔladi kimanyiyaka di’onto monga la lɔsɛnɔ l’ɔngɛnɔngɛnɔ? Dui sɔ tokimanyiyaka dia sho monga la diɔtɔnganelo dia dimɛna l’asukanyi aso. Ayonga dui dia lomba dia sho nkitanyiya dako dia lo Bible diata ɔnɛ: “Naka kokaka, lo yɛdikɔ yakokanyu nsala, nyodjasɛ l’anto tshɛ ki.” (Rɔmɔ 12:18) “Anto tshɛ” watɛkɛtama lo divɛsa nɛ mendanaka l’ase nkumbo ndo anto akina tshɛ wahasangi laso dietawɔ. Onde nsɛna lo wɔladi la “anto tshɛ” koka tokimanyiya dia monga la lɔsɛnɔ l’ɔngɛnɔngɛnɔ?

ƐNYƐLƆ KA MƐTƐ:

Tɔshi ɛnyɛlɔ ka womoto ɔmɔtshi lelɛwɔ Nair. L’edja k’ɛnɔnyi efula, Nair akahomana l’ekakatanu wakadje dikoka diande dia nsɛna l’anto akina lo wɔladi djekoleko l’ase nkumbo kande lo waale. Ntatɛ lam’akɔsɛkɛ omɛnde ambeta ɛnɔnyi oko 15, ndamɛ mbodia anande. Ɔnande ɔmɔtshi la pami akayoyasha lo didjoyadjoya dia wolo ndo mbala efula nde akatɔmbɔkɔka ndo akanɛɛka nyango l’akadiyɛnde. Nair mbetawɔka dia ekɔ paka kɛnɛ kakandeke oma lo Bible mbakawokimanyiya dia mbidja wɔladi lo nkumbo kande kaanga l’atei w’ekakatanu ɛsɔ tshɛ. Nair akewɔka dia mana kana ndɔ l’anto. Nde akasalaka la wolo dia monga la lɔsɛngɔ, kɛtshi ndo ndjadja lo dihole di’anto akina. (Ɛfɛsɔ 4:31, 32) Nde akayoshihodiaka ɔnɛ nsɛna lo wɔladi l’anto akina akokimanyiya dia nyomoleka monga la diɔtɔnganelo dia dimɛna l’ase nkumbo kande ndo l’anto akina.

TOKANAKE YIMBA LO KƐNƐ KENDANA LA NSHI YASO YAYAYE

Naka sho nkitanyiya alako wa yimba watosha Yeso, kete tayonga la lɔsɛnɔ l’ɔngɛnɔngɛnɔ. Dia monga la lɔsɛnɔ l’ɔngɛnɔngɛnɔ, sho pombaka kanaka yimba lo kɛnɛ kendana la nshi yaso yayaye. Ndo nto, hatotonga la lɔsɛnɔ l’ɔngɛnɔngɛnɔ naka sho mbeyaka tsho ɔnɛ tayotshunda osombe, tayotata hemɔ ko ndjovɔ. A awui asɔ mbasalema mɛtɛ l’andja wasɛnaso ɔnɛ.

Tekɔ la losango lasalanganya otema. Jehowa ayɔtshɔkɔla efula wanɛ tshɛ wasala la wolo dia ‘nkɛndakɛnda oko wakakɛndakɛndaka Yeso.’ Jehowa tolakaka dia kem’edja nde ayanga mbela andja w’oyoyo wa losembwe lɛnɛ ayodjasɛ anto wele la kɔlamelo pondjo pondjo la yoonge ya kokele. Bible mbutaka ɔnɛ: “Enda! Hiombo yaki Nzambi yaya kaamɛ la anto, ndo nde ayodjasɛ kaamɛ la wɔ, ko vɔ wayoyala anto ande. Nzambi ndamɛ ayoyala kaamɛ la wɔ. Nde ayokitola asɔyi tshɛ oma lo washo awɔ, ndo nyɔi hatoyala nto, delo hadiotoyala nto, kaanga ndjawi kaanga kandji hatoyala nto. Akambo wa ntondo wamboshila.”​—Ɛnyɛlɔ 21:3, 4.

Maria, womoto l’ɛnɔnyi 84 lakatatɛkɛtshi dikambo diande lo sawo dia ntondo, ekɔ l’ɔngɛnɔngɛnɔ ndo l’elongamelo k’ɔnɛ ɛtɛkɛta ɛsɔ wayokotshama ndooko onyake. Ko, kayotota lo dikambo diayɛ? Onde wɛ nangaka mbeya akambo efula lo kɛnɛ kendana la “lɔsɛnɔ l’oshika” layotonga lalɔ lo Diolelo diaki Nzambi? (1 Timɔte 6:19) Naka eelo, kete wɛ koka nɔmba Ɔmɛnyi wa Jehowa ɔmɔtshi wa l’ɛtshi kanyu ka nkɛtɛ dia mbeka layɛ Bible kana mfundɛ wanɛ wakatondja periodikɛ kɛnɛ.b