Onde wɛ koka ndjaɛkɛ l’ɔtɛmwɛlɔ lo kɛnɛ kendana la Lɔkɛwɔ?

Sylvia mbutaka ate: “Lakɔtɔka lo kalasa y’adidi l’efula k’anto wakayataka dia vɔ wekɔ atɛmɔdi. Koko vɔ wakavaka l’ɛgzamɛ ndo wakanɔka didjoyadjoya. Ɔtɛmwɛlɔ komonga kaanga la shɛngiya lo nsɛnɔ yawɔ.”

Lionel nde lawɔ mbutaka ate: “Asekami wa l’olimu kesaka ndo dimbiyaka hemɔ. Ɔtɛmwɛlɔ ekɔ dui diatawembe tsho l’onyɔ.”

Ɔtɛmwɛlɔ waya bu la shɛngiya lo kɛnɛ kendana la lɔkɛwɔ le anto efula ɛlɔ kɛnɛ. Efula k’anto wekɔ paka la “ɛnamelo k’anto wayasha l’awui wa Nzambi,” koko mɛnyaka oma lo etsha awɔ dia vɔ ‘mangunaka wolo ande.’ (2 Timɔte 3:5) Pastɛrɛ yawɔ hawowasha ɛnyɛlɔ ka dimɛna ndo hawowasha alako w’oma l’Afundelo wendana la lɔkɛwɔ. Ɔnkɔnɛ, keema dui dia diambo di’anto efula mbetawɔ dia Nzambi hatonyanga kaanga vɔ kosalaka awui wa kɔlɔ.

BIBLE ETSHATƆ?

Bible mɛnyaka dia Nzambi ekɔ la nsaki ndo lɔkɛwɔ laso koka mbonyangiya kana mbɔngɛnyangɛnya. Ɛnyɛlɔ, etena kakatɔmbɔkwɛka ase Isariyɛlɛ w’edjedja Nzambi, vɔ ‘wakoonyangiyaka.’ (Osambu 78:40) Koko, ‘ɔngɛnɔngɛnɔ w’efula mongaka l’olongo’ etena katshika onto ɔmɔtshi akambo ande wa kɔlɔ. (Luka 15:7) Etena kashihodia onto waonga w’amɛna wa Shɛso lele l’olongo, ngandji kokande Nzambi ndekaka mfula ndo kɛsɔ mbotshutshuyaka dia nde nanga kɛnɛ kalanga Nzambi ndo mpetsha kɛnɛ kahetshande.—Amose 5:15.

ONDE ƐMƐNYI WA JEHOWA SALAKA NGASƆ?

Jurnalɛ mɔtshi ya lo États-Unis, (Deseret News) mbutaka ɔnɛ: “Ɛmɛnyi wa Jehowa kimanyiyaka ase nkumbo dia vɔ mbokana dimɛna, nkamba olimu l’otema ɔtɔi ndo monga la losembwe.” Jurnalɛ yakɔ yaamɛ kotshaka ɔnɛ: “Ɛmɛnyi wa Jehowa sɛnaka lo ndjela atɔndɔ wa laadiko wendana la lɔkɛwɔ. Vɔ mbetawɔka dia ɔnwɛlɔ wa mfɔka, ɔnwɛlɔ wa wanu wa tshambandeko, ɔnwɛlɔ wa dinɔnɔ dia wolo, tɔkɛnyɔ ta falanga ndo awui wa mindo wa dieyanelo ekɔ mbekelo ya kɔlɔ yakoka ndanya diɔtɔnganelo di’asa onto la Nzambi.”

Ngande wambokimanyiyama Ɛmɛnyi wa Jehowa lo mbeya waonga waki Nzambi? Sylvia mbutaka ate: “Ɛlɔ kɛnɛ, anto efula wokesana woho w’anyanya l’akambo w’osakelo ndo wekɔ lo ntala lo djonga shɔ esadi eto. Koko nshihodia woho wayaoka Jehowaa etena kasala anto akambo asɔ ambokimanyiya dia dimi nsala kɛnɛ kele ɔlɔlɔ. Dimi laya l’ɔngɛnɔngɛnɔ ndo la ki ka l’etei k’otema.” Sylvia ambetawɔ dia nsɛna lo ndjela wetshelo w’Ɛmɛnyi wa Jehowa ambolowanya lɔsɛnɔ lande.