EKADIMWELO LO AMBOLA W’OMA LO BIBLE
Onde lowandji ɔtɔi layɔlɔmbɔla andja w’otondo lushi lɔmɔtshi?
Kakɔna kayosala lowandji layɔlɔmbɔla andja w’otondo di’anto wa lo wedja tshɛ monga kaamɛ? Isaya 32:1, 17; 54:13
Ohokanyiya wahɔ wakoka anto nkondja naka lowandji ɔtɔi nɔmbɔla andja w’otondo. Ɛlɔ kɛnɛ, anto efula wekɔ lo nsowa l’ɔtɛ wewɔ weola w’efula, etena kele anto akina wekɔ lo mbɔka lo dɛngɔ l’ɔngɔnyi. Koko, lowandji lɔmɔtshi layɔlɔmbɔla andja w’otondo la kɛtshi layokotshɛ anto tshɛ ehomba awɔ. Onde wɛ fɔnyaka dia anto koka nkenga lowandji la ngasɔ?—Adia Jeremiya 10:23.
L’edja k’ɔkɔndɔ w’anto, mandji yambokita tatalaka lo toho efula dia nkotsha ehomba w’ambolami awɔ, djekoleko w’ase wola. Mandji mɔtshi salaka akambo l’esehe. (Undaki 4:1; 8:9) Koko, Nzambi Kanga-Wolo-Tshɛ akalake dia mbela lowandji layɔhɛna mandji kina tshɛ. Ɔnɔmbɔdi alɔ ayokotshɛ anto ehomba awɔ mɛtɛ.—Adia Isaya 11:4; Danyele 2:44.
Kakɔna kayosala Diolelo diaki Nzambi?
Jehowa Nzambi akasɔnɛ Ɔnɔmbɔdi woleki tshɛ dimɛna, Yeso y’Ɔnande. (Luka 1:31-33) Etena kakinde oko onto la nkɛtɛ, Yeso akayasha efula dia nkimanyiya anto. Oko Nkumekanga, nde ayosala dia anto wa lo wedja tshɛ monga kaamɛ ndo ayowanyɛ asui tshɛ.—Adia Osambu 72:8, 12-14.
Onde onto tshɛ ayetawɔ Yeso oko Ɔnɔmbɔdi? Keema. Koko Jehowa ekɔ la solo dia lotutsha. (2 Petero 3:9) Nde mbishaka anto diaaso dia mbetawɔ Yeso oko Ɔnɔmbɔdi. Kem’edja, Yeso ayanga minya anto wa kɔlɔ oma la nkɛtɛ ndo ayanga mbela wɔladi ndo lotui tshitshi l’andja w’otondo.—Adia Mika 4:3, 4.