Wakayakimɔ la lolango dia tokimanyiya la Mexique

EKƆ dui di’ekeketshelo dia mɛna woho watadɛ lofulo l’ɛlɔngɔlɔngɔ l’esekaseka w’Ɛmɛnyi wa Jehowa wetɛ nsɛnɔ yawɔ ɔsɛlɛngɛ l’oyango wa ndeka ndjasha l’olimu w’esambishelo. (Mat. 6:22) Naa etshikitanu ɛmɔtshi wasalawɔ? Ekakatanu akɔna wahomana la wɔ? Dia nkondja ekadimwelo lo ambola asɔ, nyɛsɔ tohokame kɛnɛ katotɛ ɛlɔngɔlɔngɔ l’esekaseka ɛmɔtshi wakatshu la Mexique dia tosambisha.

“SHO POMBAKA NSALA ETSHIKITANU”

Dustin nde la Jassa w’oma l’États-Unis wakatshukana lo Ngɔndɔ ka ntondo 2007. Yema tshitshɛ l’ɔkɔngɔ wa diwala diawɔ, vɔ wakasombe mashuwa ɔmɔtshi ndo wakatatɛ mbeteta la wɔ. Vɔ wakakitsha mashuwa awɔ suke la Astoria, la Orégon, osomba w’olangala efula wa l’États-Unis wakadingama l’ekonda ndo l’akona wakombama la loonge efula mangana yema la océan Pacifique. Dustin mbutaka ate: “Lɛkɔ, oseka dihole tshɛ diakokayɛ menda paka wɛ ntshikala la diambo.” Atshukanyi asɔ wakayaoke dia vɔ wakahombe nsɛna lɔsɛnɔ l’ɔsɛlɛngɛ ndo ndjaɛkɛ le Jehowa. Vɔ mbutaka ɔnɛ: ‘Laadiko di’akambo asɔ tshɛ, takadjasɛka lo mashuwa waki la 7, 9 mɛtrɛ, takakambaka olimu wakoka, takɔtɔka nsanganya lo etshumanelo kakasalaka nsanganya l’ɔtɛkɛta okina ndo lo tena dimɔtshi takakambaka oko ambatshi mboka wa tshanda.’ Koko l’ɔkɔngɔ wa tshanda mɔtshi, vɔ wakayɛna dia vɔ kɔmbɔsa yɛdikɔ ya dimɛna. Dustin mbutaka ate: “Lo dihole dia sho sukɛ etshumanelo kɛsɔ, wenya aso wakalekaka mbeta dia nɔngɔsɔla mashuwa aso. Takayɛna dia naka sho mɛtɛ nangaka mbetsha Jehowa lo dihole dia ntondo, kete sho pombaka nsala etshikitanu.”

Jassa kotshɛka ate: “La ntondo ka sho tshukana, lakadjasɛka lo wodja wa Mexique ndo lakɔtɔka l’etshumanelo kasala nsanganya l’Angɛlɛ. Lakangɛnangɛnaka nkamba lɛkɔ ndo lakalomɔlomɔka dia nkalola lɛkɔ.” Etena kakawasalaka ɔtɛmwɛlɔ wa nkumbo, dia nkeketsha nsaki kawɔ ka tokimanyiya lɛnɛ ewɔ l’ohomba efula w’apandjudi, Dustin nde la Jassa wakatatɛ mbadia ɛkɔndɔ wa lɔsɛnɔ wendana l’anangɛso ndo l’akadiyɛso wakonɔ dia tokamba lo bɛtshi dia nkɛtɛ diele diangɔ dia dinelo efula. (Jni. 4:35) Dustin mbutaka ate: “Sho lawɔ takakombolaka monga l’ɔngɛnɔngɛnɔ akɔ waamɛ.” Etena kakawaewoya angɛnyi awɔ amɔtshi waki la Mexique ɔnɛ olui ɔmɔtshi w’oyoyo wambokengama wekɔ l’ohomba w’ekimanyielo, Dustin nde la Jassa wakakane yimba lo dikambo sɔ. Vɔ wakatshike elimu awɔ, mashuwa awɔ ndo wakonɔ la Mexique.

“DUI DIOLEKI DIMƐNA DIAKATASALE”

Dustin nde la Jassa wakatodjasɛka l’osomba wa Tecomán wele l’omamu wa océan Pacifique, koko lo kilɔmɛtrɛ 4345 lo ɛstɛ ka Astoria. Dustin mbutaka ate: “Lo dihole dia sho monga lo tshitshi ndo la akona oko waki lɛnɛ akiso, takatoyala lo yanyi ya tɛɛ ndo takɛnaka esongo wa tonyimu tsho lo tshalola.” Oma l’etatelo, vɔ kokondja elimu wa nkamba, komonga la falanga, wakalɛka paka mma la kɔndɛ mbala hiende lo lushi, lomingu tshɛ. Jassa mbutaka ate: “Lam’ele mbo ya ndɛ shɔ yakayongaka eshi le so, ambeki aso wa Bible wakatatɛ tela amuma, abɔtɛ, apapadi ndo atapa wa tonyimu.” L’edjedja ka wonya, atshukanyi asɔ wakayotanaka olimu wa mbetshaka anto akina ɔtɛkɛta wa Taïwan. Kakianɛ, akuta wakawakondjɛka oma l’olimu ɔsɔ mbakawayakotshɛka ehomba awɔ wa lushi la lushi.

Ngande wakayaoke Dustin nde la Jassa lo kɛnɛ kendana la yoho yawɔ ya lɔsɛnɔ y’oyoyo shɔ? Vɔ mbutaka ɔnɛ: “Wonwelo ɔsɔ aki dui dioleki dimɛna diakatasale. Diɔtɔnganelo diasaso la Jehowa ndo l’anto akina diakaleke nkeketala oleki woho wakidiɔ ntondo. Lushi tshɛ, takasalaka akambo efula kaamɛ, mbuta ate ntshɔ l’esambishelo, nkɛtshanya woho wahombaso nkimanyiya ambeki aso wa Bible ndo nɔngɔsɔla nsanganya. Ndo nto, tambotshungɔ oma lo tɔsɛngiya ta kɔlɔ efula taki la so ntondo.” Vɔ kotshaka ɔnɛ: “Kakianɛ, tamboshihodia kɛnɛ kakiso kombeyaka ntondo, mbuta ate mɛtɛ ka daka diele lo Osambu 34:8 wata ɔnɛ: ‘Nyunganeli, nyeyi nyati: [Jehowa] eli ololo!’”

KAKƆNA KATSHUTSHUYA NUNU DI’EKAMBI DIA NDJAKIMƆ LA LOLANGO?

Anangɛso l’akadiyɛso ndekana 2 900 wotshukanyi kana w’enyemba wele efula ka l’atei awɔ wekɔ l’ɛnɔnyi lam’asa 20 l’ɛmɔtshi ndo 30 l’ɛmɔtshi, wakonɔ dia tokamba lo bɛtshi dia nkɛtɛ dia la Mexique lɛnɛ ewɔ l’ohomba efula w’apandjudi wa Diolelo. Ko lande na kakasale Ɛmɛnyi wa Jehowa ɛsɔ tshɛ etshikitanu wa ngasɔ? Etena kakawambola amɔtshi l’atei awɔ dimbola sɔ, vɔ wakasha ɛkɔkɔ esato w’ohomba efula. Naa ɛkɔkɔ akɔ?

Ɔkɔkɔ wa ntondo ele, dia mɛnya ngandji kokawɔ Jehowa ndo asekawɔ anto. Leticia akabatizama ele l’ɛnɔnyi 18. Nde mbutaka ate: “Etena kakamayakimɔ le Jehowa lo batizama, lakashihodia ɔnɛ kɛsɔ nembetshiyaka mbokambɛ olimu l’otema ami tshɛ ndo l’anima ami tshɛ. Ɔnkɔnɛ, dia mɛnya ɔnɛ dimi mbokaka Jehowa ngandji k’oma k’ɛse otema, lakatatɛ nkamba la wenya, la wolo ndo l’akoka ami dia mbokambɛ.” (Makɔ 12:30) Hermilo, leke koditshukamaka nde la Leticia aki kodikotshaka ɛnɔnyi 20 l’ɛmɔtshi etena kakandonɔ dia tokimanyiya lɛnɛ akiwɔ l’ohomba efula w’apandjudi wa Diolelo. Nde mbutaka ate: “Lakashihodia ɔnɛ nkimanyiya anto lo mbakotshɛ ehomba awɔ wa lo nyuma ekɔ dui dioleki ohomba dia dimi mɛnya ngandji kokami wonyami onto.” (Makɔ 12:31) Ɔnkɔnɛ, nde akatshike osomba awɔ wa dimɛna efula wa Monterrey, lɛnɛ akandakambaka lo bankɛ ndo lɛnɛ akinde la lɔsɛnɔ la dimɛna efula, ko akonɔ otsha lo ngielongelo mɔtshi.

Ɔkɔkɔ wa hende ele, dia monga l’ɔngɛnɔngɛnɔ wa mɛtɛ ndo wa pondjo. Yema tshitshɛ l’ɔkɔngɔ wa batisimu kande, Leticia akatshindɛ kadiyɛso kɛmɔtshi kele ombatshi mboka otsha l’osomba ɔmɔtshi, ko wakatosambishaka l’edja ka ngɔndɔ k’otondo. Leticia mbohɔka ate: “Lakaambe efula lo menda woho waketawɔka anto losango la Diolelo lakataasambishaka ndo dui sɔ diakangɛnyangɛnya efula. L’ekomelo ka ngɔndɔ kakɔ, lakate dimɛ nte: ‘Kɛnɛ mɛtɛ mbahombami nsala lo lɔsɛnɔ lami.’” Ngasɔ mbakasale ndo Essly, kadiyɛso k’onyemba keke ko dikotshɛka ɛnɔnyi 20 l’ɛmɔtshi, mbuta ate ɔngɛnɔngɛnɔ wakandɛnaka waki l’anto akina mbakookutola dia ntatɛ nkamba olimu ɔsɔ. Etena kakinde eke lo kalasa ya sekɔndɛrɛ, nde akahomana l’Ɛmɛnyi wa Jehowa efula waki l’ohetoheto wakatshu dia tokimanyiya lɛnɛ akiwɔ l’ohomba efula w’ekimanyielo. Nde mbutaka ate: “Lo menda ɔngɛnɔngɛnɔ waki la anangɛso l’akadiyɛsɔ asɔ, lakakombola dia monga la yoho ya lɔsɛnɔ laki la wɔ.” Akadiyɛso efula wakasale oko Essly. Lo mɛtɛ, akadiyɛso w’enyemba ndekana 680 wa la Mexique wekɔ lo ntshɔ dia tokimanyiya lɛnɛ ewɔ l’ohomba efula w’ekimanyielo. Ande ɛnyɛlɔ ka dimɛna kashawɔ ɛlɔngɔlɔngɔ ndo epalanga w’Akristo lee!

Ɔkɔkɔ wa sato ele, dia nsɛna yoho ya lɔsɛnɔ yele l’oyango ndo ya dimɛna. L’ɔkɔngɔ wa nde nshidiya kalasa ya sekɔndɛrɛ, wakatɛ Essly dia mbosha bursɛ dia tɔtɔ kalasa y’adidi. Asekande wakookeketsha dia nde mbetawɔ bursɛ kakɔ dia nde ndjonga la lɔsɛnɔ la dimɛna, mbuta ate mbɔtɔ inivɛrsite dia nkondja titrɛ ko nkondja olimu wa lokumu, nsomba mutuka ndo mɛngɔla lo wedja efula. Koko, nde kondjela alako asɔ. Essly mbutaka ate: “Angɛnyi ami w’Akristo efula wakayelaka akambo asɔ ndo lakɛnyi dia vɔ kondjetsha eyango wa lo nyuma nto lo dihole dia ntondo lo nsɛnɔ yawɔ. Lakɛnyi nto dia vɔ waki l’ekiyanu efula l’ɔtɛ w’ekakatanu waki la wɔ nɛ dia wakayashaka tshavu l’akambo wa l’andja ɔnɛ. Lakalangaka nkamba la nshi yami y’osekaseka dia kambɛ Jehowa tshɛ lo tshɛ.”

Essly akayɔtɔ kalasa mɔtshi ya tomondo yakayookimanyiyaka dia ntana olimu wa ndjakotshɛka ehomba ande etena kakandakambaka olimu w’ombatshi mboka ndo oma laasɔ nde akonɔ lo ɛtshi ka nkɛtɛ kɛmɔtshi kakiwɔ l’ohomba efula w’apandjudi. Nde akatongaka l’okakatanu wa mbeka ɔtɛkɛta wakatɛkɛtaka waa Otomi ndo waa Tlapaneco. Kakianɛ, l’ɔkɔngɔ wa nde nsambisha l’edja k’ɛnɔnyi esato l’osomba ɔsɔ, nde mbutaka ate: “Nkamba lɛnɛ ele ohomba efula w’ekimanyielo ambombisha ɔlɔ ndo lɔsɛnɔ lami laya l’oyango. Kɛnɛ koleki tshɛ ele, dui sɔ diamboleka nkeketsha diɔtɔnganelo diele lam’asami la Jehowa.” Phillip nde la Racquel, atshukanyi weke kodikotshɛka ɛnɔnyi 30 l’ɛmɔtshi w’oma l’États-Unis, mbetawɔka ɔnɛ: “Andja wekɔ lo tatshikitana esadi esadi woho ɔnɛ wele anto efula mbɔsaka dia nsɛnɔ yawɔ bu shikaa. Koko, ntshɔ dia tokamba lɛnɛ ele anto efula pokamɛka losango la lo Bible, tokimanyiyaka dia nsɛnɔ yaso monga l’oyango ndo sho mongaka l’ɔlɔ w’efula.”

WOHO WA NKANDOLA EKAKATANU

Lo mɛtɛ, apandjudi watshɔ dia tokimanyiya lɛnɛ ewɔ l’ohomba efula w’apandjudi wa Diolelo, pomanaka l’ekakatanu. Okakatanu ɔmɔtshi ele, woho wa ndjakotshɛ ehomba awɔ. Dia nsala dui sɔ, wɛ pombaka nsala etshikitanu dia ndjaekesanyiya l’akambo wele lo ɛtshi ka nkɛtɛ keyɛ. Verónica, lele ombatshi mboka wa manamana mbutaka ate: “Dihole dimɔtshi diakamatshu, lakakatɛka diangɔ dia ndɛ ko sondjɛka. Lo ɛtshi kekina ka nkɛtɛ kakimi, lakasondjɛka ahɔndɔ ndo lakanyanaka avo. Kakianɛ, lokamba olimu wa solanɛ mvudu ndo wa ndakanya ambutshi woho wa vɔ sawolaka l’anawɔ.”

Ndjaekesanyiya la mbekelo ya lo wodja okina kokaka monga tshondo y’okakatanu etena konɔ onto lo dihole dikina. Kɛsɔ mbakakomɛ Phillip nde la Racquel etena kakawatshu dia tokimanyiya lo ɛtshi ka nkɛtɛ kakawatɛkɛtaka nahuatl. Phillip mbutaka ate: “Takatotanaka mbekelo yotshikitanyi efula lɛkɔ.” Ko kakɔna kakaakimanyiya dia vɔ mbekesanɛ la yɔ? Raquel kotshɛka ate: “Takaleke mbidja yimba l’akambo w’amɛna wakatɛnaka le waa Nahuatl, mbuta ate kaamɛ kaki l’ase nkumbo ya lɛkɔ, losembwe laki lam’asawɔ l’anto akina ndo lokaho laki la wɔ. Takeke akambo efula lo mbidjasɛ lɛkɔ ndo lo nkamba kaamɛ l’anangɛso l’akadiyɛso wa lɛkɔ.”

WOHO WAKOKAYƐ NDJALƆNGƆSƆLA

Naka wɛ nangaka ntshɔ dia tokimanyiya lɛnɛ ewɔ l’ohomba w’ekimanyielo, ngande wakokayɛ ndjalɔngɔsɔla? Anangɛso l’akadiyɛso wele la diewo lo dikambo sɔ, mbutaka ɔnɛ: “La ntondo ka wɛ ntshɔ, ntatɛ mbetɛ lɔsɛnɔ layɛ ɔsɛlɛngɛ ndo ngɛnangɛna la kɛnɛ kele la yɛ.” (Flpɛ. 4:11, 12) Ahombayɛ nsala nto? Leticia mbutaka ate: “Lakewɔ weho w’elimu wa l’andja ɔnɛ wakakonyɛka dia ntshikala paka dihole diaamɛ. Laki l’ohomba wa monɔ oseka dihole tshɛ ndo lɛnɛ tshɛ akiwɔ l’ohomba w’apandjudi.” Hermilo mbutaka ate: “Lakeke woho wa nkatɛ, nsola ndo nkɔma ahɔndɔ.” Verónica mbutaka ate: “Etena kakimi la ngelo la ambutshi ami ndo la akosɛmi, lakaakimanyiyaka dia nsola mvudu ndo katɛka mbo ya ndɛ. Laki nto la mbekelo ka namaka diangɔ.”

Levi nde la Amelia oma l’États-Unis ndo wambotshukana l’edja k’ɛnɔnyi enanɛi mbutaka dia lo yoho ya laande alɔmbɛlɔ mbakaakimanyiya dia vɔ ndjalɔngɔsɔla dia ntshɔ tokimanyiya la Mexique. Levi mbutaka ate: “Takakambe akumi dia mbeya lofulo la falanga lakatahombaka tokamba la lɔ lo wodja okina l’edja k’ɔnɔnyi w’otondo ndo takalɔmbaka Jehowa dia nde tokimanyia diaha sho nsala adepasɛ woleki lofulo la falanga lɔsɔ.” L’ɔkɔngɔ wa ngɔndɔ mɔtshi, vɔ wakakotsha lofulo la falanga lakawatɛ Jehowa lo dɔmbɛlɔ ndo aha la ntshimbatshimba, vɔ wakonɔ. Levi mbutaka ate: “Lam’ele Jehowa ambokadimola ɛsɛngɔsɛngɔ aso, aya sho salaka kɛnɛ kakatasangoya.” Amelia kotshɛka ate: “Takafɔnyaka dia tayototshikala ɔnɔnyi ɔtɔi oto lɛkɔ, koko kakianɛ tambosala ɛnɔnyi esambele ndo hatosangoya kaanga yema dia nkalola. Nsɛna lanɛ ambotokimanyiya dia sho mɛna woho watokimanyiya Jehowa la lonya lande la wolo. Lushi tshɛ, tekɔ lo mɛna tolembetelo ta ɔlɔlɔ ande le so.”

Adam nde la Jennifer, atshukanyi w’oma l’États-Unis wakatshu dia tokimanyiya lo ɛtshi ka nkɛtɛ ka la Mexique katɛkɛtawɔ Angɛlɛ wakasale alɔmbɛlɔ efula ko vɔ wakakimanyiya efula. Vɔ ndakaka onto tshɛ lalanga ntshɔ dia tokimanyiya ɔnɛ: “Tolongamɛke dia akambo tshɛ monga kokele. Ɛnya lo dɔmbɛlɔ nsaki kayɛ ka tokimanyiya lɛnɛ ewɔ l’ohomba ndo oma laasɔ sala akambo lo yoho yɔtɔnɛ l’alɔmbɛlɔ ayɛ. Etɛ lɔsɛnɔ layɛ ɔsɛlɛngɛ, fundɛ kɔmite ka filialɛ ka lo wodja walangayɛ ntshɔ dia tokimanyiya ndo l’ɔkɔngɔ wa laasɔ, nkamba akumi w’adepasɛ wayoyosala ndo tshɔka aha la ntshimbatshimba!”a Naka wɛ nsala ngasɔ, kete eya dia lokema l’ɛngɔnyi ndo l’ɛtshɔkɔ wa lo nyuma wekɔ lo kokongɛ.