Elongamelo kakɔna kele la mi lo dikambo dia watshɛmi?

AMBETA edja kele ɔtɛ a dui ɔmɔtshi wakotola yambalo y’anto wakatondjama lo jurnalɛ mɔtshi (The Chosun Ilbo) y’ase Corée. Ɔtɛ a dui akɔ mbutaka ɔnɛ: “‘Onde Shim Cheong,’ onto la diambo laki kombeya ndooko dui lo dikambo dia Yeso, akatshu lo ifɛrnɔ?”

Ɔtɛ a dui ɔsɔ akakutola yaambalo y’anto nɛ dia lo ndjela shimu y’ase Corée, Shim Cheong ekɔ ɔna womoto lokama ngandji efula l’ɔtɛ wakandakimɔ lɔsɛnɔ lande dia nkimanyiya she laki kanga tshungu. Aya ɛnɔnyi efula wele anto wekɔ lo mbotombola efula. Diakɔ diele, ase Corée waketɛ Shim Cheong oko ɔna womoto lakatshike ɛnyɛlɔ ka dimɛna k’onto lakayakimɔ.

Mɛnamaka dia le anto efula, kanyi y’ɔnɛ onto la ngasɔ pombaka nongola dilanya dia mbidjama lo dja y’ifɛrnɔ paka l’ɔtɛ wakinde komonga Okristo wakabatizama, ekɔ kɔlɔ ndo hakoke salema. Laadiko di’awui asɔ tshɛ, ondo shimu shɔ yakasalema edja efula la ntondo ka losango lendana la Kristo nkoma lo ngelo kawɔ.

Lo jurnalɛ shɔ wakakɔnya ondjashi Nzambi ɔmɔtshi. Wakawombola dia mbeya kana anto tshɛ wavɔ aha la nkondja diaaso dia mbeka awui wendana la Yeso nongolaka dilanya dia mbidjama lo dja y’ifɛrnɔ. Ngande wakandakadimola? Nde akakadimola ate: “Sho hateye. Sho fɔnyaka tsho dia ekɔ yoho mɔtshi yayosalɛ Nzambi [anto wa ngasɔ] akambo.”

KƐNƐ KALƆMBAMA DIA NKONDJA MPANDA

Katakismu k’aseka Mupɛ mbutaka ɔnɛ: “Batisimu ekɔ ohomba dia nkondja mpanda. Oko wakadite Yeso, naka onto hotwe nto lo ashi ndo le nyuma k’ekila, nde hakoke mbɔtɔ lo Diolelo diaki Nzambi (Jni 3.5).” L’ɔtɛ wa dui sɔ, anto amɔtshi mbetawɔka dia wanɛ wavɔ aha la batizama mbidjamaka lo dja y’ifɛrnɔ kana soyamaka lo yoho kina l’ɔkɔngɔ wa nyɔi.

Koko anto akina mbɔsaka dietawɔ sɔ oko dui diahokɛma ɔtɛ l’ekolo. Miliyɔ y’anto wakavu aha la mbeya awui w’oma lo Bible. Onde vɔ wakadjama lo dja ya pondjo? Kakɔna kata Bible lo dikambo sɔ?

ELONGAMELO KASHA BIBLE

Bible mɛnyaka hwe dia Nzambi hasha anto waheye ɛlɛmbɛ ande dilanya. Etsha 17:30 toshikikɛka ɔnɛ: “Nzambi akadihe washo lo tena diaki anto komonga la ewo.” Ko naa elongamelo kasha Bible anto waki kokondja diaaso dia mbeka awui wendana la Nzambi ko wakavu?

Okadimwelo wa dimbola sɔ koka tanema lo ɛtɛkɛta wakatɛ Yeso otshi wa kɔlɔ ɔmɔtshi wakahanema suke la nde. Pami kɛsɔ akatɛ Yeso ate: “Kombohɔ lam’ayoyonga lo Diolelo diayɛ.” Kakɔna kakawotɛ Yeso? “Lo mɛtɛ kakotɛmi ɛlɔ nte: Wɛ ayoyala la mi lo Paradiso.”​—Luka 23:39-43.

Onde Yeso akalake pami kɛsɔ dia nde ayotshɔ l’olongo? Ndooko. Pami kɛsɔ ‘kombotɔ nto’ oma lo ashi ndo oma le nyuma, nɛ dia ɔsɔ mbele dui dia ntondo diahomba onto nsala dia mbɔtɔ lo Diolelo dia l’olongo. (Joani 3:3-6) Koko, Yeso akalake otshi wa kɔlɔ ɔsɔ dia nde ayoyɔsɛna nto lo paradiso. Oko wakinde ose Juda, ondo pami kɛsɔ akeyaka awui wendana la paradiso ka la nkɛtɛ kaki lo ekambɔ k’Ɛdɛna kakɔndwama lo dibuku dia ntondo dia lo Bible. (Etatelu 2:8) Daka diaki Yeso diakawosha elongamelo k’ɔnɛ nde ayolwama dia ndjɔsɛna lo nkɛtɛ kayokadimɔ paradiso nto.

Lo mɛtɛ, Bible tolakaka ɔnɛ: “Eolwelo k’anto w’ɛlɔlɔ ndo k’anto wa kɔlɔ kayoyala.” (Etsha 24:15) “Anto wa kɔlɔ” ele wanɛ wakavu aha la nsɛna lo yoho yɔtɔnɛ l’atɔndɔ wosembwe waki Nzambi l’ɔtɛ wakiwɔ kombeya lolango lande. Yeso ayolola otshi wa kɔlɔ wakasawola la nde oko wayondolola miliyɔ kana miliyara y’anto akina wakavu aha la mbeya lolango la Nzambi. Ɔnkɔnɛ, lo paradiso ka la nkɛtɛ vɔ wayoyetshama ɛlɛmbɛ wa Nzambi ndo wayoyonga la diaaso dia mɛnya ɔnɛ vɔ mbokaka Nzambi ngandji lo nkitanyiya wadjango ande.

ETENA KAYOLWAMA ANTO WA KƆLƆ

Etena kayolwama anto wa kɔlɔ, onde vɔ wayolomboshama lo ndjela etsha awɔ wakete? Keema. Rɔmɔ 6:7 mbutaka ɔnɛ: “Onto lambovɔ ambotshungɔ oma lo pɛkato yande.” Anto wa kɔlɔ futaka pɛkato yawɔ etena kavɔwɔ. Diakɔ diele, vɔ wayolomboshama lo ndjela kɛnɛ kayowoyosala l’ɔkɔngɔ wa vɔ mbolwama, koko aha lo ndjela kɛnɛ kakawasale etena kakiwɔ kombeyaka lolango la Nzambi la ntondo ka vɔ mvɔ. Naa wahɔ wayowokondja?

L’ɔkɔngɔ wa vɔ mbolwama, anto wa kɔlɔ asɔ wayonga la diaaso dia mbetshama ɛlɛmbɛ waki Nzambi wayondosha etena kayofwama wɛɔmbɔ wa didjidji. L’etena kɛsɔ, vɔ wayolomboshama “lo ndjela etsha a[wɔ],” mbuta ate lo ndjela woho wayowokitanyiya ɛlɛmbɛ wa Nzambi kana bu. (Ɛnyɛlɔ 20:12, 13) Le efula ka anto wa kɔlɔ asɔ dui sɔ honga diaaso dia hende, koko diaaso diawɔ dia ntondo dia nkondja lɔsɛnɔ la pondjo la nkɛtɛ lo mbeka ndo nsala lolango la Nzambi.

Wetshelo w’oma lo Bible ɔsɔ, ambokimanyiya anto efula dia nyomonga la mbetawɔ le Nzambi. Yeong Sug ekɔ ɔmɔtshi l’atei w’anto asɔ. Etena kakandayoolaka, nde akayashaka efula l’ɔtɛmwɛlɔ w’aseka Mupɛ. Ase nkumbo kande efula waki waa abe. Oko wakandalongamɛka dia monga masɛlɛ, nde akatshu lo kuva. L’ɔkɔngɔ wa laasɔ, nde akatombe oma lɛkɔ nɛ dia nde akatɔkɔmɔ lo menda kɛnɛ kakasalemaka lɛkɔ. Kɛnɛ kakaleke tshɛ ele, nde kokoka mbetawɔ wetshelo wa dja y’ifɛrnɔ nɛ dia nde akashihodiaka ɔnɛ nsoya anto lo dja y’ifɛrnɔ bu dimɛna ndo ɔsɔ keema djembetelo ya ngandji.

Oma laasɔ, Ɔmɛnyi wa Jehowa ɔmɔtshi akayɛnya Yeong Sug ɛtɛkɛta w’oma lo Bible ɛnɛ: “Wasena mbeyaka vati: Vo wayuvo. Keli wavo haweyi nduku dikambu. Vo kema la difutu. Euhwelu kawo kambushila.” (Undaki 9:5) Ɔmɛnyi wa Jehowa ɔsɔ akawokimanyiya dia nshihodia ɔnɛ watshɛnde hawosoyama lo dja y’ifɛrnɔ. Koko, vɔ wekɔ lo ndala djɔ lo nyɔi wakongɛ eolwelo.

Lo mbeya dia anto efula watokaka akambo wa mɛtɛ w’oma lo Bible Yeong Sug akanandema efula oma l’ɛtɛkɛta waki Yeso wele lo Mateo 24:14 ɛnɛ: “Lokumu l’ɔlɔlɔ lɔnɛ la Diolelo layosambishama lo nkɛtɛ k’otondo oko ɔmɛnyi le anto wa lo wedja tshɛ, ko oma laasɔ ekomelo kayoya.” Ɛlɔ kɛnɛ, nde ekɔ lo nsambisha lokumu l’ɔlɔlɔ ndo ekɔ lo mbutɛ anto akina elongamelo ka dimɛna k’oma lo Bible.

“NZAMBI KEEMA LA SHƆNƆDI”

Bible totɛka ɔnɛ: “Nzambi keema la shɔnɔdi, koko lo wedja tshɛ, onto lawoka wɔma ndo lasala akambo w’ɛlɔlɔ mbetawɔmaka le nde.” (Etsha 10:34, 35) Ɔsɔ ekɔ losembwe la kokele lakokaso nkongɛ oma le Nzambi “[l]atulangaka sambu k’ololo la uluwanyi.”—Osambu 33:5.