YASUKANYA LA NZAMBI
“Nyotetemale nɔmba, ko wayonyosha”
“Nkumadiɔndjɔ, otetsha woho wa nɔmba.” (Luka 11:1) Ombeki wa Yeso ɔmɔtshi mbakɔɔlɔmbɛ dui sɔ. Dia mbokadimola, Yeso akakambe la wɛɛla ehende watɛnya woho wakokaso nɔmba dia Nzambi tohokamɛ. Naka wɛ toyambolaka dia kana Nzambi mpokamɛka alɔmbɛlɔ ayɛ, kete wɛ ayɔngɛnangɛna okadimwelo wakasha Yeso.—Adia Luka 11:5-13.
Wɛɛla wa ntondo mendanaka la ɔnɛ la lɔmba. (Luka 11:5-8) Wɛɛla ɔsɔ tɛkɛtaka dia pami kɛmɔtshi kakakondja ɔngɛndangɛnda la kati k’otsho, ko komonga la yangɔ ya ndɛ ya mbosha. Pami kɛsɔ akahombe paka tanɛ ɔngɛndangɛnda yangɔ ya ndɛ. Kaanga mbakiwɔ la kati k’otsho, nde akatshu tɔkɔkɔla ɔngɛnyi ande dia nde tɔsɔmba mapa. Mbala ka ntondo, ɔngɛnyi ande akatone memɔ nɛ dia nde l’ase nkumbo kande waki lo djɔ. Koko lo tɛtɛ mbala ko mbala, ɔngɛnyi ande akayemɔka ndo akawosha yangɔ ya ndɛ.a
Wetshelo akɔna wakondjaso oma lo wɛɛla ɔsɔ lo kɛnɛ kendana la dɔmbɛlɔ? Yeso akatotɛ dia sho pombaka ntetemala nɔmba, nyanga ndo nkɔkɔla. (Luka 11:9, 10) Lande na? Onde kɛsɔ nembetshiyaka dia Yeso akate ɔnɛ Nzambi hahokamɛ alɔmbɛlɔ aso mbala kakɔ ɔtɔi? Ndooko. Yeso akalange mbuta dia otshikitanyi la ɔngɛnyi wa pami kengo lakatone memɔ, Nzambi mongaka suke dia mpokamɛ alɔmbɛlɔ w’anto wele la mbetawɔ. Sho mɛnyaka mbetawɔ ka ngasɔ etena katetemalaso nɔmba. Lo ntetemala nɔmba, sho mɛnyaka ɔnɛ tekɔ mɛtɛ l’ohomba wa kɛnɛ kalɔmbaso ndo ɔnɛ tekɔ la mbetawɔ dia Nzambi koka tosha tɔ naka dui diakɔ mbɔtɔnɛka la lolango la nde.—Makɔ 11:24; 1 Joani 5:14.
Wɛɛla wa hende mendanaka la ɔnɛ ‘lahokamɛ alɔmbɛlɔ,’ mbuta ate Jehowa. (Osambu 65:2) Yeso akambola ɔnɛ: “Papa kakɔna l’atei anyu kele naka ɔnande mbɔlɔmba lose ko nde mbosha oloyi lo dihole dia lose? Kana naka nde mbɔlɔmba okele ko nde mbosha nkoto?” Mbokamaka hwe dia ndooko papa kakoka mbisha ɔnande ɛngɔ ka kɔlɔ. Ɔnkɔnɛ Yeso akayosalaka wɛdikelo lo kɛnɛ kendana la wɛɛla ɔsɔ etena kakandate ɔnɛ: Ɔnkɔnɛ naka nyu, anto wa kɔlɔ, mbeyaka “mbisha ananyu weshasha w’ɛlɔlɔ, kete hoke Shɛnyu lele l’olongo! Shi nde ayoleka mbisha nyuma k’ekila le wanɛ wɔɔlɔmbatɔ”? Nyuma k’ekila mbele woshasha woleki tshɛ nɛmɔ washa Jehowa anande wa la nkɛtɛ wɔɔlɔmbatɔ.b—Luka 11:11-13; Mateo 7:11.
Nzambi mongaka suke dia mpokamɛ alɔmbɛlɔ w’anto wele la mbetawɔ
Wetshelo akɔna wakondjaso oma lo wɛɛla ɔsɔ lo kɛnɛ kendana la Jehowa ‘Ɔnɛ lahokamɛ alɔmbɛlɔ?’ Yeso akalange dia sho mbeya ɔnɛ Jehowa ekɔ Ombutshi wayakiyanya dikambo diaso ndo nde tokotshɛka ehomba aso. Diakɔ diele, ekambi waki Jehowa pombaka mbotɛ ehomba awɔ lo dɔmbɛlɔ aha l’okakatanu. Lo mbeya ɔnɛ Jehowa nangaka kɛnɛ koleki ɔlɔlɔ lewɔ, vɔ mbɔlɔmbaka ndo mbetawɔka ekadimwelo wawashande oyadi ekadimwelo akɔ hawɔtɔnɛ la kɛnɛ kalongamɛwɔ.c
Ekongelo ka wadielo wa Bible lo Ngɔndɔ ka nɛi
a Wɛɛla wa Yeso ɔsɔ, wakɔtɔnɛ la mbekelo ndo akambo wakasalemaka, nɛ dia le ase Juda, nongola angɛndangɛnda aki ɔkɛndɛ w’ekila. Nkumbo y’ase Juda wakahɛka mapa efula lo lushi, diakɔ diele di’onto tɔsɔmba, aki paka naka mapa ande wamboshila. Ndo nto, naka ase nkumbo waki ase wola, kete amɔtshi wakahombaka ndala lo l’odihe lo shambrɛ yaki lawɔ.
b Yeso akakambaka mbala efula la tshɛkɛta “kete hoke” lo nkana l’anto yimba dia mɛnya woho woleki Jehowa anto la fwa.
c Dia mbeya akambo akina efula lo kɛnɛ kendana la woho wa nɔmba ko Nzambi mpokamɛ alɔmbɛlɔ aso, enda tshapita 17 ya dibuku Bible etshatɔ mɛtɛ? diakatondjama oma le Ɛmɛnyi wa Jehowa.