Onde ekɔ ɔtɛmwɛlɔ ɔmɔtshi wakokaso ndjaɛkɛ?

Naka ɔtɛmwɛlɔ ɔmɔtshi wambokonyangiyaka, kete ondo wɛ koka monga l’okakatanu dia ndjaɛkɛ l’ɔtɛmwɛlɔ tshɛ. Koko eya di’ekɔ ɔtɛmwɛlɔ ɔmɔtshi wakokayɛ ndjaɛkɛ lɔkɔ. Etena kakinde la nkɛtɛ, Yeso akasɔnɛ ambeki ande ndo nde akawaetsha dia vɔ nsɛna lo yoho yɔtɔnɛ l’atɔndɔ waki Nzambi. Ɔnkɔnɛ, ambeki wa nsɔlɔ wa Kristo wasala la wolo dia nsɛna lo yoho yɔtɔnɛ l’atɔndɔ ande wekekɔ polo ndo nshi nyɛ. Ko lende akokayɛ mbatana?

Estelle, lakatatɛkɛtshi dikambo diande oma l’etatelo mbutaka ate: “Dimi lakayotatɛka mbeya Bible paka lam’akamayotatɛka mbeka Bible l’Ɛmɛnyi wa Jehowa. Kombeta edja, lakashihodia ɛtɛkɛta wele lo Joani 18:32 wata ɔnɛ: ‘Nyayeya akambo wa mɛtɛ, ko akambo wa mɛtɛ wayonyotshungola.’”

Ray, lakatatɛkɛtshi dikambo diande nde lawɔ mbutaka ate: “Etena kakamekaka Bible l’Ɛmɛnyi wa Jehowa, dimi lakeye dia Nzambi keema kiɔkɔ y’asui wele l’anto. Laki l’ɔngɛnɔngɛnɔ wa mamba dia mbeya dia Nzambi ekɔ l’ɛkɔkɔ watshikande akambo wa kɔlɔ ndo nde ekɔ lo ndaka dia mbanya keema edja.”

Aha la taamu, keema dikambo dia tshitshɛ dia nsala kɛnɛ kele ɔlɔlɔ etena kele anto efula wekɔ lo ndjasha l’akambo wa kɔlɔ. Koko dui sɔ koka salema. Efula k’anto wekɔ l’ohomba wa vɔ nshihodia Bible ndo nkamba la tɔ. Diakɔ diele, Ɛmɛnyi wa Jehowa wekɔ lo mbeka Bible ofele la miliyɔ y’anto lawakawɔ. Lomingu tshɛ, nyemba y’anto wekɔ lo mbeka kɛnɛ mɛtɛ ketsha Bible. Etombelo wambonga la dui ele vɔ wekɔ lo ndjasukanya l’Otungi awɔ ndo wekɔ lo nkenga nkumbo yele l’ɔngɛnɔngɛnɔ efula.a

Naka Ɛmɛnyi wa Jehowa wamboya ndjokosambisha nto, kowambole lande na kayaɛkɛwɔ l’ɔtɛmwɛlɔ awɔ. Sɛdingola kɛnɛ ketshawɔ ndo ɔkɔndɔ awɔ, ko oma laasɔ wɛ menda kana ekɔ ɔtɛmwɛlɔ ɔmɔtshi wakokayɛ ndjaɛkɛ lɔkɔ.